Dhewuteronome 22
22
1Ngako u txi wona homu ya mwananu mwendo nvuta yakwe yi di mwalate, u nga si leke sihariso; u fanete ku si heleketa ka mwananu. 2Se ngako mwananu asi nga hafuhi ni nawe, mwendo u si m'zivi, txifuyotxo txi xayise ha m'tini kwako, txi zumba kala mwananu e tsimbila e txi lava; ngu kona u nota mninga txifuyo txakwe. 3U na maha toneto ngu mbongola yakwe, ni txyambalo txakwe hambi ni txihi tximaha txakwe, a txi mwananu a nga mwalalelwa ngu txona, u txi txi mana u nga txi leke.
4 # Wona ni ka: Eks. 23:4-5. Ngako u txi wona mbongola ya mwananu mwendo homu yakwe, si di wite hanzila, u nga ti hunde, aniko m'vhunete ku si khukhisa.
5Wamsikati a nga ambale syambalo sa wamwamna, hambi wamwamna nene a nga ambale syambalo sa wamsikati, nguko awule a mahako toneto manyala masoni ka Mkoma, Txizimu txako.
6Ngako u txi thuka u mana txisaka txa txinyana txokari ha nzilani kwako, txi di txitimwi mndongani mwendo hahatshi, txi di ni mavhondo mwendo manda, ni kungako mame wa kona a di konaho ni mavhondo mwendo manda, u nga teke mame wa kona ni mavhondo akwe; 7u nga sikota kuteka mavhondo a kona, aniko mame wa kona u na mleka, e txhatxheka, a txi tsula. Ngu toneto, u na kateka, ni masiku ako ma na anda.
8Ngako u txi aka nyumba ya yiphya, u na bhiyela liangwa la kona; kasi ku nyumba yako yi si ku manisi mnandu wa mnoha, ngako ku txi wa m'thu ngu txitimwi ka yona, a txi fa.
9U nga phaye thembweni kwako ka mivhinya, mbewu ya tixaka timbidi, kasi ku yi si nyenyeziswi mihando ya mbewu yi u no phaya, ni vhinya ya yiphya.
10U nga dime ngu homu yo jokelwa kumweko ni mbongola.
11 # Wona ni ka: Levh. 19:19. U nga ambale syambalo so lukelwa ngu matoya a tinvuta, kumweko ni linyu.
12 # Wona ni ka: Mit. 15:37-41. U na maha makhatxa, u ma rungela ka mune wa titshulu ta didhamba dile u fenengelako.
Kusawuleka ka kutekana
13Ngako wamwamna a txi tekana ni wamsikati wokari, se msana ka kuva a di otete nayo, a txi khata ku m'vengela, 14a txi mlumbeta timhaka ta tingana ni ku m'bhumisa phungo yo biha, a txi khene: “Ni tekani nayo wu wamsikati, aniko mbimo yi ni nga khata kuotela nayo, kha na mmana a di tumile;” 15sekoko tate wa dihorana ni mame wa kona, va na teka sikombiso sa wumbiri wakwe va txi si yisa ka madhota a didhoropani, va di tshanganile ha txikeni. 16Se tate wa dihorana a na khene ka madhota: Awuwa wa dijaha ni mningile mwanana wangu, kasi ku e maha msikati wakwe, aniko ene se wa mnyenya; 17wonani taku a mlumbetile timhaka ta tingana, a txi khene: “Kha na mana mwanana wako i di wotuma; kambe txikombiso txa wumbiri wa mwanana wangu ngu txiya:” Se va na ateta dilasoro masoni ka madhota a didhoropa. 18Sekoko madhota a didhoropa ma na mteka wamwamna wule, ma txi ya mtsayisa, 19se vona va na m'dihisa male ya dizana wa maxekele a silivhela, ve ninga tate wa dihorana, e diha mbiri ya ka Israyeli, a nga yi bhumisa phungo yo biha. Hahanze keto, dihorana di na va msikati wakwe, ni nene kha na mbi va a txi mtutumisa kambe, ka otshe masiku a kuhanya kwakwe.
20Kambe ngako mhakeyo i ti ditshuri, ku si maneki txikombiso txa wumbiri ka wule wa dihorana, 21sekoko va na teka wule wa dihorana ve tsula nayo ha txikeni ka nyumba ya tate wakwe, se majaha a didhoropani kwawe, ma na m'balisela ngu marigwi kala a txi fa; nguko a mahile to biha ka va ka Israyeli, ngu kumaha wugango nyumbani ka tate wakwe; ngu toneto u na va u txi fuvisa wubihi hagari kwanu.
22Ngako wamwamna wokari a txi manwa a di otete ni msikati wo tekwa, ngu wumbidi wawe va na dawa, awule wa dijaha a nga otela ni wamsikati, kumweko ni wule wamsikati. Ngu toneto, u na fuvisa wubihi hagari ka va ka Israyeli.
23Ngako dihorana da mbiri di di wutilwe ngu dijaha dokari, se dimwani dijaha di txi manana nayo wule wa dihorana amu didhoropani, di txi otela nayo, 24sekoko ngu wumbidi wawe, va na yiswa ha txikeni ka didhoropa, va txi ya baliselwa ngu marigwi, kala va txi fa; nguko dihorana kha da peka huwa, di kombela kulamulelwa, ni wule wa dijaha nguko a bihisile muwutwa wa muakelani wakwe. Ngu toneto, u na fuvisa wubihi hagari kwanu. 25Se ngako wamwamna wokari a txi mana mbiri yo wutwa, thembweni, a txi yi pfinya, e otela nayo, sekoko eyo wa dijaha a nga otela nayo a na fa ekha; 26kambe u nga mahe txilo ka mbiri, yona kha yi nga ni txionho, txi yi ningako fanelo ya kufa. Nguko ayiya mhaka ya fana ni ya wamwamna, wule a wukelako muakelani wakwe, a txi m'daya. 27Nguko koko a mani wule wa mbiri txitingani; se mbiri yile yo wutwa yi pekile huwa, kambe kha ka maneka m'thu wo yi lamulela.
28Ngako wamwamna wokari a txi mana dihorana da mbiri, da kuva di sanzi kuwutwa, a txi di pfinya e otela nado, a txi manwa ka mhakeyo yo biha, 29#Wona ni ka: Eks. 22:16-17. sekoko wamwamna wule a nga otela nayo, a na diha ka tate wa dihorana male ya mtxhanu wa magumi a maxekele a silivhela; se dihorana di na va msikati wakwe, nguko a di mahisile tingana; ngu toneto ene kha na mbi sikota ku mtutumisa, ka otshe masiku a kuhanya kwakwe.
30 # Wona ni ka: Levh. 18:8; 20:11; Dhewut. 27:20. Ni wammweyo wamwamna, kha na mbi teka msikati wa tate wakwe, nguko eto ti nava i di tingana ka tate wakwe.
Currently Selected:
Dhewuteronome 22: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.