Marakusi 13
13
To ina mewaliꞌ i kahópóꞌána duniáꞌ
Iesu mampolaluita kaꞌina magerona Támbina Pueꞌ Ala
(Mat. 24:1-2; Luk. 21:5-6)
1Karoona Iesu mopaturoꞌ tauna, pohuꞌ miꞌi hai topeguruNa hangko i Támbina Pueꞌ Ala. Ara hadua hangko i topeguruNa to mohángáꞌá, “Guru. Peita támbi deꞌe! Peita watuna to mahile ntepuꞌu! Maróhó hai mababe ntepuꞌu!”
2Nauliꞌ Iesu, “Ba nipeita kamahilena hai kamababena Támbina Pueꞌ Ala deꞌe? Agáiáná Kuhángáꞌákou: ina haweꞌ tempóna, tiꞌara piꞌi ina ara hambuaꞌ watu to mentárá i katoroꞌána, bateꞌna ina ragero upu-upu.”#13:2 Támbina Pueꞌ Ala ragero toRoma rekeꞌ-rekeꞌna iba puloꞌna parena hangko ionoꞌ, pare 70M. Kamagerona Támbina Pueꞌ Ala mewaliꞌ tandaꞌna binataꞌ tiꞌara piꞌi paraluu rasambale rapopenómbá i Pueꞌ Ala, láwiꞌ Iesu to mewaliꞌ popenómbá to kahópóꞌána, hai tadulako menómbá woꞌo tiꞌara piꞌi raparaluu láwiꞌ Iesu miꞌi Tadulako Menómbá Mahile. (Básá Iberani 9:13-14.) Teukiꞌ miꞌi i Pototowiá to Sae, Támbina Pueꞌ Ala ina ragero. (Básá Mika 3:12; Ieremia 26:18.)
Iesu mampolaluita kamapáriraꞌ tauna to meuláꞌ i Hia
(Mat. 24:3-14; Luk. 21:7-19)
3Roo onoꞌ, Iesu hai topeguruNa laoheꞌ i Buluꞌ Saitu.#13:3 Buluꞌ Saitu: mombehambali hai Ierusale, tándáꞌ i mata alo, i wongkona lokeꞌ Kidero hai rapotudaꞌi kau saitu. Buluꞌ Saitu iti mapángkáꞌ mani hangko i Ierusale hai buluꞌ Sio. Támbina Pueꞌ Ala ara i buluꞌ Sio. Tangaꞌna Iesu mehoda melindoꞌ tándáꞌ i Támbina Pueꞌ Ala, Peturuꞌ, Iakobu, Iohane hai Andaria laoheꞌ molaluita i Hia. Tempó iti, tiꞌara ara tauna to ntániꞌna. 4Rauliꞌ, “Kipembiáꞌ bona Nuhángáꞌáꞌangkaiꞌ ba impirá pewaliꞌána upu-upu to Nuꞌuliꞌ ininá, hai tandaꞌ apa to ina mewaliꞌ ane haweꞌ miꞌi tempó pewaliꞌána.”
5Nauliꞌ Iesu, “Maingáꞌ-ingáꞌkou, bona tiꞌarakou rapakanawoꞌ, 6láwiꞌ handaꞌ tauna ina haweꞌ hai ina manguliꞌ kahirana Datu Topehómpóꞌ, álána handaꞌ tauna to ina rapakanawoꞌ. 7Ane mohádikou to tangaꞌraꞌ mombeala hai bámbári pombeala, ineeꞌkou malááꞌ, hai ineeꞌ nipotingkáráꞌ, láwiꞌ upu-upu iti hangaa-ngaa mewaliꞌ sieruꞌ, agáiáná tiꞌara mani haweꞌ kahópóꞌá duniáꞌ. 8Tampoꞌ ina mombeala hai tampoꞌ ntániꞌna, kadatuá ina moewaꞌ kadatuá ntániꞌna, hai iumbá-umbá peá ina ara linu hai rimi. Upu-upuna iti hangko pantepuꞌuána, agáiáná kapári iti ina tetámbái mani karumihina nodo kapári to nahádi towawine to tangaꞌna humádi.
