1 Musa 19
19
Dosa Sodom
1Enggo kessa itamuèi si Abraham laus mo malaèkat sidua kalak i mi Sodom, janah gellap kessa ari soh mo kalak i. Kundul-kundul ngo si Lot tikanna i i pèntu pengkeruhen. Idah kessa mo kalak i, kèkè mo ia lako menimbaki. Nai mersembah mo ia i hadeppen kalak i, 2ninganna idokken, “Singgah mo kènè lebbè mi bagesku alè tuan. Ndorok mo kènè morih nèhè janah mermalam i bagesku. Baremben mula uè kè, ndorok mo kènè ndor ndungo janah menerrusken perdalanen ndènè.”
Tapi ialoi kalak i mo, “Lias atè mo, mermalam i kasèan kuta èn mo kami.”
3Tapi memmes mo ièlèk-èlèk si Lot, ujungna gabè rebbak mbengket mo kalak i dekket si Lot mi bagesna. Ihidangken si Lot mo pangaen merasa kalohon janah ipanggang mo roti cukup bai kalak i, nai mangan mo kalak i.
4Tapi tikan madèng meddem tamuè i, ikeppung kalak Sodom mo bages i. Karina daholi i kuta i situa-tua dekket anak perana roh ngo mi sidi. 5#Prh. 19:22-24 Idiloken kalak i mo taba si Lot, ninganna mengkuso, “Idikè ngo kalak siroh mermalam mi bagesmi? Sohken mo bainami asa campur kami dekketsa.”
6Karuar mo si Lot i bagesna nai, janah enggo kessa i itutup mo pèntu, 7nina mo taba kalak Sodom i, “Kènè alè dengan, memmes kupidoken taba kènè, ulang baing kènè kejahaten sibagidi. 8Dengkohken kènè mo, lot ngo dua kalak berungku simerbaju dèng. Idi mo kuberèken bai ndènè, janah baing kènè mo barang bakunè sambing katè ndènè dekketsa. Tapi ulang kekadè kènè tamungku idi, kerna kennah kuondingi ngo kalak i.”
9Tapi nina kalak Sodom i mo taba si Lot, “Laus ko! Kalak roh ngo ko naing mengatur kami? Kettu laus ko! Mula oda, mberraten mo penjerra nami bamu, daripada taba sidua kalak i.” Nai ionjemken kalak i mo si Lot janah mèter naing mo icèdai pèntu. 10Tapi mèter idoroken tamuè sidua kalak i mo tanganna mengeruah si Lot mi bages, nai itutup mo pèntu. 11#2 Raj. 6:18 Ipepètung kalak i mo mata karina kalak siniruar bages i, gabè oda nè jupa kalak i pèntu i.
Itadingken si Lot kuta Sodom
12Idokken tamuè sidua kalak i mo taba si Lot, “Mula lot dukakmu daholi, daberru, kèla bak purmaèn, barang kadè-kadèmu sidèbanna dèng i kuta èn, arahken mo kalak i karuar i sèn nai, 13ai naing kuripasken kami mo kuta èn. Enggo idengkoh Jahowa asung tersèngèt pengelako pengisi kuta èn, janah iutus ngo kami lako mengeripasken kuta Sodom èn.”
14Nai idahi si Lot mo duana ranto berruna i, idokken mo, “Kettu kènè mo laus i kuta èn nai, kerna naing iripasken Jahowa mo kuta èn.” Tapi idokdok kalak i ngo kial si Lot sambing i.
15Mayak nterrang ari, ikudus malaèkat sidua kalak i mo si Lot asa ikettu berkat, nina kalak i mo, “Kettu mo.” Laus mo ko dekket sinibagesmu dekket berrumu sidua kalak i isèn nai, asa ulang matè kènè tikan iripasken kuta èn. 16#2 Ptr. 2:7 Tapi bimbang ngo si Lot. Masèh ngo atè Jahowa midahsa, kernai iarahken tamuèna sidua kalak i mo si Lot dekket sinibagesna bak berruna sidua i mi ruar kuta i. 17Enggo kessai idokken sada kalak malaèkat i mo, “Lojang mo kènè, paluah kènè mo kessah ndènè. Ulang tumulih kènè mi podi, janah ulang kè mengadi i lembeng i. Mi delleng mo kènè mperrus, asa ulang matè kènè.”
