TEALIAN 20
20
Abraham tukon Abimelekh
1Abraham biyol luwedoi Mamre taambikon lalom kobuta Kanaan, tukon dungol tataap doi napokalalatanan ko Kades tukon Syur. Bubula kotempo doi bundu, salataa yana dungol doi Gerar, 2#Tea. 12:13, 26:7 yana bantile baikon Sara naboloki daanoon utuso piyoto. Tobikon doiya Tomundo Abimelekh luwedoi Gerar sumboliiyo kona bobitokon mobabayo Sara doi yana. 3Daano kopopokee ko Mian Bisa okitakene kobutongo doi tomundodoo doi olumon lalomo tukon bantile, “Ikoo naikon mate, sabab lapamo ikoo alayo boinedoo; sabab yana anomo kona lakai.”
4Bai Abimelekh akiyon napolong taape Sara, maka dotomundodoo bantile, “Temeneno, yaku aki kusalah! Oilakai Temeneno naikon sakisaayo yaku tukon kubangsa? 5Abraham susuungo bantile baikon boinedoo utuso piyoto, tukon boinedoo bantile koidan buno doiya. Yaku lapamo kubaiyo dolanggedoo tukon noanggu lalom mobilisii, jadi yaku aki kusalah.”
6Maka ko Mian Bisa timbiliyo doi olumonoo lalomo, “Takainomo, Yaku toiyo baikon ikoo lakukanggene tukon noa lalom mobilisii. Tobikon doiya Yaku lapamo pantane ikoo momokubai lalim doiya-Ku, tukon aki Kusodiikene ikoo motaape boinedoo. 7Bai dia budodoo, abalinggene yana doi na lakai. Konalakai meeng konabi, tukon yana naikon sambeang tuuk doikoo sulano naaki mumate. Bai kalu ikoo aki muabalinggene, neneeke, ikoo tukon sasaibino komu mian naikon mate!”
8Modoakon kooloyono, dowa-dowa soono, Abimelekh uange sasaibino konapagawe tukon popitoikene doi yanila sasaibino komo tealidoo. Yanila teali matakut tuuno. 9Lapa doiya Abimelekh uange Abraham tukon mansadai, “Oila komo lapamo ikoo kubaiyo doi kami? Oila dakusalah doikoo, tobikon mulubatene nabalaa nia doi butonggu tukon kubatomundoan? Tutuu aki namoola ikoo kubaiyo buno doiya doiyaku. 10Bulaando ikoo mokubaiyo bunokoiya?”
11Abraham timbiliyo, “Yaku pikikene, dimbaa akiyo komian momatakutene ko Mian Bisa, tobikon yaku naikon inakate doi mian moiyase dakuboloki. 12Koidan kai yanadoo bisa utusonggu piyoto. Kami meeng kotama, bai tina komo posasala, tukon doibundu kami pokila. 13Maka salataa ko Mian Bisa sumboliiyaku motinggale kotamanggu nabonua tukon lausala doi lipu-lipu mododoon, yaku bantile doi kuboloki, ‘Okitakene komu setiaan doiyaku tukon bantile doi memeeng komian baikon yaku nia utusomu langgongo.’ ”
14Lapa doiya Abimelekh abalinggene Sara doi Abraham, tukon doiya tempodoo yana beekene koidan koata-ata, domba tukon sapi. 15Dotomundodoo bantile doi Abraham, “Naiyamo sasaibino dakulipu; tataapkanggene inaando komu iniyas.” 16Maka yana bantile doi Sara, “Koutusomu langgongo lapamo yaku beena sololoon kodoi perak buno paloosan doi sasaibino komian baikon ikoo tutuu aki musala.”
17-18Ko Temeneno lapamo kubaiyo kamba sasaibino koboine doi Abimelekh nakamali sabab kadadian tukon Sara Abraham nabolokidoo. Maka Abraham sambeang doi Mian Bisa, tukon ko Mian Bisa aline Abimelekh, naboloki, tukon naata-ata moluko, maka doboiboinedoo moola mosuung koidan.
Currently Selected:
TEALIAN 20: LAIBGZ
Highlight
Share
Copy
Want to have your highlights saved across all your devices? Sign up or sign in
