LÚU 16
16
Faanɛ́ɛ́ngi kɔwɔ́ato telembo tála yénge ngutúwɔ w̃ɔ́i wa
1Jísu i mɔɔ faanɛ́ɛ́ péka heiní volú yélaitii mbɛ, i ɣɛ ta, “Kpatɛ h̃íỹɛndopo yiláá tɔ́ wɔ́lɔ í ɣɛ́i na, ngeyá wɔ́lingaitii maah̃ú belé mɔ́ɔ i ɣɛi ngeyá. Kɛ́ nungáá tí ndéni kpatɛ w̃ɔ́i ná w̃a ngáá kɛ ngeyá wɔ́li maah̃ú béle mɔ́i ná lɔɔ́ ngeyá wɔ́lingaitii ngupu. 2Kɛ kpatɛ w̃ɔ́i i yaá wɔ́li maah̃ú béle mɔ́i ná lolínga, í mɔ́ɔ́ni, i ɣɛ ma, ‘Sí ngí mɛningɔ́ kɔwɔ́ato í wá, tɔɔỹaá le? Vá yí wóna, bɔw̃álale yáá mɔ́ɔ ɣɛmá ngáá ngeyá wɔ́li maah̃ú belé mɔ́ɔ́ kúnafɔ.’ 3Kɛ ngeyá wɔ́li maah̃ú belé mɔ́i ná i ndengá gi má, i ɣɛ ta, ‘Ndeé lɔ náa ngáá kɛ? Sífaa ní núu walaí lɔɔ kúla náa ngengengí h̃u, aáva súú áá bái kali híya fááw̃a, nyáá vá ngáá ɣɛ́ ngáá wúfe ngáá ngí nungáá w̃aanɛ́ɛ́nɛ ŋani haáw̃a.’ 4Kɛ i ɣɛa ta, ‘Ngí kɔlɔ́ naa sí ngáá kɛ kɛinɔɔ́ ná ní núu walaí áá kpɛ́ ngengengí h̃u, ngí nungáá hɔ́lɔ tí lokohéi mbú ti vɛ́lɛitii mbu.’ 5Faalɔ, i nungái sítii kínɛi tólini ngi núu walaí gúle í ɣɛ́i ti w̃a. Kɛ i hésendaa w̃ɔ́i w̃ɔ́ɔ́ninga, i ɣɛ ma, ‘Nɔnɛ́ kúle lɔ í í w̃a ní núú walaí hááw̃a?’ 6Kɛ ná ɣɛa ma, ‘Ngulɔ gáál̃ɔu hɔ́ndɔ ngwáhakpangɔ lɔ í má.’ Kɛ i ɣɛa ná w̃a, ‘Hei bála bala, yí pú kɔlɔí sí w̃á ngáá í wáá hái lɔ ngáá ngulɔ gáál̃ɔu hɔ́ndɔ nááningɔ.’ 7Kɛ i mɔɔ felé kélei w̃ɔ́ɔ́ninga, i ɣɛ ma, ‘Yáa vá, nɔnɛ́ tɔ́ í í w̃á ngáá kule ní núu walaí hááw̃a?’ Ná í ngoo yápoteni, i ɣɛ ma, ‘Wíítii bɛ́ki hɔ́ndɔ nááningɔ puu nááningɔ.’ Kɛ í ɣɛa ná bɛ́lɛ ma, ‘Kɔlɔí sí yéɣe, yí pɔ́nɛ ma ngáá í wáá hái lɔ ngáá wíítii bɛ́ki hɔ́ndɔ sáángɔ puu ndɔ́ɔ́lungɔ.’
8Ngapúmai náa, kpatɛ w̃ɔ́i ná i telembo tála w̃ɔ́i ná lɛ́ni í ɣɛ́i ngáá ngeyá wɔ́li maah̃ú béle mɔ́i ngáá kele ɣeléngɔ́ɔ́ lé. Sífaa nungái sítiini taá Ngala fááw̃a ngeleí sí wu, ti géle ɣelengɔ́ɔ́ lé ti lɛ́ɛ́h̃ui h̃uuhíya kíli w̃a í lɔ́ve Ngalángi vóngaitii mba.”
