Matiu 20
20
Ngkóráꞌ pándiriꞌ kana i topobágóꞌ hinoe
1-2Nauliꞌ Iesu, “Ane Pueꞌ Ala moháwángi pobágóꞌraꞌ upu-upu taunáNa i alo to ina haweꞌ, kaNabábehina nodo ngkóráꞌ pándiriꞌ deꞌe: Hadua pueꞌ hinoe anggoroꞌ lao mampeliꞌ tauna to moundeꞌ mobágóꞌ i hinoena. Mepulo-pulo nalámbiꞌheꞌ bahangapa tauna, hai nahángáꞌáheꞌ, ‘Laomokou mobágóꞌ i hinoengkuꞌ, hai ina kuweꞌikou saromi hadua-hadua nodo to biásá i tauna to mobágóꞌ hangaloá, ia miꞌi hampepaꞌ dóiꞌ peráꞌ.’#20:1-2 dóiꞌ peráꞌ - Básá Iunani: dinar. Rapokana miꞌi laluitana iti, haneꞌi lao mpuꞌumoheꞌ. 3Tintiꞌ hahioꞌ mepulo, lao wopiꞌi pueꞌ hinoe mampeliꞌ to ntániꞌna. Naita bahangapa tauna mehoda-hoda peheꞌ i pobaluꞌ-baluꞌá, 4nahángáꞌáheꞌ, ‘Laomokou mobágóꞌ i hinoengkuꞌ. Ina kuweꞌintokou saromi to hintotoꞌ hai pobágóꞌmi.’ Lao mpuꞌumoheꞌ. 5Kalialo miꞌi, lao wopiꞌi pueꞌ hinoe iti mampeliꞌ tauna. Nahángáꞌáheꞌ, ‘Laomokou mobágóꞌ i hinoengkuꞌ.’ Noꞌonoꞌ woꞌo to nabábehi tintiꞌ tálu kalumbaꞌ.
6Tintiꞌ lima miꞌi kalumbaꞌ, nalámbiꞌ wopiꞌi tauna to mehoda-hoda, nakuneꞌheꞌ, ‘Moapa riꞌi haneꞌi mehoda-hoda pekou hangaloá? Tiꞌarantokou mobágóꞌ?’
7Rahániki, ‘Tiꞌara ara to mampopobágóꞌangkaiꞌ.’
Nauliꞌ pueꞌ hinoe iti, ‘Ane noꞌonoꞌi, laomokou mobágóꞌ i hinoengkuꞌ.’ Lao mpuꞌumoheꞌ mobágóꞌ.
8Támpu miꞌi alo, nauliꞌ miꞌi pueꞌ hinoe i mandorona, ‘Nukióꞌmoheꞌ topobágóꞌ iti, hai nuweꞌimoheꞌ saroraꞌ. Nuweꞌiheꞌ sieruꞌ saroraꞌ tauna to mantepuꞌu mobágóꞌ hangko i tintiꞌ lima ininá. Roo onoꞌ, nuweꞌiheꞌ woꞌo saroraꞌ tauna to mantepuꞌu mobágóꞌ tintiꞌ tálu. Nubábehi noꞌonoꞌ duuꞌna haweꞌ i tauna to mobágóꞌ mantepuꞌu mepulo.’
9Haweꞌ mpuꞌumoheꞌ to mobágóꞌ mantepuꞌu tintiꞌ lima kalumbaꞌ. Molámbiꞌheꞌ saroraꞌ hadua-hadua hampepaꞌ dóiꞌ peráꞌ. 10Noꞌonoꞌ oaꞌ kanabábehina duuꞌna haweꞌ i topobágóꞌ to mantepuꞌu mepulo. Topobágóꞌ to mantepuꞌu mepulo-pulo iti manguliꞌ i laluraꞌ, ‘Manótó hangaa-ngaa melábi to ina naweꞌikeꞌ, láwiꞌ hangaloákeꞌ mobágóꞌ!’ Agáiáná to raweꞌiheꞌ woꞌo hampepaꞌ peá dóiꞌ peráꞌ. 11I polámbiꞌraꞌ saroraꞌ iti, mohume-humeheꞌ pueꞌ hinoe, rauliꞌ, 12‘To haweꞌ i bókóꞌ, mobágóꞌheꞌ hajaa peá. Agáiáná kaiꞌ, mobágóꞌangkaiꞌ hangaloá hai nahimbaꞌiangkaiꞌ alo to mahárá. Moapa riꞌi haneꞌi nupahibali peá baiaringkiꞌ hai hira?’
