1 Samuwele 11
11
Sawule a txi xula va ka Amoni
1Sekoko Nahasi Muamoni a to kwelela, eya randela didhoropa da Jabhesi-Giliyadhi, se vathu votshe va Jabhesi va to gela Nahasi, va txi kha vona:
“Maha txitumelelano ni nathu, aniko athu hi na kuthumela.”
2Aniko Nahasi Muamoni a to va gela tiya:
Ni na maha txitumelelano ni nanu, ka zumbelo yiya: Ngako mi txi mmweyo ni mmweyo kwanu e xokola diso da txinene, ngu kumaha keto ni veka etxo txiruko txitimwi ka votshe va ka Israyeli.
3Sekoko madhota a Jabhesi ma to m'gela ku kha ona:
Hi ninge mtxhanu wa masiku ni mambidi, kasiku hi rumela mitumi ka yotshe mihingano ya ka Israyeli, se ngako ku si maneki wu hi txhatxhisa, hi na ti ningela kwako.
4Se mbimo yile mitumi yi nga hoka Gibheya ka Sawule, yi to gela vathu mapswi awa. Sekoko vathu votshe va to kwangula, ve dila. 5Ka mbimo yoneyo Sawule a ti wuya ngu thembweni, ngu msana ka tihomu; se a txi khene:
Ku to maheka txani aku vathu va dilako kani? Se va to mtxhamusela mapswi a vathu va Jabhesi. 6Sekoko mbimo yile Sawule a nga pfa timhaka eto, Moya wa Txizimu wu to wulela kwakwe, se kuhenya kwakwe ku to tura ngutu. 7Se a to teka tihomu timbidi e daya, e wilela ngu sihango, e si rumela ka dotshe ditiko da ka Israyeli ngu manza a mitumi, a txi khene:
Ni wuhi wule a no mbi huma e londeta Sawule ni Samuwele, tihomu takwe ti na mahwa tonatiya. Sekoko kuthava Mkoma kutota txitimwi ka vathu, ve huma votshe ngu mbilu yimweyo. 8Sawule a to va bala kona Bhezeki, se kumaneka 300.000 wa vanana va ka Israyeli; ni 30.000 wa vavamna va ka Judha. 9Sekoko va to kha vona ka mitumi yile yi nga ta:
Gelani vathu va Jebhesi-Gileyadhi, mi txi khanu:
Mangwana ni mitshikari, ku nata kutxhatxhiswa kwanu.
Yi to ta koko mitumi, yi ta zivisa ka vathu Jebhesi, aniko vona va to tsaka. 10Se vathu va Jabhesi va to kha vona ka va ka Amoni:
Mangwana, hi na huma hi ta ti ningela kwanu, sekoko mi na maha ngu ngathu totshe ti mi ti wonako. 11Se ku to maheka tito, magwanani ka kona, Sawule a to abanisa vathu ngu mitxawa yiraru, aniko veya wulela wugoveloni ni mabimbi-kutxa, kambe va to xasela va ka Amoni kala ni mitshikari. Se avale va nga sala va to hangalaka mmweyo no mmweyo eya ka wukhalo wakwe. 12Sekoko vathu va to kha vona ka Samuwele:
I mani wule a nga ti ti khene Sawule kha na mbi fuma txitimwi kwathu kani? Hi ningeni vathuvo hi va daya. 13Aniko Sawule a to khene:
Nyamsi, kha ku na mbi dawa m'thu ni wammweyo, nguko nyamsi Mkoma a hulukisile Israyeli. 14Se Samuwele a to khene ka vathu:
Ngonani, hi tsimbileni Giligali hi ya wuseta kona mfumo. 15Se vathu votshe va to khukha veya Giligali, veya simeka Sawule ku va mfumeli masoni ka Mkoma kona Giligali, kambe va to ningela mningelo wa kudikha masoni ka Mkoma; Sawule ni votshe vavamna va ka Israyeli va to tsaka ngutu koneyo.
Currently Selected:
1 Samuwele 11: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.