MATIUS 6
6
Pak, pak apok owe batetam atakam
1“Tanom turuar! Tare agama akot pak aememakam, owe bipu baem bas. Owe tare era akot pak aememakam bapor-ombar. Tare taakot pak owe bipu aemtakam apaye, Surga oup Taritipit asan akot tara baem apok aemtem.
2Tare pak era pak apok owe atetamtakam, era pak, owe banamek tara basisiromem bas. Era pir bae owe, pak era pak apok owe atetamtas, are Yahudi owe samayen tame bomonam, bokotpuam, owe banamek ara basisiromem aememas. Are owe ara basitim, jak aseseromemas. Atakamnak, asamot owe taka era owe asitimmas. 3Tare ere, pak era pak apok owe atetamtakam, baso bas. Me tajoo owe anakotam era aemtakam pak bapor-ombar. 4Emesare era atetamtakam pak ere, tiruu pak. Surga oup Taritipit ere, era tiruu aemtakam pak aportem. Erarawa Are asan akot tara aemteman.”
Atakam Allah bajanim atakam
(Luk. 11:2-4)
5“Atakam Allah ajanimtakamam, era pir bae owe tamen emtakam. Era owe Yahudi owe samayen tame bomonam, bokotpuam, atakam Allah bajanim, jak aseseromemas. Are, owe, era aemmas pak bapor, jak aseseromemas. Atakamnak, asamot oweiin, era owe asitimmas. Allah ere, era owe basitim apok aemtem. 6Tare ere, atakam Allah ajanimtakam, takamar bomon ajiiteteray, wanam jimsap bakapimapomay. Tararawa, atakam Allah ajanimay. Owe Taritipit bi bapor apok aemmas. Me, Armat Ipit, taoemtakam pak aportem. Ararawa, asan akot tara atetamteman.
7Atakam Allah ajanimtakam, Allah amsam apok owe tamen bambi atakam bakore bas. Era owe abimak binip ere, ‘Dare atakam tanane akoretam, Allah jane ajitemaro,’ emes bimak binip atetaramemas. 8Tare atakam Taritipit bajanim apok ere, Armat Ipitam era asan pota aemapmakam pak bonak aporem. Erarawa tare era owe aememas tamen baem bas. 9Atakam Allah ajanimtakam, emes atakam ajanimay:
‘DaDot! Surga oup aapatim. Allah ere, Wo taka are.
Owe tere Wo taka baeomtanis. Anom Wo taka basitimtanis.
10Me waa Wore woowe baomep. Surga oup owe era akot apormarem pak jipu aememas.
Ara aemansa tapirmi oweam era akot apormarem pak jipu baemtas.
11Waa daobajapenda banda pak patetamaro.
12Wore era aemarom pota pak, bimak binip bajanimemtamaro. Ere dare owe era aemeroes pota pak, bimak binip emejanimemtamom.
13Wore Bii Kapar Ipit dare Wora bamesem bamompim aemportaro, Wonom era Jokoman Ipit dare afiak pak, ajortaeraro. [Fiaknak Owe Baomep Ipit ere, Wo taka are. Wanam woakotipitnak aememem pakam emes aememaartemarem. Ara atakam, ere atakamnak.]’
Emes atakam Allah ajanimay. 14Tare owe tara aemen pota pak, bimak binip ajanimemtamtakam, Surga oup Taritipit era aemekem pota pak, bimak binip ajanimemtamteman. 15Me, tare owe pota pak tara aemen, bimak binip bajanimemtam apok aemtakam, Surga oup Taritipit era aemekem pota pak bimak binip bajanimemtam apok aemteman.”
Banda pak bamase atakam
16“Tare banda pak ambasemtakam, tare era pir bae owe tamen bimak wuturu baemem bas. Era owe, wan bi ajaorememas. Era pak, are banda pak ambasememas baporom pak are. Atakamnak, asamot oweiin, era owe asitimemas. Allah ere, era owe basitim apok aemtem. 17Tare banda pak ambasemtakam, takuus fini batetaramay. Me tabiam bwi aeosomay. 18Owe, tare banda pak bamasem bapor-ombar. Taritipit ere, aportem. Owe, Armat Ipit bi bapor apok aememas. Me, Armat Ipit, taoemtakam pak aportem. Are asan akot tara aemteman.”
