Lukasi 18

Ngkóráꞌ pándiriꞌ kana i hadua topobutusi hai hadua tobembaꞌ

1Roo onoꞌ, Iesu mopahaweꞌ hampákáꞌ ngkóráꞌ pándiriꞌ i topeguruNa bona mekakaeheꞌ oaꞌ hai ineeꞌ luleꞌ. 2Nauliꞌ, “I hambuaꞌ wánuá, ara hadua topobutusi to tiꞌara mengkoruꞌ i Pueꞌ Ala, hai tiꞌara woꞌo mobiláꞌ ba heáná peá. 3I wánuá iti, ara woꞌo hadua towawine to bembaꞌ. Handaꞌ miꞌi kánina paka lao i topobutusi mopahaweꞌ kárá-kárána, nauliꞌ, ‘Nutulungiaꞌ wongkódóꞌá hangko i ewálingkuꞌ.’

4Marue miꞌi topobutusi iti tiꞌara mau motulungi tobembaꞌ iti, agáiáná kahópóꞌána nauliꞌ i laluna, ‘Kehapiꞌaꞌ tiꞌara mengkoruꞌ i Pueꞌ Ala hai tiꞌaraꞌaꞌ mobiláꞌ ba heáná peá, 5agáiáná ánti kahaweꞌna oaꞌ tobembaꞌ iti mai metunggái, rángina miꞌi kubutusi kárá-kárána, láwiꞌ ane tiꞌara kutulungi, ina mosalempori peaꞌ oaꞌ láwiꞌ ia ina mai oaꞌ i kódóꞌ.’ ”

6Roo onoꞌ, nauliꞌ Pueꞌ Iesu, “Nipailalu apa to nauliꞌ topobutusi iti. Kehapiꞌ tiꞌara manótó laluna, agáiáná kahópóꞌána naundeꞌ motulungi tobembaꞌ iti. 7Noꞌonoꞌ woꞌo, Pueꞌ Ala ina motulungikou to Napileꞌi mewaliꞌ taunáNa, ane meraruaꞌkou oaꞌ i Hia membiáꞌ tulungi, maroꞌa káindi ba mabaa. Timama miꞌi oaꞌ Pueꞌ Ala motulungikou. 8Bateꞌna ina hawiáꞌ kaNatulungimi. Agáiáná ane haweꞌ huleꞌ Ánáꞌ Mánusiá i duniáꞌ deꞌe, ba ina Nalámbiꞌ tauna to mepoinálái mani i Hia?”

Ngkóráꞌ pándiriꞌ kana i toParisi hai toperóróꞌ ásele

9Roo onoꞌ, Iesu mopahaweꞌ wopiꞌi ngkóráꞌ pándiriꞌ deꞌe i tauna to maꞌángkáꞌ láwiꞌ rapekiri hira peá to manótó i peitána Pueꞌ Ala. Mewaliꞌ raundeꞌ peá mopakóiꞌ tauna ntániꞌna. 10Nauliꞌ Iesu, “Ara rodua tauna to lao i Támbina Pueꞌ Ala bona mekakaeheꞌ. Hadua toParisi, hai hadua toperóróꞌ ásele. 11ToParisi iti meángkáꞌ hai mekakae, nauliꞌ, ‘Kuꞌuliꞌ handaꞌ kamaroꞌana i Hio Pueꞌ, láwiꞌ tiꞌaraꞌaꞌ nodo tauna ntániꞌna to manako, to motengkoꞌ laluraꞌ, ba to mebualosi. Kuꞌuliꞌ handaꞌ kamaroꞌana i Hio, láwiꞌ tiꞌaraꞌaꞌ tauna to madósá nodo toperóróꞌ ásele doꞌo. 12Mopuasaꞌaꞌ rongkani i laluna haminggu,#18:12 ToParisi mopuasaꞌ alo Mandaꞌ hai alo Iba, agáiáná kehapiꞌ madotaheꞌ mopuasaꞌ, tiꞌara iti to mopakanótóheꞌ i peitána Pueꞌ Ala. Básá woꞌo to teukiꞌ i wóiꞌ Lukasi 2:36-37. hai hanggáláꞌ hampuloꞌ kuweꞌiKoꞌ hangko i upu-upu polámbiꞌángkuꞌ.’#18:12 hanggáláꞌ hampuloꞌ: Básá Pohuleki 14:22-23.

13Agáiáná toperóróꞌ ásele iti, meángkáꞌ peá ngkaraoꞌ, hai tiꞌara pebáiꞌ mengoaꞌ i langiꞌ. Ánti kanaisána dósána, ia motápáꞌ-tápáꞌ pondána tandaꞌ penosoꞌna, nauliꞌ, ‘Ó Pueꞌ Ala! Nupokaꞌahiꞌaꞌ wongkódóꞌá, láwiꞌ kódóꞌ deꞌe tauna to madósáꞌaꞌ!’ ” 14Hangko ionoꞌ, napahópóꞌ Iesu laluitaNa, Nauliꞌ, “Toꞌu ntepuꞌu to Kuhángáꞌákou: i pesuleꞌraꞌ i támbiraꞌ, toperóróꞌ ásele iti to natarima Pueꞌ Ala hai Narekeꞌ tauna to manótó i peitáNa, agáiáná toParisi iti, tiꞌara natarima Pueꞌ Ala. Láwiꞌ heáná to mampepemahile, ina napaiwóiꞌ Pueꞌ Ala. Hai heáná to mengkaiwóiꞌ, ina napomahile Pueꞌ Ala.”

