YAHYA 10
10
Miseue keuhai bubiri ngon ureuëng meurabe
1“Keubiet beutôi nyang Ulôn peugah nyoe: Ureuëng nyang tamong lam weue bubiri ngon cara jilumpat pageue, dan hana rot babah pintoe, atawa jiék rot laén, ureuëng nyang lagée nyan pancuri dan peurampok. 2Teuma ureuëng nyang jitamong rot babah pintoe, nyang kheueh tukang rabe bubiri. 3Nyang jaga weue jibuka pintoe keu tukang meurabe nyan, dan bubena bubiri jiseutôt su ureuëng nyan watée jihôi beulatang nyan ngon nan maséng-maséng dan laju jikawai beulatang nyan peuteubiet uluwa. 4Óh ka lheueh mandum bubiri nyan jiba uluwa, tukang meurabe nyan jijak dikeue, dan mandum bubiri nyan laju jiseutôt dilikot sabab jituri su nyang kawai jih. 5Awaknyan hana jeuet jiseutôt ureuëng laén, meunan teuma jiplueng nibak ureuëng nyan, sabab hana jituri su nyang kawai jih.”
6Isa geupeugah keumiseue nyan, teuma awaknyan hana muphom peue meukeusut jih.
Isa, tukang meurabe nyang gét
7Teuma Isa geupeugah sigoe teuk, “Keubiet beutôi nyang ulôn peugah nyoe: Ulôn kheueh pintoe keu bubiri. 8Banmandum nyang teuka sigohlom ulôn na kheueh pancuri dan peurampok, teuma bubena bubiri hana jideungoe su awaknyan. 9Ulôn kheueh pintoe, soe nyang tamong rot ulôn seulamat; jihnyan jiteubiet tamong dan meuteumé peunajoh. 10Pancuri teuka teuma jijak ceumeucue, keu jijak peumaté dan keu jipeurusak. Teuma ulôn teuka mangat manusia meuteumé udeb-udeb nyang meulimpah ruah.
11Ulôn kheueh tukang meurabe nyang gét. Tukang meurabe nyang gét jitem bri nyawöng jih keu bubiri-bubiri jih. 12Ureuëng tung upah nyang kon tukang meurabe dan kon teuma ureuëng po mandum bubiri nyan, jiplueng jitinggai mandum bubiri meunyoe jihnyan jikalon asée srigala nyang teuka. Dan bubena bubiri nyan laju jiteugom ngon jipeucrebre. 13Ureuëng nyang tung upah nyan jiplueng, sabab ureuëng nyan jimubuet keu tueng upah. Ureuëng nyan hana jipako keu mandum bubiri nyan. 14-15#Mat. 11:27; Luk. 10:22 Ulôn kheueh tukang meurabe nyang gét. Saban lagée Bapak geuturi Ulôn dan Ulôn kuturi Bapak, meunan cit teuma Ulôn kuturi mandum bubiri Lôn dan awaknyan pih jituri Ulôn. Ulôn peuna watée keu beulatang nyan. 16Mantong na bubiri nyang laén atra Ulôn, teuma hana rhoh lamkawan bubiri nyoe. Awaknyan Ulôn ba dan awaknyan pih jideungoe su Ulôn. Awaknyan mandum teuma jeuet#Awaknyan mandum teuma jeuet: padub-padubboh naseukah kuno: Dan teuma na. keu saboh kawan deungon sidroe tukang meurabe.
17Bapak geugaséh Ulôn sabab Ulôn peujôk nyawöng Ulôn, keu Lôn teurimong lom teuma. 18Hana meusidroe pih nyang hase jicok nibak Ulôn. Ulôn bri atranyan ateueh meulakée Ulôn keudroe. Ulôn na kuasa keu Lôn seurah atra nyan, dan na teuma kuasa keu Lôn cok lom. Nyan tugaih nyang Ulôn teurimong bak Bapak Ulôn.”
19Sabab Isa geupeugah meunan, ureuëng-ureuëng Yahudi ka jimeudakwa. 20Keubiet jai that nyang jipeugah, “Ureuëng nyan ka jitamong jén! Jihnyan ka pungoe! Keupeue guna jih gata deungoe nyang jipeugah nyan?”
21Teuma na cit nyang peugah, “Ureuëng nyang jitamong jén hana jeuet jimarit lagée nyan! Peu kheueh hase jipeubuet lé jén ureuëng buta jeuet jimeungieng?”
