1 Samuwele 14
14
Kuxula ka Jonatani
1Se ku to maheka, koko, taku ka ditshiku dimwani Jonatani mwana Sawule, a to gela mfana wule a nga ti ti mrwalela matxhari, a txi khene: Ngono, hi tsula ka vawoneleli va Vafilista, vaku ngu didhawa da kheya. Kambe Jonatani kha gela tate wakwe. 2Se Sawule a ti ti mhinganoni ka Gibheya, hahatshi ka mndonga wa mromani wu nga ti ti Migroni; se vathu vale a nga ti navo i ti vo dingana 600 wa vavamna. 3Kambe Ayiyasi, mwana Ayitubhe, mwanawe wa Ikabho, mwana Finiyasi, mwana Eli, mphaxeli wa Mkoma kona Silo, a ti ti ambate efodhe; kambe vathu va si tiziva taku Jonatani a ti ti tsute.
4Se hagari ka tinzila ti Jonatani a nga ti tshawunyeta ngu tona eya ka vawoneleli va Vafilista, ku ti ti ni marigwi mambidi o lapha ma ku ni tshoka, dimwedo ka didhawa da kheno ni dimwani ka didhawa da kheya; ditina da dimwedo i ti ti Bhozezi; se ditina da dimwani i ti ti Sene. 5Dirigwi dimwedo da wuphemba di ti ti ngu masoni ka Mikimaxi, se dimwani da wulambwe, di ti ti ngu masoni ka Gibheya.
6Jonatani koko, a to khene ka mfana wule a nga ti mrwalela matxhari: Ngono, hi tsimbile ka vawoneleli va va makhuna; kutilava Mkoma a na hi lwela, nguko ka Mkoma kha txi ngaho txi a tandekako ku txi hulukisa, hambi i di vavangi mwendo vavadotho.
7Sekoko mrwali wa matxhari akwe a to m'gela ku khene: Maha totshe ti ti ku mbiluni kwako; tsimbila kotshe madingano ni mbilu yako, ani ni ni nawe.
8Jonatani koko, a to khene: Wona taku hi na tsula ka vavamna vale, hi ya ti wonekisa kwawe. 9Se ngako va txo hi gela ku kha vona: Emani kala kuza hi ta kwanu; sekoko hi na ema ka wukhalo wathu, hi si tshuketi hafuhi kwawe. 10Kambe ngako va txi kha vona: Kwelelani mi ta kwathu; sekoko hi na kwelela, nguko Mkoma a na va a di va ningete manzani kwathu; se etxo txi na va txikombiso kwathu.
11Ngu wumbidi wawe va to ti kombekisa ka vawoneleli va Vafilista, se Vafilista va to kha vona: Wonani taku Vahebheru va humile ngu maphalani mule va nga ti baramile kona.
12Se vavamna vale vawoneleli va to xamula ka Jonatani ni ka mrwali wa matxhari akwe, va txi kha vona: Kwelelani mi ta kwathu! Aniko athu hi nata mi gondisa. Se Jonatani a to khene ka mrwali wa matxhari akwe: Kwelela u ni londeta ngu msana, nguko Mkoma a va ningete manzani ka Israyeli.
13Sekoko Jonatani a to kwelela ngu mikondo yakwe ni manza akwe, kambe mrwali wa matxhari akwe e mu londisa ngu msana; se va to wa masoni ka Jonatani, se mrwali wakwe wa matxhari e va daya ngu msana kwakwe. 14Se kumaheka kuxula kuwa ko khata, Jonatani ni mrwali wa matxhari akwe va date vavamna va magumi mambidi, ka wukhalonyana wu dingana hafu ya txikwele txa thembwe, txo txi nga dimwa ngu tihomu timbidi. 15Se ku to va ni kuthava wugoveloni, txitingani ni ka votshe vathu; vawoneleli ni vona ni vaxaseli va to dhudhumela, a ha koza ni ditiko di zinginika, nguko i ti ti kuthava kutako ngu ka Txizimu.
Kuxulwa ka Vafilista
16Vawoneleli va Sawule koko, vale va nga ti Gibheya ka Bhenjamini, va to wona vathu va txi thekela ngu kututuma, na va txi gumulana. 17Sekoko Sawule a to khene ka vathu vale a nga ti navo: Balani vathu hi na wona to, i mani a nga khukha hagari kwathu. Se va to bala, se ve wona to hambi Jonatani ni mrwali wa matxhari akwe va ti si ngaho. 18Sekoko Sawule a to khene ka Ayiyasi: Tisa dibhokiso da Txizimu hawa. (Nguko ka ditshiku dile, dibhokiso da Txizimu di ti ni vanana va ka Israyeli).
