Eksodha 40
40
Kusawulekiswa ka Ditenda Masoni ka Txizimu
1 Mkoma a wombile ka Mosi a txi khene:
2“Ka ditshiku do khata da mtxima wo khata, u na aka nyumba ya ditenda da msengeletano. 3U na veka ka yona dibhokiso da txitumelelano kambe u na fenengeta ngu nguwo ya m'jiyo. 4U na wuletisa meza u txi veka txitimwi ka yona dibhokiso da txitumelelano ni sotshe siya sa kona. U na tisa phande ya malambu, se u na lumekela malambu a kona. 5U na veka txiluvelo txa nzalama txa dibaselo do bhumula ngu masoni ka dibhokiso da Wufakazi; sekoko u na hayeka m'jiyo ngu ha txikeni ka ditenda do sawuleka. 6U na veka txiluvelo txa mhamba yo hiswa ngu masoni ka txike txa nyumba yo sawuleka ya ditenda da msengeletano. 7U na veka mkamba ngu hagari ka ditenda da msengeletano ni txiluvelo u txi wu thela mati u txi wu tata. 8U na pambiyeta diguma ngu kurendelekisa, kambe u na veka m'jiyo wa nguwo ha txikeni ka diguma.
9Sekoko u na teka mafura o tola u txi tota ngu ona nyumba yo sawuleka ni sotshe asi si ku mndani ka yona; u na yi sawulekisa ni sotshe simaha sa yona, yi txi va yi di sawulekile. 10U na tota txiluvelo txa mhamba yo hiswa ni sotshe simaha sa txona, u na sawulekisa txiluvelo, se txona txi na maneka txi di sawulekile ngutu. 11Sekoko u na tota mkamba ni txipande txa wona, se wu na maneka wu di sawulekile.
12Se u na ruma ati to Aroni ni vanana vakwe ve tshuketa ha txikeni ka ditenda do sawuleka u txi va sambisa ngu mati. 13U na ambeka Aroni ngu syambalo so sawuleka; u na mtota u txi m'basisa kasiku e thuma mthumo wa wuphaxeli, masoni kwangu. 14U na ruma ati to vanana vakwe ve tshuketa ni vona, u txi va ambalisa mabhaji 15u na va tota nga ti u nga totisa tona tate wawe, se va na va vaphaxeli va mthumo wangu; ngu kutotwa kwawe, wuphaxeli wu na va wawe mbimo yotshe, ngu liveleko ni liveleko.”
16Mosi a to maha totsheto, madingano ni ti Mkoma a nga mleletisa tona. 17Ka ditshiku do khata ka mtxima wo khata ka dilembe da wumbidi, di to emiswa ditenda do sawuleka; 18Mosi a to emisa ditenda do sawuleka, a txi veka siparako sa kona, a txi emisa mapulango a kona, a txi wuleta timbalelo, e zima tiphande; 19a to tshulela ngu ditenda da txitshulelo e sanzeka txifenengeto txitimwi ka kona, madingano ni ti Mkoma a nga mrumisa tona.
20A to teka wufakazi a txi wu wuletisa amu ka dibhokiso, a to veka sikhongwani aha ka dibhokiso, a txi veka txikhalo txa wuxinji, txitimwi ka dibhokiso . 21A to wuletisa dibhokiso amu ka ditenda do sawuleka, a txi hayeka nguwo ya m'jiyo, a txi fenengeta ngu yona dibhokiso da wufakazi, nga tonti Mkoma a nga leletelisa tona ka Mosi.
22A vekile meza ditendani ka msengeletano, ngu didhawa da wuphemba ka dibhokiso, ngu hahanze ka nguwo ya m'jiyo, 23a to veketela mapawu ngu ku ma txhatxhameta masoni ka Mkoma, nga tona ti Mkoma a nga leletisa tona ka Mosi. 24A vekile phande ya malambu amu ka ditenda da msengeletano, masoni ka meza, ngu didhawa da wulambwe ka ditenda da msengeletano, 25se a to txhatxhameta malambu e ma turisa masoni ka Mkoma, nga tonti Mkoma a nga leletisa tona ka Mosi. 26A to veka txiluvelo txa nzalama amu ka ditenda da msengeletano, ngu masoni ka nguwo ya m'jiyo, 27se a to hisa ngu txitimwi dibaselo do bhumula, nga tonti Mkoma a nga leletisa tona ka Mosi.
28Ngu msana a to veka nguwo ya m'jiyo, ha txikeni ka ditenda do sawuleka, 29a vekile txiluvelo txa mningelo wo hiswa, ha txikeni ka nyumba yo sawuleka, ya ditenda da msengeletano, se a to maha kona mningelo wo hiswa ni mningelo wa sakudya, nga tonti Mkoma a nga leletisa tona ka Mosi. 30A vekile mkamba ngu hagari ka txiluvelo ni ditenda da msengeletano, se e thela mati ka wona kasi kuve samba. 31Ngu konamo Mosi ni Aroni ni vanana vakwe va nga txi samba kona manza awe ni mikondo yawe. 32Yotshe mbimo yi va nga ti wulela ditendani ka msengeletano ni mbimo yi va nga ti tshuketa aha ka txiluvelo, va ti ti ni fanelo yo samba, nga tona ti Mkoma a nga leletisa tona ka Mosi.
33Ku to guleka diguma di ranganyeta nyumba yo sawuleka, ni txiluvelo, se e hayeka m'jiyo wa txike txa diguma. Ngu toneto, Mosi a to maneka a di hetile wotshe mthumo.
Direfu di fenengeta ditenda
(Mitengo 9:15-23)
34 # Wona ni ka: 1 Vafu. 8:10-11; Isa. 6:4; Eze. 43:4-5; Mtu. 15:8. Sekoko, direfu di to fenengeta ditenda da msengeletano ni kuphatima ka Mkoma ku manekile ku txi tata ditenda do sawuleka. 35Ngu toneto, Mosi a ti si sikoti kuwulela ditendani ka msengeletano, nguko direfu di ti ti tsimbilela txitimwi kwakwe ni wudhumo wa Mkoma wu ti tatile ditenda do sawuleka.
36Mbimo yi direfu di nga ti khukha txitimwi ka ditenda do sawuleka, sekoko vanana va ka Israyeli va ti ti khukha ve tsimbila. 37Aniko mbimo yi direfu di nga ti si khukhi, ni vona va ti si khukhi ve tsimbila kala ka mbimo yile direfu di nga ti khukha. 38Nguko direfu da Mkoma di ti ti fenengeta ditenda do sawuleka ni mitshikari, se ni wusiku mndilo wu wu nga ti tura mu direfuni wu ti ti woninga yotshe nyumba, na va txi ti wona vanana va ka Israyeli, ka otshe masiku a dipfhumba dawe.
Currently Selected:
Eksodha 40: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
