MÁFIYU 9

Jísu i mɛŋɛl̃ɛ́ w̃ɔ́i walóni

(Máa 2:1-12; Lúu 5:17-26)

1Jísu i viliní naá kélengi h̃u, í Galéli Yɛ Walaí léve, í yángaima ngi láá h̃u. 2Naa lɔ í lói na nungáá lɛ́ingaa tí vá ngáá mɛŋɛl̃ɛ́ h̃íỹɛndopo yiláá ngelé. Mɛŋɛl̃ɛ́ w̃ɔ́i ná i ɣɛi lááni sakálangi w̃a. Ná Jísu í nungái sítii ti lángi h̃ɔ́ingi lɔ́ni í ɣɛ́i ti h̃u, kɛ i ɣɛa mɛŋɛl̃ɛ́ w̃ɔ́i w̃a, “Liibá, mu mbála, í háá ỹɔítii suuhaa í lónga.”

3Kɛ́ kaamɔítii Ngalá sávai hááw̃a ti lɛ́ingaa ti yɛ́pɛni ỹɔw̃ɔ́ ỹɔ́w̃ɔ yelé ti ɣɛ́ ta, “Siỹɛndópoi sí lɔɔ́ tɛɣɛsu gúla ngáá Ngalá.”

4Kɛ́ Jísu i ɣɛi kɔlɔ́ sí ti ɣɛ́i taá gisíya la, faalɔ, i ti w̃ɔ́ɔ́nini, i ɣɛ ti w̃a, “Ndeé le faa ỹɔ́u ỹɔ́ungi ná i wú gí ma? 5Bɛɛ́ lɔ nde ndáá áá báni mɛŋɛl̃ɛ́ w̃ɔ́i w̃a, sí nuu áá ɣɛ́ ma, ‘Í háá ỹɔítii suuhaa í lóngá’ baa sí nuu áá ɣɛ́ ma, ‘Yooɣé, yí híya?’ 6Kɛ́ nyá ngáá ngakɛ́ ngáá wú ye ngáá kɛ ngakpá tɔ nuí síí w̃ɔ́i yaá taa ɣɛ ma Nuu Búsa Goo H̃ú Lói ngeleí sí wu ngáá í faa ỹɔ́itii suuhaaló.” Faalɔ, i ɣɛi mɛŋɛl̃ɛ́ w̃ɔ́i w̃a, “Yooɣé, yí í hákalangi yeɣé, yí lí í vɛ́lɛ la!”

7Kɛ siỹɛndópoi ná i wuyoɣénga, í lí ngi vɛ́lɛ la. 8Ná fáŋai í sí ŋál̃a lɔní, ti h̃úúlaahengɔ i ɣɛi la ngáá nduwái, aáva tí Ngalá ndaaw̃áálɛi ngakpa táálii ná hé fááw̃a nuu búsaa yáa.

Jísu i lokoloní Máfiyu wa ngáá polu w̃ɔ́ɔ

(Máa 2:13-17; Lúu 5:27-32)

9Ná Jísu í gúlai maa ỹándai wá, i siỹɛndópo yiláá tɔ́ni taa ɣɛ́ ma Máfiyu. I ɣɛi ngáá pava gula mɔ́ɔ́, aáva i ɣɛi héini pava gula máá ỹandaí. Jísu va i ɣɛ ma, “Hitɛ pólu.”

Aáva Máfiyu vá i yooɣéi, í hítɛ polú.

10Ná naá Jísu i ɣɛ́i áá mɛɛníi ỹɛ Máfiyu vɛlɛí wu, pava gáni kula mbélaa bih̃íw̃aa ɛ́ɣɛ faa ỹɔ́u yélaitii tí vááni ti báha Jísuni ngaa polú yélaitii mba. 11Ná Júsuai sítii taa ɣɛ́ tí w̃a Falósiai ti lɛ́ingaa ti sí ŋál̃aa lɔní, ti Jísu volú yélaitii mɔɔniní ti ɣɛ́ ti w̃a, “Ndeénii le wú káámɔɔ áá báha pava gani kúla mbélaitii ɛ́ɣɛ faa ỹɔ́u yélaitii mba tíwaa laaỹɛ́ ỹanda yílaa?”

12Kɛ́ Jísu i ti woo ỹɛ́nini, kɛ i ti woo yápotenga, i ɣɛ ti w̃a, “Sítii ti luwú h̃u wúyangɔ, ti beɣéngɔ ɛi ɣɛ lá salé gúla mɔ́ɔ́ w̃a, kɛ nɔ́ɔ sítii ti héébengɔ, tiyá lɔ ti beɣéngɔ áá ɣɛ́ lá salé gúla mɔ́ɔ́ w̃a. 13Kɛ́ a lí wú ngákula mba wú ɣɛ́ faí sí vólu hái wɔ́lɔ pɔnɛngɔ́i Ngala Kɔ́lɔi h̃u. Sífaa, sí pɔnɛngɔ́ Ngala Kɔ́lɔi h̃u aá lɔ ngáá sí, ‘Ngaah̃u w̃aaw̃aanúi lɔ ndóngɔ lá, kɛ́ ngáá lói ngáá toŋaní hááɣaitii.’ ” Jísu i ndií nɔ́ɔ ngu ma, i ɣɛ ta, “Ngáá váangɔ sítii faaw̃a ti ngáá telembo mbélaa, kɛ́ ngí váángɔ sítii faaw̃a taa ngáá telembo mbélaa.”

