MÁI 3
3
Jísu i Siỹɛndópo walóni tokoí háángɔ í ɣɛ́i lá mba
(Máfiyu 12:9-14; Lúu 6:6-11)
1Táiŋ peka w̃a múl̃ɔ, Jísu i liiní Ngala fɛ́li máákpɔ wotaí wu. Siỹɛ́ ngílaa i ɣɛi kotái ná wu tokoí háángɔ mba. 2Nungáá lɛ́ingaa ti ɣɛ́i kotái ná wu táá faa wɔ́li ngáá tí pɛ́lɛ Jísu wa. Faalɔ, ti ɣɛ́i taá ngasɔ́bɛ ngáá tí tɔ ná wɔ́lii i ɣɛi áá vá mbaló mbóma Ndɛɛlɛmbó Ngála Fɛli Fóloi w̃a. 3Kɛ Jísu i ɣɛa siỹɛndópoi w̃a tokoí háángɔ í ɣɛ́i lá mba, “Yooɣé, yí ló ti kpɛ́lɛɛ ngááh̃u.” 4Kɛ Jísu i ti w̃ɔ́ɔ́ninga, i ɣɛ ti w̃a, “Bɛɛ́ lɔ í pele w̃a ngáá a mú kɛ Ndɛɛlɛmbó Ngála Fɛli Fóloi w̃a? A mú faa vánda ɣɛ baa faa ỹɔ́u? Ɔɔ a mú ndɛɛh̃úu w̃ááɣawo baa a mú ndɛɛh̃u ỹááni?”
Kɛ́ taá ta fíli ndéni. 5Jísu i ti beléni ngáá ndiiyaw̃ál̃a, kɛ́ maaw̃áánungɔ i ɣɛi lá ti haáw̃a ngáá ngu suu bá ndíi í ɣɛ́i ti góó ya. Kɛ i ɣɛa siỹɛndópoi w̃a tokoí háángɔ í ɣɛ́i lá mba, “Loko h̃úúhulo mbo.” Ná í lokoí h̃úúhulo mbóni aáva tokoí i walóni náa fó. 6Kɛ Júsuai sítii taa ɣɛ́ ti w̃a Falósiai ti gúlanga ngitíí ya, tí pɛ́lɛ faa h̃uubatɛ́ mbóma taá Hɛ́lɔdi guuwu h̃uu yélaitii ngáá ti Jísu vaa.
Faŋa yambɔ́ɔ́lɔngɔ i toní Jísu wa Galéli Yɛ Walaí la
7Jísu i gulaní náa wa taá polú yélaitii, tí li Galéli Yɛ Wálai la, aáva faŋa yambɔ́ɔ́lɔngɔ i gúlani Galéli lataí h̃u, tí tó mba. 8Ná nungáitii tí mɛniní sí kínɛi Jísu í ɣɛ́i áá kɛ, nuu bíh̃iw̃aa ti gúlani Judíya lataí h̃u ɛ́ɣɛ Jɛlúsɛl̃ɛ taa walái h̃u ɛ́ɣɛ Edúmiya lataí h̃u ɛ́ɣɛ tataí sítii tí Jɔ́ɔ́dɛ Yɛí vólu véle ɛ́ɣɛ taa walái sítii taa ti lolí ngáá Táya ɛ́ɣɛ Sáidɔ, tí lí ngelé. 9Faŋaí wála yambɔ́ɔ́lɔngɔ i ɣɛi lá ngáá kɛ Jísu i ndení vólu yélaitii ma ngáá tí kéle kúlo ɣɛ kíli batɛ́ mbɛ í víli su, kɛinɔɔ́ nungái tɔ́ɔ va ɣɛ́ taa hɔ́ɔ́ hɔɔ́ mba. 10I ɣɛi náa ti bih̃íw̃aa walóni, faalɔ sítii kínɛi seebɛí í ɣɛ́i ti wa nɛ́nɛ, ti ɣɛ́i taá ỹɔw̃ɔ́ ỹɔ́w̃ɔ lúkpe lukpé ngáá tí fólo Jísu w̃a, ti lúba mba. 11Nungái sítii ỹína nyɔu ỹɔungai tɔ́ɔ́ ɣɛ́ ti volú, ná nɔ́ɔ léi tɔ́ɔ́ Jísu lɔ, tɔ́ɔ́ gúla kɔwɔ́ wú, tí bái ngeleya, ti ɣɛ́ ma, “Yá lɔ yí ngáá Ngalángi H̃íỹɛndou Loí!”
