Amosi 3
3
1Engisani mapswi ya a mi kawukako ngu ona Mkoma, anu vanana va ka Israyeli, o kawuka lotshe liveleko li ni nga li humisa ngu Egipta, a txi khene:
2Ka totshe timwaya ta ha mafuni, ni zivile anu dwe; ngu koneho, ni na mi endela ngu mhaka ya wotshe wubihi wanu.
Mprofeti kha dingani kumalala
3Ina vambidi va nga longoloka na va si na kupfana kani?
4Ina ngonyamo yi nga bhonga txitingani na yi sa ñola txilo kani?
Hambi txingonyamwana txi nga guleta dipswi diphalani na txi sa ñola txilo kani?
5Txinyana txi nga wa hahatshi ku si nga ni txo txi riyela ngu txona kani?
Txi nga ti heleketa hahatshi ka mlawu na kusina txo ya rola kani?
6Ina ku nga pekwa mpundu didhoropani vathu va si dhudhumeli ngu kuthava kani?
Ina ku nga humelela wubihi didhoropani, na wu sa mahwa ngu Mkoma kani?
7Ngu ditshuri, Mkoma Txizimu, a na mbi maha txilo na a sa kombisa txihunga txakwe ka sithumi sakwe, vaprofeti.
8Yi bhongile ngonyamo, i mani wu a na kwa mbi thava kani?
A wombowombile Mkoma Txizimu, i mani a na kwa mbi profeta kani?
Kutsayiswa ka didhoropa da Samariya
9Pfalisani tiya ka tinyumba ta wukoma ta Asidhodhi, ni ka tinyumba ta wukoma ta ditikoni ka Egipta, mi txi khanu: Sengeletanani mimangoni ka Samariya, mi wona pfilu-pfilu ya hombe hagari ka dona, ni vale va xaniswako ka dona.
10Nguko kha va ti zivi kumaha ta tinene, kuwomba Mkoma, va tata tinyumba tawe ta wukoma ngu wugevenga ni wuhasamuli. 11Ngu toneto, Mkoma Txizimu a khene: Ku na humelela txigevenga txi no randela ditiko dako, txi na hoxota dikhokhola ni tinyumba ta wukoma ti na handwa.
12 Mkoma a womba tiya:
Ku nga m'dyisi a hulukisako minenge yimbidi ya nvuta mkanani ka ngonyamo, mwendo txipembwana txa nzeve, va na hulukisisa toneto vanana va ka Israyeli va hanyako Samariya, ka misingo yo zumbiseka ni mu ka mataho a manene. 13Engisani, wukelani nyumba ya ka Jakobe, kuwomba Mkoma Txizimu, Txizimu txa Mabutho a Tiyimbi. 14#Wona ni ka: 2 Vafu. 23:15. Ditshiku di ni no tsayisa Israyeli ngu kundaka kwakwe mlayo, ni na tsayisa txiluvelo txa Bheteli; se titxheho ta txiluvelo ti na wilwa ti wela hahatshi. 15Ni na hoxota nyumba ya mbimo ya malanga ni nyumba ya mbimo ya wuxika; se tinyumba to tshuriswa ngu makwasa a tinzofu ti na lova, tinyumba ta hombe ti nava ni magwito, kuwomba Mkoma.
Currently Selected:
Amosi 3: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.