13Nahániki pueꞌ hinoe iti, ‘Ale, tiꞌaraꞌaꞌ masalaꞌ i kómu. Tiꞌara paꞌi kudándi iamepulo ina molámbiꞌkou saromi hampepaꞌ dóiꞌ peráꞌ to biásá ane tauna mobágóꞌ hangaloá? 14Niala miꞌi saromi hai pohuꞌmokou! Kakuꞌundeꞌnamonto mopahibali saroraꞌ tauna to haweꞌ i bókóꞌ hai kómu. 15Ane kuꞌuláꞌ peundeꞌángkuꞌ mampopobunduꞌ dóiꞌkuꞌ, moapa riꞌi haneꞌi nipokóiꞌ inao ane kuꞌundeꞌ mopahibali saroraꞌ tauna to haweꞌ i bókóꞌ hai kómu? Moapa riꞌi haneꞌi mahiniꞌkou i tauna ntániꞌna ane maroꞌa lalungkuꞌ i hira?’ ”
16Napahópóꞌ Iesu ngkóráꞌ pándiriꞌ iti, Nauliꞌ, “Noꞌonoꞌ woꞌo i alo pobutusi: handaꞌ tauna to tepaibókóka tueꞌraꞌ tempó deꞌe ina mewaliꞌ tepaioruá i alo to ina haweꞌ. Hai handaꞌ woꞌo tauna to tepaioruá tueꞌraꞌ tempó deꞌe ina mewaliꞌ tepaibókóka i alo to ina haweꞌ.”#20:1-16 To rapándiriꞌ pueꞌ hinoe ia miꞌi Iesu, to rapándiriꞌ topobágóꞌ iamoheꞌ topeuláꞌna Iesu, hai to rapándiriꞌ topobágóꞌ to tiꞌara ara to mampopobágóꞌheꞌ, iamoheꞌ toperóróꞌ ásele hai tauna ntániꞌna to rauliꞌ toIahudiꞌ tauna to tiꞌara maroꞌa. Tempó mobaiari saroraꞌ ia miꞌi alo pobutusi i kahópóꞌána duniáꞌ, hai saroraꞌ iti hibali-bali i upu-upu to mobágóꞌ ia miꞌi katueꞌ to maroꞌa to tiꞌara mokahópóꞌá.
Iesu mampopaisá wopiꞌi kaꞌina mateNa
(Mrk. 10:28-31; Luk. 18:28-30)
17I tempóna Iesu molumao lao i kótá Ierusale, topeguruNa to hampuloꞌ hai rodua meuláꞌheꞌ woꞌo i Hia. Nakióꞌmoheꞌ mopataniꞌ, haneꞌiheꞌ Nahángáꞌá, 18“Nipehádingi maroꞌa! Deꞌe-deꞌe, tangaꞌtaꞌ lao i Ierusale. Ionoꞌ miꞌi Ánáꞌ Mánusiá ina rahuhuꞌ i kapalaꞌ-kapalaꞌ tadulako menómbá hai guru-guru agama, hai ina rabutusi bona rahuku mate. 19Roo onoꞌ, Ánáꞌ Mánusiá ina rahuhuꞌ i tauna to tiꞌaraheꞌ toIahudiꞌ bona rasasalaꞌi, rahepe hai gulaꞌ, hai kahópóꞌána ina rapapate i kau mombehape. Agáiáná i katáluna alona, Ia ina tueꞌ huleꞌ.”
Tauna to mengkaiwóiꞌ, hira miꞌi to i reá tueꞌraꞌ i peitána Pueꞌ Ala
(Mrk. 10:35-45)
20I tempó iti, toinána Sebedeu hai ánáꞌna rodua laoheꞌ i Iesu. Ináraꞌ Iakobu hai Iohane iti molingkudu motóngkóꞌ i bitiNa láwiꞌ ara to ina napembiáꞌ. 21Nakuneꞌ Iesu, “Apa to nupoinao Kubábehi i hio?”
Nahániki ináraꞌ Iakobu hai Iohane iti, nauliꞌ, “Kupembiáꞌ bona ane mewaliꞌKoꞌ Datu, ánáꞌkuꞌ to rodua deꞌe ina mehoda mepárentá hingkakani hai Io, hadua tándáꞌ i kuánáMu, hadua tándáꞌ i kabeoꞌMu.”
22Agáiáná Iesu mohángáꞌá Iakobu hai Iohane, Nauliꞌ, “Kómu, tiꞌara niꞌisá apa to nipembiáꞌ. Nibuku paꞌi mantódihá kapári to hangaa-ngaa Kutódihá?”#20:22 mantódihá kapári to hangaa-ngaa Kutódihá? - I lalu básá Iunani: mainu hangko i mangku to hangaa-ngaa Kupainui?
