2 Vakorinto 9
9
1I di mhaka ya msengo wa kuvhunetela vasawuleki i nga va kuluza mbimo, ngako ni txi mi bhalela eto. 2Na kuziva kutiningetela kwanu ka mhaka ya kuvhuna, se ngu toneto ni ti dhumisako ngu nganu masoni ka Vamakedhoniya ni txi va gela ku khani: “Va Akaya va ti longisete kukhukhela hanyamwaka,” kukhutala kwanu ku wusile wungi wa mabanza, 3Hambi keto, ni mi rumela vanathu vava, kasiku ku ti dhumisa kwangu ngu nganu ku si mahi ka makuhu; ni ti to mi zumba mi di ti longisete ngako ni nga womba ti to mi ti longisete. 4Idiku Vamakedhoniya vokari vo ta ni nani kheyo, va ta mi mana mi sa ti longisela, ku mi themba kwangu ka hombe ku ndi na hinduka kumaha tingana kwathu. Kha ni lavi kuwomba ti to ndingana kwanu. 5Ni woni ti di ni fanelo kuthangetisa vanathu kasiku ve ta kheyo, va ta longisela msengo wanu mi nga wu thembisa, ngako wu di tshanganisilwe wu ndi na maha msengo wa ditshuri, i si nga wa kukurumetwa. 6Zivani tiya: “Awu a phayako sa sidotho, a na elula sa sidotho, awu a phayako sasingi a na elula sasingi nene.” 7M'thu a na ningele kota nga ti a xuvisako tona mbiluni kwakwe, asi karateki mwendo kukurumetwa, nguko Txizimu txi randa awu a ningelako ngu litsako. 8Txizimu txa sikota ku mi andisela otshe makatekwa, kasiku mi txi mana asi si lavekako yotshe mbimo ni ka sotshe simaha, ni kutshumela si txi sala kufela ku mi txi maha ngu sona yotshe mithumo ya yinene, 9#Wona ni ka: Mas. 112:9. kota nga ti ti nga bhalwa va txi kha vona: “A phakete e ninga sisiwana, se kululama kwakwe ku na zumba ku si nga ni magwito.” 10Txizimu txi ningako mbewu ka mphayi, txi mninga ni sakudya, se txi na mi lavela mbewu txi yi milisa, txi txi andisa mihando ya kululama kwanu. 11Mi na fumiswa ka sotshe simaha, kasiku mi sikota kuninga ngu nzila yihi ni yihi, ati ti no maha ku mmweyo ni mmweyo, e ninga kubonga masoni ka Txizimu ngu ngathu. 12Nguko, msengo wuwa hi wu humisako hi nga wo vhuna sisiwana dwe. Aniko mbwo andisa kubongwa ka Txizimu. 13Ngako va txi wona mthumo wuwa wu kombisako wunene wanu, vona va na dhumisa Txizimu ngu mhaka ya kuengisa kwanu ka timhaka ta Evhangeli ya Kristu. Kambe vona va na dhumisa Txizimu ngu msengo wa wunene awu anu mi va vhunako ngu wona, i si nga vona vokha, aniko ni votshe vathu. 14Nguko mi khongelela, vona va na komba lirando la hombe kwanu, ngu mhaka ya kateko ya kuxamalisa mi nga ningwa ngu Txizimu. 15Txi na bongwe Txizimu ngu txihiwa txa txona txo mbi balwa.
Currently Selected:
2 Vakorinto 9: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.