Vaefesu 6
6
Vanana ni vaveleki
1Anu vanana, engisani vaveleki vanu, nguko eto ti lulamile masoni ka Mkoma. 2“Thava tate wako ni mame wako, ngu txona txirumo txo khata txi ku ni txithembiso, 3kasiku u na kateka u txi hanya mbimo yo lapha ha mafuni. 4Nananu vaveleki, mi nga henyiseni vanana vanu, aniko va kuliseni ngu ku va laya ngu sileleto ni tigondo ta Mkoma.”
Tikhumbi ni vanyamne va tona
5 # Wona ni ka: Vakl. 3:22-25. Anu sithumi, engisani vanyamne vanu va ha mafuni, ngu txithavo ni kudhudhumela, na timbilu tanu ti di basile, kota nga mo engisa Kristu. 6Mi nga va thumeleni dwe, ngako va txi mi wona, nga mo randa kutsakisa vathu, aniko aku mi ku sithumi sa Kristu, mahani kuranda ka Txizimu ngu yotshe mbilu. 7Va thumeleni ngu lirando nga mo thumela Mkoma, i si nga kuthumela vathu. 8Ma tiziva ti to m'thu ni m'thu a na ya amukela manzani ka Mkoma wotshe wunene wu a nga wu maha, hambi i di txithumi, hambi i di wo thuseka. 9#Wona ni ka: Dhewut. 10:17; Vakl. 3:25; 4:1. Nananu vakoma, mahisani toneto kwawe, mi txi leka ku va dhusetela, ngu kuziva ti to Mkoma wu i ku wawe ni wanu i mmweyo a ku nzumani, ni ti to ene kha yi ngu khohe.
Matxhari a mkristu
10Ngu kugwitisa, zumbani mi di tsani ta tinene ka Mkoma, ni ka mtamo wakwe wu si tandwiko ngu txilo. 11Ti vhikeleni ngu matxhari a Txizimu, kasiku mi sikota kuxula siduko sa Sathani; 12nguko kha hilwi ni nyama ni mnoha, aniko hilwa ni mimoya yo biha yi ku txitimwi mpfhukani, ni tinduna, ni vafumi ni vakoma va va fumako ka ditiko diya da txidema. 13Ngu toneto, xomani sivhikelo ni matxhari otshe a Txizimu, kufela ku mi sikota kubamba ka ditshiku do biha, se msana ka kuva mi di ti lulamisete, mi na sikota kutserama.
14Emekani ngu kutsana. Sungani siwunu ngu ditshuri, di txi maha libhande lanu. Ambalani kululama ku txi maha txivhikelo txa khana yanu. 15Mi txi ambala tikathula mikondoni kwanu, kasi kuya txhumayela Evhangeli ya kudikha. 16Ngutu-ngutu tekani txitxhavangu txa likholo, i ku txi mi no vhika ngu txona siholoma sa mndilo sa m'bihi. 17Amukelani kuhanyiswa ku txi maha txidgoko txanu ha msungo, se dipswi da Txizimu di txi maha ditxhari danu da Moya. 18Mahani totshelele tiya na mi txi khongela, mi txi kombela kuvhunwa ngu Txizimu. Khongelani yotshe mbimo, nga ti Moya wu mi leletisako tona. Ngu konaho, zumbani mi di ti lulamisete, mi txi khongela mi si karali, mi txi kombelela vasawuleki votshe va Txizimu. 19Nanani ni kombeleleni, kasiku Txizimu txi txi ni tula khana, mbimo yi ni lavako kugondisa, ti to ni sikota kuwombawomba, ni si thavi txilo, ni txi zivisa vathu txikungo txa Evhangeli; 20ayi ni ku muemeli wa yona kona kusungwani muwa; kasi ku ni sikota kuwombawomba ngu kutxhatxheka, nga ha ti fanelako kuva ni txhumayela.
Madingula o gwitisa
21 # Wona ni ka: Dhewut. 10:17; Vakl. 3:25; 4:1. Kufela ku a ta mi zivisa mahungu angu ni ti ni thumako tona, ni mi rumela Tikiko, mwanathu wo randeka, ni kuthembeka mthumoni ka Mkoma, ene a na mi zivisa totshe. 22Ngu toneto, ni m'rumelako kwanu, kasiku e ta mi gela ati hi ku ngu tona, kasi mi na mana kutsaniswa timbilu.
23Kudikha ni lirando li li ku ni likholo, si tako ngu ka Txizimu Tate ni ka Mkoma Wathu Jesu Kristu si nave ni vanathu. 24Makatekwa ma nave ni votshe va va randako Mkoma Wathu Jesu Kristu ngu lirando lo mbi onheka!
Currently Selected:
Vaefesu 6: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.