12Kɛ́ Jísu i ti laahíni ngwala, i ɣɛ ti w̃a, “A waá nde nuu fíli má ngáá kɛ ele wáá ngáá ngé.”
Jísu i lokoloní Ngalá kééla púúngɔ maah̃úú félengɔitii mba
(Máfiyu 10:1-4; Lúu 6:12-16)
13Ná Jísu í lɛ́ɛ́ni ngihéi wa, í sítii tóli í ɣɛ́i lokoloní tí wa, aáva tí vá ngelé. 14Kɛ i lokolongá siỹɛngáá púúngɔ maah̃úú félengɔi nátii mba, í ti laahéi ngáá Ngalángi géélaitii ngáá nátii ti ɣɛ́ mba, í ɣɛ́ áá tí lɔ́ve Ngala ngóó lemái, 15ɛ́ɣɛ múl̃ɔ í ngákpa fé ti yaá ỹína nyɔítii téve fááw̃a nungáitii pólu.
16Nuu púúngɔ maah̃úú félengɔi Jísu í lókoloni tí wa ti ɣɛi ngáá Sáimɔ lɛ́i Jísu í ndaaheí péka vɛ́lɛni mba ngáá Pítɛ. 17Ná vólu, Jimisíni ngaa ngi ndéɣe Njɔú, Sɛ́bɛdi h̃iỹɛndou lengáitii. Tiyá bɛ́lɛ Jísu i ndaaheí péka vɛ́lɛni ti wa. Maa lááheingi i ɣɛi ngáá Bówanɛgɛ. Sí vá mbuí wáá ngáá ngele bandɛ́. 18Pekaítii ti ɣɛ́i ngáá Ándulu, Félepi, Batólomiyu, ɛ́ɣɛ Máfiyu. Ná vólu, Tɔmɔsí ɛ́ɣɛ Jimisí. Jimisí í ɣɛ́i ngáá Áfiyɔ h̃iỹɛndou loí. Ná vólu, Tádiyɔ ɛ́ɣɛ Sáimɔ. Sáimɔ i ɣɛi ngáá nungái sítii ti tá yílaa ti ɣɛ́i loí tí tí lɔ́wɔlɔi wúmaawo Lóómi gɔmɛtií yáa. 19Ná vólu, Júdɔ Ɛsikɛ́liyɔ lɛ́i í Jísu lokolevéni.
Kaamɔítii Ngala sávai haáw̃a ti ɣɛ́i ta ỹína nyɔu lɔ Jísu volú
(Máfiyu 12:22-32; Lúu 11:14-23; 12:10)
20Kɛ Jísu i lɛɛngá pɛ́lɛi wu, aáva faŋaí í mɔɔ yatɛ́ni mba ngáá Jísuni ngaa polú yélaitii ndaaỹɛ́ mbóndai ɣéle tɔ í ỹááni ti w̃a. 21Ná Jísu vongáitii tí fái sí ỹɛ́nini, tí liiní pomá, sífaa nungái ti ɣɛ́i taa ɣɛ́ ta, “Jísu ɣɛngɔ́ɔ́ lé mángala!”
22Kaamɔítii pa Ngala sávai hááw̃a ti ɣɛ́i gulaní Jɛlúsɛl̃ɛ, ti ɣɛ́i taa ɣɛ́ ta, “Ỹína nyɔítii ti w̃ásangi Biyɛ́sebɔ lɛ́i taá tóli múl̃ɔ ngáá Setána aá lɔ í Jísu volú. Ná lɔ́ í kɛ́nga íwaa ỹína nyɔítii téve nungáitii pólu.”