Háwui Jísu volu yélaitii tɛ́i béle sú sóu ma nɛ́nɛ

(Máa 2:18-22; Lúu 5:33-39)

14Kɛ Nguya Wo Mɔ́i Njɔú vólu yélaitii tí váánga Jísu yelé, tí mɔ́ɔ́ni, ti ɣɛ́ ma, “Ndeénii le naa súngi hóu naá Júsuai sítii taa ɣɛ́ ti w̃a Falósiai, kɛ́ í vólu yélaitii tɛ́i sú sóu?”

15Kɛ Jísu i ti woo yápotenga, i ɣɛ ti w̃a, “Aa lɔ́ wú gí ma ngáá nyah̃á wɔ́li sótangai ti w̃ááw̃aanungɔ aa ɣɛ lá ná nyáh̃a wɔ́li mɔ́i áá ɣɛ́ ti loow̃á? Aá ɣéle p̃ɛ́ɛ́ ná ɛi ɣɛ! Kɛ́ táingi lɔɔ vá vaamá ná taá nyah̃á wɔ́li mɔ́i gúla ti yaá, naa h̃uu lɔ́ taa súngi hóu.”

16Jísu í mɔ́ɔ́ ɣɛ ta, “Nuu fíli ɛi jogbo pɔ́lɔ bú pɛ́lɛ ngáá kula niiná. Bɔw̃álale kula niinái aa lɛ h̃u, í ỹánda haɣángɔi h̃uú ɣɛ́ wɔ́ɔ́lɔ í lɔ́ve hése keleí wa. 17Kɛlaa maa nuu ɔ́ɔ́ fuulé ndɔ́ɔ́ níína vu njeé kɔ́lɔ h̃u taa kpátɛ ngáá sáni pɔlɔngɔ́ áá ɣɛ́ la. Bɔw̃álale ná nuu áá ná ɣɛ, njeé kɔ́lɔ háningi aa wali, ndɔí vá í lóka, njeé kɔ́lɔi vɔ́lɔi ná vá í ỹááni. Kɛ́ láá ɣéle, nuu áá fuulé ndɔ́ɔ́ níínai vú njeé kɔ́lɔ háni niinaí h̃u. Ná lɔ́ áá kɛ faa fíli ɛ́i ɣɛ́ ngáá njeé kɔ́lɔ háningi ná kɛlaa maa ndɔí.”

Nyah̃alóu haangɔ́i ɛ́ɣɛ nyah̃ápo heebɛngɔ́i

(Máa 5:21-43; Lúu 8:40-56)

18Ná Jísu í ɣɛ́i áá fái sí lé ti w̃a, kɛ Júsuai ti wutúwɔɔ w̃ɔ́ɔ́ ta yiláa i vaangá, í lá mbɛ, i ɣɛ ma, “Ní ỹáh̃aloi i haá nɔ́ɔ kíya suu i na. Kɛ́ vá yí lóko vɛ́lɛ ma, ná áá kɛ í mɔ́ɔ́ va ndɛɛh̃úi h̃u volú.”

19Kɛ Jísu i yooɣénga polu yélaitii bɛ́lɛ tí tó mba, ti hítɛ nuu wálai ná vólu.

20Ná ti ɣɛ́i taa lí, kɛ nyah̃ápo yiláa i gulangá ngáá Jísu volú véle, í lúba Jísu w̃aa gúlai woliyángi wa. Nyah̃ápoi ná, maaw̃uỹá héébɛi i ɣɛi náá kɛ́ni mba ngáá fowó púúngɔ maah̃úú féle. 21Nyah̃ápoi ná i ndení gí má, i ɣɛ ta, “Ná nɔ́ɔ bɛ́lɛ ngáá lúba ngi gúlai wa, ngáá wálo.”

22Kɛ Jísu i vótenga í nyah̃ápoi lɔ́, i ɣɛ ma, “Mu mbálai, liibá! Í lángi í í h̃u, í í wálonga.” Ngamá nɔ́ɔ, nyah̃ápoi ná í walói náa.

23Ná Jísu í fóloni Júsuai ti núú wálai ná vɛ́lɛi la, i fúlutu hɛ mbélai ɛ́ɣɛ faŋaí lɔ́i na saa hái w̃a táá sɔɔlɛ wála wo. 24Kɛ i ɣɛa ti w̃a, “A gula mbéi wa wú kpɛ́lɛɛ, nyah̃alóu guloí sí háángɔ láá le, kɛ́ aá lɔ nɔ́ɔ nyii h̃u!” Ná í ná léni, kɛ nungái kpɛ́lɛɛ tí pɛ́lɛnga ngɛlɛ́ gúlama su. 25Kɛ́ ná tí kpɛ́lɛɛ ti gúlai ngitíí ya, Jísu i lɛɛní nyah̃alói ná lómui h̃u, í sóu toko wa, kɛ ná i wuyoɣénga. 26Faí sí w̃aa woí i hiyaí hááli hááli tataí ná h̃u.

