Lúù 23

Zízɛ̀ lɛ Pálɛ̀ wɛlɛ líé

(Máfìù 27.1-2, 11-14; Máà 15.1-5; Zɔ̃̀ɔ̃́ 18.28-38)

1O séĩ́ o wɛ̀lɛ̀, o dɔ Zízɛ̀ ká Pálɛ̀ wɛlɛ mɔ̀. 2O gbɛ̃̀ gbaa, wáà gèè Zízɛ̀ e wɔ̃́ yɔɔ kɛ, wáà gèè kélɛ̀, “Ko gɔ̃́ e kéa gɛ̃̀, áà kò mia nì kɛ̀, wáà tò zi yɔɔ píé. E kɛ à gèepìà o lɛ̀ɛ kélɛ̀ yékɛ̀ ó ɓo‐pɛ̀ ɓo Sízà lɛ̀ɛ, tó zeĩ́, áà gèè o lɛ̀ɛ kélɛ̀ à ye lɛ́ e Kɛ́lɛ̀ì, lɛ́ e sɛ́lɛ́ líé‐sí‐mì dò káa káa.”

3Pálɛ̀ e Zízɛ̀ wɛ̃́ĩ́‐lɔ̀ɔ kɛ, áà gèè, “Ƃi lɛ́ i Zúù‐mìà líé‐sí‐mì káa?”

Zízɛ̀ a gèe à lɛ̀ɛ, “Zí ɓa gèe à káa lɛ.”

4Pálɛ̀ a gèe sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ mia gbũa o lɛ̀ɛ, “Wɔ̃́ yɔɔ lɛ́ gɔ̃́ e kéa a kɛɛ, m̀ḿ à gɛ̃̀ nɛ́.”

5Kɛɛ o kɛ tĩã́ nɔ́ à gèepìà kpó‐kpó ɓo kélɛ̀, “Pɛ lɛ́ è à zɔ̃̀ɔ̃̀ɔ, aà wéé kã́ à ká mia séĩ́ lɛ́ o Zùdíà lɛ̀ séĩ́ mɔ̀ɔ, o fĩ̀ã̀. E à zi gbɛ̃̀ Gálàlíì, kɛɛ aà ɓɔ gbaa à ká lɛ̀ e kéa mɔ̀.”

Zízɛ̀ lɛ Hɛ́lɔ̀ wɛlɛ líé

6Lɛ̀ Pálɛ̀ e wɔ̃́ e kéa maa, e wɛ̃́ĩ́‐lɔ̀ɔ kɛ weeá kélɛ̀, “Gɔ̃́ e kéa lɛ Gálàlíì mi ká?” 7Lɛ̀ Pálɛ̀ a yí dɔ gbaa kélɛ̀ Zízɛ̀ lɛ́ɛ̀ go sɛ́lɛ́ lɛ́ Hɛ́lɔ̀ è à líé sia yía, e à vɔ gbaa Hɛ́lɔ̀ píé. Hɛ́lɔ̀ e kɛ Zùlúsàlɛ̀ lúó e kília ká. 8Lɛ̀ Hɛ́lɔ̀ e Zízɛ̀ gɛ̃̀ɛ, à zò e dà nyɔ́ɔ̀ɔ, ɓii aà à wɔ̃̀ ma, ɛ̃́ɛ̃́ Zízɛ̀ gɛ̃̀‐lɔ̀ aà à kɛ ɓɛ̀lɛ̀ píé gbèĩ zɛ̀ɛ mɔ́ɔ̀ wɔ̃̀ mɔ̀. À zò e kɛ à mɔ̀ kɛ Zízɛ̀ é wɔ̃́ kpàlézɛ̀ kɛ, á gɛ̃̀. 9Lɛ̀ e kɛ kília, Hɛ́lɔ̀ e Zízɛ̀ wɛ̃́ĩ́‐lɔ̀ɔ kɛ kpolà búnùzɛ̀, kɛɛ Zízɛ̀ lɛ̀ɛ́ gbaa à dò nɔ́ɔ fé là nìɛ̀. 10Sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìàa o dɔ o gã̀ mɔ̀, wáà gèè lé‐gáàa‐lɛ̀ kpó‐kpó ká kélɛ̀ Zízɛ̀ e wɔ̃́ yɔɔ kɛ. 11Hɛ́lɔ̀ wà là sóyà vɔ̀ o yéí sí Zízɛ̀ mɔ̀, wáà o wè sì à mɔ̀. O gbàà‐wíì yiè dò dà à mɔ̀, wa vɔ e mɛ̀ĩ́ Pálɛ̀ píé. 12Lúó nɔ́ doó e kília káa, Pálɛ̀ wà Hɛ́lɔ̀ o ɓɛ́ɛ‐là kṹ à ká o kíe mɔ̀. Kɛɛ lúó e kília é tĩã́ ɓɔɔ̀ɔ, o kɛ o kíe nì dàa‐gbe ká.