9Jísu í mɔ́ɔ ɣɛ ti w̃a, “Faalɔ, nyá lɔɔ́ ndé wú w̃á ngáá, wú mbala lopoa wɔlí ngáá ngeleí sí wuu bátɛitii kɛinɔɔ́ na kúna ngeleí sí wuu bátɛitii taa víla wú yáa, wú tókohei mbú w̃aahɔ́lɔ ngelegóóh̃u. 10Sífaa nuí fíli áá tɔ́wɔbaɣa gúla faa gúlo kw̃ɛ́ɛ́ su, aa tɔ́wɔbaɣa gúla faa wála walaní su bɛ́lɛ. Nuí vá ɛ́i tɔ́wɔbaɣa gúla faa gúlo kw̃ɛ́ɛ́ngaitii su, ɛi tɔ́wɔbaɣa gúla faa wála walaní su bɛ́lɛ.” 11Í mɔ́ɔ nde ti w̃a, i ɣɛ ta, “Ná wɔ́lii wú lɔ́wɔbaɣangɔ ɛ́i ɣɛ́ la ngeleí sí wúu bátɛitii suuhóu fááw̃a, kɛ ele lɔ náa áá lá ngáá wú ye tɔɔỹaá bátɛitii ngándɔɔlɔ fááw̃a? 12Aáva ná í lɔ́wɔbaɣangɔ ɛ́i ɣɛ́ la nuu véka wɔ́li faa h̃u, ele lɔ áá ŋáni he í yáa áá ɣɛ́ ngáá í ndá?
13Bɔ́ilopo fíli ɛi yénge masa félengɔ yɛ́ tɔ́iŋ, sífaa aa hilí ngáá ngilángi, í ló ngáá pekaí, ɔɔ aa bɔwɔ́ gúla kɛlɛ́ma ngilángi yɛ́, í híli ngáá pekaí. Yɛ́i ɣɛ yáá yénge tɔ́iŋ kpéi Ngalá mbɛ́ táá naholói.”
Jísu laa wóitii tɛingáá
(Máfiyu 11:12-13; 5:31-32; Máa 10:11-12)
14Júsuai sítii taa ɣɛ́ ti w̃a Falósiai tí ngoí sítii kpɛ́lɛɛ mɛ́nini Jísu í ndéni, aáva ti náholo w̃ɔl̃íngɔ i ɣɛi lá ngwála. Faalɔ, tí pɛ́lɛni laa bɛ́ɛ́luma ngáá Jísu, tíwaa ngɛlɛ́ gúla su. 15Kɛ Jísu i ɣɛa ti w̃a, “Wáa bɔ́wɔ gúla nungáitii ngaah̃ú ngáá kɛ wá lɔ ngáá nuu vánda, kɛ́ Ngalá ngí kɔlɔ́ sí í wú líítii su. Sí áá núu búsai yaah̃ú laahé ngwála ɛi hei Ngalá ngaah̃ú kɛlaa ɔɔ ló la.
16Nguya Wó Mɔ́i Njɔú ɔ́ɔ́ ɣɛ́ p̃ɛ́ɛ́ í vá, savaí Ngalá ngí féni Muusé yaá, kule í ɣɛ́i ma nuu í gólo ti wu ɛ́ɣɛ Ngalá ndaa háá lé mbélaitii. Aáva í séi náa Njɔú váángɔi h̃uu w̃á, keela woó vándai aá lɔɔ lé aáva nungái kpɛ́lɛɛ pá tiyá lɔɔ́ yákpa ngáá ti lɛ́ Ngalángi w̃ásandai h̃u ngáá ngakpá. 17Ngetéyangi ỹáánindaa aa baní ɔ́ɔ́ híti sí h̃u pɛ́ɛ́sɔ laavó kúlo kw̃ɛ́ɛ́ngi ɣéle tɔ áá gúla Ngala sávai wa.”
18Jísu í mɔ́ɔ ɣɛ ti w̃a, “Siỹɛ́ngi fíli áá bééle ngi ỹáh̃ai wá i ỹáh̃a veka yeɣé, kɛ siỹɛ́ngi ná i kɔlɔsiyá mbónga. Siỹɛ́ngi sí bɛ́lɛ pá áá kpééle mba ỹáh̃ai ná yéɣe, kɛ laá bɛ́lɛ aa ɣɛ kɔlɔsiyá mbóni.”
Kpatɛ w̃ɔ́ini ngaa Lásɔlɔ
19Kɛ Jísu i mɔɔ faanɛ́ɛ́ngi sí héinga i ɣɛ ta, “Kpatɛ w̃ɔ́i lɔ wɔ́lɔ í ɣɛ́i na, maayílingɔ i ɣɛi nɔ́ɔ la hɔ́wɔ fíli ngáá kula h̃ɔ́w̃ɔ bangɔ́ vanda vándaitii. Ngele fíli ɔ́ɔ́ wo, i ɣɛi nɔ́ɔ ndiivo kɛɛ́ wála h̃u. 20Nyaani w̃ɔ́ɔ́ yiláá pa i ɣɛi na, ndaahéingi i ɣɛi ngáá Lásɔlɔ. Pala léé léé i ɣɛi nduwúi w̃a. I ɣɛi nɔ́ɔ lááni nuu lɛ́ɛ́w̃ai kpatɛ w̃ɔ́i ná vɛ́lɛi la. 21Aáva ɔ́ɔ́ ɣɛ lááni na áá kpatɛ w̃ɔ́i laa w̃átai w̃ɔní mɔ́ni kɛinɔɔ́ tí pilí bɛ́lɛ ngáá í mɛ. Kékeaitii kéle tɔ tɔ́ɔ́ vá tíwaa ngi válaitii ngakɔ́iŋ kɔ́iŋ.
