MATIUS 17
17
Yesus wan bi ajaoreme atakam
(Mrk. 9:2-13; Luk. 9:28-36)
1Emesare. Bare poman ban taka aemapes. Bare poman ban taka aemapes arawa, Yesus, Petrusam, Yakobusam, Yakobus areot Yohanesam, oupnak fami apa atoomtemete. 2Are era owe bipu, wan bi ajaoremen. Me abi, jee tamen asaramemen. Me apakaianam bwer fasarnak tamen ambarampimen. 3Emesare, Musa anama Elia era owe bipu ajateomemisen. Are atakam Yesus ajamkoramesen. 4Petrus arawa, atakam Yesus akoromen. “Tuhan! Dare ara asan aememmarom, ere akotnak. Wore akot aportem, dere jise tame bamintep ara asan tara baeapomtam. Wan taka Wor. Wan taka Musa. Wan taka ere, Elia.” Emes atakam aesimen. 5Armat Ipit atakam taomekoremape, jisewonam fasarnak era owe ametepurimompen. Atakamam era fasarnak jisewonam bomon akoreisimen. “Ara aemema Ipit deTii. Dere Armat Ipit afaimommin. Dere Armat Ipit akotnak. Tanom aatakam jane pajiay.” Emes atakam jane ajiesen. 6Abajamkai owe emes atakam jane ajies ere, are bap andaebuamesteteresen. Are ombare daytinaken. 7Yesus arawa, era owe ambaromen. Are era owe ban akurumen. “Ombare bas.” Emes atakam aesimen. 8Abajamkai owerawa, Yesus banamek apemjatemesen. Are Yesus apa aporesen.
9Wanam, fami aendaes ere, Yesus atakam era owe asakamtamen. “Era aporakam pak, atakam owe boesimtam bas— Asamot Anakot Ajaoreme Ipit ajaorwasitto bare ajiire.” Emes atakam aesimen. 10Abajamkai oweam Armat Ipit ajateporesen. “Musa Basakamtam Atakam baememtam oweam, ‘Elia bonak ato takamjinaotem.’ Emes atakam aesimmas. Me, era owe emes atakam, ere wama tamenem?” Emes atakam aesimesen. 11Armat Ipit arawa, “Elia bajinao, wanam era atakam takes bajasosotii are. 12Tare ere, jane pajiay! Elia, ere emejinaoe. Era owe ere, armat ipit amsam apok. Are armat ipit ajurusumes. Are armat ipit ajak asenomemes pak jipu aemes. Anom Asamot Anakot Ajaoreme Ipit emes taka ajurusumtemas.” Emes atakam aesimen. 13Yesus emes atakam akorerawa, era bajamkai owe, Are Yohanes Owe Bwi Bakupimtaer Ipit atakam akore aporesen.
Yesus bii ambirimjisime atakam
(Mrk. 9:14-29; Luk. 9:37-43a)
14Emesare. Are era owe tananepu aofasies. Jipit takarawa, Yesuspu ambarome. Are Armat Ipit bipu jindi andaepuape. 15Ararawa, “Tuhan! Detii seekot aoorportaman. Are apieme. Are ajiriseme. Are jisam asapiepua, bwiam apiepua, emes aememe. 16Dere era jii wobajamkai owepu atoomtiney. Era owe ere, era jii baemejaoromtaer asan apok.” Emes atakam aesime. 17Yesus arawa, atakam abajamkai owe akorome. “Tare Dera bamesem apok ajaniemmakam owe. Tanom jaos owe. Dere tare takan wama tamen bare jamememtey? Dere jak jirao tara boem, wama tamen bare emtey? Emesare, era jii arapu atoomdaeay.” Emes atakam aesime. 18Yesus, era jii jak bomon bii, atakam fiak asakamtame. Era biirawa, era jii jak bomon ajise. Era jiiam, asan akot ameteememe. 19Wanam, abajamkai owe, Yesuspu apa ambaromes. “Dare era bii bamirimjisim aemporarom apok, ere wama tamenem?” Emes atakam aesimes. 20Yesus arawa, “Tare eemnak Dera bamesemkorom apok. Erarawa tare era pak baemeem asan apok. Atakamnak, era kutukoser wus eek, ere kosernak. Me, tare defiak pak emes kosernak ambesemkoromtakam apaye, tanom era fami atakam bakorom ere, ‘Era asan aesosey.’ Emes atakam era fami akoromtakam, are era asan aesostem. Me tare baemeem asan apok pak, ere apoknak aemtem. [ 21Me, owe banda pak bamase apok aemtas, wanam atakam Allah bajanim apok aemtas, are emes bii baemebirimjisim asan apok.]” Yesus emes atakam aesime.
Yesus dambir aemto pak atakam
(Mrk. 9:30-32; Luk. 9:43b-45)
22Emesare. Yesusam, abajamkai oweam, Galilea tapirmi takan aemapes. Armat Ipit arawa, “Jipit taka Asamot Anakot Ajaoreme Ipit, jokoman owe aotasimemomtamtem. 23Era oweam, Armat Ipit atatiitemas. Bare bamintep arawa, Allah, Armat Ipit ajaoromwasumtumtem.” Emes atakam aesime. Emesare, era owe jak potanak aemapes.
Allah Tame uang atakam
24Emesare. Are Kapernaum ambaremes. Kapernaum ambaremes arawa, Allah tame uang bataajanim owe, Petrus ambaromes. “Me taguru, Allah asakamtame atakam Allah Tame uang, atetamemar apeno.” Emes atakam aesimes. 25Petrus arawa, ‘Atetameme.’ Emes atakam aesime. Emesare, Petrus tame ajiie. Yesusam atakam bonak ara eekorome. “Simon! Ara aemansa tapirmi raja, owe, uang ara batetam atakam asakamtamemas. uang raja atetamtas owe ere, wama oweem? Asaman apaye? Kaaowe saman apaye? Wore wama bimak binip tetarammarem?” Emes atakam aesime. 26Petrus arawa, “Kaaowe saman, uang, raja atetamemas.” Emes atakam aesime. Yesus arawa, “Emesare, raja asaman owe, uang, raja batetam apok aememas. 27Me, dare Allah Tame uang bajanimtam owe, jak pota baemapom bas. Erarawa wore era jupima apendaey. Wonom bakik baemompey. Me bonak ajimtaertem enamo ataerey. Me enamo aokone bomon, uang taka aportemarem. Era uangam ataerey. Era owe atetamey. Era uang, deraye woraye Allah atakam asakamtame batetam uang erare.” Yesus emes atakam aesime.
Currently Selected:
MATIUS 17: LAIASC
Highlight
Share
Copy
Want to have your highlights saved across all your devices? Sign up or sign in
@LAI 1994