Wa gèe Zízɛ̀ é ga

(Máfìù 27.15-26; Máà 15.6-15; Zɔ̃̀ɔ̃́ 18.39—19.16)

13Pálɛ̀ e sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ mia wũ‐là‐mìà é dàá míáa bàa, e o súo kɛ o kíe là. 14A gèe o lɛ̀ɛ, “Ka nu gɔ̃́ e kéa ká m píé, káà gèè lɛ kà mia nì kɛpìà, wáà tò zi yɔɔ píé. Kɛɛ maà mɛ̀ĩ́‐sà dɔ à mɔ̀ ka wɛlɛ mɔ̀, tó m̀ḿ wɔ̃́ yɔɔ lɛ́ kà gèe a kɛɛ, gɛ̃̀ nɛ́ kɛ é kɛ à dò nɔ́ɔ fé kɛ‐mì ká. 15Ɛ́ɛ̃́ é kɛ bɛ̃̀ɛ̃ Hɛ́lɔ̀ káa, lɛ̀ɛ́ gbaa wɔ̃́ lɛ́ a kɛ yɔɔ gɛ̃̀, ɓii à vɔ́ a ɓo ko píéa mɔ́ɔ̀ wɔ̃̀ mɔ̀. Kɛɛ ḿm̀ gèe ka lɛ̀ɛ, gɔ̃́ e kéa lɛ̀ɛ́ wɔ̃́ lɛ́ ò kɛ̀, tó wáà mɔ́ɔ̀ mi zɛ ɓòa, kɛ nɛ́. 16À mɔ́ɔ̀ wɔ̃̀ mɔ̀ɔ, ḿm̀ lo à mɛ̀ɛ̀ gbàtò ká, tó m kã́ à mɔ̀, e là ló ɓo.”

[ 17E kɛ Pálɛ̀ mɔ̀ é mia lɛ́ o kɛ bĩ́‐kɛ̀ìa doó‐mì ɓo bĩ́‐kɛ̀ì Dìè‐mia‐là Kpílì lúó ká.] 18Míá o kɛ yía, o séĩ́ o gbɛ́ɛ́ weeá kélɛ̀, “Ì à zɛ. Ì Bàlábà ɓo bĩ́‐kɛ̀ì ko lɛ̀ɛ.” 19Bàlábà e kília wa dùò bĩ́‐kɛ̀ì, ɓii aà gèlè gɔ̃ do gòmɛ́nɛ̀ ká pɛ́lɛ e kília yía mɔ́ɔ̀ wɔ̃̀ mɔ̀, ɛ̃́ɛ̃́ e kɛ mi zɛ‐mì ká.

20Pálɛ̀ a naa é kã́ Zízɛ̀ mɔ̀ é là ló ɓo. A mɔ́ɔ̀ mɛ́ĩ́ ɓo zeĩ́ mia gbũa lɛ̀ɛ. 21Kɛɛ míáa o gbɛ́ɛ́ kélɛ̀, “Ì à pá nélè ká kɔ́lɔ́sì mɔ̀. Ì à pá nélè ká kɔ́lɔ́sì mɔ̀.”

22Pálɛ̀ e bɛ̀i e wéé kpolà yààka zɛ̀ o lɛ̀ɛ kélɛ̀, “Mɛɛ wɛ̃́ĩ̀? Mɛɛ wɔ̃̀ yɔɔ lɛ́ a kɛ? Wɔ̃́ lɛ́ ò bɛ̀i à mɔ̀ ó mɔ́ɔ̀ à zɛ ɓoa, m̀ḿ à gɛ̃̀ nɛ́ kɛ á kɛ. À mɔ́ɔ̀ wɔ̃̀ mɔ̀ɔ, ḿm̀ lo à mɛ̀ɛ̀ gbàtò ká, tó m kã́ à mɔ̀ e là ló ɓo.”

