Genesisi 30
30
1Ngako Rakeli a di woni ti to kha velekela vanana Jakobe, a to khata kulusa ka Leya, se e womba ka Jakobe, a txi khene:
“Nihe vanana, hahanze keto, ndinene ku ni txi fa.”
2Sekoko Jakobe a to henyela Rakeli, a txi khene:
“U pimisa ti to ani ni ha wukhaloni ka Txizimu, txi txi nga kulambela liveleko kani?”
3Ene a to xamula a txi khene:
“Ndiyo Bhiliha txithumi txangu. Otela nayo, ti to a na velekela vanana txitimwi ka mazolo angu, se ni#30:3 Mwendo: mana vanana. na mana vanana ngu kwakwe.”
4Ti di ngeto, ene a to mninga Bhiliha txithumi txakwe, a txi va msikati wakwe. Se Jakobe a to mteka. 5Bhiliha a to mana txirumbu, a txi velekela Jakobe mwanana, wa mfana. 6Sekoko Rakeli a to khene:
“Txizimu txi ni lamute, txona txi ni engisile, txi txi ni ninga mwanana wa m'zambi.” Ngu mhaka yeto, a mrayile ditina daku#30:6 Ti wombako ku mlamuli. i Dhani.
7Bhiliha, txithumi txa Rakeli, a to engeta e mana txirumbu, e velekela Jakobe mwanana wa wumbidi, wa mfana. 8Sekoko Rakeli a to khene:
“Ni lwite ni mkomwangu, kulwa ka Txizimu, kambe se ni xute.” mwanana a mrayile ditina daku i Naftali.#30:8 Ti wombako ku kulwa.
9Leya, ngu kuwona ti to a emile, khaswi a txi veleka, a to teka Zilpa, txithumi txakwe, e txi ningela ka mwamna wakwe Jakobe, kasi ku e maha msikati wakwe. 10Zilpa, txithumi txa Leya, a to velekela mwanana wa mfana, Jakobe. 11Sekoko Leya a to khene:
“Ni katekile!” Se e mraya ditina daku i Gadhi.#30:11 Gadhi: Ti womba “thomba”.
12Msana keto, Zilpa, txithumi txa Leya, a to velekela Jakobe mwanana wa wumbidi, wa mfana. 13Sekoko Leya a ti khene:#30:13 Vaheb. Ni katekile.
“Ni katekile! Vavasikati va na ni dhana ku ni m'thu wo kateka.” Se mwanana a mrayile ditina daku i Aseri.#30:13 Ti wombako taku Kukateta.
14Se ngu mbimo yo elula fulaho, Rubheni a to ya mana maranga a lirando thembweni, e wuya nawo ka Leya, mame wakwe. Sekoko Rakeli a to khene ka Leya:
“Hi nga niha maranga awa a nga wuya nawo mwanako.”
15Aniko Leya a mxamute a txi khene:
“Ina u alakanya taku ndidotho aku u nga ni tekela mwamna kani? Sekoko u lava ku ni tekela kambe maranga a lirando a mwanana wangu kani?”
Sekoko Rakeli a to khene:
“Jakobe a na va ni nawe wusiku wuwa, kasi kudihela maranga a lirando a mwanako.”
16Ni minova, Jakobe a txi wuya ngu thembweni, Leya a to mu hingeta e m'gela tiya:
“Kulaveka ti to u otela ka wusiku wa nyamsi ni nani, nguko ni ku xavile ngu maranga a lirando a mwanana wangu.” Se ene a to otela nayo ka wona wusiku wule. 17Txizimu txi to engisa mkombelo wa Leya, ene a to mana txirumbu, e velekela mwanana wa wutxhanu Jakobe, wa mfana. 18Sekoko Leya a to khene:
“Txizimu txi ni ningile txhatxhazelo, ngu ku ni nga ningela txithumi txangu ka mwamna wangu”; se mwanana a to mraya ditina daku#30:18 Ti wombako ku txhatxazelo. i Isakari.
19Sekoko Leya a to mana txirumbu kambe, e velekela mwanana Jakobe, wa wutxhanu ni mmweyo, wa mfana. 20Se a nje khene kha Leya:
“Txizimu txi ni ningile txihiwa txo tshura, konkuwa mwamna wangu a na ni ninga lisima, nguko ni m'velekete mtxhanu wa vanana ni mmweyo.” Se a to mraya ditina daku#30:20 Ti wombako ku nyumba. i Zebhuloni.
21Msana keto, a to veleka mwanana wa dihorana, e mraya ditina daku#30:21 Ti wombako ku a nga lamulwa. i Dhina.
22Txizimu txi to alakanya Rakeli, txi mu engisile, txi mninga fanelo yo veleka vanana. 23Ene a to mana txirumbu e veleka mwanana wa mfana, a txi khene:
“Txizimu txi thavisile tingana tangu.” 24Se a to mraya ditina daku#30:24 Ti wombako ku muengeteli. i Josefa, a txi khene:
“Mkoma a na ni ninge mmwani mwanana wa mfana!”
