Genesisi 37
37
Josefa ni vanawe
1Josefa a to zumba ditikoni ka Kanana, amu tate wakwe a nga ti akile kona. 2Ngu tiya tiveleko ta Jakobe: Josefa a ti ni tanga ya digumi da malembe ni mtxhanu ni mambidi, ene a txi dyisa tinvuta ta tate wakwe, kumweko ni vanawe, vanana va Bhiliha ni Zilpa, vasikati va tate wakwe; Josefa a ti ti geletela tate wakwe timhaka to biha, ati vanawe va nga txi ti mahetela.
3Se Israyeli a ti ti randa ngutu Josefa, kupinda votshe vanana vakwe, nguko i ti mwanana wa wukhovana wakwe; se a to rumisa ku e rungelwa dibhaji do lapha da mixowo yayingi. 4Vanawe ngako va txi wona ti to tate wawe a randa ngutu Josefa, kupinda votshe vamwani vanawe, va to khata ku m'vengela ngutu, va si lavi ni kuwombawomba nayo ngu kuthutha.
5Sekoko, dimwani da masiku, Josefa a to lora ni wusiku, se ngu msana a to txhamusela mloro wuwa ka vanawe; ngu mhaka yeto, livengo lawe li to kula ngutu. 6Ene a va gete, a txi khene:
“Engisani timhaka ta mloro wu ni nga va nawo: 7Hi ti ti maneka hi di thembweni, hi txi sunga tinyanda ta fulaho; nyanda yangu yi to wuka yi txi ema, se tanu tinyanda ti to randela nyanda yangu, ti txi yi khizamela.”
8Sekoko vanawe va to kha vona kwakwe:
“Ti komba ti to awe u na fuma txitimwi kwathu kani? Niku awe u na hi thangela nga m'thu wa hombe kani?
Ngu kumaha yeto, va to m'vengela ngutu, ngu mhaka ya miloro yakwe, ni mapswi akwe.”
9Ene a to lora wumwani mloro, awu a nga wu xawutela ka vanawe, a txi khene:
“Ni lorile wumwani mloro: Ni woni ditambo, mtxima ni digumi da tinyeleti ni yimweyo, na si txi ni khizamela.”
10Ene a to xawutela toneto ka tate wakwe ni ka vakomwakwe, aniko tate wakwe a to mkawuka, a txi khene:
“Mloro wa txani wonewo u nga va nawo kani? Ti komba ti to ani, ni mame wako ni vakomwako, hi na khizama hahatshi masoni kwako, kani?”
11 # Wona ni ka: Mith. 7:9. Vakomwakwe va to zumba va txi m'vengela; kambe tate wawe a to veketa mapimoni kwakwe timhaka tiya.
Kuxaviswa ka Josefa, ni kutsuliswa kwakwe Egipta
12Vanawe Josefa va to ya Sikemi, va txi ya dyisela kona mitxhambi ya tate wawe, 13Israyeli a to womba ka Josefa a txi khene:
“Vakomwako va tsute Sikemi, va txi ya dyisela kona mitxhambi. Ngono, ni na kuruma kwakwe.”
Se Josefa a to xamula, a txi khene: “Ni ti lulamisete.”
14Ene a m'gete, a txi khene:
“Tsula u txi ya wona ti to vakomwako va hanyisa kutxani ni mitxhambi, se u na ni wuyisela mahungu awe.” Josefa a di rumilwe, a to khukha mkovani ka Hebroni a txi ya hoka Sikemi. 15M'thu wokari wa dijaha, a to wona Josefa a txi timela nzila amu txiwulani, e mu wotisa, a txi khene:
“U lava txani kani?”
16Ene a xamute, a txi khene: “No lava vakomwangu. Maha wuxinji u txi ni gela, amu va dyiselako kona mitxhambi yawe.”
17Wa dijaha a m'gete, a txi khene:
“Vona va khukhile ka wuwa wukhalo, ni va engisile va txi kha vona: A hi yeni Dhotani.”
