Àpɔ́sɔ̀lɔ̀ 1
1
1Tìɔ́fɔ́lɔ̀, m̀ kii bèĩzɛ̀ lɛ́ ma bɛ̃̀ɛ̃ yía, m wɔ̃́ séĩ́ lɛ́ Zízɛ̀ a kɛ, ɛ̃́ɛ̃́ lɛ́ a zɔ̃̀ɔ̃̀ɔ, wɔ̃̀ gèe à yí. É góá lúó lɛ́ e gbɛ̃̀ là yɛɓoa kɛɛ̀ mɔ̀, 2é ló é ɓɔá lúó lɛ́ Wálà a sí áà lòá lɛ̀ía mɔ̀ɔ, ma wɔ̃̀ bɛ̃̀ɛ̃ kíía yí. Kɛ Wálà é tĩã́ à síì é lóá lɛ̀ía, Zízɛ̀ e wɔ̃́-kɛ-yɛ̀lɛ̀ zɔ̃̀ɔ̃̀ gɔ̃à lɛ́ aà o sí, ó kɛ là àpɔ́sɔ̀lɔ̀ vɔ̀ káa, lɛ̀ɛ Gɛ̀ɛ̀ Púlú zì yíkɛ̀ gáàa kolo là zàá. 3Lɛ̀ e ga lɛ́ e wɛ̀lɛ̀ ga kɛ̀lɛ̀ɛ, e e dìè zɔ̃̀ɔ̃̀ gɔ̃à o kília o lɛ̀ɛ. E à kɛ wa yí dɔ kpó-kpó ɓo kélɛ̀ lɛ ɓéèe. E e dìè zɔ̃̀ɔ̃̀ o lɛ̀ɛ kpolà búnùzɛ̀ lúó vũ̀ yììsɛ gílì. Lɛ̀ wa gɛ̃̀ɛ, wà ye nì o mɛ́ĩ́ ɓo, áà Wálà zì tò-mia-là wɔ̃̀ yí kèle-kèlè o lɛ̀ɛ. 4Lɛ̀ wà ye nì o pá o kíe mɔ̀ɔ, wɔ̃́ lɛ́ a gèe o lɛ̀ɛ, gɛ̃̀ e ké. “Yékɛ̀ ká gó Zùlúsàlɛ̀. Kà yà nɔ̀-lɛ̀ɛ-pɛ̀ lɛ́ m Dàa e e wè dɔá ka lɛ̀ɛ, lɛ́ ma wɔ̃̀ gèe ka lɛ̀ɛ, nuù gɛ̀nɛ̀. 5Zɔ̃̀ɔ̃́ e mia bàtáì kɛ yíí ká. Kɛɛ lúó lɛ́ ka bàtáì kɛɛ̀ è lo kɛɛ̀ à ká Gɛ̀ɛ̀ Púlú káa, ye wá gbaa gbèĩ.”
Zízɛ̀ e ló lɛ̀í
6Lɛ̀ lɛ́ Zízɛ̀ wà àpɔ́sɔ̀lɔ̀ vɔ̀ɔ o pá o kíe mɔ̀ɔ, o à wɛ̃́ĩ́-lɔ̀ɔ kɛ weeá kélɛ̀, “Ko Dàa-mì, lúó e kéa lɛ́ ì lo tò-mia-làa nɔɔ̀ e mɛ̀ĩ́ Éézɛ̀lɛ̀-mìà lɛ̀ɛ?”
7Zízɛ̀ a gèe o lɛ̀ɛ, “M Dàa aà lúó dò wà wɔ̃́-kɛ-lùò o pɛ̀ kɛ e dìè-tĩ́ zì yíkɛ̀ gáàa ká, ɛ̃́ɛ̃́ ye wá ka mɔ̀ kɛ ká lúó ò lo kɛɛ̀ à káa, dɔ. 8Yíkɛ̀ gáàa nɔɔ̀ lɛ́ɛ̀ lo kɛɛ̀ à ká ka lɛ̀ɛ yé Gɛ̀ɛ̀ Púlú aà nu ka làa ká. Káà lo kɛɛ̀ m̀ kélá ká Zùlúsàlɛ̀, ɛ̃́ɛ̃́ Zùdíà wà Sɛ̀mɛ́lìà-sɛ̀lɛ̀ lɛ̀ séĩ́ mɔ̀, ɛ̃́ɛ̃́ sɛ́lɛ́ léĩ́ tèá-pìà.” 9Lɛ̀ e nyɛ wɔ̃́ e kéa gèeè mɔ̀ɔ, Wálà a sí o nyìɛ́, áà lòá lɛ̀í. E ló lɛ̀í-kii yí, e gó o nyìɛ là.