23Kɛ Jísu i ti lolínga, í yɛ́pɛ ti yelé faanɛ́ɛ́ngaa h̃u, i ɣɛ ta, “Setána aa ɣelé Setána levé náa nuí vólu?” 24Í mɔ́ɔ́ ɣɛ ti w̃a, “Ná ndɔwɔlɔ́ yílaangi áá bɔ́wɔ yakɔ́lɛ su ngáá kuuwu kuuwú, táá lápi ngáá ỹɔw̃ɔ́ ỹɔ́w̃ɔ, maa ndɔ́wɔlɔi ná ya ngáá wála mba. 25Ná vólu, ná pɛ́lɛ yílaangi áá bɔwɔ́ yakɔ́lɛ su ngáá kuuwu kuuwú, táá lápi ngáá ỹɔw̃ɔ́ ỹɔ́w̃ɔ, maa núngaitii ti háá ya ngáá wála mba. 26Faalɔ, ná Setána w̃asandaí áá wɔ́lɛ wɔlɛ́ su ngáá kuuwu kuuwú táá lápi ngáá bɔwɔ́, ngi w̃ásandai ɛi lɛmbí, kɛ i folónga kɛɛlɛ́.”
27Jísu í mɔ́ɔ ɣɛ ta, “Nuu fíli ɛi lɛ suuba mɔ́ɔ́ vɛ́lɛ wu ɔ́ɔ́ lí ngáá suuba mɔ́i ná wɔ́lingaitii kɛ léi í suuba mɔ́i ná yíli hése, aa ɣɛ́a náá vɛ́lɛi wúúbale náa.”
28Í mɔ́ɔ ɣɛ ti w̃a, “Ngí tɔɔỹái le wú w̃á, faa ỹɔ́u ỹɔ́ungaitii kpɛ́lɛɛ taá ngoo ỹɔ́u ỹɔ́ungaitii nuu áá ti le Ngalá ma, ti h̃úúhaa áá lo. 29Kɛ́ nuí fíli áá ngoo ỹɔ́u ỹɔ́ungaa le kɔwɔ́ato Hɛ́ɛ́ma Ỹínangi wa, Ngalá ngɛ́i maa w̃ɔ́i h̃úúhaalo kúnafɔ, sífaa kúnafɔ taá ngi ndá gúnafɔ haa ỹɔu w̃ul̃á áá ɣɛ́ kɛ́ni.” 30Jísu i sí léni bɔw̃álale nungáitii ti lɛ́ingaa ti ɣɛ́i taa ɣɛ́ ta, “Ỹína nyɔí lɔ í polú.”
Jísu njeé koo h̃uáitii
(Máfiyu 12:46-50; Lúu 8:19-21)
31Kɛ Jísui njée ɛ́ɣɛ Jísu ndéɣeaitii ti ɣɛ́i ngáá siỹɛngáá tí váánga, tí ló ngitíí ya, tí keelá lɔ́ve pɛlɛ́i wu ngáá ti Jísu lolí. 32Faŋaí i ɣɛi vúúni Jísu yelé mbélengɔ. Kɛ ti ɣɛ́a ma, “Í njeéni ngaa í ndéɣeaitii tiyá lɔ ngitíí ya táá í ŋál̃aa w̃ɔ́ɔ́ni.”
33Kɛ Jísu i ɣɛa ta, “Ele lɔ í ngáá ní njée? Ná vólu, elení tɔ ti ngáá ní ndéɣeaitii?” 34Kɛ i sítii kpelénga ti ɣɛ́i héini maayelé mbélengɔ, i ɣɛ ta, “A wɔlɛ lɛ́ɛ! Sítii tɔ ti ngáá ní njéé ɛ́ɣɛ ní ndéɣeaitii! 35Nuí fíli áá sítii kɛ Ngalá ndóngɔ la, aá lɔ í ngáá ní njéé, ní ndéɣe, ɛ́ɣɛ ní hééla.”
