TI GƐ́Ɛ́ HAÍTII 3
3
Nɔɔnɔ h̃íỹɛndopoi í wáloni
1Folo yílaa, Pítɛni ngaa Njɔú ti ɣɛ́i taa lí Hɛ́ɛ́ma Yála Pɛ́lɛi góvii h̃u Ngala fɛ́li táingi w̃a kpɔkɔ hólo yakpámai. 2Siỹɛndópo yiláá pá tí ɣɛ́i ndení wɔ́lɔ nɔɔnɔngɔ́ aáva tɔ́ɔ́ líí la Hɛ́ɛ́ma Yála Pɛlɛí bákii la taá naa lolí ngáá Kpaki Vandá Wálai La. Naa lɔ hɔ́wɔ fíli tɔ́ɔ́ líí la na áa nungáitii fɛ́li kápa faaw̃a tɔ́ɔ ɣɛ́ taa lí Hɛ́ɛ́ma Yála Pɛ́lɛi góvii h̃u. 3Ná siỹɛndópo nɔɔnɔngɔ́i ná í Pítɛni ngaa Njɔú lɔ́ni táá vá ngáá ti lí Hɛ́ɛ́ma Yála Pɛ́lɛi góvii h̃u, i ti hɛ́lini kápa faaw̃a. 4Pítɛ i nɔɔnɔ w̃ɔ́i ná beléni tííŋ aáva ngimɔ́ɔ́ nɔ́ɔ Njɔú bɛ́lɛ í kpéleni. Kɛ Pítɛ í ɣɛ́a nɔɔnɔ w̃ɔ́i ná w̃a, “Ni belé lɛ́ɛ!” 5Faalɔ, nɔɔnɔ w̃ɔ́i ná yaah̃ú i ɣɛi ti wa, kingí i na ngáá í ŋani w̃ááhɔlɔ ti yaá. 6Kɛ Pítɛ í ɣɛ́a nɔɔnɔ w̃ɔ́i ná w̃a, “Kápa ngaa ngéya kpósouŋ. Kɛ́ sí í ngéya nyá lɔ́ɔ fe í yáá. Jísu Kílisitii laahéingi h̃ú lɛ́i í ngáá Násɔlɛ taí h̃uu w̃ɔ́i, yooɣé, yí híya!” 7Kɛ i nɔɔnɔ w̃ɔ́i ná hóunga ngisa lokói wa, í bɔ́ mba, í mbuyoɣé, í to. Aáva ngamá nɔ́ɔ, nɔɔnɔ w̃ɔ́i ná gɔwɔ́itii ɛ́ɣɛ kɔwɔ́ lóólaitii ti h̃úú í báni kɛ́ŋɛ. 8Nɔɔnɔ w̃ɔ́i ná i howaní, í lo gɔwɔ́i ya, í pɛlɛ hiyamá. Kɛ i tongá ti wa tí lɛ Hɛ́ɛ́ma Yála Pɛ́lɛi góvii h̃u. I ɣɛi áá híya, áá hówa, áá Ngalá tɛ. 9Ná nungáitii kpɛ́lɛɛ tí tɔní íwaa híya, áá Ngalá tɛ, 10ti ɣɛ́i kɔlɔ́ ngáá kɛ laá kái kái tɔ́ ɔ́ɔ́ ɣɛ́ héini Hɛ́ɛ́ma Yála Pɛ́lɛi bákii lá tɔ́ɔ́ naa lolí ngáá Kpaki Vandá Wálai La áá nungáitii fɛli fɛlí. Aáva ti kpɛ́lɛɛ ti gindáá vílingɔ i ɣɛi la ngáá sí í híyani ngáá siỹɛndópoi ná.
