MATIUS 9
9
Yesus ḇyuk pararei faro snon ḇepapipen oso
9:1-8
(Mrk. 2:1-12; Luk. 5:17-26)
1Inja Yesus dek kwar ro wai ya posa skokaḇor. Fyoroḇa skofyafer ro mnu marin ḇyedi. 2Ma kawasa ssun faro I snon ḇepapipen oso ḇeḇarek ro kamḇoi anenef ḇyedi. Rofyor Yesus myam kakyar sena Ikofen faro snon ḇepapipen ani: “Wakyare, ne, romawa Yedi nyaki sasar bena neḇepyos kwar.”
3Snon ḇefawinananem Refo Yahudi ono simnaf rarirya sikofen ro sisnesna, soḇo: “Idonef Allah.”
4Ḇape Yesus Ifawi swaruser sena inja Ikofen: “Snaro mkokara roi-roi ḇeḇyeḇa ro mkosnemna? 5Rosai ḇepyan ya, Yakofen: Sasar bena neḇepyos kwar, roḇaido Yakofen: Wakḇok ma wambran? 6Ḇape insa mkofawi, ro supswan ine Rumkun Snonkaku ipok ipyos sasar” – raimnai Ikofen faro snon ḇepapipen ani; – “Wakḇok, wakanow kamḇoi anenef bedi ma wabur ḇe rum bedi!”
7Ma snon ani iyori fa ibur. 8Ma kawasa ḇeḇor ḇemam roi ḇeḇesya ani simkak ma sisandik Allah ḇeḇuk kwar papoik ḇerarirya faro snonkaku.
Yesus dor Matius 9:9-13
(Mrk. 2:13-17; Luk. 5:27-32)
9Rofyor Yesus ibur kwar ro dia, Myam snon oso snori Matius kyain ro rum ḇeyor som, inja Ikofen faro i: “Waso Aya.”
Ma Matius iyori ma iso I.
10 #
Luk. 15:1-2
Ḇarpur ya rofyor Yesus danan ro Matius rum ḇyedi, ḇeyor som sibor srama ma snonkaku ḇesasar ono sanan kam kuker Yesus ma manfamyan Ḇyesi. 11Rofyor snon Farisi smam rarirya sikofen faro manfamyan Ḇyesi, soḇo: “Snaro Guru mkoḇedi danan kuker ḇeyor som ma snon sasar?”
12Yesus imnaf rarirya Ikofen: “Snonkaku ḇeprei sefandun ḇena monsyaḇa, ḇoi snonkaku ḇeduf sya siso ḇeḇefandun ḇena mon.” 13#Hos. 6:6; Mat. 12:7 Inja mkora, ma mkokara wos ine kankunesḇyedi isoine: “Roi Yaḇefandun ya isoine sne ḇesaswar ḇoi farsarser ḇa, snar Yarama fa yor ḇenapes sya ḇa, ḇoi Yor kawasa ḇesasar.”
Fakfuken ro mnuk farfor
9:14-17
(Mrk. 2:18-22; Luk. 5:33-39)
14Ḇarpur ya manfamyan Yohanes ḇyesi srama faro Yesus ma sifuken, soḇo: “Rariso indiri nko kuker Farisi sya nkoḇe farfor, mḇoi manfamyan besi sakfarfor ḇa?”
15Yesus kyarem farosi: “Inja manfakawin ya bati ḇyesi semarindiro fafisu manfakawin ya isya kyainus si? Ḇape fafisu isyama nari ssun manfakawin ya bur si ma ro fafisu ani insape nari sakḇe farfor.
16Snonkaku osoḇa beri syokop sansun ḇekwar kuker marker ḇebabo, snar nari marker ḇebabo ani ismeruk sansun ani, ma makmuk ya iba syadi wer. 17Rarirya kako somunaḇebabo seḇeser ro kibonḇeḇerereḇa snar rofyor rarirya ido nari kibon ḇeḇerere ani imef ma swan ansi sisbawer ma kibon ani kako ḇyemommom. Inja somuna ḇebabo sya seḇeser ro kibon ḇebabo kako, ma rarirya sukam suḇe ḇefaduru.”
