Zɔ̃̀ɔ̃́ 3

Zízɛ̀ wà Nekòdímà

1Fálásíì gɔ̃ lɛ́ ò si Nekòdímàa e kɛ ɓe. E kɛ Zúù-mìà wũ-là-mìà doó-mì ká. 2Lúó doó káa, e ló Zízɛ̀ píé bĩ́míà, áà gèè à lɛ̀ɛ, “Lábàì, kóò à yí dɔ kélɛ̀ i pɛ-zɔ̃̀ɔ̃̀-mì lɛ́ Wálà a vɔɔ ká. Mi gbɛɛ lɛ̀ɛ́ bɛ̀i lé-pa-wɔ̃̀ lɛ́ ɓà kɛ̀ɛ kɛɛ̀, yé Wálà wá à píéa ká.”

3Zízɛ̀ a là nìɛ̀ weeá kélɛ̀, “Wánà-wɔ̃̀ kpó-kpó lɛ́ m̀ gèe i lɛ̀ɛ ɓɛ. Mi gbɛɛ lɛ̀ɛ́ bɛ̀i Wálà zì tò-mia-là dɔɔ̀, yé à ye dɛɛ ɓoò wáá káa ká.”

4Nekòdímà a gèe kélɛ̀, “Zi sùu kpɛɛ̀ lɛ́ mí aà kɛ gɔ̃áa ò bɛ̀i à mɔ̀ ó ye dɛɛ ɓoá? Lɛ́ɛ̀ bɛ̀i wàà e lèe gé ó à ye kpolà pèèlɛ zɛ̀ ɓo zeĩ́?”

5Zízɛ̀ a gèe kélɛ̀, “Wánà-wɔ̃̀ kpó-kpó lɛ́ m̀ gèe i lɛ̀ɛ ɓɛ. Mi gbɛɛ lɛ̀ɛ́ bɛ̀i kɛɛ̀ Wálà zì tò-mia-là wì, yé à yeè wá yíí wà Gɛ̀ɛ̀ Púlú kolo làa ká. 6Pɛ lɛ́ nɔ̀ɛ à yea, lɛ nɔ̀ɛ ká. Kɛɛ Gɛ̀ɛ̀ Púlú lɛ́ è gɛ̀ɛ̀ yea. 7Yékɛ̀ é kɛ wɔ̃́ kpàlézɛ̀ ká i lɛ̀ɛ, yé maà gèe lɛ ka mɔ̀ ká ka ye dɛɛ ɓoa ká. 8Fã̀ã̀ lɛ́ɛ̀ lo lɛ̀ nɔ́ à nàà é ló yia mɔ̀. Íì à vĩ è kɛ̀ áà dɔ̀ɔ ma. Kɛɛ ìí lɛ̀ lɛ́ e gó yi, ɛ̃́ɛ̃́ lɛ́ è lo yía dɔ. Zi nɔ́ doóa lɛ́ lɛ à ká mia séĩ́ lɛ́ Gɛ̀ɛ̀ Púlú è o yea káa.”

9Nekòdímà a gèe à lɛ̀ɛ, “Zi sùu kpɛɛ̀ lɛ́ wɔ̃́ sùua è bɛ̀i kɛɛ̀ à ká?”

10Zízɛ̀ a là nìɛ̀ kélɛ̀, “Ƃí i pɛ-zɔ̃̀ɔ̃̀-mì kpànazɛ̀ ká Éézɛ̀lɛ̀ɛ, lɛ́ ìí wɔ̃́ e kéa yí dɔɔ? 11Wánà-wɔ̃̀ kpó-kpó lɛ́ m̀ gèe i lɛ̀ɛ ɓɛ. Kóò wɔ̃́ lɛ́ kò à dɔɔ gèe. Ɛ́ɛ̃́ kóò pɛ lɛ́ kɔaà gɛ̃̀ɛ, wɔ̃̀ gèe. É kɛ bɛ̃̀ɛ̃ kília, kàá wéé à mɔ̀ kɛ ká ka kɔ̀ yà ko zì kélá-wè lɛ́ kò ɓoa wì. 12Kàá m wéè gɛ̃̀ wánà ká yé maà kpóṹ là zèe wɔ̃̀ gèe ka lɛ̀ɛ ká. Yé lɛ kília, zi sùu kpɛɛ̀ lɛ́ mɔṹ kà lo m wéè gɛ̃̀á wánà ká yé maà Wálà-pà wɔ̃̀ gèe ka lɛ̀ɛ ká? 13Ɛ́ɛ̃́ mi gbɛɛ lɛ̀ɛ́ ló do Wálà-pà é kã́ Mi Gbe lɛ́ e gó yi, lɛ́ e nu tã́ã̀ zèea mɔ̀ɔ ká.”

