1 Pedro 4
4
Wutomi wu wu nga txitxa
1Ngu toneto, ngako Kristu a nga pfa kupanda nyamani kwakwe, na nanu xomani matxhari a kuzumba mi di ni mialakanyo yo nga toneto. Awule a nga xaniseka nyamani, a hambani ni txionho; 2kasiku, ka masiku awa a nga salelwa ngu ona a kuhanya nyamani, e sikota kuhanya asi londeteli minavelo ya nyama, aniko a txi londetela kuranda ka Txizimu. 3Se ti dingani ati mi nga ti hanyisa tona kale, to tsakelwa ngu vamatiko, ta kuhanya ngu wugelegele, ni kunavela ko biha, ni wudevi, ni makolo, ni masuke, ni kukhozela sa mafu. 4Vona va xamala ku mi si ngadi mi tsimbila navo, amu ka wubhemba, se ngu mhaka yeto, va mi ruka. 5Kambe vona va na ya xamula ka wule a nga ti emisela kuya lamula vo hanya ni vo fa. 6Nguko, ngu mhaka ya toneto, Evhangeli yi txhumayetwe ni ka vafi, kasiku, va di lamutwe ngu ka nyama kufana ni vamwani vathu, va na mana kuhanya ngu Moya, kufana ni Txizimu.
Vaphakeli vavanene va siningo sa Txizimu
7Se magwito a sotshe somaha ma hafuhi. Ngu toneto, zumbani mi di ni mapimo amanene, mi txi ti wonela mi khongela. 8#Wona ni ka: Mav. 10:12. Ngutu-ngutu, khatalelani kurandana, nguko lirando la fenengeta mtalo wa sionho. 9Zivani kuamukelana mbimo yi mi endelanako, na mi si ngungurukeli. 10Kota vaxayisi vavanene va tikateko ta Txizimu, mmwani ni mmwani kwanu a na vhune vakwawe ngu txiningo txi a nga hiwa. 11Awu a wombawombako, a na womba-wombe ngu kulondisa dipswi da Txizimu. Awu a thumako a na thume madingano ni txyavelo txi a nga hiwa ngu Txizimu, kasiku, Txizimu txi pfaliswa ka sotshe somaha, ngu Jesu Kristu, i ku ene a lumbwako ngu kupfaliswa, ni mtamo, ngu ha ku si gwitiko. Amen!
Ngako u txi xaniseka nga Dikholwa
12Vo randeka ngutu, mi nga dhukisweni ngu mndilo wa kudukwa, wu wu nga dhivelwa hagari kwanu, nga ku to humelela txo mbi txi ziva. 13Aniko, tsakani ngu kumana txyavelo txa sixaniso sa Kristu, kasi ku na nanu, mi txi ta sikota kutsaka ni kugiya, ka ditshiku di ku nota kombiswa kupfaliswa ka Kristu. 14Ngako mi txi xaniswa ngu ditina da Kristu, mi katekile, nguko moya wa kupfaliswa, Moya wa Txizimu, wu zumbile hagari kwanu. 15Ni wammweyo kwanu a nga thuke a txi xaniswa ngukuva i di txidayi, dikhokhokho, mlumbeti, mwendo ngu kunavela silo sa vane. 16Aniko, ngako a txi xaniswa ngu mhaka ya kuva i di dikholwa, a nga telwe ngu tingana, aniko a na pfalise Txizimu ngu mhaka ya ditina donedo. 17Nguko yi hokile mbimo ya kukhata ngu Nyumba ya Txizimu yi txi lamulwa. Se ngako ku txi khatwa ngu ngathu njiavelo muni va nota txi mana ava va si engisiko Evhangeli ya Txizimu, kani? 18Ngako mlulami ti mkaratelako kuhuluka, nji txani txi nota humelela ka wu i ku m'bihi, ni wu i ku muonhi kani? 19Ngu toneto, avale va xanisekako ngu kulava kulondeta kuranda ka Txizimu, va na ningele mihefemulo yawe ka M'vangi wo thembeka, ngu kumaha mithumo ya yinene.
Currently Selected:
1 Pedro 4: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.