Iesu mowátiꞌ ánángkóiꞌ

(Mat. 19:13-15; Mrk. 10:13-16)

15Araheꞌ woꞌo tauna to moánti ánáꞌraꞌ i Iesu bona Napekamaꞌheꞌ hai Nawátiꞌheꞌ. Karaitána topeguruNa apa to rabábehi tauna iti, rakámbáróáheꞌ. 16Agáiáná Iesu mokióꞌheꞌ ánángkóiꞌ iti, hai Nahángáꞌáheꞌ topeguruNa, “Nipatodáhiheꞌ ánángkóiꞌ iti mai i Kódóꞌ. Ineeꞌheꞌ nikóntó, láwiꞌ tauna to nodo ánángkóiꞌ deꞌe, ina mewaliꞌheꞌ taunána Pueꞌ Ala i lalu popárentáNa. 17Toꞌu ntepuꞌu laluitaNgkuꞌ deꞌe: Pueꞌ Ala ina mepárentá i laluraꞌ tauna to mopaisarenga katueꞌraꞌ i Hia, nodo ánángkóiꞌ to mopaisarenga katueꞌna i tosaena.”

Maꞌángkárá ntepuꞌu i topebuku mewaliꞌ taunána Pueꞌ

(Mat. 19:16-30; Mrk. 10:17-31)

18Ara hadua tadulakoraꞌ toIahudiꞌ to mekuneꞌ i Iesu, nauliꞌ, “Guru to maroꞌa! Apa to hangaa-ngaa kubábehi bona molámbiꞌaꞌ katueꞌ to maroꞌa to tiꞌara mokahópóꞌá?”

19Nauliꞌ Iesu i tauna iti, “Moapa riꞌi haneꞌi nuꞌuliꞌ Kódóꞌ deꞌe to maroꞌaꞌAꞌ? Tiꞌara ara hadua to maroꞌa, bateꞌna peá Pueꞌ Ala. 20{Agáiáná ina Kuhániki pekuneꞌmu.} Nuisá miꞌi hawaꞌ to teukiꞌ i lalu Hawaꞌna Musa: Ineeꞌ mebualosi, ineeꞌ mepapate, ineeꞌ manako, ineeꞌ mosabiki dongkoꞌ, nubiláꞌ inámu hai umámu.”#18:20 Básá Pesuwuꞌá 20:12-16. Agáiáná Iesu tiꞌara mokábelái hawaꞌ to kahampuloꞌ.

21Nauliꞌ tauna iti, “Upu-upu hawaꞌ iti, kupeuláꞌi miꞌi hangko i kamaleheꞌkuꞌ mani.”

22Kanahádina Iesu laluitana, Nauliꞌ, “Ara mani hampákáꞌ to hangaa-ngaa nubábehi. Laomokoꞌ sieruꞌ mampobaluꞌ upu-upu párewámu, hai dóiꞌ hólóna nugáláꞌ-gáláꞌáheꞌ tauna to meahiahiꞌ tueꞌraꞌ. Ane nubábehiꞌi noꞌonoꞌ, ina mahile háwángina to nulámbiꞌ i lalu surugáꞌ. Roo onoꞌ, maimokoꞌ meuláꞌ i Kódóꞌ.” 23Kanahádina tauna topebuku iti polaluitana Iesu, masusa miꞌi laluna láwiꞌ handaꞌ ntepuꞌu tampoꞌna hai párewána.

24Kamasusana laluna tauna iti naisá miꞌi Iesu, haneꞌi Natótói, Nauliꞌ, “Maꞌángkárá ntepuꞌu tauna to pebuku mewaliꞌ taunána Pueꞌ Ala i lalu popárentáNa. 25Madoli mani hambaꞌa untá mesuaꞌ i lalu kalolu daru haneꞌi topebuku mewaliꞌ taunána Pueꞌ Ala i lalu popárentáNa.”

26Upu-upu tauna to mohádi laluitana Iesu tingkáráꞌheꞌ {láwiꞌ rapekiri tauna topebuku nawátiꞌ Pueꞌ Ala}, onoꞌ miꞌi haneꞌi mekuneꞌheꞌ i Iesu, rauliꞌ, “Ane tauna topebuku tiꞌara peisá mewaliꞌ taunána Pueꞌ Ala, apa mani tauna ntániꞌna! Heáná paꞌi to nabuku molámbiꞌ katueꞌ to maroꞌa to tiꞌara mokahópóꞌá?”

27Nahániki Iesu, “Tiꞌara ara to peisá nabábehi tauna bona mewaliꞌheꞌ taunána Pueꞌ Ala. Agáiáná Pueꞌ Ala peá to peisá mohómpóki dósá tauna.”#18:27 I lalu básá Iunani: Ane i tauna, tiꞌara nabuku, agáiáná ane i Pueꞌ Ala, upu-upu peisá mewaliꞌ, láwiꞌ tiꞌara ara to tiꞌara Nabuku Nabábehi.

