FARFYAR RO MANWAWANSYA 5
5
Ananias ma Safira
5:1-11
1Snon oso ḇeso snori Ananias. I kuker swari snori Safira suḇoḇ saprop mnuk oso. 2Kuker fawawi ro swari Safira sukram maeja saprop ani ḇarya ma ḇaryakada Ananias duni fa ryiri ro ḇarpon manwawan ansi siwesna. 3Ḇape Petrus ikofen, ḇo doḇo: “Ananias, rosai ḇeḇewari ibiris ḇyewayam snembri, isof wafrowes Rur Ḇesren ya ma wakram maeja ro yaf boḇ ani ḇarya? 4Rofyor boḇ saprop ani ḇaim, saprop beirya, ma rofyor boḇi kwar, maeja ya kako isya ro ḇramsi? Snaro kwara ro snembri fa wafrur roi ḇeradine? Wafrowes snonkaku ḇa, ḇoi wafrowes Allah.” 5Rofyor Ananias imnaf wos ani isapi ma imarbos beri. Inja kawasa kam ḇemnaf roi ḇeḇesya anine simkak fafayaḇa. 6Ma romawa babo ono srama; spankun ḇemar ani, ma ssuni ro waryar randi, fa sikriri.
7Indokada oras rikior nawas wer, Ananias swari syun ḇoi ifawi roi ḇeḇesya kwar ya ḇa. 8Petrus ikofen faroi, ḇo doḇo: “Wakofen kaku faro aya, maeja ḇero saprop muḇoḇ ani irya kamke?”
Bin ani kyarem, ḇo doḇo: “Kaku rarirya.”
9Petrus ikofen: “Snaro muḇe oser fa mufrowes bir Manseren Rur Ḇyedi? Mame, snonkaku insandi ḇekrir swambri sya, si ḇeyores ro ḇarpon kedwa ya ma nari sakun au kako ro waryar ḇeḇondi.” 10Rofyor ani beri bin ani isapi ro ḇarpon Petrus wemin ḇyesu ya ma imarbos beri. Rofyor ani snonkbor ansi ssun, sisma bin ani imar kwar, inja ssuni ro waryar ya randi ma sikriri fanam swari. 11Inja jemaat ani ḇesiper ma kawasa ḇemnaf roi ḇeḇesya ine simkak fafaya ḇa.
Aḇyair ma fasasnai kanandor
5:12-16
12Ma manwawan ansi sifrur aḇyair nabor ma fasasnai kanandor ro fandu kawasa ḇeḇor ansi. Kawasa ḇekyarsya kam siryur ḇesya kwar ro rumbrawer Salomo kuker ḇaḇeoser. 13Snonkaku ḇeso sya simku ḇa fa seoser kuker si. Rariryano kawasa ḇeḇor ansi kam semaf si. 14Ma faḇaḇye muma snonkaku ḇefnoḇek fa ḇekyar Manseren sibor kaku iḇye snon ma bin, 15rarirya ssun ḇeduf ono ḇeḇondi, ḇenyan ḇeba, ma srir si fa sḇarek ro kamboi ro yar sena, insa Petrus rofyor imbrainuk, nin ḇyedi dunuk ro si. 16Ma snonkaku ḇeḇor ḇeraker mnu-mnu fanam Yerusalem kako semaraniḇo srama ssun ḇeduf sesi ma snonkaku rurḇemaḇak iswoḇer sya. Ma sikam ḇyuk pararei faro si.
Manwawan ansi seḇefaspar ro bui
5:17-25
17Ḇarpurya Imam Ḇeba kuker ḇeso isya, isoine snonkaku ro rarwas Saduki sirandak fa smunwarek si, snar sisnesna namsor kaku ḇeri, 18inja sfor manwawan ansi fa sismai ro bui ro mnu ya. 19Ḇape rofyor roḇ kwar Manseren malaikat ḇyesi oso syeḇen kedwai ḇeḇor ro bui ma dunsi ḇeḇondi ma ikofen: 20“Mkora, mkores ro Rum Allah ma mko ḇaryas wos ḇekenem ya faro kawasa ḇeḇor ansi.”