14Zi nɔ́ doó lɛ́ Móózè e mɛ̀nɛ kɛ mɔ́ à ká yílí mɔ̀, áà sì lɛ̀í yɛ̀í làa, zi nɔ́ doóa lɛ́ lɛ à mɔ̀ ó Mi Gbe sí à ká lɛ̀í, 15kɛ mi nɔ́ɔ fé lɛ́ è e zò dɔ à mɔ̀ɔ, kɛ é kɛ̀ɓe wɔ́lɔ́-wɔ́lɔ́ sɔ̀lɔ̀ ɓoa. 16Ƃii kpóṹ là zèe lɔ̀ kpɔ́ɔ̀ e kɛá Wálà mɔ̀ nyɔ́ɔ̀ɔ, lɛ́ a mɔ́ɔ̀ e Gbe doó nɔ́ e kɛ à kɛ̀lɛ̀ɛ nɔ ɓoa. A kɛ kíli, kɛɛ mi nɔ́ɔ fé lɛ́ è e zò dɔ à Gbé e kília mɔ̀ɔ, kɛ é kɛ̀ɓe wɔ́lɔ́-wɔ́lɔ́ sɔ̀lɔ̀ ɓo, yékɛ̀ é kɛ ga-mì ká. 17Ƃii Wálà lɛ̀ɛ́ gbaa e Gbe vɔ kpóṹ là zèe kɛ é mɛ̀ĩ́-sà káá mia wĩĩ́. Kɛɛ a vɔ kɛɛ ó la-ɓo sɔ̀lɔ̀ ɓo à kolo là zàá.

18Mi lɛ́ è e zò dɔ Wálà Gbe mɔ̀ɔ, mɛ̀ĩ́-sà káà wá à wĩĩ́. Kɛɛ mi lɛ́ lɛ̀ɛ́ e zò dɔ à mɔ̀ɔ, mɛ̀ĩ́-sà aà nyɛ kàà à wĩĩ́ mɔ̀, ɓii lɛ̀ɛ́ e zò dɔ nɛ́ Wálà Gbe doóa mɔ̀. 19Zi lɛ́ mɛ̀ĩ́-sà kàà-mia-wĩĩ́ lɛ à káa, gɛ̃̀ e ké. Lɛ̀ fɔ̀nɔɔ̀ɔ nuù lɛ gbaa kpóṹ là zèe. Kɛɛ mia ɓéèe óò lɔ̀ kɛ̀ bĩ́ tii ká, é dieá lɛ̀ fɔ̀nɔɔ̀ɔ là, ɓii o kɛ-wɔ̃̀ lɛ yɔɔ. 20Mi nɔ́ɔ fé lɛ́ è kɛ-wɔ̃̀ yɔɔ kɛ̀ɛ, lɛ̀ fɔ̀nɔɔ̀ɔ lɔ̀ nyɛɛ̀ lɛ à mɔ̀. Ɛ́ɛ̃́ lɛ̀ɛ́ nu lɛ̀ fɔ̀nɔɔ̀ɔ mɔ̀, ɓii làá naa à zì kɛ-wɔ̃̀ yɔɔ é dà wáà-là. 21Kɛɛ mi lɛ́ è wɔ̃́ lɛ́ lɛ kpeĩa kɛ̀ɛ, lɛ́ɛ̀ nu lɛ̀ fɔ̀nɔɔ̀ɔ mɔ̀, kɛɛ lɛ̀ fɔ̀nɔɔ̀ɔ ɓɛ á zɔ̃̀ɔ̃̀ kélɛ̀ e e kɛ-yɛ̀ɓo kɛ Wálà zò-dà-zì píé.

Zízɛ̀ wà Zɔ̃̀ɔ̃́

22Lɛ̀ e kɛ gbaa kília, Zízɛ̀ wà là tòà-píé-mìà o ló Zùdíà-sɛ̀lɛ̀ yí. Wà ye nì o kɛ yí lúó dò píé, áà mia bàtáì kɛ̀. 23Zɔ̃̀ɔ̃́ bɛ̃̀ɛ̃ e kɛ mia bàtáì kɛpìà Énɔ̀, lɛ́ e kɛ Sélɔ̀ũ̀-sɛ̀lɛ̀ ká kɔ̀ɛ́ɛ yí, ɓii yíí e kɛ yí gbùò. Mia o kɛ lópìà à píé, tó áà o bàtáì kɛ̀. 24Kɛ òó Zɔ̃̀ɔ̃́ dùò nɛ́ bĩ́-kɛ̀ì.