23Kɛɛ o kɛ nɔ́ tĩã́ gbɛ́ɛ́ gágà ɓopìà kélɛ̀ ò Zízɛ̀ pá nélè ká kɔ́lɔ́sì mɔ̀. Lɛ̀ e kɛ kília, o zì gbɛ́ɛ́ o kɛ à ɓopìàa, à kɔ̀ e die. 24À mɔ́ɔ̀ wɔ̃̀ mɔ̀ɔ, Pálɛ̀ e mɛ̀ĩ́‐sàa kã́ gbaa zi lɛ́ míáa wa naa à káa ká. 25Pálɛ̀ e gɔ̃ lɛ́ wa naa à káa ɓo bĩ́‐kɛ̀ì. Ye lɛ́ e kɛ gɔ̃ lɛ́ wa dùò bĩ́‐kɛ̀ì gèlè gɔ̃̀ gòmɛ́nɛ̀ ká, ɛ̃́ɛ̃́ mi zɛ‐wɔ̃̀ wɛ̃́ĩ̀a káa. Lɛ̀ e kɛ kília, e Zízɛ̀ nɔ gbaa o lɛ̀ɛ kɛ ó wɔ̃́ lɛ́ ò nàà ó kɛ à káa kɛ.

O Zízɛ̀ pá nélè ká kɔ́lɔ́sì mɔ̀

(Máfìù 27.32-44; Máà 15.21-32; Zɔ̃̀ɔ̃́ 19.17-27)

26Lɛ̀ e kɛ kília, o ló Zízɛ̀ ká. Lɛ̀ o kɛ lópìàa, o ɓɔ gɔ̃ lɛ́ ò si Sáímɔ̀, lɛ́ è go Sàlĩ́ĩ̀a là. E kɛ nupìà pɛlɛí, áà gò sɛ́lɛ́ kélé kélé e tóa yí píé. O à kṹ, o kɔ́lɔ́sìa kpɔ́ à gbãã̀, wáà kɛ̀ áà tò à ká Zízɛ̀ píé.

27Mia gbũ gbùò o kɛ tópìà à píé. Loà dò lɛ́ o kɛ gbóó ɓopìà, wáà à yéĩ̀ kũ̀a, o kɛ mia gbũ e kília bà. 28Zízɛ̀ e nìɛ̀ o píé, áà gèè, “Loà lɛ́ kà go Zùlúsàlɛ̀ ɓɛ. Yékɛ̀ ká gbóó ɓo m mɔ́ɔ̀ wɔ̃̀ mɔ̀. Kɛɛ kà gbóó ɓo ka dìè, ɛ̃́ɛ̃́ kà nɔ́ɔ̀ nì mɔ́ɔ̀ wɔ̃̀ mɔ̀. 29Ƃii lúó lɛ́ mia ò lo wɔ̃́ e kéa gèeè à káa, lɛ nupìà. Ye lɛ́ e kélɛ̀, ‘Zi sùu kpɛɛ̀ lɛ́ lúà kpɔ́ɔ̀ lɛ à ká kpómá vɔ̀, lɛ́ òó nɛ́ ye do, ɛ̃́ɛ̃́ lɛ́ òó nyɔ́ dɔ do nɛ́ léa mɔ̀ ké.’ 30Lúó e kília, lɛ́ɛ̀ lo kɛɛ̀ lúó lɛ́ mia ò lo à gèeè tɔ̃̀ũ̀ gbùò gbùò vɔ̀ lɛ̀ɛ, ‘Kà dà ko là,’ ɛ̃́ɛ̃́ tó wáà gèè à kélé kélé nì bɛ̃̀ɛ̃ lɛ̀ɛ, ‘Kà ko bĩ̀ĩ̀a’ káa. 31Yé mɔṹ ò wɔ̃́ sùua kɛ̀ lúó lɛ́ yílí lɛ tĩã́ à ká dɔ́lɔ́ɔ káa, zi sùu kpɛɛ̀ lɛ́ è lo kɛɛ̀ à ká yé yílí e kília aà kɔ̀ɔ̀ɔ ká?”

32O ló Zízɛ̀ wà gɔ̃à pèèlɛ o ká kɛ ó o zɛ. Gɔ̃à pèèlɛ o kília o kɛ lɔ́ɔ̀‐sìè‐mìà ká. 33Lɛ̀ o ɓɔ lɛ̀ lɛ́ ò si Kpò‐kòlò Wɛ́lɛ́ pàa mɔ̀ɔ, o Zízɛ̀ pá nélè ká kɔ́lɔ́sì mɔ̀ à lɛ̀ mɔ̀. O wɔ̃́ nɔ́ doóa kɛ lɔ́ɔ̀‐sìè‐mìàa ká. À doó‐mì e kɛ Zízɛ̀ kɔ̀ yiè yí, à doó bɛ̃̀ɛ̃ e kɛ à kɔ̀ gbiè yí. 34Zízɛ̀ a gèe, “M Dàa, ì wɔ̃́ e kéa ɓo o wũ mɔ̀. Ƃii wɔ̃́ lɛ́ ò kɛ̀ɛ, òó à yí dɔ.”