9Agáiáná kómu deꞌe, maingáꞌ-ingáꞌkou, láwiꞌ kómu ina rahakaꞌkou hai raꞌánti i lindoꞌraꞌ tadulako agama. Ina rahepekou i lalu támbi penómbáꞌá. Ánti peuláꞌmi i Kódóꞌ, ina rahuhuꞌkou i lindoꞌraꞌ topopárentá hai datu-datu. I tempó iti, ina raweꞌikou lógá mopahaweꞌáheꞌ kana i pepoináláimi i Kódóꞌ. 10Hai Ngkóráꞌ Marasa hangaa-ngaa rapahaweꞌ sieruꞌ i humalele duniáꞌ, hangko mewaliꞌ riꞌi upu-upu tunggáiána Pueꞌ Ala.#13:10 Peundeꞌána Pueꞌ Ala bona upu-upu tauna rahómpóki hangko i huku dósá. Rápáꞌna, básá Pewaliꞌána 12:3b; 18:18; Sura Petóiá 72:17; 96; Iesaia 42:6-7; 49:6b; 52:10; Galatia 3:8; 1 Timotiu 2:4-5. 11Ane rahakaꞌkou hai raꞌánti i lindoꞌraꞌ tadulako, ineeꞌkou malááꞌ ba noumbá pehániꞌmi. Ane haweꞌ tempómi molaluita, Pueꞌ Ala ina mopakanótóákou apa to hangaa-ngaa niuliꞌ, láwiꞌ apa to niuliꞌ i tempó iti, tiꞌara hangko i pekirimi haduduámi agáiáná ina mentóáꞌ hangko i Inao to Magasaꞌ.
12Ina haweꞌ tempóna, handaꞌ tauna ina mampehuhuꞌá halaluraꞌ ba ánáꞌraꞌ bona rapapate ánti peuláꞌraꞌ i Kódóꞌ. Ara woꞌo ánángkóiꞌ to ina moewaꞌ tosaeraꞌ hai mampehuhuꞌá bona rahuku mate. 13Noꞌonoꞌ woꞌo kómu. Ánti peuláꞌmi i Kódóꞌ, ina rakáhihiꞌkou handaꞌ tauna. Agáiáná tauna to mepoinálái oaꞌ i Kódóꞌ haweꞌ i kahópóꞌána, ina molámbiꞌheꞌ katueꞌ to maroꞌa to tiꞌara mokahópóꞌá.”
Iesu mampolaluita tempó kapári to rumihi#13:14-27 I lalu gáláꞌna ka-13 deꞌe, mampopengaa to napolaluita Iesu. 1) Kapári to ina mewaliꞌ i kahópóꞌána duniáꞌ (wátiꞌna ka-5 haweꞌ ka-13). 2) PehániꞌNa i pekuneꞌraꞌ topeguruNa i wátiꞌna ka-4 mokana kamagerona Támbina Pueꞌ Ala hai Ierusale (wátiꞌna 14-20). 3) Iesu mopakanótó wopiꞌi pepopaingáꞌi hangko i wátiꞌna ka-5 hai ka-6 (wátiꞌna 21-23). 4) Kahaweꞌna huleꞌ Iesu i karongkánina, hai kahópóꞌána duniáꞌ (wátiꞌna 24-27).
(Mat. 24:15-28; Luk. 21:20-24)
14Iesu mopaliliu laluitaNa i topeguruNaheꞌ, Nauliꞌ, “Hangkoia nabiꞌ Danieli mampolaluita kaꞌina árána ‘To Kadake to Megero.’#13:14 To Kadake to Megero: Básá Danieli 9:27; 11:31; 12:11. Básá woꞌo to teukiꞌ i Kahirámpuá Laluita. Heáná to mobásá laluita deꞌe, hangaa-ngaa napekiri maroꞌa apa lempóna! Mewaliꞌ, ane niꞌita apa to natunggái Danieli iti meángkáꞌ i katoroꞌá to tiꞌara rapeweꞌi rakatoroꞌi,#13:14 katoroꞌá to tiꞌara rapeweꞌi rakatoroꞌi: ia miꞌi, Támbina Pueꞌ Ala, “Katoroꞌá to Magasaꞌ”. Básá Matiu 24:15. ránginamoheꞌ tauna to toroꞌ i tampoꞌ Iudá melangka lao i buluꞌ.