10Lɛ̀ o kɛ tĩã́ lɛ̀ gɛ̃̀pìà lɛ̀í lɛ̀ e kɛ lópìàa káa, nɔ́ zá lea, gɔ̃à pèèlɛ lɛ́ sɔ púlú e kɛ o mɔ̀ɔ, o ɓɔ o dɔ o sɔ́nɔ́. 11Gɔ̃à pèèlɛ o kília, wa gèe o lɛ̀ɛ, “Gɔ̃à lɛ́ kà go Gálàlíì ɓɛ, mɛ́ e kɛ lɛ́ ka dɔ lɛ́ kà lɛ̀ gɛ̃̀ lɛ̀í? Zízɛ̀ nɔ́ e ké lɛ́ Wálà a sí, lɛ́ e lóá lɛ̀ía, zi nɔ́ doó lɛ́ ka gɛ̃̀ áà lòá lɛ̀ía, zi nɔ́ doóa lɛ́ è lo nuù à káa.”
Zúdà dɔ̀lɔ̀-yí-mì
12Lɛ̀ e kɛ kília, àpɔ́sɔ̀lɔ̀ vɔ̀ɔ o Ɔ́lè-tɔ̃̀ũ̀a yɔ̀ɔ́ gbaa, wáà lò o mɛ̀ĩ́ Zùlúsàlɛ̀. É gó Ɔ́lè-tɔ̃̀ũ̀a wĩĩ́, é ló Zùlúsàlɛ̀ɛ, lɛ gbèĩ lɛ̀ zí lɛ́ ò tàà píé fĩ́ĩ́-dɔ-lùò káa, lɛ à ká gbèĩa, lɛ́ ɓe. 13Lɛ̀ o ɓɔ Zùlúsàlɛ̀ɛ, o tɛ̀nɛ̀ lɛ̀í-kà dò là, o ló à wì à lɛ̀ lɛ́ o kɛ yììpìà yia mɔ̀. Míá o ló yia, o tɔ́ lɛ e kéa. Pílɛ̀, Zɔ̃̀ɔ̃́ ɛ̃́ɛ̃́ Zĩ́ĩ̀, Áã́dùlù, e bɛ̀i Félè wà Tɔ́mɔ̀, ɛ̃́ɛ̃́ zeĩ́ Bàtólómì wà Máfìù, Zĩ́ĩ̀ lɛ́ à dàa e kɛ Áfìà káaò, ɛ̃́ɛ̃́ Sáímɔ̀ lɛ́ e kɛ mia lɛ́ o tò-o-dìè-là wɔ̃̀ e kɛ o zò píéa doó-mì káaò, ɛ̃́ɛ̃́ zeĩ́ Zúdà lɛ́ e kɛ Zĩ́ĩ̀ gbe káa. 14Míá o kéa séĩ́ o ló o kíe là, wáà sɛ̀nɛ ɓò o zò doó ká teele. Wà loà nì, ɛ̃́ɛ̃́ Melé lɛ́ e kɛ Zízɛ̀ lòóò káa nì, wà Zízɛ̀ lèe-gé vɔ̀ lɛ́ o kɛ pà-kíe-mɔ̀ e kília yí teelea.
15Lúó e kília káa, Wálà-mìà o pá o kíe mɔ̀. O kɛ lèĩ mia wũ doó là vũ̀ pèèlɛ ká. Pílɛ̀ e wɛ̀lɛ̀, e dɔ o zèí, áà gèè kélɛ̀, 16“M lèe-gé vɔ̀, wɔ̃́ lɛ́ à bɛ̃̀ɛ̃ɛ̃̀ lɛ Wálà là kíía yí kélɛ̀ lɛ́ɛ̀ lo kɛɛ̀ɛ, e kɛ à mɔ̀ é kɛ. Wɔ̃́ e kília lɛ́ e wɔ̃́ lɛ́ Gɛ̀ɛ̀ Púlú e dɔ Dèɓé yí mɔ́, lɛ́ a gèe, lɛ́ à gbɛ̃̀ɛ̃ɛ̃̀ lɛ Zúdà mɔ̀ɔ káa. Zúdà e kília lɛ́ e kɛ mia lɛ́ o Zízɛ̀ kṹa, o líé-sí-mì káa. 17Zúdà e kɛ ko dò ká. Yɛɓo lɛ́ ko kɛ à píéa, à zì nɔɔ̀ e kɛá à lɛ̀ɛ áà kɛ̀.”
