Vahebheru 8
8
Jesu Mphaxeli Wahombe wa Txitumelelano txa Txiphya
1 # Wona ni ka: Mas. 110:1. Se, msungo wa mhaka yi hi yi wombako ngu wuwa: Hi na ni Mphaxeli Wahombe wo ngeto, awu a nga khalahatsha txineneni ka txiluvelo txa wukoma nzumani. 2Ene i mthumeli wa wukhalo wo Sawuleka wa ditenda da ditshuri, di di nga akwa ngu Mkoma, i si nga ngu m'thu. 3Nguko, mphaxeli wa hombe, wuhi ni wuhi, a veketwe kasiku e maha miningelo ni timhamba. Ngu toneto, ta laveka ti to nene mphaxeli e va ni txilo txa kuningela. 4Nguko, idiku Kristu a ti ko vaho ha mafuni, nga i si nga mphaxeli ni ka kudotho, nguko vaho vaphaxeli va va humisako miningelo madingano ni sileleto sa mlayo. 5#Wona ni ka: Eks. 25:40. Aniko, mthumo wa kukhozela kwakwe njifananiso ni mtsudi wa si si ku nzumani, madingano ni kuleleta ka Txizimu, ku ku nga amukelwa ngu Mosi, kasiku e aka ditenda, nguko a getwe ku: “Kulaveka ku u txi wona, kasiku u maha totshe madingano ni ti u nga geliswa tona mmangoni.” 6Aniko kha ditshuri, Kristu a mani mthumo wa hombe ngutu kupinda wa kale. Nguko, ene i muemeli wa txitumelelano txa tshuko, nguko sithembiso si txi nga sungwa ngu sona nza tshuko. 7Ngu toneto, idiku txitumelelanotxo txi ti si nga ni txihoxo, nga txi si faneli kutsivetwa ngu txa wumbidi. 8Nguko, Txizimu txi to wona txihoheto, txi txi womba tiya: “Mata masiku, kuwomba Mkoma, ayawa ni nota maha txitumelelano txa txiphya ni nyumba ya Israyeli ni nyumba ya Judha. 9Kha txi na mbi fana ni txitumelelano txi ni nga txi maha ni vatate vawe, ka ditshiku di ni nga va ñola ngu diwoko, ni va humisa ditikoni ka Egipta. Nguko, vona kha va vekisa txitumelelano txangu; ngu toneto, kha na va khatalela, kuwomba Mkoma. 10Txitumelelano txi ni no txi maha ni nyumba ya Israyeli msana ka masiku onayo, kuwomba Mkoma, ngu txiya: Ni na veka milayo yangu mapimoni kwawe, ni na yi bhala timbiluni kwawe. Ani ni na va Txizimu txawe, ni vona va na vathu vangu. 11A walo wu a no gondisa muakelani wakwe mwendo mkwawe a txi khene: Ziva Mkoma, nguko votshe va na ni ziva kukhukhela ka wam'dotho kala wa hombe. 12Nguko, ni na va ni wumbilu ka sihoxo sawe, ni na mbiswa ni txi alakanya sionho sawe.” 13Ngu toneto, ngako a txi womba ngu txitumelelano txa txiphya, a txhipisa txile txo khata. Se atxi i ku txa kale, atxi txi nga txhipa txi hafuhi ni kumwalala.
Currently Selected:
Vahebheru 8: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.