Josefa koko a to tsimbila e lava vakomwakwe, a txi ya va manela kona Dhotani. 18Vona va mu woni a di ngadi kule, se na a sanzi kuhoka hafuhi kwawe, va to langana ti to ve m'daya. 19Va to wombawombisana va txi kha vona:
“Ndiyole nyamilorwani, wata! 20Ngonani hi ta m'daya hi txi mrinza amu ka diphala dokari, hi na ya womba ti to txihari txokari txa txitinga txi m'date, txi txi m'dya. Hi lava kuwona ti to miloro yakwe yi na thuma txani!”
21Aniko Rubheni, a di engisile timhaketo, a to lava nzila ya kuponisa Josefa manzani kwawe. A to womba, a txi khene:
“Hi nga m'dayeni!” 22Rubheni a to engeta, a txi khene: “Hi nga theketeni mnoha wakwe! Mrinzeni ka diphala da mu txiwulani, aniko mi nga mpfinyeni ngu manza anu! Ene a ti ko zama ku m'hulukisa manzani kwawe, kasiku e mtshumeta a txi m'yisa ka tate wakwe.”
23Ngako Josefa a di hokile hafuhi kwawe, va to mñola va txi mu ambula dibhaji dakwe do ziza, adi a nga ti ambate. 24Va to mñola va txi mtshotsha mu diphalani; i ti diphala da diphanga, mndani ka dona ku ti si nga ni mati.
25Ti di ngeto, va to khalahatsha va txi dya sakudya. Mbimo yi va nga gula maso, va to wona mtxawa wa va ka Ismayeli, va kuta ngu Gileyadhi; makamelu awe ma ti rwate mafura o bhumula, ni makha, ni mira, va txi ya naso Egipta. 26Sekoko Judha a to womba ka vanawe, a txi khene:
“Ti vhuna txani kudaya mnanda wathu, hi txi sisa mnoha wakwe, kani? 27Ngonani, a hi mxaviseni ka va ka Ismayeli, hi nga nyeteni manza athu; ene mnanda wathu, wa nyama yimweyo ni mnoha wumwewo ni nathu.”
Se vanawe va to mu engisa. 28#Wona ni ka: Mith. 7:9. Ku ti ngako vanyamabhindu va Midhiyani va txi pinda ngu hafuhi kwawe, vona va to humisa Josefa ngu mu diphalani, ve mxavisa Josefa ka va ka Ismayeli ngu magumi mambidi a maxekele a silivhela, se vanyamabhindu va to mteka, ve tsula nayo Egipta.
29Ngako Rubheni a di wuyile koko, e ta solela mu diphalani, e wona ti to Josefa kha nga ho mu diphalani; a to vharula syambalo sakwe; 30se a di tshumete a txi wuya ka vanawe, a ti ta khene:
“Mfana kha nga ho amule! Se ani ni ya hani kani?”
31Sekoko va to daya mabhongwe mmweyo, ve teka dibhaji da Josefa va txi di nakanisa ngu mnoha 32va txi rumela dibhaji dile do lapha ka tate wakwe, kumweko ni mapswi awa:
“Hi nga wona dibhaji diya, hi ngadi mana. Ina hi nga dona dibhaji da mwanako kani?”
33Ene a di di woni a ti khene:
“Ngu dona dibhaji da mwanana wangu! Txihari txokari txa txitinga txi m'date txi txi m'dya! Josefa mwanana wangu a bhandisetwe!”
34Sekoko Jakobe a to vharula syambalo sakwe, e phamba disaka txiwununi kwakwe, a txi maha mkhwasi, ni masaluko o dila mwanana wakwe, ngu mbimo ya kulapha. 35Vanana vakwe votshe vamajaha ni vamahorana va to ya mkhongotela, aniko ene a to lamba kukhongotelwa, a txi khene:
“Ahim-him ni na dila ni txi relela ka mwanana wangu, kufani.”
Jakobe tate wawe, a to msaluka. 36Ti di ngeto, Vamidhiyani va to ya xavisa Josefa ditikoni ka Egipta, ka mfumeli Potifari,#37:36 Mwendo: didhota. mthenwa wa Faro, i nga ti mthangeli wa vawoneleli.