19Se ku to maheka tito, ngako Sawule a txi ngadi e womba-womba ni mphaxeli, kuthava kule ku nga ti wugoveloni ka Vafilista ku to kula ngutu, kuanda, se Sawule a je khene ka mphaxeli: Thavisa dianza dako!
20Sekoko Sawule kumweko ni votshe vathu vale a nga ti navo, va to sengeletana, veya kulwani; wona taku ditxhari da mmweyo di ti ti thola mmwani, se ku to maneka pfilu-pfilu ya hombe ngutu. 21Kambe hagari ka Vafilista ku ti ti ni Vahebheru, kufana ni kukhatani, avale va nga kwelela navo veya randela wugovelo; se ni vona vava va to ti pata ni va ka Israyeli, vale va nga ti ti ni Sawule ni Jonatani. 22Va di tipfite koko, votshe vathu va ka Israyeli vale va nga ti baramile ka mmango wa Efrayime, ti taku Vafilista va tutumile, ni vona va to va tutumisa ve yalwa navo. 23Ka ditshiku donedo Mkoma a to hulukisa Israyeli; se wugovelo wu to hoka Bheti-Avheni.
Msana ka kulwa
24Se ka ditshiku dile vathu va ka Israyeli va ti rerekile ngutu, nguko Sawule a ti xambanyile ka vathu, a txi khene: Dikhombo ka m'thu wule a no dya dipawu kala ni minova, kasiku ni ti photela ka valala vangu. Se vathu votshe va to leka kudya dipawu. 25Se votshe vathu va to wulela txitingani; mule ku nga ti ni wulombe hahatshi. 26Se ngako vathu va di hokile txitingani va to wona kujomba ka wulombe; hambi keto, ni wammweyo kha yisa dianza dakwe ha txisofu, nguko vathu va ti thava txixambanyo. 27Kambe Jonatani kha tipfa mbimo yile tate wakwe a nga xambanya ka vathu, se a to nawuluta tshoka ya donga yile a nga ti nayo manzani, e yi nakanisa ngu amu ka dihesa da wulombe; se a txi wuletisa diwoko mkanani, maso akwe ma to tuleka. 28Sekoko mmweyo ka vathu a to xamula a txi khene: Tate wako a xambanyile ka vathu, a txi khene: Dikhombo ka m'thu wule a no dya dipawu nyamsi. Nguko vathu va ti ti gumile mtamo.
29Sekoko Jonatani a to khene: Tate wangu wa nemetisa vathu, wonani, maso angu ma tulekile ngu kule ni nga danzanyana wulombe wuwa. 30I ti tshuko i ti ku vathu nyamsi ngu kutxhatxheka vadyite so handwa si va nga si mana ka valala vawe. Aniko konkuwa kuxaselwa ka Vafilista kha ka maha ka hombe.
31Kambe ka ditshiku donedo va to xasela Vafilista, kukhukhela Mikimaxi kala Ayijaloni; se vathu va ti gumile mtamo ngutu. 32Sekoko vathu va to tutumela kuya handa, ve teka tinvuta, ni tihomu, ni marole, se ve si daya hahatshi, ve dya ni mnoha wa sona. 33#Wona ni ka: Gen. 9:4; Dhewut. 12:16; 15:23. Se va to zivisa Sawule va txi kha vona: Wona taku vathu va onhela Mkoma, ngu kudya nyama ni mnoha wa yona. Se ene a to khene: Mi onhile ngutu; wumbulutani dirigwi da hombe nyamsi di ta hawa kwangu.
34Sawule a to khene kambe: Hangalakani hagari ka vathu, mi va gela tiya: Mmweyo ni mmweyo a na tise homu yakwe, ni nvuta yakwe, mi ta daya hawa, midya, aniko mi nga onheleni Mkoma ngu kudya nyama ni mnoha wa yona. Sekoko vathu votshe va to tisa ni wusiku, mmweyo ni mmweyo ngu dianza dakwe, homu yakwe, ve ta daya koneho.
35Sekoko Sawule a to akela Mkoma txiluvelo; atxiya njiluvelo txo khata txi a nga akela Mkoma.
