TEALIAN 27
27
Ishak balakaatiyo Yakub
1Daano kooloyo meeng, salataa Ishak motuamo tukon piito koidan, yana uange Esau, napau langgongo, maka bantile doi yana, “Kupau!”
“Oode, Tama,” Esau timbiliyo.
2Ishak bantile, “Ikoo toiyo yaku motuamo tukon akimo naikon tubo malumbit koidan. 3Jadi alayo komu pana batango tukon mupana-pana, tauso mangasu meeng koiyayon doi padang. 4Saange namonondok buno komo yaku yase, maka babakanaku. Lapa yaku kaane, naikon yaku beekene daku balakaat doi koo moakiyon kumate.”
5Ishak tukon Esau naposalitaiyanoo Ribka lengele. Maka salataa lapa Esau ampakon mangasu, 6Ribka bantilemo doi Yakub, “Sodokai yaku lapa lengele tamamu mobantiikene doi Esau bunonaiya, 7‘Asuwomo meeng koiyayon tukon saange namonondok tuuk yaku. Lapa yaku kaane, naikon yaku beekene daku balakaat doi koo doi Temeneno salaano, moakiyon kumate.’ 8Jadi, kupau,” Ribka bantil koidan, “ndongoliiyo tukon kubaiyomo oila daku binantil nia. 9Tauso doi ndayayon natampat, tukon lilike lua kombembe napau momalanak, sulano kusaange teali tamamu nakinaan inias. 10Doibundu babayo doi yana sulano nakaane, tukon lapa doiya yana naikon beekene kona balakaat doi koo moakiyon yana namate.”
11Bai Yakub bantile doi tinano, “Tina, bolikon kai Esau butongo daano kobullono, bai butonggu aki? 12Inai-inaikene tama nataape kobutonggu tukon toiyo baikon yaku okoliiyo yana; maka yana bolikon beena balakaat, bai kutukiyo yaku.”
13Tinano timbiliyo, “Inai molili, Pau. Sodiiyomo yaku komo tanggunge sasaibino kona kutuk. Kubaiyomo oila daku binantil, ndokiiyo dombembe-mbembedoo.” 14Maka Yakub tauso moalayo dombembe-mbembedoo tukon babayomo doi tinano, maka Ribka saange Ishak nakinaan inias. 15Doibundu Ribka alayo Esau nabokukum momonondok tuuno, moabese doi bonua, maka kolombike doi Yakub. 16Yana bungusikene mbembedoo napau kulito doi Yakub botokono tukon bulungo moakiyo kobullono. 17Maka yana beekene doi Yakub mosinaango monondok tukon roti molapamo yana kubaiyo.
18Lapa doiya Yakub tauso doi tamano tukon bantile, “Tama!”
“Oode,” Ishak timbiliyo, “indee ikoo, Esau kabai Yakub?”
19Yakub timbiliyo, “Esau tama napau langgongo; tama nateteba yaku lapamo lakukene. Osulango tukon kaane kosail moinasu yaku mobabayo nia, sulano tama moola balakaatiyo yaku.”
20Ishak bantile, “Mosobit tuuno komu matapuan, daku Pau.”
Yakub timbiliyo, “Sabab ko Temeneno Mian Bisa itama nasinosubai lapamo tulungiyo yaku.”
21Maka Ishak bantile doi Yakub, “Maimo lolanikon sulano yaku moola taape ikoo. Kai bisa ikoo Esau?” 22Yakub koolaniyo kotamano, tukon tamanodoo taape yana maka bantile, “Alalomu buno Yakub nalalo, bai botokomu buno Esau botokono.” 23Ishak aki natingoniiyo Yakub sabab kobotokono daano kobullono buno Esau botokono. Bai tempo Yakub batotobo binalakaati, 24yana daano masadai koi-koidan, “Kai bisa ikoo Esau?”
“Bisa,” Yakub timbiliyo.
25Maka Ishak bantile, “Beekanaku dosailoo. Lapa yaku kaane naikon yaku beekene daku balakaat doi koo.” Yakub beekene dosailoo doi yana tukon koidan anggur soisik sulano nainimun. 26Maka tamano bantile doi yana, “Mai kolanikon koidan, Pau, tukon umayomo yaku.” 27#Ibr. 11:20 Salataa Yakub kolaniyo sulano naumayo, Ishak somakene Esau napakean boono, maka yana binalakaatimo. Ishak bantile, “Monondok daku pau boono buno padang boono molapamo Temeneno balakaatiyo. 28Boliisi Mian Bisa nabeena doi koo kosoiluk luwedoi timbu, tukon kubaiyo komu asi-asi molumbang! Boliisi Yana beena doikoo gandum tukon anggur molobi-lobian! 29#Tea. 12:3 Boliisi kobangsa-bangsa nateali muata tukon bangsa bense-benseno nasosuba doikoo. Boliisi mukuasaiyo sasaibino komu montolutusan, tukon kotinamu nakatulunan nasosuba doi salaamu. Boliisi nakinutuki sasaibino komian mokutuke ikoo tukon binalakaati komian mobalakaatiyo ikoo.”
