Vahebheru 6
6
1Ngu toneto, ahi lekeni tigondo ta makhato a dipswi da Kristu, hi ya masoni ka tigondo to hetiseka, hi si tshumeli hi gondela timhaka ta makhato: Ta kutisola ka mithumo ya kufa ni ta likholo ka Txizimu, 2ni tigondo ta kubhabhatisa, ni ta kusanzeka ka manza, ni ta kuwuka ka vafi, ni ta kuabaniswa ko gwita. 3Ngu ti hi fanelako ku ti thuma ngako Txizimu txi txi hi tumelela. 4Ngu toneto, kha ti koteki ka vathu va va nga amukela liwoningo, ava va nga danza txiningo, ava va nga mana txyavelo txa Moya wo Sawuleka, 5ava va nga danza kutshamba ka dipswi da Txizimu, ni mitamo ya timbimo ti titako, 6se ve wa, ti to ve tshumela ve hinduka da wumbidi, nguko vona va tshumete ve bethela ha txihambanoni Mwanana wa Txizimu, ve mmaha txiruko. 7Nguko, mafu awa ma selako mati a nzumani ayawa ma wako ngu mtalo, aya ma milisako similwa sa sinene, asi si vhunako va va ti dimelako, mafuyo ma mana kukatekiswa ngu Txizimu. 8Aniko, mafu awa ma humisako mipa ni tikwakwati ma na rukwa, me gwita ngu kuhiswa. 9Kambe i di athu, vo randeka ngutu, hambi hi txi wombisa eto, ha themba ngu kutsana ti to mi ka didhawa da dinene, adi da kuhanyiswa. 10Nguko, Txizimu kha txi nga ni tshofu. Kha txi na kudivala mthumo wanu, ni lirando li mi nga li kombisa ka ditina da txona anu mi nga thumela vasawuleki va txona, avava ni konkuwa, mi va thumelako. 11Kambe athu hi navela ti to mmweyo ni mmweyo kwanu e kombisa kukhutala konako kala magwito, kasiku txithembo txanu txi hetiseka. 12Athu kha hi lavi ku mi txi hinduka mi maha mikara, aniko, londetelani avale va amukelako thomba ya sithembiso ngu likholo ni kutimisela.
Txithembiso txo tsana txa Txizimu
13Nguko Txizimu, ditshiku di txi nga maha txithembiso ka Abrahamu, ngako ku nga ti si nga ho mmwani wa hombe kupala txona, awu txi nga ti fanela kuxambanya ngu ngene txi xambanyile ngu ditina da txona txipune, 14#Wona ni ka: Gen. 22:16-17. txi txi kha txona: “Kha ditshuri, ni na kukatekisa ngu sikatekiso so tala, ni na kuandisa ngu mtengo wawungi.” 15Se Abrahamu, ngu kutimisela kwakwe, a to mana si a nga thembiswa sona. 16Vathu va xambanya ngu ditina da wu i ku wa hombe kwawe, kotshe kukanetana kuguma ngu kuxambanya ko tsana. 17Se, ngu kulava kukombisa ta tinene ka vadyi va thomba, ti to txithembiso txa Txizimu kha txi na mbi tshumelela msana, txona Txizimu txi to tsanisa txithembiso ngu kuxambanya. 18Ku ni simaha simbidi so tsana. Ka sona si sa simbidi, kha ti koteki ti to Txizimu txi hi kanganyisa. Ngu toneto, athu hi txi thembako, hi fanete kunamarela ngu kutsana ka txithembiso txi txi nga vekwa masoni kwathu. 19Txithembiso txiya, kwathu, txi fanana ni hangi ya moya, ayi i ku ya kutsana ni kuthembeka, ayi yi dolako nguwo ya txitshingelelo ya dithepele yi txi wulela mndani ka txiluvelo txa Txizimu. 20#Wona ni ka: Mas. 110:4. Ahawa a nga wulela kona Jesu ngu mhaka yathu, kota mthangeli, e mahwa Mphaxeli wa Hombe, madingano ni mlayo wa Melkisedheki.
Currently Selected:
Vahebheru 6: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.