Yesus ḇyaus Yairus inai ḇyedi ma ḇyuk pararei faro bin oso ro dafduf rik
9:18-26
(Mrk. 5:21-43; Luk. 8:40-56)
18Fafisu Yesus dawawos rarirya faro si, mananir rum nadi, oso, ryama faro Yesus ma ḇyan suba faro I, ḇo doḇo: “Inaikir ayedi insandi imar, ḇape yor fa rwama insa rwir ḇramsi roi, nari ikenem wer.”
19Inja Yesus iyor i fnoḇek manfamyan Ḇyesi ma siso snon ani.
20Rofyor ani bin ḇeduf dafduf rik ḇewampasi wambarek samfur seser risuru ryama fyanam Yesus ro ḇarpur Ḇyedi ma pyan ro Yesus syatu Ḇyedi pusyom na. 21Snar kyara ro sneri: “Mḇoi yapan monda ro syatu Ḇyenano nari yaprei.”
22Ḇape Yesus isiḇer fa myam i ma Ikofen: “Wamku ser snembri, ne inai Yedi, kakyar bedi ḇyuk pararei faro au kwar.” Inja ro fafisu ani beri bin ani iprei bos.
23Rofyor Yesus rya kwar ro mananir rum nadi ani rum ḇyedi ma myam siwuf sonker ma kawasa ḇeḇor ansi sembrus, 24ikofen faro si: “Mko sasyar bur, snar inai ine imarḇa, ḇoi denef. Ḇape simbrif I.” 25Rofyor kawasa ansi seḇeyaw kwar, Yesus syun ma duf inaikir ani ḇrasi, rofyor ani inaikir ani ikbok beri. 26Rarirya roi ḇeḇesya ani ḇyesno yar-yar sup ya fyor ani.
Yesus ḇyuk pararei faro snon ḇepraf risuru
9:27-31
27Rofyor Yesus imbran pdef mararan Ḇyedi ro diwa, snon ḇepraf risuru suyom I ma suyor ḇo suyoḇo: “Waswar nu, ne, Romawa Daud.”
28Ro fafisu Yesus syun ro rum oso, snon ḇepraf ansu ya sura faro I ma Yesus ikofen faro su: “Mukyar, nari Yapok yafrur raris fararyor muḇena?”
Sukarem, suyoḇo: “O Manseren, nukyare.”
29Raimnai Yesus pyan ro mkamor suḇesi ma Ikofen: “Musma raris moḇ mukyar rai.” Fyorya beri mkamor suḇesi sḇas. 30Ma Yesus danun pakrek faro su, ma ikofen: “Muswarepen naḇye insa snonkaku osero ifawi awer roine.”
31Ḇape rofyor susasyar ya beri suḇaryasi ro supya fyor ani ḇesiper.
Yesus ḇyuk pararei faro awer oso
9:32-34
32Rofyor snon ḇepraf ansuya susasyar, kawasa ssun faro Yesus awer oso biris ya iswoḇer i. 33Ma rofyor Ibiris ya ḇyeḇeyaw, awer ani dawawos beri. Kawasa ḇeḇor ansi sikandor soḇo: “Roi ḇera dine komam baim ro Israel.” 34#Mat. 10:25, 12:24; Mrk. 3:22; Luk. 11:15 Ḇape Farisi sya soḇo: “Kuker papoik ro mananir Ibiris Iyau Ibiris ya.”
Yesus iswarkuf kawasa ḇeḇor ansi
9:35-38
35 #
Mat. 4:23; Mrk. 1:39; Luk. 4:44 Rarirya Yesus Imbran yar ḇe mnu nakam; Ḇyuk farkarkor ro rum nadi ma ḇyaryas Ankankinem Ḇeḇye ro Ḇaḇesasoser Boiyaswa ma iyaw dafduf ma papipen nakaem. 36#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34 Myam kawasa ḇeḇor ansi, Yesus sneri dek kuker sawarwar faro si, snar simor ma ssoninyan imnis domba ḇena manfarandowsḇa. 37#Luk. 10:2Inja Ikofen faro manfamyan Ḇyesi: “Fafisu afufya imnis kwar, ḇoi yaf ya ibabo ḇeyinek sya sibor ḇa. 38Inja mkor faro tuan ḇena afuf ya, insa fyarem ḇeyinek sya sibor faro afuf ani.”
Currently Selected:
MATIUS 9: LAIBHW
Highlight
Share
Copy
Want to have your highlights saved across all your devices? Sign up or sign in