Esau makabi balakaat luwedoi Ishak
30Mosobit sala lapa Ishak beekene kona balakaat tukon Yakub tauso, Esau, utuso langgongo, mulemo doi namangasuan. 31Yana lakon masaang kinaan momonondok maka yana babayo doi tamano, yana bantile, “Osulango, Tama, tukon kaane sail yaku mobabayo tuuk Tama, sulano Tama namoola balakaatiyo yaku.”
32“Indee ikoo?” Ishak sadaiyo.
“Esau Tama napau langgongo,” yana timbiliyo.
33Ishak tambuun mbombokon sasaibino kobutongo, tukon yana masadai, “Kalu buno doiya, indee komo lapamo mangasu iyayon tukon babayo doi yaku budodoo? Yaku lapamo kaane akiyon mulubat. Maka yaku lapamo beekene daku balakaat labino doi yana, tukon diabudodoo balakaatoo tealimo yana kotumbuno sidutu-posidutukon.”
34Salataa Esau ndongoliiyo doiya, yana kokiil tuuno tukon poloon tuuno, maka yana bantile, “Balakaatiyomo yaku kai koidan Tama!”
35Ishak bantile, “Utusomu pioto lapamo lubat doisumai tukon kokoliiyo yaku. Yana lapamo alayo kobalakaat kona bisaan naikon yaku beekene doi ikoo.”
36 #
Tea. 25:29-34
Esau bantile, “Naiyamo koluano luunggon yana nakokoliiyo yaku. Bisamo kosambuno Yakub. Yana lapamo alayo daku hak salaku pau langgong, tukon dia budodoo yana alayo koidan balakaat motuuk doi yaku. Oila Tama akiyono kobalakaat bailon buat yaku?”
37Ishak timbiliyo, “Yaku lapamo tealikene yana mutuan, tukon sasaibino kona montolutusan yaku tealikene naata. Yaku lapamo beekene doi yana gandum tukon anggur. Diabudodoo kiyono kooi-oila koidan momoola yaku lakukene tuuk ikoo, Kupau!”
38 #
Ibr. 12:17
Esau aki naiyase tade makabi doi tamano, “Oilakai Tama tolongo meeng kobalakaat modaano? Balakaatiyomo yaku koidan, Tama!” Maka tambuuno koidan yana kokiil.
39 #
Ibr. 11:20
Doibundu Ishak bantile doi yana,
“Akiyo naikon daano kosoiluk luwedoi timbu buat ikoo,
akiyono naikon daano koasi momolumbang tuuk ikoo.
40 #
Tea. 36:8; 2Tom. 8:20 Ikoo naikon tubo luwedoi musabel,
mau teali ata utusomu pioto,
bai kalu ikoo nggimal,
ikoo naikon tongosobii luwedoi nakuasa.”
41Maka Esau mesikitene Yakub sabab kotamano lapamo beekene konabalakaat doi utuso piotodoo. Napopikikon, “Akimo naikon namalumbit kotamano naikon matemo tukon lapa kita poloonggene, yaku naikon akateyomo Yakub.”
Ishak sumboliiyo Yakub nataus doi Laban
42Salataa Ribka lengele kaliangano Esau nateteloo, yana monggiuanggene Yakub tukon bantile, “Ndongoliiyo, koutusomu langgongo Esau konaniat soboliyo kona misikitan tukon akateyo ikoo. 43Nah lakukene oila daku binantil nia. Tauso tukon mosobit doi utusonggu langgongo Laban doi Haran, 44tukon dungolo doi yana bubula kotempo kona kalumbit, polong koutusomu langgongo tade kona nggimalan, 45tukon yana toliminggene oila komo lapamo ikoo lakukene tuuk doi yana. Doibundu yaku naikon mosumbolii mian mobabayo ikoo mule doisumai. Aki kuiyase nalapus dakupau lua doi oloyo mopokakana.”
46Maka Ribka bantile doi Ishak, “Aki kusanaang tuuno momokita Esau naboloki-boloki moluwedoi bangsa benseno molulubatonoo. Kalu Yakub poala koidan tukon Het boineno, tadukai kumate tolong.”
Currently Selected:
TEALIAN 27: LAIBGZ
Highlight
Share
Copy
Want to have your highlights saved across all your devices? Sign up or sign in
