1 Musa 35
35
Si Jakob bak denganna laus mi Betel
1 #
1 Ms. 28:11-17
Tikan sidari nina Dèbata mo taba si Jakob, “Aku ngo Dèbata sienggo pacidahken diringKu taba kono, tikan mperrus ko bai kakamu si Esau nai. Kettu mo laus mi Betel. I sidi mo kè merian janah bahan mo i sidi langgaten bangKu.”
2-3Nai idokken si Jakob mo taba dukak-dukakna dekket taba karina sirebbak dekketsa, “Lompat mo kita isèn nai mi Betel. Naing kubahan ngo i sidi sada langgaten bai Dèbata simengurupi aku tikan tersessak dekket mengondingi aku barang mikè aku laus. Patakken kènè mo karina gana-ganaen silot i bai ndènè; menguras mo kènè nai pakkè kènè mo oles mbersih.” 4Nai ipemberrèken kalak i mo taba si Jakob karina gana-ganaen silot bai kalak i, bagi dekket atting-attingna. Karinana i itanem si Jakob mo i terruh kayu mbellen i gembar kuta Sikhem.
5Tikan berkat si Jakob dekket denganna i, ibaing Dèbata mo buradan karina jelma silot i sikuliling kuta; gabè oda ijalang kalak i si Jakob dekket denganna i. 6Nai soh mo kalak i mi kuta Betel i tanoh Kanaan, ukum arnia Lus ngo gerar kuta i. 7Ibahan si Jakob mo i sidi langgaten janah igerari mo bekkas i “El-Betel,” kumarna ipeteridah Dèbata dirina i sidi tikan mperrus ia bai kakana nai. 8I sidi ma mo matè si Debora simendèdah si Rebekka kin, janah ikubur mo iterruh kayu mbellen kan selatan kuta i. Kumernakenna i ngo asa igerari kayu i “Kayu Tangis”.
Ipasu-pasu Dèbata si Jakob i Betel
9Enggo kessa balik si Jakob i Mesopotamia nai, ipeteridah Dèbata ngo dirina bana ninganna memasu-masu si Jakob. 10#1 Ms. 32:28 Nina Dèbata tabasa, “Oda nèngè kono igerari si Jakob tapi si Israel ngo.” Bagi mo igerari Dèbata ia si Israel. 11#1 Ms. 17:4-8 Nai idokken Dèbata dèng ma, “Aku ngo Dèbata perkuasa. Merrak-merrik mo ko. Mbuè mo bangsa pemparenmu janah gabè empung raja-raja. 12Nagerri sienggo Kuberèken bai si Abraham dekket bai si Isak, Kuberèken mo bamu dekket bai pinemparmu.” 13Kessa i laus mo Dèbata menadingken si Jakob. 14#1 Ms. 28:18-19 I bekkas mengerana Dèbata taba si Jakob, ipecènder ngo i sidi sada batu pernèngèten. Ipèlèken mo batu i bai Dèbata, merkitè iarirken anggur dekket minak zaitun mi babona. 15Bekkas i mo igerari “Betel”.
Matè si Rahel
16Enggo kessa i itadingken si Jakob dekket denganna mo Betel. Tikan mayak Efrata, dapet mo ketikana ketaring si Rahel. Tapi mahal ngo tubuh dukakna i. 17Tikan makin itestes iakap rabisen i, nina sibaso mo tabasa, “Pepihir ukurmu alè Rahel daholi ngo dukakmu i.” 18Tapi enggo njolmit ajal si Rahel, janah tikan naing mpostep kessahna, ibaing mo gerar anak i si Ben-Oni, tapi ukum bapana ibaing mo gerarna si Benjamin.
19Enggo kessa matè si Rahel, ikubur mo ia i biding dalan laus mi Efrata, bagèndari gerarna Betlehem. 20Ipecènder si Jakob mo sada batu i sidi mahan pernèngèten, soh sidari èn teridah dèng ngo kuburen si Rahel kumernaken batu pernèngèten i. 21Kessa i, iterrusken si Jakob ngo perdalanenna janah ipajek mo perundung-undungenna i sada bekkas ilausi kessa pak Eder. 22#1 Ms. 49:4 Tikan i sidi kalak i, rebbak meddem mo si Ruben dekket si Bilha, imo rading bapana. Terbertik ngo i taba si Jakob, gabè melaga kalohon mo ia.
Dukak-dukak si Jakob
(1 Kron. 2:1-2)
Lot ngo sipuluh dua anak si Jakob. 23Tubuh si Lea imo: si Ruben (anak situaen si Jakob), si Simeon, si Lewi, si Juda, si Isasar dekket si Zebulon. 24Tubuh si Rahel imo si Josep dekket si Benjamin. 25Tubuh si Bilha rading si Rahel imo si Dan bak si Naptali. 26Tubuh si Zilpa rading si Lea imo si Gad dekket si Asyer. Imo situbuh i Mesopotamia.
Matè si Isak
27 #
1 Ms. 13:18
Nai soh mo si Jakob mendahi bapana, imo i kuta Mamre i gembar Hebron. (Arnia empungna si Abraham pè merian i sidi ngo). 28-29Ibas umurna nggeddang kalohon, imo seratus ualuhpuluh tahun, matè mo si Isak. Nai ikubur anakna si Esau bak si Jakob mo.
Currently Selected:
1 Musa 35: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
