3 Johani 1
1
Dipswi do thanga
1 # Wona ni ka: Mith. 19:29; Var. 16:23; 1 Vak. 1:14. Ani Didhota ni bhalela Gayo wo randeka ngutu, awu ni mrandako ngu ditshuri. 2Wo randeka, ni navela ti to u txi hanya kwati, ni ti to wutomi wako wa mmidi wu txi xayiseka kufana ni ti wu xayisekisako tona wutomi wako wa moya. 3Ni tsakile ngutu ngu kubwaka ka vanathu, va txi fakaza ditshuri di u di simamelako, ti to u hanya mu ka ditshuri. 4Ku walo ti ti ni tsakisako ngutu kupinda kuziva ti to vanana vangu va hanya mu ka ditshuri.
Kudhumiswa ka Gayo
5Wo randeka, u hanya wutomi wo thembeka ka totshe ti u ti mahako ka vanathu, ngutu-ngutu ka vale i ku vapfhumba. 6Vona va fakazile lirando lako masoni ka dibanza. U na va u txi maha ta tinene, ngako u txi va longela sa nzila ngu tifanelo ti ti tsakisako Txizimu, 7nguko vona va tekile dipfhumba diya ngu ditina da Txizimu, va si tumeli kuamukela txilo ka vamatiko. 8Ngu konaho, hi fanete ku va amukela vathuvo, kasi ku hi thumisana navo amu ka ditshuri.
Kusolwa ka Dhiyotrefo
9Ni bhalete dibanza mamwani mapswi, aniko Dhiyotrefo, a randako ku ti maha mthangeli hagari kwawe, kha hi amukeli. 10Ngu konaho, ngako ni txi ta kheyo, ni nata landula mahanyelo akwe, ni mapswi akwe o biha, a hi poyilelako ngu ona. Hahanze keto, a lamba ni kuamukela vanathu. Se avale va ti lavako ku va amukela, wa va tsimbisa, a txi va humisa dibanzani. 11Wo randeka, u nga etsetele wubihi, aniko etsetela wunene. Awu a mahako wunene, a lumba Txizimu; awu a mahako wubihi, kha txi wona Txizimu.
12Dhemetriyo va msuma wunene votshe vathu; ditshuri ni dona da mfakazela, nanathu ha mfakazela, se nanu ma tiziva ti to wufakazi wathu mbwa ditshuri.
Mapswi o gwitisa
13Ni ti ni ta tingi ni nga ti fanete ku kubhalela, aniko kha ni lavi ku kurumela tona, ngu kuthumisa dipapilo ni tinta. 14Na themba ti to hi na wonana kunukunuku, se hi nata womba-womba, hi txi wonana khohe ni khohe. 15Kudikha ku nave ni nawe! Va kudingula vangana vako. Dingula nawe mmweyo ni mmweyo ka vangana vathu.
Currently Selected:
3 Johani 1: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.