25Zɔ̃̀ɔ̃́ là tòà-píé-mìàa dò o gbɛ̃̀ wà Zúù-mìàa doó-mì wáà tèé dà mia kɛ̀-púlú-wɔ̃̀ wɛ̃́ĩ̀. 26Lɛ̀ e kɛ kília, o ló Zɔ̃̀ɔ̃́ píé, wáà gèè à lɛ̀ɛ, “Tísɛ̀, gɔ̃ lɛ́ kà ye ka kɛ Zɔ́dã̀-yììà mɛ̀ĩ́, lɛ́ ɓa wɔ̃̀ gèea, ɓáà dɔ? Lɛ mia bàtáì kɛpìà gbaa, ɛ̃́ɛ̃́ mia séĩ́ o lópìà à píé.”

27Zɔ̃̀ɔ̃́ a gèe o lɛ̀ɛ, “Pɛ lɛ̀ɛ́ bɛ̀i kɛɛ̀ mi nɔ́ɔ fé kɛ̀lɛ̀ yé Wálà lɛ̀ɛ́ à nɔ à lɛ̀ɛ ká. 28Ka dìè káà bɛ̀i à mɔ̀ ká m̀ kélá-wè ɓo wɔ̃́ lɛ́ ma gèea mɔ́ɔ̀ wɔ̃̀ mɔ̀. Ma gèe kélɛ̀, ‘Ma wá Kɛ́lɛ̀ì ká. Kɛɛ o m vɔ à wɛlɛ mɔ̀.’ 29Mi lɛ́ léé è lo gɔ̃ síìa lɛ à kɛ̀lɛ̀ɛ, kɛɛ à ye lɛ́ lɛ léé e kília sí-gɔ̃̀ káa. Lee-sí-gɔ̃̀ ɓɛ́ɛ lɛ dɔ̀á yi, tó áà e tóó dɔ̀. Ɛ́ɛ̃́ à gé lɛ́ɛ̀ li yé aà lee-sí-gɔ̃̀ɔ wéè maa ká. Zí e kéa lɛ́ m dìè m̀ géli lé paà lɛ à káa. 30Lɛ à mɔ̀ m mɔ́ɔ̀ wɔ̃̀ é kɛ fɛ́í-fɛ̀ì, tó à zì áà kɛ̀ kpànazɛ̀.”

Mi lɛ́ è go lɛ̀ía

31Mi lɛ́ è go lɛ̀ía, lɛ kpànazɛ̀ é dieá mia séĩ́ là. Mi lɛ́ è go kpóṹ làa, lɛ kpóṹ-là là mi ká, ɛ̃́ɛ̃́ lɛ́ɛ̀ kpóṹ-là wɔ̃̀ gèe. Mí è go lɛ̀ía, lɛ pɛ séĩ́ là. 32Lɛ́ɛ̀ wɔ̃́ lɛ́ aà gɛ̃̀, ɛ̃́ɛ̃́ lɛ́ aà maa, wɔ̃̀ gèe, kɛɛ mi dò wá ɓe kɛ é e kɔ̀ yà wɔ̃́ lɛ́ à gèea wì. 33Mi lɛ́ è lo e kɔ̀ yàà wɔ̃́ lɛ́ à gèea wìa, láà zɔ̃̀ɔ̃̀ à kɛ̀ kíli kolo là kélɛ̀ Wálà lɛ wánà zɛ̀. 34Mi lɛ́ Wálà aà vɔɔ, lɛ́ɛ̀ wɔ̃́ lɛ́ è go Wálà léa gèe. Láà kɛ̀ kíli, ɓii Wálà lɛ́ɛ̀ Gɛ̀ɛ̀ Púlú nɔ à lɛ̀ɛ féfé le. 35Mia Dàa láà lɔ̀ kɛ̀ e Gbe ká, lɛ́ a mɔ́ɔ̀ pɛ séĩ́ kpɔ́ ɓo à kɔ̀ làa. 36Mi lɛ́ è e zò dɔ Wálà Gbe mɔ̀ɔ, kɛ̀ɓe wɔ́lɔ́-wɔ́lɔ́ laa kɛ̀lɛ̀. Mi lɛ́ è Wálà Gbe wéè toa, lɛ́ɛ̀ ló kɛ̀ɓe sɔ̀lɔ̀ ɓoò. Kɛɛ Wálà zì wɔ̃́à-wàa-kɔ̀ lɛ́ɛ̀ lo tóò à là.

Currently Selected:

Zɔ̃̀ɔ̃́ 3: MNT

Highlight

Copy