Currently Selected:
Genesisi 37: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
Genesisi 37
37
Josefa ni vanawe
1Josefa a to zumba ditikoni ka Kanana, amu tate wakwe a nga ti akile kona. 2Ngu tiya tiveleko ta Jakobe: Josefa a ti ni tanga ya digumi da malembe ni mtxhanu ni mambidi, ene a txi dyisa tinvuta ta tate wakwe, kumweko ni vanawe, vanana va Bhiliha ni Zilpa, vasikati va tate wakwe; Josefa a ti ti geletela tate wakwe timhaka to biha, ati vanawe va nga txi ti mahetela.
3Se Israyeli a ti ti randa ngutu Josefa, kupinda votshe vanana vakwe, nguko i ti mwanana wa wukhovana wakwe; se a to rumisa ku e rungelwa dibhaji do lapha da mixowo yayingi. 4Vanawe ngako va txi wona ti to tate wawe a randa ngutu Josefa, kupinda votshe vamwani vanawe, va to khata ku m'vengela ngutu, va si lavi ni kuwombawomba nayo ngu kuthutha.
5Sekoko, dimwani da masiku, Josefa a to lora ni wusiku, se ngu msana a to txhamusela mloro wuwa ka vanawe; ngu mhaka yeto, livengo lawe li to kula ngutu. 6Ene a va gete, a txi khene:
“Engisani timhaka ta mloro wu ni nga va nawo: 7Hi ti ti maneka hi di thembweni, hi txi sunga tinyanda ta fulaho; nyanda yangu yi to wuka yi txi ema, se tanu tinyanda ti to randela nyanda yangu, ti txi yi khizamela.”
8Sekoko vanawe va to kha vona kwakwe:
“Ti komba ti to awe u na fuma txitimwi kwathu kani? Niku awe u na hi thangela nga m'thu wa hombe kani?
Ngu kumaha yeto, va to m'vengela ngutu, ngu mhaka ya miloro yakwe, ni mapswi akwe.”
9Ene a to lora wumwani mloro, awu a nga wu xawutela ka vanawe, a txi khene:
“Ni lorile wumwani mloro: Ni woni ditambo, mtxima ni digumi da tinyeleti ni yimweyo, na si txi ni khizamela.”
10Ene a to xawutela toneto ka tate wakwe ni ka vakomwakwe, aniko tate wakwe a to mkawuka, a txi khene:
“Mloro wa txani wonewo u nga va nawo kani? Ti komba ti to ani, ni mame wako ni vakomwako, hi na khizama hahatshi masoni kwako, kani?”
11 # Wona ni ka: Mith. 7:9. Vakomwakwe va to zumba va txi m'vengela; kambe tate wawe a to veketa mapimoni kwakwe timhaka tiya.
Kuxaviswa ka Josefa, ni kutsuliswa kwakwe Egipta
12Vanawe Josefa va to ya Sikemi, va txi ya dyisela kona mitxhambi ya tate wawe, 13Israyeli a to womba ka Josefa a txi khene:
“Vakomwako va tsute Sikemi, va txi ya dyisela kona mitxhambi. Ngono, ni na kuruma kwakwe.”
Se Josefa a to xamula, a txi khene: “Ni ti lulamisete.”
14Ene a m'gete, a txi khene:
“Tsula u txi ya wona ti to vakomwako va hanyisa kutxani ni mitxhambi, se u na ni wuyisela mahungu awe.” Josefa a di rumilwe, a to khukha mkovani ka Hebroni a txi ya hoka Sikemi. 15M'thu wokari wa dijaha, a to wona Josefa a txi timela nzila amu txiwulani, e mu wotisa, a txi khene:
“U lava txani kani?”
16Ene a xamute, a txi khene: “No lava vakomwangu. Maha wuxinji u txi ni gela, amu va dyiselako kona mitxhambi yawe.”
17Wa dijaha a m'gete, a txi khene:
“Vona va khukhile ka wuwa wukhalo, ni va engisile va txi kha vona: A hi yeni Dhotani.”