Currently Selected:
MÁI 3: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000
MÁI 3
3
Jísu i Siỹɛndópo walóni tokoí háángɔ í ɣɛ́i lá mba
(Máfiyu 12:9-14; Lúu 6:6-11)
1Táiŋ peka w̃a múl̃ɔ, Jísu i liiní Ngala fɛ́li máákpɔ wotaí wu. Siỹɛ́ ngílaa i ɣɛi kotái ná wu tokoí háángɔ mba. 2Nungáá lɛ́ingaa ti ɣɛ́i kotái ná wu táá faa wɔ́li ngáá tí pɛ́lɛ Jísu wa. Faalɔ, ti ɣɛ́i taá ngasɔ́bɛ ngáá tí tɔ ná wɔ́lii i ɣɛi áá vá mbaló mbóma Ndɛɛlɛmbó Ngála Fɛli Fóloi w̃a. 3Kɛ Jísu i ɣɛa siỹɛndópoi w̃a tokoí háángɔ í ɣɛ́i lá mba, “Yooɣé, yí ló ti kpɛ́lɛɛ ngááh̃u.” 4Kɛ Jísu i ti w̃ɔ́ɔ́ninga, i ɣɛ ti w̃a, “Bɛɛ́ lɔ í pele w̃a ngáá a mú kɛ Ndɛɛlɛmbó Ngála Fɛli Fóloi w̃a? A mú faa vánda ɣɛ baa faa ỹɔ́u? Ɔɔ a mú ndɛɛh̃úu w̃ááɣawo baa a mú ndɛɛh̃u ỹááni?”
Kɛ́ taá ta fíli ndéni. 5Jísu i ti beléni ngáá ndiiyaw̃ál̃a, kɛ́ maaw̃áánungɔ i ɣɛi lá ti haáw̃a ngáá ngu suu bá ndíi í ɣɛ́i ti góó ya. Kɛ i ɣɛa siỹɛndópoi w̃a tokoí háángɔ í ɣɛ́i lá mba, “Loko h̃úúhulo mbo.” Ná í lokoí h̃úúhulo mbóni aáva tokoí i walóni náa fó. 6Kɛ Júsuai sítii taa ɣɛ́ ti w̃a Falósiai ti gúlanga ngitíí ya, tí pɛ́lɛ faa h̃uubatɛ́ mbóma taá Hɛ́lɔdi guuwu h̃uu yélaitii ngáá ti Jísu vaa.
Faŋa yambɔ́ɔ́lɔngɔ i toní Jísu wa Galéli Yɛ Walaí la
7Jísu i gulaní náa wa taá polú yélaitii, tí li Galéli Yɛ Wálai la, aáva faŋa yambɔ́ɔ́lɔngɔ i gúlani Galéli lataí h̃u, tí tó mba. 8Ná nungáitii tí mɛniní sí kínɛi Jísu í ɣɛ́i áá kɛ, nuu bíh̃iw̃aa ti gúlani Judíya lataí h̃u ɛ́ɣɛ Jɛlúsɛl̃ɛ taa walái h̃u ɛ́ɣɛ Edúmiya lataí h̃u ɛ́ɣɛ tataí sítii tí Jɔ́ɔ́dɛ Yɛí vólu véle ɛ́ɣɛ taa walái sítii taa ti lolí ngáá Táya ɛ́ɣɛ Sáidɔ, tí lí ngelé. 9Faŋaí wála yambɔ́ɔ́lɔngɔ i ɣɛi lá ngáá kɛ Jísu i ndení vólu yélaitii ma ngáá tí kéle kúlo ɣɛ kíli batɛ́ mbɛ í víli su, kɛinɔɔ́ nungái tɔ́ɔ va ɣɛ́ taa hɔ́ɔ́ hɔɔ́ mba. 10I ɣɛi náa ti bih̃íw̃aa walóni, faalɔ sítii kínɛi seebɛí í ɣɛ́i ti wa nɛ́nɛ, ti ɣɛ́i taá ỹɔw̃ɔ́ ỹɔ́w̃ɔ lúkpe lukpé ngáá tí fólo Jísu w̃a, ti lúba mba. 11Nungái sítii ỹína nyɔu ỹɔungai tɔ́ɔ́ ɣɛ́ ti volú, ná nɔ́ɔ léi tɔ́ɔ́ Jísu lɔ, tɔ́ɔ́ gúla kɔwɔ́ wú, tí bái ngeleya, ti ɣɛ́ ma, “Yá lɔ yí ngáá Ngalángi H̃íỹɛndou Loí!”