18Tapi ialoi si Lot mo, “Ialè Tuan ulang pasulak kami mperrus mi delleng. 19Nemmuken enggo mo tuhu-tuhu iurupi kènè aku, janah paluahken kessahku. Tapi ndaohsu ngo delleng adoi; tah bakunè terayaki mara i aku gabè matè sinderrang madèng soh mi sidi. 20Tengen mo, ijolo adoi Lot ngo sosor, oda pella ndaoh. Paduè mo mi sidi aku asa maluah aku.”
21Ialoi malaèkat i mo, “Jadi, oda pella kuripasken sosor i. 22Ndor, Lojang mo kènè! Oda terbakin aku barang kadè pè, mula madèng soh kono mi sidi.”
Kerna idokken si Lot kuta i sosor, gabè igerari mo kuta i Zoar.
Persalpun kuta Sodom dekket Gomora
23Mbincar mo mataniari tikan soh si Lot mi Zoar. 24#Mat. 10:15, 11:23-24; Luk. 10:12, 17:29; 2 Ptr. 2:6; Jud. 7 Simpusta mèter roh mo udan barèrang merdengan api ibaing Jahowa mi kuta Sodom dekket Gomora. 25Iripasken mo kuta sidua i, bagi dekket lembeng bak suan-suanen bak karina pengisina. 26#Luk. 17:32 Tapi tumulih ngo mi podi ukum sinibages si Lot, mèter mobah mo ia gabè tihang batu sira.
27Njengkas sibarembenkenna, isudu si Abraham mo laus mi bekkasna cènder i hadeppen Jahowa sidari ilebbènkenna i. 28Itatap ia mo dempak Sodom dekket Gomora dekket mi karina lembeng, janah idah mo cèmber mercèmpul i tanoh i nai, tosè bagè cèmber pinoron. 29Bagi mo tikan iripasken Jahowa kuta i imo napa bekkas si Lot merkuta, ièngèt Dèbata ngo si Abraham janah mengurupi si Lot merberrus.
Asal-usul kalak Moab dekket kalak Amon
30Kerna buradan si Lot merian i Zoar, gabè laus mo ia mi delleng rebbak dekket berruna sidua i, gabè merian ibas sada liang mo kalak i. 31Nai idokken berruna situaen i mo taba anggina, “Bapa enggo mo tua-tua, janah i suberri aur èn, oda lot anak laki sindorok mengkabini kita, asa lot dukakta. 32Aci, sibaing mo bapa mabuk, nai rebbak meddem mo kita dekketsa asa lot dukakta.” 33Bernginkenna i iberrè kalak i mo bapana mènum anggur nai rebbak meddem mo berruna situaen i dekket bapana; tapi mabuk kalohon ngo ukum bapana, oda ngo ibettoh barang kadè masa.
34Siberembenkenna, nina situaen i mo taba anggina, “Enggo mo rebbak meddem aku berngin i dekket bapa. Berngin bon sibaing nola ma mo ia mabuk. Nai meddem mo ko dekketsa. Nai tubuhen dukak mo kita gennep luas.” 35Bagi mo bernginkenna i, ipemabuk kalak i mo si Lot, janah rebbak meddem mo berruna sipeduaken i dekketsa. Mabuk kalohon mo si Lot gabè oda tahu ia kadè masa. 36Jadi mbadan mo duana berru si Lot i, kumernaken bapana. 37Nai menubuhken anak mo berruna situaen i, ibaing gerarna si Moab. Ia mo empung simengusurken kalak Moab sibagèndari. 38Berruna sipeduaken pè menubuhken anak ma mo, ibaing mo gerarna si Ben-Ami. Ia mo empung simengusurken kalak Amon sibagèndari.
Currently Selected:
1 Musa 19: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