Pak Surga oup tapirmi bajaresisim atakam
(Luk. 12:33-34)
19“Tanom pak ara aemansa tapirmi bajaresisim bas. Ara asan ere, woset, pak, jafa atetakamemas. Pakam asa ajuapteteremas. Wosom oweam tame danais aememas, wanam pak wosom aeemas. 20Tare ere, pak Surga oup tapirmi ajarisisimay. Era asan ere, woset pak jafa batetakam apok. Pakam asa bajuap apok. Wosom oweam pak wosom bae, tame danais baem apok. 21Emesare, tare tapak baemap asan, tajakam erapu aemapmakam.”
Bimak binip akot apaye, jiiti apaye, atakam
(Luk. 11:34-36)
22“Owe abanamek, damo apelita emes tamen are. Me tabanamek akot apaye, ere tabimak binipam baso takes. 23Me, tabanamek pota apaye, tabimak binipam jiiti takes. Me tasare jiiti ajaoremto apaye, tare jiitinak aememaartemakam.”
Pak bimak binip taka bas atakam
(Luk. 16:13, 12:22-31)
24“Karai baetam ipit, karai ermat ipit jamnuk emes karai baemeetam asan apok. Are wan ipit bifane afeomemtem, wanam wan ipit afaimtem. Are wan ipit ajamkaitem, wanam wan ipit pota aportem. Tare Allah karai baetamam, ara aemansa tapirmi pak bataet bimak binip daytu bateteramam, jamnuk takes takan baemeem asan apok.
25Emesare, tanom baporay! Era andetakam banda pak, tare jafer baemem pak. Me, tare era andetakam pak, bimak binip jirao bas. Tanom tadamo ajiimomemtakam pakaian, bimak binip jirao bas. Jafer baemem, ere anakot erare. Banda pak ere, anakot pak apok. Asamot damoam anakot. pakaian ere, anakot apok. 26Oup sakao banamek apeomeporay. Are pak akene bajapom apok. Are amos bajow apok. Are pak tame bomon bajarisisimapom apok. Me, Surga oup Taritipit banda pak era sakao atetamum. Emesare, tare anakotnak. Me sakao ere, anakot apok. 27Owe, pak bimak binip jirao atetaramtas apaye, are adambir atemtas bare, bare takakopeam baemeotasisim asan apok.
28Tanom era ajiimomemtakam pakaian, wama bimak binip jirao tetarammakam? Taar esakam, banamek apeomeporay. Are karai apok. Are pakaian bakekem apok. 29Tare ere, baporay! Raja Salomo akotnak aememen. Armat ipit ere, pakaian era taar esakam emes akotnak, bajiimomem apoknak. 30Emesare, era wasen pak, waa aapatisa. Asep bare ere, owe era pak jis ambomtiitemas. Allah ere, era pak akotnak aemapome. Tare eemnak bamesemkorom apok owee! Emesare, Armat Ipitam pakaian tara atetamteman. 31Erarawa tare pak bimak binip jirao bas. Tanom, ‘Ete banda paka detam? Ete bwi detam? Ete pakaian ajiimomemtam?’ emes atakam bas. 32Me Allah amsam apok owe era pak takes bimak binip jirao atetaramemas. Surga oup Taritipit, era andetakam pak takesam, era ajiimomemtakam pakaian takesam, amsam. 33Tare ere, Allah aobaomep owe baemem jati ato takameay. Tanom Allah akot apormar pak baem jati ato takameay. Armat Ipit arawa, wan pak takesam tara atetamteman. 34Emesare, to aemtakam pak, bimak binip jirao bas. Waa bajirisem pak ere apas. To bajirisem pakam ere apas. Wan bajirisem pak bimak binip jirao bas.”
Currently Selected:
MATIUS 6: LAIASC
Highlight
Share
Copy
Want to have your highlights saved across all your devices? Sign up or sign in
@LAI 1994