12Kɛ́ Jísu i ti laahíni ngwala, i ɣɛ ti w̃a, “A waá nde nuu fíli má ngáá kɛ ele wáá ngáá ngé.”
Jísu i lokoloní Ngalá kééla púúngɔ maah̃úú félengɔitii mba
(Máfiyu 10:1-4; Lúu 6:12-16)
13Ná Jísu í lɛ́ɛ́ni ngihéi wa, í sítii tóli í ɣɛ́i lokoloní tí wa, aáva tí vá ngelé. 14Kɛ i lokolongá siỹɛngáá púúngɔ maah̃úú félengɔi nátii mba, í ti laahéi ngáá Ngalángi géélaitii ngáá nátii ti ɣɛ́ mba, í ɣɛ́ áá tí lɔ́ve Ngala ngóó lemái, 15ɛ́ɣɛ múl̃ɔ í ngákpa fé ti yaá ỹína nyɔítii téve fááw̃a nungáitii pólu.
16Nuu púúngɔ maah̃úú félengɔi Jísu í lókoloni tí wa ti ɣɛi ngáá Sáimɔ lɛ́i Jísu í ndaaheí péka vɛ́lɛni mba ngáá Pítɛ. 17Ná vólu, Jimisíni ngaa ngi ndéɣe Njɔú, Sɛ́bɛdi h̃iỹɛndou lengáitii. Tiyá bɛ́lɛ Jísu i ndaaheí péka vɛ́lɛni ti wa. Maa lááheingi i ɣɛi ngáá Bówanɛgɛ. Sí vá mbuí wáá ngáá ngele bandɛ́. 18Pekaítii ti ɣɛ́i ngáá Ándulu, Félepi, Batólomiyu, ɛ́ɣɛ Máfiyu. Ná vólu, Tɔmɔsí ɛ́ɣɛ Jimisí. Jimisí í ɣɛ́i ngáá Áfiyɔ h̃iỹɛndou loí. Ná vólu, Tádiyɔ ɛ́ɣɛ Sáimɔ. Sáimɔ i ɣɛi ngáá nungái sítii ti tá yílaa ti ɣɛ́i loí tí tí lɔ́wɔlɔi wúmaawo Lóómi gɔmɛtií yáa. 19Ná vólu, Júdɔ Ɛsikɛ́liyɔ lɛ́i í Jísu lokolevéni.
Kaamɔítii Ngala sávai haáw̃a ti ɣɛ́i ta ỹína nyɔu lɔ Jísu volú
(Máfiyu 12:22-32; Lúu 11:14-23; 12:10)
20Kɛ Jísu i lɛɛngá pɛ́lɛi wu, aáva faŋaí í mɔɔ yatɛ́ni mba ngáá Jísuni ngaa polú yélaitii ndaaỹɛ́ mbóndai ɣéle tɔ í ỹááni ti w̃a. 21Ná Jísu vongáitii tí fái sí ỹɛ́nini, tí liiní pomá, sífaa nungái ti ɣɛ́i taa ɣɛ́ ta, “Jísu ɣɛngɔ́ɔ́ lé mángala!”
22Kaamɔítii pa Ngala sávai hááw̃a ti ɣɛ́i gulaní Jɛlúsɛl̃ɛ, ti ɣɛ́i taa ɣɛ́ ta, “Ỹína nyɔítii ti w̃ásangi Biyɛ́sebɔ lɛ́i taá tóli múl̃ɔ ngáá Setána aá lɔ í Jísu volú. Ná lɔ́ í kɛ́nga íwaa ỹína nyɔítii téve nungáitii pólu.”