22I ɣɛi ngáá hɔ́wɔ ta, nyaani w̃ɔ́i ná í há, malékaitii tí lii lá ngelegóóh̃u, tí sei Lébilah̃au bela. Kpatɛ w̃ɔ́i bɛ́lɛ nɔ i haaní aáva tí kpɔ́lu. 23Kɛ́ kpatɛ w̃ɔ́i ná i liiní njahááma nduwu ya fuulɛ́ wálai h̃u. Naa lɔ í lóni na í wú nga séi, í Lébilah̃au lɔ maagooh̃ángɔ p̃óuma, Lásɔlɔ i kpela. 24Kɛ i Lébilah̃au lolínga, i ɣɛ ma, ‘Kɛɛɣɛ́ Lébilah̃au, mááw̃aanu hóu kái, yí Lásɔlɔ lɔve í loko beɣái hítɛ njɛí ya, í sítɛ nɛ́ɛ́ngi w̃a, maa í lɛ́i, bɔw̃álale nyá lɔ nduwu ya fuulɛ́ wála h̃u ngɔmbuí sí h̃u mbéi.’
25Kɛ́ Lébilah̃au i kpatɛ w̃ɔ́i woo yápoteni, i ɣɛ ma, ‘Ní lóu, ná h̃u yí ɣɛ́ngɔ ngelewu ndɛɛh̃ú h̃u yí faa vánda vándaitii maahɔ́lɔni yí ɣɛ́i loní la, Lásɔlɔ va faa ỹɔ́itii tɔ í maahɔ́lɔni, kɛ́ sí h̃u aá lɔ náa mbéi ngapɔpɔ́ su, yáa vá yí nduwu ya fuulɛ́ wála h̃u. 26Í síɣe bɛ́lɛ ná kpɛ́lɛɛ mbá, ndowá wála lɔ a mu lówah̃u kɛinɔɔ́ sítii ti longɔ́ ti vá míl̃anda yí na tálaa hómbo kɛlaa nuu ɔ́ɔ́ gúla míl̃anda yí na ɔ́ɔ́ vá ni yelé.’ 27Kɛ kpatɛ w̃ɔ́i i Lébilah̃au woo yápotenga, i ɣɛ ma, ‘Kɛɛɣɛ́, yí véleni kái Lásɔlɔ lɔve ní kɛ́ɛ́ɣɛ vɛ́lɛi la, 28sífaa ní ndéɣeaitii ti yá lɔ́ na lɔɔ́lu ti ngáá siỹɛndóu lengaa. Bɛ́lɛ í lí, í ti laahí kɛinɔɔ́ tɔ́ɔ́ va vá nduwu ya fuulɛ́ ỹándai sí ngí na.’
29Kɛ Lébilah̃au i ngoo yápotenga, i ɣɛ ma, ‘Ngala sávaitii í féni Muusé yaá tiyá lɔ na ɛ́ɣɛ Ngalá ndaa háá lé mbélaitii ti gɔ́lɔ vɔnɛngɔ́itii, bɛlɛ́ í ndéɣeaitii tí wolílo suu hái nátiini ma, ti híya ngáá ti ye.’ 30Kɛ kpatɛ w̃ɔ́i i ɣɛa Lébilah̃au w̃a, ‘Kpele, kɛɛɣɛ́ Lébilah̃au, kɔlɔí nátii ti bɔ́ɔ́ ɣɛ na kɛ́ ná nuu áá yóóɣe sái h̃u, í lí ti yelé, taá vólu yáfe ti háá ỹɔítii mba.’ 31Kɛ́ Lébilah̃au i ɣɛi ma, ‘Ná í ndéɣeaitii tɛ́i ɣɛ́ wolíloni savaítii ma Ngala ngi féni Muusé yaá ɛ́ɣɛ Ngalá ndaa háá lé mbélaitii ti gɔ́lɔ vɔnɛngɔ́itii, nuu ɔ́ɔ́ bɔ́ɔ́ yooɣé sái h̃u, í lí ti yelé, ná ɛi kɛ tɔɔ́ lá la.’ ”
Currently Selected:
LÚU 16: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