21Seuser anun ani, ma fyor arwo babo sra ssun ro Rum Allah ma sirandak ssḇuk farkarkor ro dia. Rofyor ani Imam Ḇeba ma ḇeso isya siwan Kankain Karkara Agama fa siryur, isoine ḇebarara kankain er Israel sya kam, posa siwan fa ssun manwawan ansi ro bui. 22Ḇape rofyor snonkaku siwan ansi sra ro bui, fama sisrow manwawan ansi ro dia ḇa. Inja skaḇer fa sikofen ḇayir, 23ḇo soḇo: “Inkora ḇoi bui isisen pyum kaku ma manwadwaren sya kam sisya ro moḇ sena ro ḇarpon kedwaya, ḇape rofyor inkoseḇen kwar, inkosrow snonkaku osero ḇa ro bui.” 24Rofyor mananir ḇewaren Rum Allah ma mananir imam-imamsya simnaf wos anna, seḇirḇar ma sifuken inja rosai ḇeḇesya kwar kuker manwawan ansi. 25Ḇape snon oso ryama faro si ma ikofen: “Mkomame, snonkaku mkoḇefa ḇesun ro bui, sisya ro Rum Allah ma ssḇuk farkarkor faro kawasa ḇeḇor.”
Manwawan ansi sisya ro ḇarpon Kankain Karkara Agama – Ananun Gamaliel
5:26-42
26Inja mananir ḇewaren Rum Allah kuker min ḇyesi sra ssun manwawan ansi, ḇape kuker aḇaḇen, snar simkak nari kawasa ḇeḇor ansi ssosi kuker karui.
27Ssun manwawan ansi ḇeḇarpon Kankain Karkara Agama. Imam Ḇeba ifuken si, 28#Mat. 27:25doḇo: “Inkodwarek pakrek mko kwar insa mkoḇuk farkarkor kaker awer. Ḇape mko ḇaryas farkarkor mkoḇena, ro Yerusalem ḇesiper, ma mkomarisen mkorir Snon ani rik ḇyedi fa nek inko.” 29Ḇape Petrus ma manwawan ḇeso ansi skarem, soḇo: “Inkoso syadi faro Allah ro inkoso snonkaku. 30Up koḇesi Allah sedi ḇyaus Yesus kwar, mkomun i ma mkopai ro aprop. 31I kada isma saḇsiḇer ro Allah mankundi ḇar raku ḇyedi fa ḇyemanfarkin ḇeḇeknam koreri, insa Israel simbror ma sisma ampun ro sasar sena. 32Ma inkoine inkoḇe saksi ro roi ḇeḇor annane, inko ma Rur Ḇesren, Allah ḇyuk faro kawasa sya kam ḇeḇeuser Yesus.”
33Simnaf wos anna sisnesna nfafardun ma skara fa siḇe smun manwawan ansi. 34Ḇape snon Farisi oso ro fandu kankain ani snon ḇefawinananem Refo Yahudi snori Gamaliel, kawasa sibor semafi, iyori ma dor, insa siwan snonkaku ansi fa sisasyar resari. 35Raimnai ikofen faro kankain ani: “Ne, kawasa Israel, mkokara naḇye resari, rosai mkomarisen mkofrur faro snonkaku sine. 36Snar ro ḇepon Teudas ikḇawes kwar ma dow mankundi ḇesnon ḇeba, ma snonkaku ḇesoi sya indokada utin rifiak; ḇape smun i ma ḇesoi sya kam sibur ḇesisye ma roi ḇeḇesya ani imnai. 37Posa kwar roi, ro fafisu fasfas epen ḇarbor snonkaku sya, Yudas snon Galilea oso ikḇawes. Dun kawasa sibor kaku fa siso i ro mbrus ḇyedi, ḇape ikako imar, ma ḇesoi sya kam siḇesisye. 38Eḇedari yakofen faro mko: Mkopok mkofrur roi oso ḇaḇeri faro snonkaku ansine. Mkorir si, snar rofyor roi sifrur ine ḇyeknam ro snonkaku nari ipromes, 39ḇape rofyor ḇyeknam ro Allah nari mkopok mkodwarek snonkaku sine ḇa; snar imbude mkosampum Allah.” 40Rarirya siso farkarkor ani. Ma sor manwawan ansi fa siprer si ma sidwarek si insa ssḇuk farkarkor kaker awer kuker snonsnon Yesus. Raimnai siwan si fa sibur.
41Manwawan ansi sibur kankain ani kuker raryaḇ ḇeba, snar skara kwar sikako sakḇe kandera ma san anonef snar snonsnon Yesus. 42Rarirya ras-ras kam ssḇuk farkarkor pdef ro Rum Allah ma ro kawasa rum sena ma sḇaryas Ankankinem Ḇeḇye ḇekur Wairek.
