1 Pedro 2
2
Dirigwi do hanya ni ditiko do tiningela ka Txizimu
1Ngu toneto, lekani wotshe wubihi, makuhu, wuxengeteli, livengo, ni totshe tixaka ta siruko, 2nga vanana va tikereke, navelani masi a Moya kasi ku ona ma na sikota ku mi ninga kukula, mi ya kuhanyiswani, 3#Wona ni ka: Mat. 5:34-37. ngako mi di danzile wunene wa Mkoma. 4Ngonani hafuhi ka Mkoma, i ku dirigwi do hanya, adi di nga nyenywa ngu vathu, aniko i ku da kusawulwa ni kudhundeka masoni ka Txizimu. 5Nananu, kufana ni marigwi o hanya, mi fanete kuakwa, mi maha nyumba ya moya, ti to mi va vaphaxeli vo sawuleka, ava va humisako timhamba to tsakisa Txizimu, ngu Jesu Kristu. 6Ngu mhaka yeto, amu ka Mibhalo, ti ho ti taku: “Wonani, na veka ka m'ti wa Siyoni dirigwi da lisima di di nga sawulwa, do dhundeka; awule a kholwako ka dona, kha na mbi wiswa tingana.” 7#Wona ni ka: Mas. 118:22. Ngu toneto, mi katekile anu mi kholwako, aniko, ka vale va si kholwiko; dirigwi di vaaki va ngadi nyenya, di mahile dirigwi da hombe do tsanisa. 8Dirigwi diya di na va humba ni ku va wisa, va na humbwa ngu dona, nguko kha va kholwa ka Evhangeli, i ku ti va nga sikeliswa tona. 9Ngu toneto, anu mi liveleko lo sawuleka, vaphaxeli va wukoma, mfumo wo sawuleka, vathu va va lumbako Txizimu, kasiku mi na tsimbila mi txi rurutela mithumo ya kuxamalisa ya Txizimu, atxi txi nga mi humisa txidemani, txi mi wuyisa liwoningoni ka txona ko xamalisa; 10anu kale mi nga si nga vathu, kambe konkuwa, se mi vathu va Txizimu, anu kale mi nga sinzi kudivalelwa, se konkuwa mi mani kudivalelwa.
Hanyelo ya mkristu
11Na mi kombela, vo randeka ngutu, nga vaendi ni valuveli ditikoni muwa, mi leka kutiningetetela ka minavelo ya mmidi, ayi yilwako ni moya yotshe mbimo. 12Wutomi wanu hagari ka va va si kholwiko, wu nave wa wunene ngutu, kasi ku ngako va txi mi lumbeta, kuva mi di vabihi, vona va na yi ziva mithumo yanu ya yinene, se ve dhumisa Txizimu ka ditshiku da kuta ka txona. 13Ngu mhaka ya Mkoma, ti vekeni hahatshi ka milayo ya wukoma wa ha mafuni: Ka mfumeli, ni ka wa hombe, 14ni ka vafumeli va va nga ningwa ngu ngene, mtamo wo tsayisa vabihi ni kudhumisa avale va mahako ta tinene. 15Nguko, Txizimu txi lava kumalata wuphukuphuku ngu mithumo yanu ya yinene. 16Hanyani nga vathuseki; kambe, mi nga thumiseni wuthuseki wanu kasi kufenengeta wubihi, aniko hanyani nga sithumi sa Txizimu. 17Vekani txithavo ka votshe vathu. Randani kuhanyelana. Thavani Txizimu. Thavani mfumeli.
Txikombiso txa kuxaniseka ka Kristu
18Anu sithumi, mi fanete kutiveka hahatshi ka vanyamne vanu, mi va komba txixonipho txo hetiseka, i si nga ka vale i ku vavanene dwe, kambe ni ka vale i ku vo karata. 19Nguko i kateko ngako m'thu a txi timisela sixaniso ngu mhaka ya Txizimu, hambi a txi xaniswa a si nga ni mnandu. 20I hakhelo muni mi fanelako ku yi mana kutimiselani kwanu, ngako mi txi tsayiswa ngu sionho si mi nga si maha, kani? Aniko, ngako mi txi mana sixaniso ngu kumaha wunene, kutimisela kwanu ka tsakisa Txizimu. 21Ngu toneto, mi nga dhanelwa tona, nguko hambi Kristu nene, a tumete kuxaniswa ngu mhaka yanu, kasi ku mi siyela txikombiso, ti to mi na sikota kulondetela mkondo wakwe. 22Ene kha maha txionho, ni txisofu txakwe kha txa womba makuhu. 23Ene, mbimo yi va nga ti mruketela, kha ruketela nene. Mbimo yi va nga ti m'xanisa, kha va henyela, aniko a to ti ningela ka wule a lamulako ngu kululama. 24Ene a nga rwala sionho sathu ngu mmidi wakwe, ha txihambanoni, kasiku, ngako hi txi fa ka txionho, hi na sikota kuhanya ngu kululama. Anu mi hanyisilwe ngu silonda sakwe. 25Nguko, mi ti ti fana ni tinvuta ta kuhangalaka, aniko akuwa mi tshumete mi wuya ka M'dyisi ni Muwoneleti wa mimoya yanu.
Currently Selected:
1 Pedro 2: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.