1 Samuwele 17
17
Goliya a txi lwisa va ka Israyeli
1Se Vafilista va to sengeleta mabutho awe kasi ku yalwa, va to ya sengeletana kona Soko, i ku ditiko da ka Judha, kambe veya gova ngu hagari ka Soko ni Azeka, m'hinganoni ka Dhamini. 2Kambe Sawule ni vavamna va ka Israyeli va to sengeletana, veya gova ka mkova wa Mkusuni, se ve ti lulamisela kulwa ni Vafilista. 3Se Vafilista va ti zumbile mmangoni, ngu didhawa dimwani, kambe va ka Israyeli va ti ka wumwani mmango ngu dimwani didhawa; se mkova wu ti ngu hagari kwawe.
4Sekoko ku to huma wamwamna wa ndena ngu digoveloni ka Vafilista, wule ditina dakwe i nga ti ti Goliya, wa Gati, a nga ti ni mtxhanu wa mikono ni wumwewo kulapha ni dianza dimwedo. 5A ti ambate txigoko txa msuku ha msungo kwakwe, ni txikatawu txa magwagwarimba, se kunemela ka txikatawu i ti ti ka 5.000 wa maxekele a msuku. 6A ti ti ni sivhikelo sa msuku txitimwi ka mikondo yakwe, ni txivhikelo txa msuku makatani kwakwe. 7Se ndonga ya ditxhari dakwe yi ti ti fana ni phande ya mluki, se simbi ya ditxhari dakwe i ti ti ni kunemela ka 600 wa maxekele a simbi; kambe masoni kwakwe ku ti thangela mrwali wa sivhikelo. 8Se Goliya a to ema, e huwelela ka mabutho a Israyeli, a txi khene: Mi humela txani mi di xomile yimbi kani? Ina ani kha ni nga Mufilista, se anu, kha mi nga sithumi sa Sawule kani? Sawulani hagari kwanu wamwamna wu a no relela e ta kwangu. 9Ngako ene a txo ta lwa ni nani e ni daya, hi na maha sithumi sanu; kambe, ngako ani ni txo ta mxula ni m'daya, mi na maha sithumi sathu, mi na hi thumela. 10Ato khene kambe Mufilista: Nyamsi na phikizana ni mabutho a ka Israyeli, ni txi khani: Ni ningeni wamwamna, kasiku hi talwa ngu wumbidi wathu.
11Sekoko ngako Sawule ni votshe va ka Israyeli va di pfite mapswi a Mufilista, va to xamala ni kuthava ngutu.
Dhavhidha wugoveloni ka Sawule
12Se Dhavhidha i ti ti mwanana wa wamwamna wokari wa Efrata, ka Bhetlehema wa Judha, awu ditina dakwe i nga ti ti Jese, a nga ti ti ni mtxhanu wa vanana ni vararu; se ka masiku a Sawule wamwamna wuwa a ti kumbile, i ti wa tanga ya hombe hagari ka vathu. 13Se vanana vararu va hombe va majaha va Jese, va to tsula ni Sawule yimbini; matina awe i Eliyabhe, matiwula akwe, se wa wumbidi i Abhinadhabhi, ni wa wuraru i Sama. 14Dhavhidha i ti mnanda ka vona, se vakomwakwe va vararu va to londeta Sawule. 15Kambe Dhavhidha a ti tiya ka Sawule, a txi tshumela e wuya Bhetlehema ku ta dyisa tinvuta ta tate wakwe.
16Sekoko mnadani ka mune wa magumi a masiku, Mufilista koko, a to tikombisa mixo ni minova. 17Se Jese a to khene ka mwanakwe Dhavhidha:
Na ku kombela, teka efa yiya ya mafaka o yokwa, ni simbwanda siya sa digumi, wu tutuma wu heleketa ka vakomwako wugoveloni. 18Aniko teka digumi da magadi a masi u ya ninga mthangeli wa mabutho, kambe u naya txisela vakomwako, u xola taku mwendo va hanya kha kwati; se u na ya wuya ni txi tsaniso txa kona. 19Se a ti tiho Sawule kumweko navo, ni votshe vavamna va ka Israyeli mkovani ka Mkusuni, va txi lwa ni Vafilista.