Ureuëng Yahudi hana jitem teurimong Isa
22Di Yerusalem dumna rakyat ba teungoh jimeu Uroe Raya Teureseumi Rumoh Iébadat. Bak watée nyan musém sijuek. 23Isa teungoh geujak bak seuramoe Nabi Sulaiman lam Rumoh Iébadat nyan, 24watée nyan ureuëng-ureuëng Yahudi teuka laju meusapat ban silingka Isa. Awaknyan jipeugah, “Sampoe án pajan Droeneueh peubiyeu kamoe ragu-ragu? Peugah laju troh trang, meunyoe Droeneueh biet-biet Raja Peuseulamat.”
25Geujaweueb lé Isa, “Ka lheueh Lôn peugah bak gata, teuma gata teutab hana tapatéh. Buet-buet nyang Ulôn peubuet ateueh nan Bapak Lôn, ka jeuet keu bukeuti keuhai Ulôn. 26Gata hana tapatéh sabab gata hana rhoh lamkawan bubiri Lôn. 27Bubiri-bubiri Ulôn jideungoe su Ulôn. Ulôn kuturi awaknyan, dan awaknyan jiseutôt Ulôn. 28Ulôn bri keu awaknyan udeb seujati dan keukai, dan siumu masa awaknyan hana binasa. Hana meusidroe pi nyang hase jireupah awaknyan lam jaroe Ulôn. 29Bapak Ulôn, nyang ka geubri awaknyan keu Ulôn, leubeh#Bapak Ulôn, nyang ka geubri awaknyan keu Ulôn, leubeh: padub-padubboh naseukah kuno: Peue nyang geubri lé Bapa Ulôn ubak Ulôn sampoe leubeh. nibak peue mantong. Dan hana meusidroe pi nyang hase jireupah awaknyan lam jaroe Bapak. 30Ulôn ngon Bapak na kheueh sa.”
31Ban jideungoe haba nyan laju lé ureuëng-ureuëng Yahudi jicok lom batée jikeuneuk geulawa Isa. 32Teuma Isa geupeugah bak awaknyan, “Gatanyoe ka tangieng Ulôn nyang ka lheueh Ulôn peubuet buet nyang jroh, nyang geubri tugaih lé Bapak ubak Ulôn. Nibak mandum buet nyan, nyang toh kheueh nyang jeuet keusabab gatanyoe keuneuk rhom ulôn?”
33 #
Im. 24:16
Ureuëng Yahudi nyan jijaweueb, “Kon sabab buet-buet Droeneueh nyang gét nyan kamoe keuneuk geulawa Droeneueh ngon batée, teuma sabab Droeneueh neuhujat Allah. Droeneueh sidroe manusia, keuneuk neupeujeuet Droeneueh Allah.”
34 #
Zab. 82:6
Geujaweueb lé Isa, “Bukon na teutuléh lam Kitab Huköm gata: Allah meufeureuman, ‘Gata na kheueh ilah’? 35Geutanyoe ta teupeu bahwa peue nyang teutuléh lam Alkitab teutab teupeuguna siumu masa. Jadi, meunyoe Allah geubri seubutan ‘ilah’ keu ureuëng nyang teurimong peue nyang geupeugah, 36pakon gata peugah Ulôn hujat Allah sabab Lôn peugah Ulôn Aneuëk Allah? Padahai Ulôn geupiléh lé Bapak dan geu-utus lam donya nyoe. 37Meunyoe Ulôn hana lôn peubuet buet nyang geubri lé Bapak, bék neupatéh keu Ulôn. 38Teuma sabab Ulôn peubuet hainyan, patéh kheueh peue nyang Ulôn peubuet, bah kheueh gata hana tatem patéh ubak Ulôn. Deungon lagée nyan gata tateupeue dan muphom Bapak teutab meusaboh ngon Ulôn, dan Ulôn teutab meusaboh ngon Bapak.”
39Awaknyan jiuseuha lom keuneuk drob Isa, teuma Gobnyan hase teupeusi nibak awaknyan.
40 #
Yah. 1:28
Isa geugisa lom u meurandeh Krueng Yordan, bak teumpat Nabi Yahya ilée geuseumanö, laju geutinggai disinan. 41Jai that-that ureuëng nyang jijak bak Gobnyan. Awaknyan jipeugah, “Nabi Yahya hana geupeubuet buet-buet nyang ajaéb, teuma banmandum nyang geupeugah keuhai ureuëng nyoe beutôi.” 42Dan Ramé that ureuëng nyang na disinan meuiman ubak Isa.
Currently Selected:
YAHYA 10: LAIACE
Highlight
Share
Copy
Want to have your highlights saved across all your devices? Sign up or sign in
Old and New Testament in Today's Aceh Language @ LAI, 1997.