Rahániki, “Kibuku!”
23Nauliꞌ wopiꞌi Iesu, “Toꞌu, hangaa-ngaa nitódihá kapári nodo to ina Kutódihá.#20:23 Iakobu rabóhóki tambólóna i Ierusale (básá Suro 12:2), hai Iohane marue ratarungku i puló Patmos (básá Pampetudeꞌá 1:9). Agáiáná tiꞌara Kódóꞌ to mopakanótó heáná to ina mehoda tándáꞌ i kuánáNgkuꞌ hai heáná tándáꞌ i kabeoꞌKuꞌ, bateꞌna peá UmáNgkuꞌ to mopakanótó.”
24I karahádina peá to hampuloꞌ pembiáꞌraꞌ Iakobu hai Iohane iti, mabukoꞌheꞌ, 25onoꞌ miꞌi haneꞌi Iesu mokióꞌ upu-upu topeguruNa, Nahángáꞌáheꞌ, “Niꞌisánto tauna to tiꞌara moisá Pueꞌ Ala masodoheꞌ ane mopárentá tauna, hai tauna to mapángkáꞌ lántiꞌraꞌ iti pakaheꞌ mopasimbuku tauna, bona mampeuláꞌiheꞌ hawaꞌraꞌ. 26Agáiáná kómu, ineeꞌkou noꞌonoꞌ. Heáná to mampoinao bona i reá tueꞌna, hangaa-ngaa mewaliꞌ sieruꞌ hadua topekádipurá. 27Hai heáná to mampoinao bona tepaioruá, hangaa-ngaa mewaliꞌ sieruꞌ nodo hadua hawiꞌ.#20:27 Hawiꞌ tiꞌara molámbiꞌ saro, mehárungá peheꞌ i pueꞌraꞌ. Hangaa-ngaa mengkoruꞌheꞌ i pueꞌraꞌ hai mampeuláꞌi hawaꞌna. Noꞌonoꞌ woꞌo kitaꞌ. 28Hangaa-ngaa nipeuláꞌi pambiárána Ánáꞌ Mánusiá, láwiꞌ tunggáiáNa mai i duniáꞌ deꞌe tiꞌara bona mewaliꞌ topohawaꞌ, ngkáliꞌna riꞌi bona mewaliꞌ hawiꞌ, hai ina mohuhuꞌ wátáNa rapapate bona handaꞌ tauna peisá Nahómpóki hangko i huku dósáraꞌ.”
Iesu mopakauriꞌ rodua tobilo
(Mrk. 10:46-52; Luk. 18:35-43)
29Kapohuꞌraꞌ Iesu hai topeguruNa hangko i kótá Ieriko,#20:29 kótá Ieriko: uwalu kilómete tándáꞌ i katámpuá alo hangko i uwai Iarade, hai rompuloꞌ hai iba kilómete i wongko tándáꞌ i katámpuá alo hangko i Ierusale. handaꞌ tauna meuláꞌ i Hia. 30I polumaoraꞌ, araheꞌ rodua tobilo to mehoda i wiwi rárá. Karaisána peá kaꞌIesuna to melempó, meraruaꞌheꞌ, rauliꞌ, “Pueꞌ, pemuleꞌána Datu Daudiꞌ!#20:30 pemuleꞌána Datu Daudiꞌ: Básá to teukiꞌ i wóiꞌ Matiu 9:27. Nupokaꞌahiꞌangkaiꞌ!”
31Handaꞌ tauna mokabukoꞌiheꞌ, rauliꞌ, “Maniiꞌkou!” Agáiáná tobilo iti mekióꞌ-kióꞌ peheꞌ rapasimbuku, rauliꞌ, “Pueꞌ, pemuleꞌána Datu Daudiꞌ! Nupokaꞌahiꞌ wongkaiꞌkaa!”
32Mengkaroo mpuꞌu miꞌi Iesu, Nakióꞌheꞌ, haneꞌi Napekuneꞌ, “Apa to niundeꞌ Kubábehi i kómu?”
33Rahániki, “Pueꞌ, kiundeꞌ ntepuꞌu meita!”
34Maꞌahiꞌ laluna Iesu i hira, haneꞌi Nakamaꞌ mátáraꞌ. Kásáliu meitaheꞌ,#20:34 Iesu mopakauriꞌheꞌ tobilo, tandaꞌ kaꞌIana Datu Topehómpóꞌ. (Básá Iesaia 29:18; 35:5.) hai meuláꞌheꞌ i Hia.
Currently Selected:
Matiu 20: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
