1 Samuwele 2
2
Mkombelo wa Ana
1 # Wona ni ka: Luk. 1:46-55. Sekoko Ana a to kombela, a txi khene:
Mbilu yangu yi tsakela Mkoma, ni
mtamo wangu u guletilwe ka Mkoma;
Txisofu txangu txi asamile txitimwi ka valala vangu,
nguko na tsaka kuhanyisani kwako.
2Kha ku na wo sawuleka kufana ni Mkoma;
nguko kuwalo mmwani hahanze kwako;
kha ku na dirigwi ni da dimwedo do fana ni Txizimu txathu.
3Mi nga andiseni mapswi o tikulisa,
ni mapswi o ti guleta ma nga hume sisofuni kwanu;
nguko Mkoma, Njizimu txa wutxhari,
ene wa veka mithumo yathu ha txikaloni.
4Wulaho wa tindena wu funyilwe,
ni vale va nga ti wisilwe va tsanisilwe ngu mtamo.
5Avale kale va nga ti tikhura,
vathumela dipawu,
aniko konkuwa avale va nga ti ni nzala va humute;
hambi txifule txi velekile mtxhanu wa vanana ni vambidi,
se awule a nga ti ni vanana votala a sate ekha.
6 Mkoma ngene a thavisako wutomi, kambe ngene a ningako;
wa relelisa m'thu dithithani,
se e tshumela e m'humisa ka dona.
7 Mkoma wa va nga wusiwana,
kambe wa fumisa;
wa veka hahatshi, kambe wa guleta.
8Wa humisa txisiwana amu ka dikhuma,
wa guleta txikulungu madhakani,
kasi ku e txi khalahatshisa hagari ka vakoma,
ni kuvaninga thomba ya txikhalo txa wudhumo;
nguko makhato a mafu nga Mkoma,
a vekile ditiko txitimwi ka ona.
9A na xayisa mikondo ya va sawuleki vakwe,
aniko vabihi va na maha siduma amu ka txidema;
nguko m'thu kha na mbi humelela ngu mtamo wakwe.
10A va valwako ni Mkoma va na phwaraselwa;
a na va dhindela a di nzumani;
Mkoma a na lamula magwito a mafu,
ni kuninga mtamo ka mfumeli wa ona,
kambe a na guleta wukoma wa msawuleki wakwe.
11Sekoko Elikana a to tshumelela m'tini kwakwe, kona Rama; aniko mfana a to sala a txi thumela Mkoma masoni ka mphaxeli Eli.
Vanana va Eli
12Aniko vanana va Eli i ti ti vanana va wubihi, kambe va ti si zivi Mkoma; 13nguko txitoloveto txa vaphaxeli vale, ka vathu i ti ti txiya: Ngako wokari a txi ningela mphaxo wokari, mfana wa mphaxeli a ti tiya a di ni garfo manzani kwakwe, ya magwasa mararu, mbimo sile nyama yihalako; 14e ta thola nyama amu ka khadi, mwendo amu ka digalongo, mwendo amu ka xungwa, mwendo amu ka dibhota; se sotshe si garfo yi sikotako ku si humisa, mphaxeli a ti ko teka. Se va ti mahisa toneto ka votshe va ka Israyeli vale va nga ti ti ya kona Silo. 15Kambe na mafura ma sanzi kuhiswa, mfana wa mphaxeli a ti ti ta khene ka m'thu wule a ningelako mphaxo: Naheta nyameyo ni ya yokela mphaxeli, nguko kha na mbi amukela ngu kwako nyama yo bhikwa, hahanze ka yayimbiso. 16Se ngako m'thu a txo m'gela ku khene: Thangani ngu kuhisa mafura a nyamsi, se ngu msana u na ti tekela yi u yi navelako, sekoko, ene a ti ti mxamula, a txi khene: Ahim-him, ni ninge konkuwa; aniko, ngako wo txa lamba ni na maha ngu kuhonyola.
17Ngu kumaha keto, txionho txa majaha awa i ti ti txa hombe ngutu masoni ka Mkoma, nguko vathu va ti eyisa mningelo wa Mkoma.
Samuwele kona Silo
18Aniko Samuwele a txi thuma masoni ka Mkoma, na i di ngadi mfana, adi ambate efodhe ya linyu. 19Se dilembe ni dilembe, mwamwakwe a ti ti mrungela syambalo sa sidotho, e ta mninga mbimo yi a tako ni mwamna wakwe ku ta maha mphaxo wa dilembe. 20Se Eli a to katekisa Elikana ni msikati wakwe, a txi khene:
Mkoma a na ku ninge mbewu ngu ka msikati wuwa, ngu mhaka ya txikombelo txile a nga txi maha ka Mkoma. Se va to tshumelela ka wukhalo wawe.