Josefa koko a to tsimbila e lava vakomwakwe, a txi ya va manela kona Dhotani. 18Vona va mu woni a di ngadi kule, se na a sanzi kuhoka hafuhi kwawe, va to langana ti to ve m'daya. 19Va to wombawombisana va txi kha vona:
“Ndiyole nyamilorwani, wata! 20Ngonani hi ta m'daya hi txi mrinza amu ka diphala dokari, hi na ya womba ti to txihari txokari txa txitinga txi m'date, txi txi m'dya. Hi lava kuwona ti to miloro yakwe yi na thuma txani!”
21Aniko Rubheni, a di engisile timhaketo, a to lava nzila ya kuponisa Josefa manzani kwawe. A to womba, a txi khene:
“Hi nga m'dayeni!” 22Rubheni a to engeta, a txi khene: “Hi nga theketeni mnoha wakwe! Mrinzeni ka diphala da mu txiwulani, aniko mi nga mpfinyeni ngu manza anu! Ene a ti ko zama ku m'hulukisa manzani kwawe, kasiku e mtshumeta a txi m'yisa ka tate wakwe.”
23Ngako Josefa a di hokile hafuhi kwawe, va to mñola va txi mu ambula dibhaji dakwe do ziza, adi a nga ti ambate. 24Va to mñola va txi mtshotsha mu diphalani; i ti diphala da diphanga, mndani ka dona ku ti si nga ni mati.
25Ti di ngeto, va to khalahatsha va txi dya sakudya. Mbimo yi va nga gula maso, va to wona mtxawa wa va ka Ismayeli, va kuta ngu Gileyadhi; makamelu awe ma ti rwate mafura o bhumula, ni makha, ni mira, va txi ya naso Egipta. 26Sekoko Judha a to womba ka vanawe, a txi khene:
“Ti vhuna txani kudaya mnanda wathu, hi txi sisa mnoha wakwe, kani? 27Ngonani, a hi mxaviseni ka va ka Ismayeli, hi nga nyeteni manza athu; ene mnanda wathu, wa nyama yimweyo ni mnoha wumwewo ni nathu.”
Se vanawe va to mu engisa. 28#Wona ni ka: Mith. 7:9. Ku ti ngako vanyamabhindu va Midhiyani va txi pinda ngu hafuhi kwawe, vona va to humisa Josefa ngu mu diphalani, ve mxavisa Josefa ka va ka Ismayeli ngu magumi mambidi a maxekele a silivhela, se vanyamabhindu va to mteka, ve tsula nayo Egipta.
29Ngako Rubheni a di wuyile koko, e ta solela mu diphalani, e wona ti to Josefa kha nga ho mu diphalani; a to vharula syambalo sakwe; 30se a di tshumete a txi wuya ka vanawe, a ti ta khene:
“Mfana kha nga ho amule! Se ani ni ya hani kani?”
31Sekoko va to daya mabhongwe mmweyo, ve teka dibhaji da Josefa va txi di nakanisa ngu mnoha 32va txi rumela dibhaji dile do lapha ka tate wakwe, kumweko ni mapswi awa:
“Hi nga wona dibhaji diya, hi ngadi mana. Ina hi nga dona dibhaji da mwanako kani?”
33Ene a di di woni a ti khene:
“Ngu dona dibhaji da mwanana wangu! Txihari txokari txa txitinga txi m'date txi txi m'dya! Josefa mwanana wangu a bhandisetwe!”
34Sekoko Jakobe a to vharula syambalo sakwe, e phamba disaka txiwununi kwakwe, a txi maha mkhwasi, ni masaluko o dila mwanana wakwe, ngu mbimo ya kulapha. 35Vanana vakwe votshe vamajaha ni vamahorana va to ya mkhongotela, aniko ene a to lamba kukhongotelwa, a txi khene:
“Ahim-him ni na dila ni txi relela ka mwanana wangu, kufani.”
Jakobe tate wawe, a to msaluka. 36Ti di ngeto, Vamidhiyani va to ya xavisa Josefa ditikoni ka Egipta, ka mfumeli Potifari,#37:36 Mwendo: didhota. mthenwa wa Faro, i nga ti mthangeli wa vawoneleli.
Currently Selected:
:
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.