Jísu i mbole h̃íỹɛngaa félengɔ wáloni

27Ná Jísu va í gúlai maa ỹándai ná wa, áá lɔ́ve kpóloo, siỹɛngáá félengɔ ti wólengɔ ti hítɛi polú, táa tolí ngéleya, táá ɣɛ́ ma, “Yɛ́i taa í lóli ngáá Masangí Deevé Láála Loí, ni yaah̃ú w̃ááwaanu hóu kai!”

28Ná Jísu í lɛ́ɛ́ni pɛlɛ́i wu, mbole yeláá félengɔi nátii tí líí náa ngelé. Kɛ Jísu i ti w̃ɔ́ɔ́ninga, i ɣɛ ti w̃a, “Wú langɔ́ɔ́ lé lá ngáá, ngáá hómbo ngí wú wálo?”

Nátii ti ngoo yápoteni, ti ɣɛ́ ma, “Ééi, Kawálai!”

29Kɛ Jísu i lubangá ti yaah̃úitii mba, i ɣɛ ti w̃a, “Bɛlɛ́ í ɣɛ́ wú yɛ́ kíya nɔ́ɔ wú lángɔ la.” 30Kɛ ngamá nɔ́ɔ tí yaah̃úi w̃aa i ɣɛa kpál̃au táá ỹanda lɔ. Jísu vá í ti laahíi kpááŋ i ɣɛ ta, “A waá faí sí le nuu fíli má!”

31Kɛ́ ná siỹɛndópo félengɔi nátii ti lííni, ti Jísu w̃aa woo híya hiyaí hááli tataí ná kpɛ́lɛɛ sú.

Jísu i siỹɛndópoi sí wáloni, lɛ́i ɛ́i belé bɔɔlɔ́

32Ná naá ti ɣɛ́i taa lí, nungáá lɛ́ingaa tí vááni ngáá siỹɛndópo yiláa Jísu yelé. Siỹɛndópoi na ɛ́i belé hombó ɔ́ɔ́ bɔ́ɔ́lɔ bɔw̃álale ỹína nyɔí i ɣɛi polú. 33Kɛ́ ná náa léi Jísu í ỹína nyɔí lévei polú, siỹɛndópoi ná i pɛ́lɛi náa yɛpɛmá. Maa hái i faŋaí kpɛ́lɛɛ kindáá vílini, táá ɣɛ́ ta, “Nápa, nuu áá nɛ́ɛ́ naa lɔní sí ỹɔ́kɔ faa laalií ta ɔ́ɔ́ ɣɛ́ Ísulɔ yeláitii ndííwaa!”

34Kɛ́ Júsuai sítii taa ɣɛ́ ti w̃a Falósiai ti ɣɛ́i ta, “Jísu lɔɔ hómbo nɔ́ɔ áá ỹína nyɔítii tevé nungáitii polú ỹína nyɔítii ti w̃ásangi yákpangi h̃u.”

Jísu i nungáitii ngááh̃u w̃ááw̃aanu hóuni

35Jísu i liiní taí kpɛ́lɛɛ su ɛ́ɣɛ kokóitii kpɛ́lɛɛ ngá, áá kalambongí wo Júsuai ti Yála fɛli máákpɔ wotaítii mbu. Ná vólu, áá keela woó vándai lé kɔwɔ́ato Ngalángi w̃ásandai wa. Íwaa mɔ́ɔ́ nungáitii mbaló seebɛ híí kpɛ́lɛɛ í ɣɛ́i ti wa. 36Ná í fáŋai yá tɔ́ni, ti yaah̃ú w̃ááw̃aanu í sóuni bɔw̃álale ti liihɛ́lɛngɔ i ɣɛi lá, aáva tɛ́i belé bɔ́ bɔwɔ́ wa. Ti ɣɛ kíli gulangɔ́ i ɣɛi nɔ́ɔ lá ngáá mbaalaitii ti w̃aah̃ú belé mɔ́ɔ́ ɛ́i ɣɛ́ na. 37Faalɔ, Jísu i ɣɛi volú yélaitii ma, “Sii híí ŋáni hítingɔi h̃uu wɔ́ɔ́lɔngɔɔ lé, Kɛ́ kula mbélaitii taá bih̃í. 38Faalɔ, a Ndemɔí Ngala mɔ́ɔ́ni lɛ́i ngi ndá í ngáá sii híí ŋáni í kula mbélaa lɔve ngi báálai h̃u sitingɔ náa.”

Currently Selected:

MÁFIYU 9: KNNT

Highlight

Copy