Vathu ve hulukisa Jonatani
36Msana keto, Sawule a to khene: A hi releleni hi londeta Vafilista ni wusiku, hi ya va handa kala kuza ditxitxa, kambe hi nga siyeni m'thu ni wammweyo kwawe. Se va to kha vona: Maha ti u ti wonako i di ta tinene masoni kwako. Kambe mphaxeli a to khene: A hi tshuketeni ahawa ka Txizimu.
37Sekoko Sawule a to wotisa ka Txizimu a txi khene: Ina ni nga relela ni londeta Vafilista kani? Ina u na va ningela manzani ka va ka Israyeli kani? Aniko ka ditshiku dile Txizimu kha txa mxamula. 38Sekoko Sawule a to khene: Tshuketani kheno, motshenu vathangeli va vathu, xolisisani mi wona to txionho muni txi nga mahwa nyamsi. 39Nguko ni xambanya ngu Mkoma, a hulukisako Israyeli, ti to hambi ngako mnandu wu di ka mwanana wangu Jonatani, kha ditshuri a na fa. Se kha ku na ni wammweyo a nga xamula ka votshe vathu. 40Sawule a to khene kambe ka votshe va ka Israyeli: Anu mi na va ka dimwani didhawa, se ani ni mwanana wangu Jonatani hi nava ka didhawa dimwani. Sekoko vathu va to kha vona ka Sawule: Maha ti u ti wonako i di ta tinene masoni kwako.
41Sawule koko, a to khene ka Mkoma, Txizimu txa Israyeli: Kombisa ditshuri. Sekoko Jonatani ni Sawule va to ñolwa ngu xolo, se vathu va to huluka. 42Sekoko Sawule a to khene: Xaxuvani hagari kwangu ni ka mwanana wangu Jonatani. Se ku to ñolwa Jonatani. 43Sekoko Sawule a to khene ka Jonatani: Ni gele ti wu nga maha. Se Jonatani a to m'gela a txi khene: Ni to danzanyana wulombe wa wudotho ngu tshoka ya donga yi ni nga ti nayo manzani; se ni fanela kufa kani?
44Sekoko Sawule a to khene: Txizimu txi na mahe toneto ni kuengetela, nguko kha ditshuri u na fa, Jonatani.
45Kambe vathu va to kha vona ka Sawule: Ina Jonatani a na fa, ene wule a nga maha mthumo wa hombe wo hulukisa Israyeli kani? Ti nga maheke to nga eto. Hi xambanya ngu Mkoma a hanyako, u nga thuke u wisa hahatshi msisi ni wawumwewo dwe wa ha msungo kwakwe! Nguko Jonatani a mahile eto ni Txizimu nyamsi. Ngu kumaha keto, vathu va to hulukisa Jonatani, kasiku asi fi.
46Kambe Sawule a to leka kulondeta Vafilista, se Vafilista ve tshumelela ka wukhalo wawe.
Kufuma ni mwaya wa Sawule
47Sekoko Sawule a to fuma txitimwi ka Israyeli e lwa ni votshe valala vakwe, vale va nga ti mrandete, i ku vava: Mowabhi, ni vanana va Amoni, ni Edhomi, ni vafumeli va Zobha, ni Vafilista; kotshe amu a nga ti tiya, a ti ko xula. 48Se a to va ni mtamo ngutu, e dayela Vaamaleki, e txhatxhisa va ka Israyeli manzani ka vale va nga ti va xanisa.
49Se vanana va Sawule va majaha i ti ti Jonatani, ni Isivhi, ni Malikisuwa; se matina a vanana vakwe vavambidi vamahorana i ti ti vava: Ditina da mkoma wa kona i ti Merabhe, se ditina da mnanda wa kona i ti Mikali. 50Se ditina da msikati wa Sawule i ti Ayinowami, mwana Ayimahasi; kambe ditina da mthangeli wa dibutho da yimbi i ti Abhineri, mwana Neri, tatanyani wa Sawule. 51Se Kisi tate wa Sawule, ni Neri tate wa Abhineri, i ti ti vanana va Abhiyeli.
52Se ku to maneka yimbi ya hombe yo wukela Vafilista, ka otshe masiku a kuhanya ka Sawule. Ngu kumaha keto, votshe vavamna va tindena ni mtamo, avale Sawule a nga va wona a to va teka ve maha vakwe.
Currently Selected:
1 Samuwele 14: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.