TI GƐ́Ɛ́ HAÍTII 15
15
1Nungáá lɛ́ingaa ti gúlani Judíya lataí h̃u, tí vá Átiyɔ taa h̃u aáva ti ɣɛ́i taá ti mbála Yalá fɛ́li mbélaitii kálambo. Maa núngaitii ti ɣɛ́i taá kalambongí wo, táá ɣɛ́ ta, “Kɛ léi ti wú lɔ́ve pɛlɛ́ vólu kíya í Ngala sávai h̃u Ngalá ngí féni Muusé yáá, kɛ́ ná láá le, wú wúmaa ɛ́i wo.” 2Faí sí i vaaní ngáá ndaahasá ỹɔ́u ỹɔu ɛ́ɣɛ maaɣaalí ỹɔ́u ỹɔ́u nungáitii ndowah̃u taá Pɔ́ɔni ngaa Bánaba. Faalɔ, tí lókoloni Pɔ́ɔni ngaa Bánaba wa taá Ngala fɛ́li mbélaa lɛingáá ngáá tí lí Jɛlúsɛl̃ɛ taa h̃u, tí mɔ́ɔ́ni mbó ngáá Ngalangí géélaitii taá kele ɣéle mbélaitii Ngala fɛ́li mbélaitii faaw̃a kɔwɔ́ato faí sí wa.
3Ná Ngala fɛ́li mbélaitii tí tí lɔ́veni, tí lííw̃ai, ti wálani tataí sítii su taa ti lolí ngáá Fɔnísiya ɛ́ɣɛ Samááliya táa nde ndé kɛ kíya sítii taa ngáá Júsua tí vótenga Ngalá mba. Ngoo vilí ngóó vándai sí i kɛní Ngala fɛ́li mbélaitii kpɛ́lɛɛ tí gooh̃unɛ́ɛ ngwala. 4Ná ti fóloni Jɛlúsɛl̃ɛ taa h̃u, Ngalángi géélaitii ɛ́ɣɛ kele ɣelé mbélaitii ɛ́ɣɛ Ngala fɛ́li mbélaa vekaítii tí lókoheini ti wu. Aáva nátii pa tí volú haa léni náa ti w̃a kɔwɔ́ato sí kpɛ́lɛɛ mbá Ngalá ngí kɛ́nga ti w̃áá véle w̃a. 5Kɛ sítii tí langɔ í ɣɛi la ngáá Jísu tí lɛ́ingaa ti ɣɛí Júsuai sítii ti gákai w̃a taa ɣɛ́ ti w̃a Falósiaitii, tí wúyoɣeni, tí lo aáva ti yɛ́pɛ ti w̃a, ti ɣɛ́ tá, “Sítii taa ngáá Júsua kɛ taa tí lɔ́ve pɛlɛ́ vólu, ná vólu, tí ɣɛ ngáá koló mbélaa Ngala sávaitii mbu Ngalá ngí féni Muusé yáá.”
6Ngalángi géélaitii taá kele ɣéle mbélaitii tí w̃áákpɔni mba ngáá tí fái sí ya kpéle kpéle tí ngapóte sɔ́lɔ su. 7Ná ti yɛ́pɛni ká ká kɔwɔ́ato fái sí wa, kɛ Pítɛ i wuyoɣénga, i ɣɛ ti w̃a, “Mu mbálangaa, wú faa wɔ́lɔ mba bútei ngáá kɛ kuu tá gulangɔ́ w̃a náa su i Ngalá ndiivóni ngáá í lókolo mbá wú h̃ú ngáá sítii taa ngáá Júsua tí Ngalángi gééla woo vandaí sí ỹɛ́ni máá véle w̃a aáva tí la lá. 8Ngalángi sí í mu lii h̃ú haítii kɔlɔ, i ngakɛ́nga ngáá kɛ i lokohéinga ti wu ngáá ngi Hɛ́ɛ́ma Ỹínangi í féngɔ ti yaá kɛ kíya í féngɔ mu yaá. 9Ngalá ngáá ndowah̃u kɔlɛ́ fíli mbóngɔ mu lówah̃u maá tiyéni. Kɛ́ i ti lií w̃ááwolengɔ sífaa ti langɔ́ lá. 10Ndeé lɔ náa í kɛngá sí h̃u laá wú lóngɔ wú Ngalá suugɔvɔ́ ngáá kasɔ́ lándai Jísu volu yélaitii ngú mba sí a mu káwalani taá hómboni mbu kɛlaa muỹá búte? 11Aa pele w̃a! Ni langɔ́ɔ́ lé lá ngáá kɛ Ndemɔí Jísu ngi háa bɔwɔ́i lɔ í kɛngɔ́ ngáá háwu mú ngumaawóngi sí w̃ááhɔlɔngɔ aáva ngimɔ́ɔ́ nɔ́ɔ tí maahɔ́lɔngɔ.”