#13:14 Kótá Ierusale ara i tampoꞌ Iudá. Pare 70M, tempóna toRoma molibuꞌ Ierusale, handaꞌ toSarani mengkalimba i uwai Iarade, melangka lao i kótá Pela i poropensi Dekapoli, láwiꞌ rabuhinao laluitana Iesu iti. 15Tauna to mehoda-hoda i atuꞌ to hirante ineeꞌmoheꞌ lebaꞌ mesuaꞌ i lalu támbiraꞌ moala ba apa-apa. 16Tauna to i hinoe, ineeꞌmoheꞌ lebaꞌ mesuleꞌ lao moala kumbáraꞌ. Hangaa-ngaa liliuheꞌ melangka! 17Ina masusa ntepuꞌu tueꞌraꞌ towawine to morodua hai to mopahuhu ánáꞌraꞌ i tempó iti. 18Mekakaekou i Pueꞌ Ala bona alo pelangkaꞌámi iti tiꞌara kana tempó udá.#13:18 tempó udá: I tampoꞌ Iudá, tempó lengiꞌ tempó udá woꞌo. 19Láwiꞌ i tempó iti, ina mewaliꞌ kapári to rumihi ntepuꞌu, to tiꞌara mani hangkani mewaliꞌ hangko i rungu-runguna i tempóna Pueꞌ Ala mampopewaliꞌ duniáꞌ duuꞌna deꞌe-deꞌe, hai tiꞌara piꞌi woꞌo ina mewaliꞌ huleꞌ i alo bókóꞌna.#13:19 Básá woꞌo Danieli 12:1 hai Ioeli 2:2. 20Agáiáná tempó kapári iti ina napakawiáꞌ Pueꞌ Ala, láwiꞌ ane tiꞌara Napakawiáꞌ, tiꞌara ina ara hadua to tueꞌ. Mewaliꞌ, ánti kamaꞌahiꞌna Pueꞌ Ala i tauna to Napileꞌi, onoꞌ miꞌi haneꞌi ina Napakawiáꞌ tempó kapári iti.
21I tempó iti, ane ara to mohángáꞌákou, ‘Peita! Demiꞌe Datu Topehómpóꞌ!’ ba ‘Domi maiꞌo!’ ineeꞌheꞌ nipoinálái, 22láwiꞌ ina haweꞌ handaꞌ tauna to mepakanawoꞌ to manguliꞌ kahirana Datu Topehómpóꞌ, ba to manguliꞌ kahirana nabiꞌ. Ina mobábehiheꞌ tandaꞌ kuasaꞌ hai tandaꞌ to mehelei bona mopakanawoꞌheꞌ tauna to handaꞌ.#13:22 Básá woꞌo Pohuleki 13:1-5. Mogalo riꞌi taunána Pueꞌ Ala to Napileꞌi miꞌi, ina rapehukáꞌ rapakanawoꞌ. 23Agáiáná kómu, maingáꞌ-ingáꞌkou! Kuhángáꞌámokou ami upu-upuna iti hangko tiꞌara mani mewaliꞌ.”
Iesu mampolaluita kana kaꞌina haweꞌNa huleꞌ
(Mat. 24:29-31; Luk. 21:25-28)
24“Mewaliꞌ i tempó iti, ane liu miꞌi tempó kapári,
alo ina mambáliꞌ mewaliꞌ makáindi,
wulá tiꞌara piꞌi ina mewangkaꞌ,
betue ina manawoꞌ hangko i langiꞌ,
25hai Pueꞌ Ala ina mampopoenggo upu-upu to ara i langiꞌ.#13:24-25 Básá woꞌo Iesaia 13:9-13; 24:21-23; 34:4; Ioeli 2:10,31; 3:15; Amosi 8:9.
26I tempó iti, upu-upu tauna ina moita Ánáꞌ Mánusiá mendáulu mai napótóꞌ gawu.#13:26 Gawu ia miꞌi tandaꞌ kaꞌárána Pueꞌ Ala i oloꞌraꞌ tauna. Básá to teukiꞌ i wóiꞌ Marakusi 9:7. Básá woꞌo Danieli 7:13-14; Marakusi 8:38; 14:62; 2 Tesalonika 1:6-10; Pampetudeꞌá 1:7; 19:11-16. Ina tongawaꞌ ntepuꞌu kuasaꞌNa hai peawaꞌna tueꞌNa. 27Ia ina mohuoꞌ malaꞌekaNa lao morámpu tauna to Napileꞌi hangko i humalele duniáꞌ, mantepuꞌu hangko i pembetoá alo duuꞌna haweꞌ i katámpuána alo.”