O gɔ̃‐pɛ̀ gɔ̃, kɛɛ ó sɔ yé ò lo lóò à ká píéa dɔɔ̀ sí à mɔ̀. 35Míáa o dɔɔ̀ e kɛá yi, wáà lɛ̀ gɛ̃̀. Zúù‐mìà wũ‐là‐mìà o kɛ yéí sípìà à mɔ̀, wáà gèè, “Lɛ́ɛ̀ mia gbɛɛ la. É kɛ̀á lɛ Kɛ́lɛ̀ì, lɛ́ Wálà aà sía káa, è e dìè la kó gɛ̃̀.”

36Sóyà vɔ̀ɔ bɛ̃̀ɛ̃ o kɛ nɔ́ yéí sípìà à mɔ̀ nɔ́ kíli. O nu à píé, o yɔ yíí kpɔ̀nɔɔ̀ɔ zɛ̀ nɔ à lɛ̀ɛ á mi. 37Wa gèe kélɛ̀, “É kɛ̀á i Zúù‐mìà líé‐sí‐mì káa, ì i dìè la.”

38Wéé lɛ́ e kéa bɛ̃̀ɛ̃ɛ̃̀ e kɛá à to là kélɛ̀, “Zúù‐mìà Líé‐sí‐mì lɛ́ e kéa.”

39Lɔ́ɔ̀‐sìè‐mìà lɛ́ o kɛ dũ̀á yia, doó‐mì e kɛ wéé gana zɛ̀ dò gèepìà Zízɛ̀ lɛ̀ɛ kélɛ̀, “Ḿ gɔ̃̀, ɓi lɛ́ i Kɛ́lɛ̀ì káa? Ì i dìè la, í ko bɛ̃̀ɛ̃ ko la mɔṹ wɛ̀.”

40Kɛɛ mi doó‐mì yé e tóa bɛ̃̀ɛ̃, e mɛ́ĩ́ ɓo e ɓɛ́ɛ e kília lɛ̀ɛ kélɛ̀, “Ìí túó Wálà lɛ̀ɛ? I wɔ̃́ nyɔ́ɔ̀ɔ nɔ́ doóa yí. 41Wɔ̃́ nyɔ́ɔ̀ɔ lɛ́ ko pèèlɛ kò gɛ̃̀ɛ, lɛ ko mɔ̀ kó sɔ̀lɔ̀ ɓo. Ƃii wɔ̃́ lɛ́ lɛ à mɔ̀ kó gɛ̃̀ wɔ̃́ lɛ́ kɔa kɛ wɛ̃́ĩ̀a, lɛ́ kò gɛ̃̀ ɓɛ. Kɛɛ à yee, lɛ̀ɛ́ gbaa wɔ̃́ yɔɔ nɔ́ɔ fé dò kɛ.” 42Lɛ̀ e kɛ kília, a gèe Zízɛ̀ lɛ̀ɛ, “Zízɛ̀, yé ɓaà yíkɛ̀ gáàa lɛ́ è lo i kɛɛ̀ mia líé‐sí‐mì káa sɔ̀lɔ̀ ɓo, tó ɓáà nùa, i zò è vùò m mɔ́ɔ̀ wɔ̃̀ ká.”

43Zízɛ̀ a gèe à lɛ̀ɛ, “Wánà‐wɔ̃̀ lɛ́ m̀ gèe i lɛ̀ɛ ɓɛ. Kò ɓi kóò lo kɛɛ̀ pɛ́nɛɛ Pálédáà.”