Jakobe ni Labhani ve maha txitumelelano
25Mbimo yi Rakeli a nga veleka Josefa, a to khene kha Jakobe ka Labani:
“Ni tumelele ni txi tshumelela mwani kwathu, i ku ditikoni kwathu. 26Ni ninge vasikati vangu, ava ni nga va thumela kwako, ni vanana vangu, ni txi tsula, nguko awe wa yi ziva mithumo yangu.”
27Sekoko Labhani a to mxamula a txi khene:
“Ngako ni di mani mathomo masoni kwako, zumba ni nani.#30:27 Vaheb. Ni hutile. Ni zivisilwe ngu txiwoniso ti to Txizimu txi ni katekisile ngu mhaka yako. 28A txi khene kambe: Ni gele hakhelo ya kona, ni na kudihela.”
29Sekoko Jakobe a to mxamula, a txi khene:
“Awe wa tiziva ti ni nga kuthumelisa tona, ni ti sifuyo sako ni nga si xayisisa tona. 30Nguko asi sa sidotho u nga ti naso ni sinzi kuta, si engetetwe ngutu; ni Txizimu txi kukatekisile ngu mhaka yangu. Se konkuwa, ngu yihi mbimo ni no khata ngu yona kuthumela mwaya wangu kani?”
31Se Labhani a to khene: “Ni nga kuninga txani kani?”
Sekoko Jakobe a to mxamula, a txi khene:
“Khu na mbi ni ninga txilo; ngako u txi maha ati ni no kukombela, ni na simama ni dyisa ni kuxayisa mitxhambi yako.” 32Nyamsi ni na tsimbila ngu ka yotshe mitxhambi, ni na thavisa ka yona sihari sotshe sa matshakatshaka ni midenda, hagari ka tinvuta, ni thavisa ati i ku ta mindenda, ni na thavisa ati i ku ta matshakatshaka ni mixowo, hagari ka tiphongo. 33“Mangwana wa kutxa, mbimo yi u nota u ta wona asi u nga ni dihela ngu sona, kuthembeka kwangu ku na tikomba: Txihari txi txi no va i si nga txa mindenda mwendo matshakatshaka, hagari ka tiphongo, ni txile txi no va i si nga txa mindenda hagari ka tinvuta, m'tini kwangu, eso si na mangala ti to nza kupiwa.”
34Sekoko Labhani a ti khene:
“Ngu tona, ti na maheke nga kuwona kwako.”
35Ka donedo ditshiku, a to thavisa vamabhongwe va matshakatshaka ni va mindenda, totshe tiphongo ta matshakatshaka ni ta mindenda, sotshe si si nga ti ni divalavati do basa; se hagari ka tinvuta a thavisile totshe ti i ku ta mtima. Ene a to si ningela ka vanana vakwe, ve si xayisa. 36Se Labhani a to ya zumba kule ni Jakobe, ngu mnava wa kudingana dipfhumba da masiku mararu. Se Jakobe a to simama a txi dyisa mitxhambi ya sifuyo sa Labani.
37Sekoko Jakobe a to ganga tindonga to hanya ta m'julamethi, ta msululwani, ni mkanju wa txilungu, e ti kwamula mabanzi, ti maha timhika#30:37 Ti womba ku timhika, tikhwave. to basa, ku txi woneka kubasa ka timhika. 38A to veka tindonga ti a nga kwamula makamba masoni ka tinvuta, amu ka mathange ni ka mikawu yo selela ka yona mati. 39Mbimo yi sona si nga ti landelana, masoni ka tindonga, si txi veleka vanana va madhowo a misesa ni a matshakatshaka, ni mavalavati.
40Sekoko Jakobe a to teka sinvutana siya e si veka ngu phuho, a txi tshumeta mtxhambi wu txi wonetela ka didhawa da sifuyo sa mindenda ni sa matshakatshaka ni ka sotshe si i ku sa mtima ka txibala txa Labani. Ngu toneto, a nga hambanisisa tona mitxhambi yakwe, asi yi patanisi ni mitxhambi ya Labani.
41Mbimo yi si nga txi landelwa sihari sa mtamo, Jakobe a txi veka tindonga masoni ka sihari, hafuhi ni mikawu, kasi ku si txi landelwa masoni ka tindonga. 42Aniko, mbimo yi sihari i nga ti si nga sa mtamo, ene asi ti veki, ngu toneto asi i nga ti so mbi na mtamo, si ti lumba Labani; ani si i nga ti sa kuena si txi va i di sa Jakobe. 43Ngu mhaka yeto, Jakobe a to maha nyatithombe wa hombe ngutu, a txi va ni mitxhambi yo tala, ni sithumi sa txisikati ni sa txiwamna, ni makamelu ni timbongola.
Currently Selected:
Genesisi 30: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