20Sekoko Dhavhidha a to wuka ni mixo ngutu, e siya tinvuta takwe ni mwoleleli wokari, se e teka mrwalo wakwe e tsula, madingano ni ti Jese a nga mu leletisa tona; se a to hoka ka wukhalo wa sikotxikani, mbimo yile dibutho da yimbi di nga ti ti longisela kuya kulwani, na di txi embelela tindando ta yimbi. 21Se va ka Israyeli ni Vafilista va to fola, va txi ema ve wonetelana. 22Se Dhavhidha a to leka mrwalo wakwe manzani ka muwoneleli wa thundu, e tutumela kuya yimbini; se a di hokile a to wotisa vakomwakwe taku mwendo va wuka kha kwati. 23Se a txi ngadi e womba-womba navo, a to wona wamwamna wa ndena wa dibutho da Vafilista a txi kwelela, wule ditina dakwe i nga ti ti Goliya, Mufilista wa Gati, se e womba-womba madingano ni mapswi ale, na Dhavhidha a txi tipfa. 24Kambe votshe vavamna va ka Israyeli, va di woni wamwamna wule, va to tutuma va txithava ngutu, 25va txi kha vona:
Ina mi mwoni wamwamna wule a kwelelako kani? Se a kwelete ku ta ruketela va ka Israyeli. Ku na maheka tito, awule a no m'daya, mfumeli a na mninga thomba yayingi ngutu, e mninga ni mwanana wakwe wa dihorana, ni kumaha ti taku nyumba ya tate wakwe yi txhatxheka ko diha khupo kona Israyeli.
26Sekoko Dhavhidha a to womba ka vavamna vale a nga ti ti navo, a txi khene:
Mi na mmahela txani wamwamna wule a no daya Mufilista wuwa, e thavisa txiruko txitimwi ka Israyeli kani? Kasi i mani Mufilista wuwa, wa kwa mba yiswa wukwerani, wo a nga ruketela mabutho a yimbi a Txizimu txo hanya kani?
27Se vathu va to engeta ve m'gela madingano ni mapswi ale, va txi kha vona: A na mahelwa tiya ni tiya wamwamna wule a no m'daya. 28Se mbimo yile Eliyabhe, mkomwakwe a nga tipfa, a txi womba ka vavamna vale, a to henyela Dhavhidha, a txi khene:
U tete txani hawa kani? Se u ti site ni mani tinvuta tile ta tidotho txiwulani kani? Na kuziva kha kwati kutikulisa kwako, ni wubihi wa mbilu yako, taku u tete ku ta wona kulwa ka yimbi.
29Sekoko Dhavhidha a to khene: Ni to maha txani ani koko, kani? Ina kha ni faneli ku wotisa txilo kani?
30Se a to khukha eya wotisa ka mmwani m'thu dipswi dile; se vathu va to tshumela ve xamula madingano ni mapswi o khata.
31Se va di pfite mapswi ale Dhavhidha a nga ma womba, va to ya gela Sawule, aniko a to rumela ku veya mteka. 32Se Dhavhidha a to khene ka Sawule:
Ti nga gume mtamo timbilu ngu mhaka yakwe; txithumi txako txi na tsula txi yalwa ni Mufilista wuwa.
33Kambe Sawule a to khene ka Dhavhidha:
Khu na mbi tsula u yalwa ni Mufilista wuwa; nguko u ngadi m'dotho, kambe ene mbwamwamna wa yimbi kukhukhela wuphyani kwakwe.
34Sekoko Dhavhidha a to khene ka Sawule: Txithumi txako txi ti ti dyisa tinvuta ta tate wa txona; se ku txi ta ngonyamo mwendo ursu yi ta ñola nvuta ka mtxhanbi, 35se ani ni ti huma ni yi tutumisa, ni yidaya, ni namuruta txifuyo mkanani ka yona; se yi txi ni wukela, ni ti ko yi ñola titshaya ni yi daya yifa. 36Se txithumi txako txi ti dayiseto ngonyamo mwendo ursu; ni na mahisa toneto ka Mufilista wuwa wa kwa mbi yiswa wukwerani kufana ni tximwetxo txa sihari, ngu kule a nga ruketela mabutho a tiyimbi a Txizimu txi txi hanyako. 37A to khene kambe Dhavhidha:
Mkoma a ni hulukisile manzani ka ngonyamo ni ka ursu; ene a na ni hulukisa manzani ka Mufilista wuwa. Sekoko Sawule a to khene ka Dhavhidha: Tsula, Mkoma a nave ni nawe!
38Se Sawule a to ambeka Dhavhidha syambalo sakwe, kambe e mu sanzeka txigoko txa msuku ha msungo, e mu ambeka ni txikatawu txa simbi. 39Se Dhavhidha a to sunga ditxhari txitimwi ka syambalo sakwe e khata kutsimbila; kambe asi khali ku si duketa; sekoko Dhavhidha a to khene ka Sawule:
Kha ni sikoti kutsimbila ni siya, nguko kha ni khali ku si duketa.