21 Mkoma koko a to katekisa Ana, se e mana txirumbu e veleka vanana vararu va vafana ni vanana vambidi vamahorana; se mfana Samuwele a ti kula masoni ka Mkoma.
Eli ni vanana vakwe
22Sekoko Eli a ti ti kumbile ngutu, aniko a to pfa totshe tile vanana vakwe va nga ti maha, ka votshe va ka Israyeli, niku va otela ni vavasikati vale va nga ti sengeletana ngu mitxawa ha txikeni ka ditenda da msengeletano. 23Se a txi khene kwawe:
Mi mahela txani timhaka to nga tiya kani? Nguko na pfa ngu ka votshe vathu vava timhaka ta wubihi wanu. 24Ahim-him, vana vangu! Nguko hi nga nduma ya yinene yi ni yi pfako; ma pengisa vathu va Mkoma. 25Ngako m'thu a txi onhela mmwani m'thu, valamuli va na mlamula; aniko ngako m'thu a txi onhela Mkoma, i mani a no mkombelela kani?
Hambi keto, kha va engisa dipswi da tate wawe, nguko Mkoma a ti ti lava ku vadaya.
26 # Wona ni ka: Luk. 2:52. Se mfana Samuwele a to kula a txi tsakelwa ngu Mkoma ni vathu.
Wuprofeti wo wukela mwaya wa Eli
27Se kutota m'thu wa Txizimu ka Eli, a txi ta m'gela tiya: Mkoma a womba tiya:
Ina kha na tikomba ngu ditshuri, ka nyumba ya tate wako, va ka Israyeli va di ngadi Egipta, nyumbani ka Faro, kani? 28#Wona ni ka: Eks. 28:1-4. Se ani ni msawute hagari ka totshe tihunzu ta va ka Israyeli kuva mphaxeli, kasiku e ningela txitimwi ka txiluvelo txangu, ni kuhisa dibaselo, e tisa efodhe masoni kwangu; kambe ni ningete nyumbani#Wona ni ka: Levh. 7:35-36. ka tate wako, yotshe miningelo ya kuhiswa ya vanana va ka Israyeli. 29Ngu kutxani mi sola miphaxo ni miningelo yangu ya sakudya, yile ni nga leletela kuva yi ningelwa nyumbani kwangu, kambe u thava vanana vako kupinda ani, kasiku mi ti enisa ngu milangelwa ya yotshe miningelo ya vathu vangu va ka Israyeli, kani? 30Ngu kumaha keto, Mkoma Txizimu txa Israyeli, a khene: Ngu ditshuri ani ni wombile ti taku, nyumba yako ni nyumba ya tate wako, ti na tsimbila masoni kwangu kala kupinduka; aniko konkuwa, kuwomba Mkoma,: Timhaketo ti nave kule ni nani! Nguko ni na thava avale va ni thavako, kambe avale va ni eyisako va na wiswa tingana. 31Wona taku mata masiku ale ni no wila diwoko dako ni diwoko da nyumba ya tate wako, kasiku ku si maneki txikosana ni txa tximwetxo ka nyumba yako. 32Se wu na wona kuxaniseka ka Nyumba ya Txizimu, ka wukhalo wa totshe ta tinene tile ni no mahela Israyeli; kambe kha ku na mbi va ni txikosana ni txa tximwetxo nyumbani kwako, ka masiku otshe. 33Aniko m'thu wule ani ni no mba mthavisa txiluveloni kwangu, a na hisa maso ako ni kudyiseta muhefemulo wako. Se votshe vathu vavangi va nyumba yako va nafa na va sanzi kukumba. 34#Wona ni ka: 1 Sam. 4:11. Se txikombiso txi txi nota txitimwi ka vanana vako va vambidi, Hofini ni Fineyasi; ngu ti to ngu wumbidi wawe va nafa ditshiku dimwedo. 35Se ani ni na ti emisela mphaxeli wo thembeka, awu a no maha madingano ni kulava ka mbilu yangu ni muhefemulo wangu, kambe ani ni na muakela nyumba yo tsana, aniko a na tsimbila masoni ka msawuleki wangu kala kupinduka. 36Se ku na maheka tito, votshe vale va no sala ka miboti ya nyumba yako, va nata khizama masoni kwakwe, ve kombela male ya silivhela mwendo txikhwemu txa dipawu, va txi kha vona: Na kukombela ni tumelele ni maha mthumo wokari wa wuphaxeli, kasiku ni txi na mana kudya txikhwemu txa dipawu.
Currently Selected:
1 Samuwele 2: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.