Zízɛ̀ ga‐zì

(Máfìù 27.45-56; Máà 15.13-41; Zɔ̃̀ɔ̃́ 19.28-30)

44E kɛ nyɛ́nɛ́‐dɔ̀‐mia‐tùluù‐zèí‐lùò ká lɛ̀ lɛ́ nyɛ́nɛ́ e tèá ɓɔɔ̀ mɔ̀ɔ ká lèĩ. Bĩ́ e dà sɛ́lɛ́ e kília yí lɛ̀ séĩ́ mɔ̀, é tóá kíli nyɛ́nɛ́‐tɛ̃́‐nyɛ̀nɛ̀ é ɓɔ. 45Ɛ́ɛ̃́ sɔ lɛ́ à dũũ̀ e kɛá sálà‐ɓò‐Wálà‐lɛ̀ɛ‐kàa wìa, e pɛ́ɛ́ gbaa. À pɛ̃́ɛ̃́ e kɛ pèèlɛ. 46Zízɛ̀ e gbɛ́ɛ́ dóo gágà weeá kélɛ̀, “M Dàa, maà m zì gɛ̀ɛ̀ kpɔ́ gbaa i kɔ̀ là.” E wɔ̃́ e kéa gèe nɔ́ɔ, e e wúú líé‐nyɛ‐mɔ̀ káá gbaa, áà gà.

47Sóyà vɔ̀ líé‐sí‐mìa e wɔ̃́ lɛ́ à kɛɛ̀ e kɛáa gɛ̃̀. E Wálà tɔ́ ɓɔ, áà gèè kélɛ̀, “Gɔ̃́ e kéa e kɛ mi kpeĩ ká wánà kpó‐kpó ká.”

48Lɛ̀ lɛ́ mia lɛ́ o nu o kíe là yi kɛ ó lɛ̀ gɛ̃̀ɛ, o wɔ̃́ lɛ́ à kɛɛ̀ e kɛáa gɛ̃̀ɛ, o séĩ́ o ló gbaa o pà píé o zò là mɛ̀ɛɛ̀ ká. 49Mia séĩ́ lɛ́ o kɛ Zízɛ̀ dɔpìà, é dàá loà lɛ́ o tó Zízɛ̀ píé, wáà gò Gálàlíìa bàa, o dɔ gbèkèni kɛ ó wɔ̃́ nì e kéa gɛ̃̀.

Zízɛ̀ bĩ̀ĩ̀‐kɔ̀

(Máfìù 27.57-61; Máà 15.42-47; Zɔ̃̀ɔ̃́ 19.38-42)

50-51Gɔ̃ lɛ́ ò si Zósɛ̀, lɛ́ è go Zúù pɛ̀lɛ̀ yé ò si Alèmàtíàa yía, e kɛ yí. E kɛ gɔ̃ sɔ̃̀ɔ̃ yiè ɛ̃́ɛ̃́ kɛ‐wɔ̃̀ kpeĩ zɛ̀ ká. À nyìɛ e kɛ nɔ́ Wálà zì tò‐mia‐là nu‐lùò gɛ̀nɛ̀. Gɔ̃́ e kília, e kɛ mɛ̀ĩ́‐sà ɓo‐mìàa doó‐mì ká. Kɛɛ lɛ̀ɛ́ gbaa wéé wɔ̃́ lɛ́ wa yà o gé ó kɛ, ɛ̃́ɛ̃́ lɛ́ wa kɛɛ, kɛ‐wɔ̃̀ mɔ̀. 52Gɔ̃́ e kília, e ló Pálɛ̀ píé, e Zízɛ̀ bílí pɛ̃́ à mɔ̀. 53Lɛ̀ e kɛ kília, e Zízɛ̀ bílí ɓo lɛ̀í, e sɔ púlú kpɛ́nɛ́ à ká, e ló à ká, a wɔɔ bũ lɛ́ wa fòo gɛ̀lɛ̀ yía yí. Òó mi dò bĩ̀ĩ̀ do bṹ e kília yí. 54Lúó e kília, e kɛ kpílì pɛ̀‐kɛ‐lùò ká. Fĩ́ĩ́‐dɔ‐lùò zi e kɛ gbɛ̃̀pìà.

55Loà lɛ́ o kɛ tópìà Zízɛ̀ píé wáà gò Gálàlíìa, o tó Zósɛ̀ píé. O ɓɔ́àa gɛ̃̀. O zi lɛ́ o Zízɛ̀ bílí wɔɔ à ká à yía gɛ̃̀. 56Lɛ̀ e kɛ kília, o ló o mɛ̀ĩ́. O nyɔ́nɔ́ gĩĩ yiè zɛ̀ wà pɛ gĩĩ yiè zɛ̀ dò pɛ̀ kɛ Zízɛ̀ bílí mɔ́ɔ̀ wɔ̃̀ mɔ̀.

O kɛ o fĩ́ĩ́ dɔpìà fĩ́ĩ́‐dɔ‐lùò ká lɛ̀ zí wà lɔ́ɔ̀ɔ a gèe à káa lɛ́ ɓe.

Currently Selected:

Lúù 23: MNT

Highlight

Copy