Se Dhavhidha a to si thavisa. 40Se a to teka ndonga yakwe manzani, eya ti sawulela mtxhanu wa marigwi txinambwanani, e ma veka amu ka mrava wa wudyisi, wu a nga ti ti nawo; e teka txibhalakaza txakwe manzani, e tshuketela ka Mufilista.
Dhavhidha e daya Goliya
41Se Mufilista nene a to khukha e tshuketela Dhavhidha; kambe mrwali wa txivhikelo txakwe a ti thangete masoni kwakwe. 42Se mbimo yi Mufilista a nga wona Dhavhidha a to mueyisa, nguko i ti ti ngadi mfana, wo tshura, wa txiemo txo khaleka. 43A to khene koko, Mufilista ka Dhavhidha:
Ina ani no va yimbwa, aku u ni telako ni tindonga kani? Se Mufilista a to ruketela Dhavhidha ngu sizimu sawe. 44A to khene kambe Mufilista ka Dhavhidha:
Ngono kwangu! Ni na ningela nyama yako ka sinyana sa nzumani ni ka sihari sa txitinga.
45Kambe Dhavhidha a to khene ka Mufilista:
Awe uta kwangu wu di ni ditxhari, ni mseve, ni txivhikelo; kambe ani ni ta kwako ngu ditina da Mkoma wa Mabutho a Tiyimbi, i ku Txizimu txa Mabutho a Tiyimbi a ka Israyeli, awule wu mruketelako. 46Kona nyamsi Mkoma a na kuningela manzani kwangu; se ni na kudaya, ni wila msungo; kambe sirumbi sa wugoveloni ka Vafilista ni na si ningela kona nyamsi ka sinyana sa nzumani, ni ka sihari sa ha mafuni; aniko mafu otshe ma na ziva taku Txizimu txiho kona Israyeli. 47Ni wotshe msengeletano wuwa wu na tiziva ti to Mkoma wa hanyisa, na i si nga ngu ditxhari mwendo mseve; nguko kulwa nga Mkoma, se ene a na mi ningela manzani kwathu.
48Se ku to maheka taku, mbimo yile Mufilista a nga khukha e hingeta Dhavhidha, Dhavhidha a to kuluveta e tutumela ku yalwa, e tshangana ni Mufilista. 49Se Dhavhidha a to wuletisa dianza amu ka mrava, e teka dirigwi, e di rinza ngu txibhalakaza, e faya Mufilista ha ka mbanza; se dirigwi di to nyuvela amu ka mbanza, e wa hahatshi ngu khohe yakwe. 50Ngu kumaha keto, Dhavhidha a to xula Mufilista, ngu txibhalakaza ni dirigwi, a to faya Mufilista, se e m'daya na Dhavhidha asi nga ni ditxhari manzani. 51Ngu kumaha keto, Dhavhidha a to tutuma, eya ema txitimwi ka Mufilista, se a to teka ditxhari dakwe, e di swomola txiwununi kwakwe; se e daya Mufilista, e mwila msungo ngu dona. Se ngako Vafilista va di woni taku ndena#17:51 Mwendo ku wamwamna wa mtamo. yawe yi datwe, va to tutuma. 52Sekoko vavamna va ka Israyeli ni va ka Judha va to khukha, ve tsaka ngutu, ve tutumisa Vafilista kala kuya hoka mkovani ni kala kuya hoka ka sike sa Ekroni; se sirumbi sa Vafilista si to mbambamela hanzila, kukhukhela Saharayimi kala Gati ni kuya hoka Ekroni. 53Sekoko vanana va ka Israyeli va to wuya ngu kututumisani ka Vafilista, veya handa magoveloni kwawe. 54Se Dhavhidha a to teka msungo wa Mufilista a txi wu tisa Jerusalema; kambe matxhari akwe a to ma veka ditendani kwakwe.
Dhavhidha a txi kombekiswa ka Sawule
55Se mbimo yile Sawule a nga wona Dhavhidha a txi tsula kuya tshangana ni Mufilista, a to khene ka Abhineri, mthangeli wa dibutho da yimbi: Abhineri, mwanana wa mani mfana wuwa kani? Se Abhineri a to khene: Wu na hanye muhefemulo wako, awe mfumeli, kha ni m'zivi.
56Sekoko mfumeli a to khene: Wotisa koko, ti to mfana wuwa i mwana mani.
57Mbimo yile koko, Dhavhidha a nga wuya ngu kuya daya Mufilista, Abhineri a to mteka e heleketa masoni ka Sawule, a di ngadi ni msungo wa Mufilista manzani kwakwe. 58Se Sawule a to khene kwakwe: Mfanawe, u mwana mani kani? Se Dhavhidha a to khene: Ni mwana txithumi txako Jese, wa Bhetlehema.
Currently Selected:
1 Samuwele 17: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