23Kɛ Jísu i ti lolínga, í yɛ́pɛ ti yelé faanɛ́ɛ́ngaa h̃u, i ɣɛ ta, “Setána aa ɣelé Setána levé náa nuí vólu?” 24Í mɔ́ɔ́ ɣɛ ti w̃a, “Ná ndɔwɔlɔ́ yílaangi áá bɔ́wɔ yakɔ́lɛ su ngáá kuuwu kuuwú, táá lápi ngáá ỹɔw̃ɔ́ ỹɔ́w̃ɔ, maa ndɔ́wɔlɔi ná ya ngáá wála mba. 25Ná vólu, ná pɛ́lɛ yílaangi áá bɔwɔ́ yakɔ́lɛ su ngáá kuuwu kuuwú, táá lápi ngáá ỹɔw̃ɔ́ ỹɔ́w̃ɔ, maa núngaitii ti háá ya ngáá wála mba. 26Faalɔ, ná Setána w̃asandaí áá wɔ́lɛ wɔlɛ́ su ngáá kuuwu kuuwú táá lápi ngáá bɔwɔ́, ngi w̃ásandai ɛi lɛmbí, kɛ i folónga kɛɛlɛ́.”
27Jísu í mɔ́ɔ ɣɛ ta, “Nuu fíli ɛi lɛ suuba mɔ́ɔ́ vɛ́lɛ wu ɔ́ɔ́ lí ngáá suuba mɔ́i ná wɔ́lingaitii kɛ léi í suuba mɔ́i ná yíli hése, aa ɣɛ́a náá vɛ́lɛi wúúbale náa.”
28Í mɔ́ɔ ɣɛ ti w̃a, “Ngí tɔɔỹái le wú w̃á, faa ỹɔ́u ỹɔ́ungaitii kpɛ́lɛɛ taá ngoo ỹɔ́u ỹɔ́ungaitii nuu áá ti le Ngalá ma, ti h̃úúhaa áá lo. 29Kɛ́ nuí fíli áá ngoo ỹɔ́u ỹɔ́ungaa le kɔwɔ́ato Hɛ́ɛ́ma Ỹínangi wa, Ngalá ngɛ́i maa w̃ɔ́i h̃úúhaalo kúnafɔ, sífaa kúnafɔ taá ngi ndá gúnafɔ haa ỹɔu w̃ul̃á áá ɣɛ́ kɛ́ni.” 30Jísu i sí léni bɔw̃álale nungáitii ti lɛ́ingaa ti ɣɛ́i taa ɣɛ́ ta, “Ỹína nyɔí lɔ í polú.”
Jísu njeé koo h̃uáitii
(Máfiyu 12:46-50; Lúu 8:19-21)
31Kɛ Jísui njée ɛ́ɣɛ Jísu ndéɣeaitii ti ɣɛ́i ngáá siỹɛngáá tí váánga, tí ló ngitíí ya, tí keelá lɔ́ve pɛlɛ́i wu ngáá ti Jísu lolí. 32Faŋaí i ɣɛi vúúni Jísu yelé mbélengɔ. Kɛ ti ɣɛ́a ma, “Í njeéni ngaa í ndéɣeaitii tiyá lɔ ngitíí ya táá í ŋál̃aa w̃ɔ́ɔ́ni.”
33Kɛ Jísu i ɣɛa ta, “Ele lɔ í ngáá ní njée? Ná vólu, elení tɔ ti ngáá ní ndéɣeaitii?” 34Kɛ i sítii kpelénga ti ɣɛ́i héini maayelé mbélengɔ, i ɣɛ ta, “A wɔlɛ lɛ́ɛ! Sítii tɔ ti ngáá ní njéé ɛ́ɣɛ ní ndéɣeaitii! 35Nuí fíli áá sítii kɛ Ngalá ndóngɔ la, aá lɔ í ngáá ní njéé, ní ndéɣe, ɛ́ɣɛ ní hééla.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000