1 Vatesalonika 5
5
1Ngu didhawa da mhaka ya masiku ni sikhati sa kona, vanathu, kha kulaveki ti to hi mi bhalela txilo ka tona. 2#Wona ni ka: Mat. 24:43; Luk. 12:39; 2 Ped. 3:10. Nguko anu ma tiziva ta tinene taku ditshiku da Mkoma di na tisa ku nga dikhamba ahawa ka wusiku. 3Mbimo yi vathu va no kha vona: “Ka ho kudikha ni kukhaliseka,” nguyo mbimo ku no humelela dikhombo ngu txidhukisa hagari kwawe, kota nga wamsikati, ngako a txi lumwa; kha va na mbi sikota kupona. 4Aniko anu, vanathu, kha mi nga mtemani ahawa koza mi txi nata maha ngu kukanganyiswa ngu ditshiku da kona nga kule ka dikhamba. 5Nguko anu motshenu mi vanana va kuwonekela, mi vanana va mitshikari. Athu kha hi nga vanana va wusiku mwendo txidema. 6Ngu kota yeto, hi nga oteleni nga vamwanyani, aniko a hi ti woneleni, hi txi hanya ngu kutipimela. 7Ava va otelako, va otela ni wusiku; ava va levako, va leva ni wusiku. 8Aniko, athu hi ku va mitshikari, he hanyeni ngu kutipimela, he ambaleni txikatawu txa txikete txa likholo ni lirando, hi txi ambala txithembo txa kuhanyiswa, txi txi maha txidgoko txathu. 9Ngu toneto, Txizimu kha txa hi tumbulukisela ku hi henyela, aniko txi hi mahete kasi kumana kuponiswa ngu Mkoma wathu Jesu Kristu, 10a nga hi fela, kasiku athu, mwendo ha wonelela mwendo ha otela, hi hanya hi di patani kumweko nayo. 11Ngu toneto, thavelelanani mi txi akisana, nga tona ti mi mahisako tona ni konkuwa.
Sileletelo so gwitisa ni madingula
12Ha mi kombela, vanathu, ti to mi txi vekela txithavo avale va mi khutalelako ngu mikaralo hagari kwanu, na i di vahombe vanu ni vathangeli vanu ngu ka Mkoma. 13Va xonipheni ngu lirando la hombe, ngu mhaka ya mthumo wawe. Hanyani navo ngu kudikha.
14Ha mi laya, vanathu, kawukani sindaka-milayo. Tsanisani ava va ku ni dizowa, vhunani ava va ku ni dikhodho, mi va ni kuhonisela ka votshe. 15Ti woneleni kasiku ni wammweyo kwanu asi tshumeteli wubihi ngu wubihi; otshe masiku duketani kumahelana ta tinene, mi txi maha toneto ni ka votshe.
16Tsakani yotshe mbimo. 17Khongelani mi si karali. 18Zivani kubonga ka totshe ti ti mi humelelako. Nguko, ngu tona tiya txi ti dhundako Txizimu kwanu, ngu ka Kristu Jesu. 19Mi nga timeni moya. 20Mi nga kanyiseni siprofeto. 21Kambe wonisisani sotshe, mi ñolisisa asi i ku sa sinene. 22Vayilelani sotshe so biha.
23Txizimu txa kudikha ngu wutumbu wa txona txi na mi basise ka sotshe, se wotshe wuthu wanu, m'hefemulo, moya, ni mmidi, zumbani mi di si veketile ngu fanelo kala kuwuyani ka Mkoma wathu Jesu Kristu. 24Awule a nga mi dhana a thembekile, ene a na ti thuma totshe tiya.
25Hi kombeleleni, vanathu.
26Losani votshe vanathu ngu kupswopswana ko sawuleka. 27Na mi kombela ngu ka Mkoma ti to dipapilo diya, di gondwa ka votshe vanathu.
28Kateko ya Mkoma wathu Jesu Kristu, yi nave ni nanu!
Currently Selected:
1 Vatesalonika 5: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.