12Faŋaí ná kpɛ́lɛɛ maakpɔ́ngɔ í ɣɛ́i la, ti w̃aa ɣɛngɔ́ i ɣɛi lá lo táa wolílo Pɔ́ɔni ngaa Bánaba w̃a ná nátii ti ɣɛ́i taá yɛ́pɛ kɔwɔ́ato kááma haítii ɛ́ɣɛ kíndaa vilí faítii mba Ngalá ngí kɛ́ni sítii ndiiwáá taa ngáá Júsua tiyá ti w̃áá véle w̃a. 13Ná ti vílani yɛpɛmá, kɛ Jimisí i yɛpɛngá, i ɣɛ ta, “Mu mbálangaa, a wolílo lɛ́ɛ! 14Sáimɔ i ngakɛ́nga ngáá mu ye kɛ kíya hése Ngalá ngí ngi lóngi yaah̃ú ɣɛngɔ́ sítii ndiiwáá taa ngáá Júsua ngáá sí í lókolongɔ nungáá wa ti liiwáá, í ti ɣɛ ngáá bɔwɔ́ vóngaa. 15Ngoí sítii Ngala ndaa háá lé mbélaitii tí ndení, tiyá lɔ nɔ́ɔ ngoo yílaa sú taá maa hái sí kíya pɔnɛngɔ́i Ngala Kɔ́lɔi h̃u. Sí vá pɔnɛngɔ́i aá lɔ ngáá sí Ndemɔí Ngalá ngí ndéngɔ, i ɣɛ ta,
16‘Ná sí áá ɣɛ́ ɣɛi gulaní su, nyáá ngaá yangáima, ngí vá volú.
Masangí Deevé vɛ́lɛi sí va ngolóngɔi, ngí tó múl̃ɔ volú.
Aáva ngáá mɔ́ɔ maa vɛ́lɛ wolóngɔi sí lo nɔ́ɔ pɛlɛ́ gála pɔlɔí ya,
ngí póte ngáá ngi níína,
17kɛinɔɔ́ ní hái í víli nungáá vékaitii kpɛ́lɛɛ ndíí vólu,
ná vólu, kɛinɔɔ́ ní lááheingi í ɣɛ́ ti kpɛ́lɛɛ mbá.
Ngimɔ́ɔ́ Ndemɔí Ngalá ngí ndéni lɛ́i í kɛ́ni ngáá háwu 18nungáitii ti ɣɛ́i faa wɔ́lɔ faí sítii mba wɔ́lɔ kpɔ́lɔɔ.’ ”
19Kɛ́ Jimisí i ndíi ngú ma ngáá yɛpɛndáá, i ɣɛ ta, “Ní ndá gí máa haí wáá ngáá sí, a málaa faa bɔ́lu sítii nda táa ngáá Júsua táá vóte Ngalá mba. 20Kɛ́ laá ɣéle, mú kɔlɔ vɔ́nɛ ti yelé, mú nde ti w̃a ngáá tálaa kpaló mba ỹɛ́ɛ́ni fíli mɛ́ sí taá ɣɛ́ naá kɔɔ kɔɔ́ ŋáni fíli kɔ́ni la taa ti yeɣé ngáá ngalángaa. Kɛ́ múl̃ɔ ti bé kɔlɔsiyá mbóndai wa. Ná vólu, tálaa suwa fíli mɛ́ tɛ́i ɣɛ́ mboló laa léveni kɛlaa tɔɔ́ ŋaaw̃ɔ ỹɛ. 21Sífaa savaí wɔ́lɔ Ngalá ngí féni Muusé yáá nungáitii faaw̃a, kaví té náa wɔ́lɔ táa suu haa lé taa kpɛ́lɛɛ su. Ná vólu, taá ti galámbo Ngala fɛ́li máákpɔ wotaítii mbu hɔ́wɔ fíli Ndɛɛlɛmbó Ngála Fɛ́li Fóloi w̃a.”
