MATIUS 19
19
Oorey owe, atapesti batuumjisim atakam
(Mrk. 10:1-12)
1Yesus emes atakam akorekorome, are Galilea tapirmi aesose. Are Yordan ju ajire, wanam Yudea tapirmi ambareme. 2Owe tananenakam Armat Ipit fe asarames. Armat Ipitam era asan damo pota owe ajaoromtaae.
3Parisi owerawa, Armat Ipit ambaromes. Are Armat Ipit jaos atakam bakore apaye baempor aren. “Oorey ipit aremo bambi atuumjisimto, are dabasakamtam atakam baoo ape?” Emes atakam aesimes. 4Armat Ipit arawa, “Bonaknak ere, era Ji Aereme Ipit, owe jipit anama taot akenemapome. Tare era atakam baca baem apoke? 5Me Ji Aereme Ipitam, ‘Emesare, jipit aritipit anama arsoot beken ajiostem, wanam aremotin takan aemaptemamis. Emesare, armo anama aremo, damo taka aememtemamis.’ Emes atakam aesime. 6Emesare, are owe jamnuk boemap apok aemtemamis. Are owe taka tamen aemaptemamis. Emesare, Allah era owe taka aemapomto, asamot owe, era owe batuumjisim bas.” Yesus emes atakam aesime. 7Era owerawa, “Musa, oorey ipit, batuumjisim buku aremo batetam, wanam era taot batuumjisim, emes atakam asakamtame ere, wama tamenem?” Emes atakam aesimes. 8Yesusam, “Musa tare jane sake owe aporen. Erarawa are tare tatapesti batuumjisim emes aemay ajietamen. Me, bonaknak ere, emes apok. 9Tare jane pajiay! Jipit aremo wan owe tamane banda apok aemto, me, armo ipit aremo atuumjisimto, wanam wan taot aotaetto, ere era ipit pere bambe ipit aememtem.” Emes atakam aesime.
10Me Yesus bajamkai owerawa, atakam Armat Ipit akoromes. “Armo Ipitam aremoam emes apaye, ere owe petae bajiem apok aemtas, asan akot aememtemas.” Emes atakam aesimes. 11Armat Ipit arawa, “Wan owe era akoremakam atakam ji baemee asan apok. Allah era atakam ji bae jak atetammar owe, era pak aemmas. 12Emesare, wan owe petae baemejiem asan apok. Me wan owe, jak bomon aemomjises, are emes taka are. Owerawa, wan owe, jii baemefim asan apok pak aemapomes. Wan owerawa, Allah karai bae akot apormas. Erarawa are petae bajiem apok, atakam ama asakamtiies. Emesare, ara atakam ji bae akot owe, are atakam ji baetas.” Emes atakam aesime.
Yesus, jii asan akot, aeme atakam
(Mrk. 10:13-16; Luk. 18:15-17)
13Emesare. Owe, jii Armat Ipitpu atoomtines. Are Armat Ipit, ban, era jii damo ten bataetii anama atakam Allah ara bajanimtam akot ajies. Me Yesus bajamkai owe ere, emes atii ates. 14Yesusam, “Ara jii dedamopu emes batoomtinaotas. Atii bata bas. Ara jii tamen owe Allah aobaomep owe aememmas.” Emes atakam aesime. 15Emesare, Armat Ipit ban era jii damo ten ataetiie. Ararawa, era asan aesose.
Ai ipit pak daytu aemome atakam
(Mrk. 10:17-31; Luk. 18:18-30)
16Emesare. Jipit taka Armat Ipitpu ambarome. Era ipit arawa, “Guru! Dere jiinenak baememaar akot. Derarawa wama akot pak emtey?” Emes atakam aesime. 17Me Yesusam, “Wore akot pak baem ajatepormanim ere, wama tamenem? Owe takakor ere akot. Wore jiinenak baememaar akot aportem, Musa Basakamtam Atakam ji takes aekoromey.” Emes atakam aesime. 18Era ipit arawa, “Me wama basakamtam atakamum?” Emes atakam aesime. Yesus arawa, “Owe tatiitem. Tani tamane bajamdamat bas. Wosom etem. Pote atakam koretem. 19Me wuritipit anama worsoot asitimaarey. Wanam, wojoo owe afaimey— wore womba afaimemarem tamen awara.” Emes atakam aesime. 20Me ai ipit arawa, “Dere era pak ji takes aeaaru. Derarawa, wan pak wama oemtey?” 21Yesus arawa, “Wore turunak ipit baemem akot aportem, wonom baesosey. Wopak takes uang auumamtaatey. Era uang arawa, sai era pak apok owe asaietamey. Worarawa, Surga tapirmi pak anakotnak atoomemtemarem. Era pak aemtem, bofasiey. Wanam ajamkaiaaran.” Emes atakam aesime. 22Era ai ipit ere, pak daytinak aemome. Erarawa are emes atakam jane ajie, are jak pota aememe, wanam aesose. Are pak daytinak aemome apore.
23Yesusam atakam abajamkai owe akorome. “Atakamnak, pak daytu owe, Allah aobaomep owe baemem, ere asan pota daytinak. 24Dere wan atakamam tara akorommin. Unta jarum, jafa bajii, ere asan pota kope. Pak daytu owe ere, Allah Ai Tapirmi bajii, ere asan pota daytinak.” Emes atakam aesime. 25Me abajamkai owe emes atakam jane ajies, are jinim daytinak aees. Era owerawa, “Wama tamenem? Era ajoremtas owe, wama oweem?” Emes atakam aesimes. 26Yesusam era owe banep ajiepore. “Asamot owe emes baemeem asan apok. Allah ere, era pak takes baem, ere aapak.” Emes atakam aesime.
27Me Petrus arawa, atakam Armat Ipit akorome. “Danom dapak takes beken ajiom, wanam Wora ajamkaiom. Erarawa dare wama pak toomemtam?” Emes atakam aesime. 28Yesusam atep ajite, “Atakamnak, Allah Ai Tapirmi, Asamot Anakot Ajaoreme Ipit aakotnak fe asan ten apakiaptem. Me Dera ajamkaimankum oweam, owe baomep fe asan 12 ten apakiaptemakam. Tanom Israel saman 12 atakam asakamtiitemakam. 29Wan owe, atame apaye, areotais apaye, armasis apaye, arisare apaye, arereis apaye, akebun apaye, beken ajies. Are era pak takes karai dera baetam beken ajies. Era owe ere, era pak daytinak aotoomemtemas. Are jiinenak aememaartemas. 30Emesare, juas aptam owe tanane, juas apok owe aoememtemas. Juas apok owe tananeam, juas aptam owe aoememtemas.”
Currently Selected:
MATIUS 19: LAIASC
Highlight
Share
Copy
Want to have your highlights saved across all your devices? Sign up or sign in
@LAI 1994