18(Zúdà e kília, e tã́ã̀ dò lɔ́ pɛlèe lɛ́ a sɔ̀lɔ̀ ɓo là wɔ̃́ yɔɔ lɛ́ a kɛɛ, kolo làa ká. Tã́ã̀ e kília lɛ̀ mɔ̀ lɛ́ e gó lɛ̀í, e mɛ̀ tã́ã̀ yi, lɛ́ e wí lɛ́ à gé-pɔ̀ɔ̀ séĩ́ e wɛ̃̀ĩa. 19Mia séĩ́-séĩ́ lɛ́ o kɛ Zùlúsàlɛ̀ɛ, wa mɔ́ɔ̀ wɔ̃̀ yí dɔ. O zì pà-wè yí zàáa, tã́ã̀ e kília wa mɔ́ɔ̀ à tɔ́ kpɔ́ ɓo, wáà sì Akèdámà. À yí lɛ́ e kélɛ̀, “Tã́ã̀ Léà Zɛ̀.”)
20“Ƃii à bɛ̃̀ɛ̃ɛ̃̀ lɛ Tã́-kiia yí kélɛ̀,
‘À zì píé kɛ́ì è tó fèle.
Yékɛ̀ mi gbɛɛ é kɛ yí.’
Ɛ́ɛ̃́ à bɛ̃̀ɛ̃ɛ̃̀ lɛ zeĩ́ kélɛ̀,
‘Lɛ sɛ̀ ó mi gbɛɛ gbɛ̃̀ à dɔ̀lɔ̀ yí, kɛ é yɛɓo lɛ́ e kɛ à kɛpìàa kɛ.’
21-22“À mɔ́ɔ̀ wɔ̃̀ mɔ̀ɔ, mi dò è dà ko bà kɛ é kélá-wè ɓo ko Dàa-mì Zízɛ̀ zì wɛ̀lɛ̀ a ɓo ga kɛ̀lɛ̀ɛ mɔ́ɔ̀ wɔ̃̀ mɔ̀. Lɛ à mɔ̀ é kɛ mia lɛ́ kò ye nì kɔaà tàà-kíe-píé kɛ ko Dàa-mì Zízɛ̀ kɛ̀-ko-píé lùò séĩ́ káa, doó-mì ká. Lúó e kília lɛ́ e kélɛ̀, é kã́ lúó lɛ́ Zɔ̃̀ɔ̃́ e kɛ mia bàtáì kɛpìà káa mɔ̀, é ló é ɓɔá lúó lɛ́ Wálà e Zízɛ̀ sí à ká ko fĩ̀ã̀, áà lò à ká lɛ̀ía, mɔ̀ɔ káa.”
23O gɔ̃à pèèlɛ tɔ́ gèe. O lɛ́ o kɛ Zósɛ̀ lɛ́ ò si Bàsábà, ɛ̃́ɛ̃́ lɛ́ zeĩ́ o kɛ à sípìà Zátàa, wà Màtáyà o káa. 24-25Lɛ̀ e kɛ kília, o sɛ̀nɛ ɓo weeá kélɛ̀, “Ko Dàa-mì, ɓi lɛ́ ì mia séĩ́ zò-píé-wɔ̃̀ dɔɔ. À mɔ́ɔ̀ wɔ̃̀ mɔ̀ɔ, mia pèèlɛ o kéa, kóò nàà kɛ mi yé ɓaà sí kɛ é dɔ Zúdà dɔ̀lɔ̀ mɔ̀ àpɔ́sɔ̀lɔ̀-yɛ̀ɓo kɛɛ̀ káa, ɓá zɔ̃̀ɔ̃̀ ko lɛ̀ɛ. Lɛ yɛɓo lɛ́ Zúdà e à tó, kɛ é ló e lópìàa ká.” 26O gɔ̃-pɛ̀ gɔ̃ kɛ ó mia pèèlɛ o kéa, mi lɛ́ ò lo à síìa, kɛ ó dɔ. Lɛ̀ wa kɛ kília, Màtáyà lɛ́ à síì e kɛ à káa. O à nɛ̀ɛ gbaa àpɔ́sɔ̀lɔ̀ vɔ̀ vũ̀ doó wɛ́lɛ́ doóa mɔ̀ gbaa.
Currently Selected:
Àpɔ́sɔ̀lɔ̀ 1: MNT
Highlight
Share
Copy
Want to have your highlights saved across all your devices? Sign up or sign in
Mann New Testament © Bible Society in Liberia, 1978.