Kɔlɔí tí pɔ́nɛni sítii ngelé taa ngáá Júsua
22Faalɔ, Ngalángi géélaitii ɛ́ɣɛ kele ɣelé mbélaitii Ngala fɛ́li mbélaitii fááw̃a, í báha náá Ngala fɛ́li mbélai sítii kpɛ́lɛɛ mbá ti ɣɛ́i Jɛlúsɛl̃ɛ, tí faa h̃uubatɛ́ mbóni ngáá tí lókolo nungáá wa bɔwɔ́ h̃u, tí tí lɔ́ve Átiyɔ taa h̃u taá Pɔ́ɔni ngaa Bánaba. Tí lókoloni Júdɔ wa lɛ́i taa ɣɛ ma Basába, ti mɔ́ɔ lokolo Sáilɔ wa aáva ti félengɔi sí ti ɣɛ́i ngáá ngutuwɔ́ yélaa Ngalá fɛ́li mbélaitii su. 23Kɔlɔí tí pɔnɛní, tí fení ti yaá ngáá ti líi la, suu woí i ɣɛi ngáá sí,
“Niỹɛ́i ni ngáá Ngalángi géélaitii ɛ́ɣɛ kele ɣelé mbélaitii Ngala fɛ́li mbélaitii faaw̃a, ni mɔ́ɔ́ ngáá wú mbála Yalá fɛlí mbélaitii, ní hái wú kpɛ́lɛɛ má wɛ́i wáá ngáá Júsua wú vílinga Ngalá fɛ́lindai sí h̃u aáva wú héini Átiyɔ taí h̃u ɛ́ɣɛ Síliya ɛ́ɣɛ Silísiya lataítii su. 24Ní mɛ́ningɔ ngáá kɛ nungáá lɛ́ingaa ti gúlangɔ ni gúúwui h̃u, tí vá wú yéle ngáá wumaa yákpa, tí faa bɔ́lu wú lá, ti wú ɣɛ́ wú nga wúúlee ngáá ngoí sítii tí ndéngɔ wú w̃a. 25Faalɔ, ni kpɛ́lɛɛ ní luw̃ángɔ ma ngáá ní lokolo siỹɛngáá lɛingáá wá taá mu mbála vandái sítii taa ɣɛ́ ti w̃a Pɔ́ɔ ɛ́ɣɛ Bánaba ngáá ti vá wú yéle 26tiyɛ́i tí lɛɛh̃úi gúlangɔ ndɔbɔ mu Lemɔ́i Jísu Kílisitii yéngengi hááw̃a. 27Faalɔ, niỹá lɔɔ Júdɔni ngaa Sáilɔ lɔve wú yéle ngáá tí nde wú w̃á ngáá laa wóó ngáá kɛ sí ní pɔnɛngɔ́ kɔlɔí sí h̃u wú yéle aá lɔ ngáá tɔɔỹaá. 28Aá lɔ ngáá Hɛ́ɛ́ma Ỹínangi lúw̃ama h̃u haa kpahangɔ́ ni wa ngáá nálaa kasɔ́ véka lá wú wú mba ɔ́ɔ́ lɔ́ve savaí sítii mba kule í wú w̃á wú híya ngáá ti ye. Maa hávaitii mbaa ngáá, 29waá mɛɛní fíli mɛ́ taá ɣɛ́ naa kɔɔ kɔɔ́ ŋani fíli kɔ́ni la taa ti yeɣé ngáá ngalángaa. Ná vólu, wálaa suwa fíli mɛ́ tɛi ɣɛ́ mboló lááleveni ɛ́ɣɛ wálaa ŋaaw̃ɔ bɔ́le. Ná vólu múl̃ɔ, a bé kɔlɔsiyá mbóndai wa. Wáá ɣɛ faa vánda ɣɛní ná wáá fái sítii kɛ. Faalɔ, a maá lɔ́ hééhau!”