Ngkóráꞌ pándiriꞌ kana i kau ara
(Mat. 24:32-35; Luk. 21:29-33)
28“Nipailalu apa to Kupaturoꞌákou moliu pándiriꞌ hangko i kau ara. Ane niꞌita dáꞌána motumbeꞌ hai mantepuꞌu motaweꞌ, niꞌisá miꞌi kaꞌina haweꞌna tempó alo. 29Noꞌonoꞌ woꞌo, ane niꞌita pewaliꞌna upu-upu to Kupahaweꞌákou ininá, niꞌisá katiꞌárána piꞌi marue ina haweꞌ miꞌi kahópóꞌána duniáꞌ.#13:29 ina haweꞌ miꞌi kahópóꞌána duniáꞌ - I lalu básá Iunani: hungkuꞌ miꞌi i babaꞌá. 30Toꞌu ntepuꞌu to Kuhángáꞌákou: upu-upu to Kuꞌuliꞌ ininá bateꞌna ina mewaliꞌ hangko tiꞌara mani mate upu-upu tauna to tueꞌ tempó deꞌe.#13:30 To natunggái Iesu, kamagerona Támbina Pueꞌ Ala hai kapári to rumihi. (Básá wátiꞌna ka-2 hai wátiꞌna ka-14 haweꞌ ka-23.) Iti mewaliꞌ rekeꞌ-rekeꞌna iba puloꞌna parena hangko ionoꞌ (pare 70M), tempóna Támbina Pueꞌ Ala ragero toRoma. 31Langiꞌ hai duniáꞌ hai upu-upu óntóꞌna ina magero, hai tiꞌara piꞌi ina ara, agáiáná laluitaNgkuꞌ bateꞌna ina ara oaꞌ haweꞌ i rue-ruena.”#13:31 To natunggái Iesu, laluitaNa hibali hai laluitana Pueꞌ Ala. Básá Sura Petóiá 119:89; 102:25-27; Iesaia 40:8; 51:6.
Paturoꞌ bona maingáꞌ-ingáꞌ
(Mat. 24:36-44)
32Iesu mopaliliu laluitaNa i topeguruNa, Nauliꞌ, “Agáiáná ane alo hai jaa pewaliꞌna upu-upuna iti,#13:32 Laluita “alo iti” paka rapakeꞌ i Pototowiá to Sae molempónga alo kahaweꞌána Pueꞌ Ala bona mobutusi kárá-káráraꞌ tauna. Rápáꞌna, básá Iesaia 2:11; Amosi 5:18; 8:3,9,13; Mika 4:6; 5:10-14. bateꞌna peá UmáNgkuꞌ to moisá. Tiꞌara ara haweꞌ hadua tauna to moisá. Mogalo malaꞌeka to i surugáꞌ, tiꞌara woꞌo raisá. Hai Ánáꞌna Pueꞌ Ala, tiꞌara woꞌo Naisá. 33Mewaliꞌ hangaa-ngaa maingáꞌ-ingáꞌkou hai timamakou oaꞌ, láwiꞌ tiꞌara niꞌisá tempó pewaliꞌána. 34Pewaliꞌna nodo ngkóráꞌ pándiriꞌ deꞌe: Hadua pueꞌ támbi moliwo ina pohuꞌ lao i kótá to karaoꞌ. Hangko tiꞌara mani pohuꞌ, ia mampolaluitaꞌáheꞌ hawiꞌna, haneꞌi hadua-hadua naweꞌiheꞌ bágóꞌ. I topokámpái babaꞌ, nahángáꞌá, ‘Maingáꞌ-ingáꞌkoꞌ!’
35-36Mewaliꞌ, kómu woꞌo hangaa-ngaa timamakou, bona ane hangkaꞌ-hangkaꞌ perái haweꞌ pueꞌ támbi, tiꞌarakou ina nahumba tangaꞌmi letaꞌ. Láwiꞌ tiꞌara niꞌisá ba impirá kaꞌina haweꞌna pueꞌ támbi, ba mepulo, mabaa, kalumbaꞌ, ba i tangaꞌ káindi. Noꞌonoꞌ woꞌo kómu, hangaa-ngaa timamakou oaꞌ. 37Apa to Kuhángáꞌákou deꞌe, Kuꞌuliꞌ woꞌo i upu-upu tauna: Nipatimama lalumi!”
Currently Selected:
Marakusi 13: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