28Hangko ionoꞌ, nauliꞌ Peturuꞌ, “Noumbámongkaiꞌ? Kipálehi miꞌi hinángkáꞌna bona meuláꞌangkaiꞌ i Hio.”

29Nauliꞌ Iesu i topeguruNa, “Bona niꞌisá: heáná to mopálehi támbina, ba toinána ba halaluna ba tosaena ba ánáꞌna, ánti pampopolumaona bágóꞌna Pueꞌ Ala, 30bateꞌna ina molámbiꞌ i duniáꞌ deꞌe handaꞌ kánina háwángina hangko i upu-upu to napálehi, hai i alo to ina haweꞌ ina molámbiꞌ woꞌo katueꞌ to maroꞌa to tiꞌara mokahópóꞌá.”

Katáluna kánina Iesu mampolaluita kana i kaꞌina mateNa

(Mat. 20:17-19; Mrk. 10:32-34)

31Hangkani tempó, Iesu mokióꞌmoheꞌ topeguruNa to hampuloꞌ hai rodua hai Narámpu i kaꞌaraꞌá to tepataniꞌ, haneꞌi Nahángáꞌáheꞌ, “Nipehádingi maroꞌa! Deꞌe-deꞌe tangaꞌtaꞌ lao i Ierusale.#18:31 Mantepuꞌuheꞌ lao i Ierusale i Lukasi 9:51. I kótá iti, upu-upu to raukiꞌ nabiꞌ-nabiꞌ kana i Ánáꞌ Mánusiá ina tebukeki. 32Ánáꞌ Mánusiá ina rahuhuꞌ i tauna to tiꞌaraheꞌ toIahudiꞌ. Ina rasasalaꞌi, rapakóiꞌ, hai ratitinuduhi. 33Ina rahepe hai gulaꞌ, hai kahópóꞌána ina rapapate. Agáiáná i katáluna alona, Ia ina tueꞌ huleꞌ.”

34Agáiáná tiꞌara raisá topeguruNa tunggáiána Iesu, láwiꞌ lempóna laluitaNa tewuniángi mani i hira.#18:34 ToIahudiꞌ mohárungá Datu Topehómpóꞌ ina mewaliꞌ datu hai mampelaeheꞌ hangko i kuasaꞌraꞌ toRoma. Tiꞌara rapekiri Datu Topehómpóꞌ ina mepárentá i laluraꞌ tauna bona teámpungiheꞌ hangko i dósáraꞌ.

Iesu mopakauriꞌ hadua tobilo i kótá Ieriko

(Mat. 20:29-34; Mrk. 10:46-52)

35Iesu hai tauna to meuláꞌ i Hia, hungkuꞌmoheꞌ i kótá Ieriko. Ionoꞌ, ara hadua tobilo to mehoda i wiwi rárá membiáꞌ-mbiáꞌ. 36I kanahádina tauna to handaꞌ moliu, ia mekuneꞌ, nauliꞌ, “Apa riꞌi to pewaliꞌ?”

37Rahániki tauna to handaꞌ, “Iesu toNasare moliu!”

38Kanahádina tobilo iti laluitaraꞌ, meraruaꞌ, nauliꞌ, “Iesu! Pemuleꞌána Datu Daudiꞌ!#18:38 Pemuleꞌána Datu Daudiꞌ: Laluita iti molempónga toMásehi, ba Datu Topehómpóꞌ. Básá to teukiꞌ i Kahirámpuá Laluita. Nupokaꞌahiꞌaꞌ!” 39Agáiáná ia rakabukoꞌi tauna to molumao ioru, rauliꞌ “Maniiꞌkoꞌ!” Tobilo iti mekióꞌ-kióꞌ peá napasimbuku, nauliꞌ, “Pemuleꞌána Datu Daudiꞌ! Nupokaꞌahiꞌaꞌ wongkódóꞌá!”

40Mengkaroo miꞌi Iesu haneꞌi mohuoꞌ tauna, Nauliꞌ, “Niánti mai tauna to bilo iti!” Raꞌánti mpuꞌu miꞌi lao i Iesu, hai Iesu mekuneꞌ i hia, Nauliꞌ, 41“Apa to nuꞌundeꞌ Kubábehi i hio?”

Nahániki tobilo iti, “Pueꞌ, kuꞌundeꞌ, wongkódóꞌá, bona meitaꞌaꞌ!”

42Nauliꞌ Iesu, “Meitamokoꞌ! Ánti pepoináláimu i Kódóꞌ, haneꞌikoꞌ mauriꞌ.” 43Kásáliu meita. Hangko ionoꞌ, ia meuláꞌ i Iesu hai motóiá Pueꞌ Ala. Hai upu-upu tauna to moita apa to pewaliꞌ iti, motóiáheꞌ woꞌo Pueꞌ Ala.

Currently Selected:

Lukasi 18: NTBEP

Highlight

Copy