30Tí siỹɛngái sítii tɔvení náa, aáva nátii tí líí náa Átiyɔ. Naa lɔ tí Ngala fɛ́li mbélaitii maakpɔní na mba, tí kɔlɔí sí wála ti yaá. 31Nungáitii tí kálani náa aáva ti góóh̃unɛɛngɔ i ɣɛi lá ngoo vili ngói sí hááw̃a, í ndúwuh̃ulɛ ngáá ti ye. 32Júdɔni ngaa Sáilɔ tiyá bútei ti ɣɛ́i ngáá Ngalá ndaa háá lé mbélaa. Aáva tí faa bih̃íw̃aa léni ngáá í nduwúh̃ulɛ ngáá Ngala fɛ́li mbélaitii ti h̃úú í bá. 33Ná tí kuu ɣɛ́i na féle, Ngalá fɛ́li mbélaitii tí hɛ́ɛ́ni ti yɛ ngáá ti ɣɛ́ ndiihéi h̃u tí tí yangáima sítii ngelé ti ɣɛ́i híɣeni ti yelé. [ 34Kɛ́ Sáilɔ i kpatɛní gi má ngáá í ló Átiyɔ.]
35Pɔ́ɔni ngaa Bánaba tí loní Átiyɔ kuu félengɔ háaw̃a naa vá tɔ tiyá ɛ́ɣɛ nuu bíh̃iw̃aa ti kalambongí woní na. Ná vólu, tí Ndemɔí Ngalá ndaa wói lení na.
Pɔ́ɔni ngaa Bánaba tí yakɔ́lɛni ma
36I ɣɛi náa ngáá hɔ́wɔ ta, kɛ Pɔ́ɔ i ndengá Bánaba w̃a, i ɣɛ ma, “Mú yangáima mú mu mbála Yalá fɛli mbélaitii séi heí taí kpɛ́lɛɛ sú mú Ndemɔí Ngalá ndaa wói lengá na, mú ti ɣɛ kíli lɔ.” 37Bánaba va i ɣɛi loní í Njɔú Máa bahá wa taá tiyéi ti lí. 38Kɛ́ Pɔ́ɔ i gisíyani ngáá kɛ aa pele w̃a ngáá Njɔú í báha ti wa, bɔw̃álale laá Njɔú i hiɣení ti volú P̃ɛɛfíliya lataí h̃u aáva aa loí ti loow̃á taá tiyéi tɔɔ́ ndi ngu ma ngáá ngengengí. 39Tí ndaahasá bándi kpandi woní í kɛ ngáá háwu tí yakɔ́lɛ siya polúi w̃a. Bánaba i Njɔú Máa yeɣéni, ti víli keléngi h̃u, tí lí Sáipulɔ lataí h̃u. 40Kɛ Pɔ́ɔ i Sáilɔ yeɣénga, tí li, aáva Ngalá fɛ́li mbélaitii tí hɛ́ɛ́ni ti yɛ ngáá tí ɣɛ́ Ndemɔí Ngalángi háa bɔwɔ longí wu. 41Tí lííni, ti lɔ́ve Síliya lataí h̃u ɛ́ɣɛ Silísiya lataí h̃u táa kɛ ngáá háwu Ngala fɛ́li mbélaitii ti h̃úú áá ba.
Tímoti i bahaní Pɔ́ɔni ngaa Sáilɔ wa
Currently Selected:
TI GƐ́Ɛ́ HAÍTII 15: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