Currently Selected:
FARFYAR RO MANWAWANSYA 5: LAIBHW
Highlight
Share
Copy
Want to have your highlights saved across all your devices? Sign up or sign in
FARFYAR RO MANWAWANSYA 5
5
Ananias ma Safira
5:1-11
1Snon oso ḇeso snori Ananias. I kuker swari snori Safira suḇoḇ saprop mnuk oso. 2Kuker fawawi ro swari Safira sukram maeja saprop ani ḇarya ma ḇaryakada Ananias duni fa ryiri ro ḇarpon manwawan ansi siwesna. 3Ḇape Petrus ikofen, ḇo doḇo: “Ananias, rosai ḇeḇewari ibiris ḇyewayam snembri, isof wafrowes Rur Ḇesren ya ma wakram maeja ro yaf boḇ ani ḇarya? 4Rofyor boḇ saprop ani ḇaim, saprop beirya, ma rofyor boḇi kwar, maeja ya kako isya ro ḇramsi? Snaro kwara ro snembri fa wafrur roi ḇeradine? Wafrowes snonkaku ḇa, ḇoi wafrowes Allah.” 5Rofyor Ananias imnaf wos ani isapi ma imarbos beri. Inja kawasa kam ḇemnaf roi ḇeḇesya anine simkak fafayaḇa. 6Ma romawa babo ono srama; spankun ḇemar ani, ma ssuni ro waryar randi, fa sikriri.
7Indokada oras rikior nawas wer, Ananias swari syun ḇoi ifawi roi ḇeḇesya kwar ya ḇa. 8Petrus ikofen faroi, ḇo doḇo: “Wakofen kaku faro aya, maeja ḇero saprop muḇoḇ ani irya kamke?”
Bin ani kyarem, ḇo doḇo: “Kaku rarirya.”
9Petrus ikofen: “Snaro muḇe oser fa mufrowes bir Manseren Rur Ḇyedi? Mame, snonkaku insandi ḇekrir swambri sya, si ḇeyores ro ḇarpon kedwa ya ma nari sakun au kako ro waryar ḇeḇondi.” 10Rofyor ani beri bin ani isapi ro ḇarpon Petrus wemin ḇyesu ya ma imarbos beri. Rofyor ani snonkbor ansi ssun, sisma bin ani imar kwar, inja ssuni ro waryar ya randi ma sikriri fanam swari. 11Inja jemaat ani ḇesiper ma kawasa ḇemnaf roi ḇeḇesya ine simkak fafaya ḇa.
Aḇyair ma fasasnai kanandor
5:12-16
12Ma manwawan ansi sifrur aḇyair nabor ma fasasnai kanandor ro fandu kawasa ḇeḇor ansi. Kawasa ḇekyarsya kam siryur ḇesya kwar ro rumbrawer Salomo kuker ḇaḇeoser. 13Snonkaku ḇeso sya simku ḇa fa seoser kuker si. Rariryano kawasa ḇeḇor ansi kam semaf si. 14Ma faḇaḇye muma snonkaku ḇefnoḇek fa ḇekyar Manseren sibor kaku iḇye snon ma bin, 15rarirya ssun ḇeduf ono ḇeḇondi, ḇenyan ḇeba, ma srir si fa sḇarek ro kamboi ro yar sena, insa Petrus rofyor imbrainuk, nin ḇyedi dunuk ro si. 16Ma snonkaku ḇeḇor ḇeraker mnu-mnu fanam Yerusalem kako semaraniḇo srama ssun ḇeduf sesi ma snonkaku rurḇemaḇak iswoḇer sya. Ma sikam ḇyuk pararei faro si.
Manwawan ansi seḇefaspar ro bui
5:17-25
17Ḇarpurya Imam Ḇeba kuker ḇeso isya, isoine snonkaku ro rarwas Saduki sirandak fa smunwarek si, snar sisnesna namsor kaku ḇeri, 18inja sfor manwawan ansi fa sismai ro bui ro mnu ya. 19Ḇape rofyor roḇ kwar Manseren malaikat ḇyesi oso syeḇen kedwai ḇeḇor ro bui ma dunsi ḇeḇondi ma ikofen: 20“Mkora, mkores ro Rum Allah ma mko ḇaryas wos ḇekenem ya faro kawasa ḇeḇor ansi.”
