Vaefesu 3
3
Mthumo wa Paulo hagari ka vamatiko
1Ngu konaho, ani Paulo ni maneka ku khotelwani ngu mhaka ya Jesu Kristu, kufela kuvhuna anu vamatiko, 2ngako mi di ti engisile va txi womba-womba ngu kateko yi, Txizimu txi nga ni ninga ngu kota yanu, kasi kumaha mthumo wa makungo a txona. 3Ngu txona txi nga ni tuletela kuziva mhaka ya msisalo wuwa, nga ti ni nga mi bhalela ngu kukomisa. 4#Wona ni ka: Vakl. 1:26-27. Ngako mi txi gonda ti ni nga mi bhalela, mi nga wona wuzivi wangu ka msisalo wuwa wa Kristu; 5ka vathu va tixaka ta kale, mhakeyo kha ya ziviswa ka vanana va vathu, kufana ni nyamsi Txizimu txi nga yi tuletela ngu Moya wo Sawuleka ka vapostoli va txona vo sawuleka ni ka vaprofeti; 6ti to vamatiko i sidya-thomba ni vona kumweko ni Vajudha, va lumba lixaka limwelo, se kambe va na mana kuvhuneka ni vona ka txonetxo txithembiso txa tximwetxo txa Kristu, ngu mtamo wa Evhangeli. 7Ni ti mahile mthumeli wa yona Evhangeli yi, ngu mhaka ya txihiwa txa kateko ya Txizimu, ayi ni nga ningwa ngu mthumo wa mtamo wa txona. 8Ani wu, ni ku wam'dotho hagari ka votshe vasawuleki ni ningilwe kateko yiya ya kunuwela ka vamatiko mahungu amanene a thomba yo mbi balwa ya Kristu; 9ni kukombisa masoni ka votshe txyavelo txa makungo awa ma nga ti sisilwe ngu kale ni kale ngu Txizimu, m'vangi wa sotshe, 10kasiku wu txi ziviswa konkuwa ka mimoya ya wuthangeli ni ya wukoma wa madhawa a nzumani, ngu kona hawa ka mthumo wa Dibanza, wutxhari wa tixaka to tala wa Txizimu, 11madingano ni makungo awa Txizimu txi nga ti ma vekile, ayawa txi nga ma wonekisa ngu Kristu Jesu Mkoma wathu. 12Ngu mtamo wakwe Kristu, ha tsana hi tshuketela hafuhi ka Txizimu ngu likholo, na hi di ni kuthemba. 13Ngu konaho, na mi kombela, mi si rereki ngu mhaka ya sixaniso sangu sa ku mi xuphekela, nguko kwanu, eto i mhaka ya kupfaliswa kwanu.
Lirando la Kristu
14Ngu toneto, na khizama masoni ka Tate, 15Tate wuwa, mwaya ni mwaya, aniya nzumani ni ha mafuni, wu ku ni ditina dakwe. 16Na kombela ti to ene, madingano ni kupfuna ka wudhumo wakwe, e mi tsanisa timbiluni kwanu, ngu mtamo wa moya wakwe, 17ni ti to Kristu a txi aka timbiluni kwanu ngu kukholwa, kufela ku lirando li txi maha mkoloti wa kutsanisa dihanyo danu. 18Ti di ngeto, mi na sikota kuziva, kumweko ni votshe vasawuleki, kuanama ni kulapha, kudemba ni kutshima ka lirando la Kristu. 19Ni kombela ti to mi txi li ziva lirando liya, i ku la hombe ngutu kupinda sotshe si hi si zivako, kufela ku mi txi talelwa ngu yotshe thomba ya kuhetiseka ya Txizimu.
20Txi na dhumiswe Txizimu, txi sikotako kumaha sasingi ngutu kupinda asi hi txi kombelako mwendo asi hi si pimisako, ngu mtamo wu, txi thumako ngu wona kwathu, 21txi na dhumiswe amu Dibanzani ni ka Jesu Kristu, ka liveleko ni liveleko, kala kupinduka. Amen.
Currently Selected:
Vaefesu 3: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.