Geela wói Pítɛ í ndéni Hɛ́ɛ́ma Yála Pɛ́lɛi góvii h̃u
11Ná nɔ́ɔ́nɔ h̃íỹɛndopoi ná í ɣɛ́i hóuni Pítɛni ngaa Njɔú wa, nungáitii kpɛ́lɛɛ ti gindáá vílingɔ i ɣɛi lá ngwala. Tí lííni ngáá viliỹɛ́ ti yelé ỹandái sí tɔ́ɔ naa lolí ngáá Sɔ́lɔmɔ Vɛlɛ Hasaí w̃a. 12Ná Pítɛ í nungáitii tɔ́ni, i ndení ti w̃a, i ɣɛ ta, “Ísulɔ yeláitii, ndeénii le sí í ɣɛ́a ngáá wú gɔ́ɔ́lamba h̃ú háa? Ndeénii le wáá wɔ́lɛ ni wa tííŋ? Laá lɔ wú gí ma ngáá kɛ ni bɔwɔ́ bɔ́wɔ yákpa tɔ ɔɔ ni gɛɛhɔ́ pánda lɔ í kɛngɔ́ siỹɛndópoi sí í híyanga? 13Ngalángi sí wɔ́lɔ a mu káwala Lébilah̃auni ngaa Áise ɛ́ɣɛ Jékɔ tɔ́ɔ́ fɛli ɛ́ɣɛ a mu káwala vekáitiini, aá lɔ í ngi Yénge Mɔ́i Jísu laaw̃áálɛnga, í ngakpá fé mbɛ. Jísui sí wú tókoleveni ngáá tí páa. Aáva wú bééleni mba Lóómingai ti gɔ́mɛti nuu walaí Páilɛɛ gakála kíya bɛ́lɛ Páilɛɛ í ɣɛ́i kpatɛní gi má ngáá í Jísu w̃aahaaló. 14Wú bééleni nuí sí wa faa ỹɔ́u fíli áá ɣɛ́i su ɛ́ɣɛ telémbongɔ í ɣɛ́i lá. Kɛ́ wú nuu váá mɔ́i w̃áánɛɛnɛ mbo ngáá Páilɛɛ í maahaaló. 15Wú ndɛɛh̃ú he mɔ́i vááni, kɛ́ Ngalá ngí mbuyoɣéni sái h̃u. Niỹá vá tɔ ni ngáá faí sí w̃aa héélea. 16Jísu yakpangí h̃uu lɔ́ siỹɛndópoi sí í mbálongi w̃aahɔ́lɔngɔ su. Aáva sí wú naa lɔngɔ́ í ɣɛ́ngɔ, i gulangɔ́ ni lángi h̃u ní su ngáá Jísu. Aáva ndangí nuu áá maahɔ́lɔ Jísu w̃aa véle w̃a, laá lɔ í siỹɛndópoi sí wálongɔ kpésekele kíya wú kpɛ́lɛɛ wáá tɔ.
17Faalɔ mu mbálangaa, ngí kɔ́lɔ ngáá tuvaí wú mbóni ngáá Jísu, wáá wú wútuwɔaitii, wú mbóni kele ɣelé tála véle w̃a. 18Kɛ maa hái hítɛ gilíi lɔ ngáá sí nga Ngalá mbɛ, ngáá sí í ndení wɔ́lɔ laa háá lé mbélaitii kpɛ́lɛɛ ma ngáá kɛ ngi Lókolo Mbá W̃ɔ́i í w̃áánɔw̃ɔ. 19Kɛ a volú yafé hɔ́ɔ́ wú háá ỹɔítii mba, wú vóte Ngalá mba kɛinɔɔ́ wú háá ỹɔítii ti wúya wú w̃á, 20kɛinɔɔ́ suuba níína w̃ááhɔlɔ áá gúla Ndemɔí yaa aáva í Jísu lɔve lɛ́i í lokoloní mba wɔ́lɔ kpɔ́lɔɔ wú hááw̃a. 21Aáva kɛ í lo ngelegóóh̃u í ló su kpóloo maa gúi í gúla Ngalá ngeyá ngáá í ŋani kpɛ́lɛɛ kɛ́ kíli batɛ́ múl̃ɔ volú kíya nɔ́ɔ wɔ́lɔ í maa gúúlongi wóni ngi hɛ́ɛ́ma láá haa le mbeláitii maa véle w̃á. 22Sífaa Muusé i ɣɛi ta, ‘Ndemɔí mu Yálangi aá lɔ́ɔ laa háá lé mɔ́ɔ gula wú bɔ́wɔ bɔ́wɔ vóngaitii ndiiwáá wú yɛ́ kíya nɔ́ɔ ngí na. Faalɔ, kɛ wú wólilo sí fíli má áá nde wú w̃á. 23Nuí fíli pá ɛ́i ɣɛ́ wolilóni sí w̃a Ngala ndaa háá lé mɔ́i áá nde, maa w̃ɔ́i be ngáá léve Ngalángi vóngaitii mba kpésekele, ngi háá h̃uu í ỹááni pɔ́lɛɣɛ pɔ́lɛɣɛ.’ ”
24Pítɛ í mɔ́ɔ́ ɣɛ ta, “Aáva tɔɔỹaá hááw̃a, Ngalá ndaa háá lé mbélaitii kpɛ́lɛɛ í séi Sámiỹɔ wa í lí ngáá naa wutúwɔɔ, ti kpɛ́lɛɛ ti yɛ́pɛni fái sítii mba tíwaa híya hááwɔ holoí sítii ma. 25Aáva wá lɔ wáa kuulóngi sítii maahɔ́lɔ Ngalá ndaa háá lé mbélai ti yɛ́pɛni kɔwɔ́ato mba. Ná vólu, kuulóngi Ngála ngí maa gɛ́lɛ ngeɣéni ti lówah̃u taa wú káwalani. Ná wáá ngáá, sí Ngalá ngí ɣɛ́i Lébilah̃au w̃a, ‘Nuí kpɛ́lɛɛ tí ngélewu taa nɛ́ɛ́ma w̃aahɔ́lɔ í láála lengái maa véle w̃a.’ 26Ná Ngalá ngí lokoloní ngi Yénge Mɔ́i wa, í tɔ́veni hése wú yéle ngáá í nɛ́ɛ́ma yéi wú w̃á ngáá wú yíla ngíla wú vólu yáfendai wú lúva gilí ỹɔ́itii mba.”
Currently Selected:
TI GƐ́Ɛ́ HAÍTII 3: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