21Seuser anun ani, ma fyor arwo babo sra ssun ro Rum Allah ma sirandak ssḇuk farkarkor ro dia. Rofyor ani Imam Ḇeba ma ḇeso isya siwan Kankain Karkara Agama fa siryur, isoine ḇebarara kankain er Israel sya kam, posa siwan fa ssun manwawan ansi ro bui. 22Ḇape rofyor snonkaku siwan ansi sra ro bui, fama sisrow manwawan ansi ro dia ḇa. Inja skaḇer fa sikofen ḇayir, 23ḇo soḇo: “Inkora ḇoi bui isisen pyum kaku ma manwadwaren sya kam sisya ro moḇ sena ro ḇarpon kedwaya, ḇape rofyor inkoseḇen kwar, inkosrow snonkaku osero ḇa ro bui.” 24Rofyor mananir ḇewaren Rum Allah ma mananir imam-imamsya simnaf wos anna, seḇirḇar ma sifuken inja rosai ḇeḇesya kwar kuker manwawan ansi. 25Ḇape snon oso ryama faro si ma ikofen: “Mkomame, snonkaku mkoḇefa ḇesun ro bui, sisya ro Rum Allah ma ssḇuk farkarkor faro kawasa ḇeḇor.”
Manwawan ansi sisya ro ḇarpon Kankain Karkara Agama – Ananun Gamaliel
5:26-42
26Inja mananir ḇewaren Rum Allah kuker min ḇyesi sra ssun manwawan ansi, ḇape kuker aḇaḇen, snar simkak nari kawasa ḇeḇor ansi ssosi kuker karui.
27Ssun manwawan ansi ḇeḇarpon Kankain Karkara Agama. Imam Ḇeba ifuken si, 28#Mat. 27:25doḇo: “Inkodwarek pakrek mko kwar insa mkoḇuk farkarkor kaker awer. Ḇape mko ḇaryas farkarkor mkoḇena, ro Yerusalem ḇesiper, ma mkomarisen mkorir Snon ani rik ḇyedi fa nek inko.” 29Ḇape Petrus ma manwawan ḇeso ansi skarem, soḇo: “Inkoso syadi faro Allah ro inkoso snonkaku. 30Up koḇesi Allah sedi ḇyaus Yesus kwar, mkomun i ma mkopai ro aprop. 31I kada isma saḇsiḇer ro Allah mankundi ḇar raku ḇyedi fa ḇyemanfarkin ḇeḇeknam koreri, insa Israel simbror ma sisma ampun ro sasar sena. 32Ma inkoine inkoḇe saksi ro roi ḇeḇor annane, inko ma Rur Ḇesren, Allah ḇyuk faro kawasa sya kam ḇeḇeuser Yesus.”
33Simnaf wos anna sisnesna nfafardun ma skara fa siḇe smun manwawan ansi. 34Ḇape snon Farisi oso ro fandu kankain ani snon ḇefawinananem Refo Yahudi snori Gamaliel, kawasa sibor semafi, iyori ma dor, insa siwan snonkaku ansi fa sisasyar resari. 35Raimnai ikofen faro kankain ani: “Ne, kawasa Israel, mkokara naḇye resari, rosai mkomarisen mkofrur faro snonkaku sine. 36Snar ro ḇepon Teudas ikḇawes kwar ma dow mankundi ḇesnon ḇeba, ma snonkaku ḇesoi sya indokada utin rifiak; ḇape smun i ma ḇesoi sya kam sibur ḇesisye ma roi ḇeḇesya ani imnai. 37Posa kwar roi, ro fafisu fasfas epen ḇarbor snonkaku sya, Yudas snon Galilea oso ikḇawes. Dun kawasa sibor kaku fa siso i ro mbrus ḇyedi, ḇape ikako imar, ma ḇesoi sya kam siḇesisye. 38Eḇedari yakofen faro mko: Mkopok mkofrur roi oso ḇaḇeri faro snonkaku ansine. Mkorir si, snar rofyor roi sifrur ine ḇyeknam ro snonkaku nari ipromes, 39ḇape rofyor ḇyeknam ro Allah nari mkopok mkodwarek snonkaku sine ḇa; snar imbude mkosampum Allah.” 40Rarirya siso farkarkor ani. Ma sor manwawan ansi fa siprer si ma sidwarek si insa ssḇuk farkarkor kaker awer kuker snonsnon Yesus. Raimnai siwan si fa sibur.
41Manwawan ansi sibur kankain ani kuker raryaḇ ḇeba, snar skara kwar sikako sakḇe kandera ma san anonef snar snonsnon Yesus. 42Rarirya ras-ras kam ssḇuk farkarkor pdef ro Rum Allah ma ro kawasa rum sena ma sḇaryas Ankankinem Ḇeḇye ḇekur Wairek.
Currently Selected:
:
Highlight
Share
Copy
Want to have your highlights saved across all your devices? Sign up or sign in