Jakobe 3
3
Ta lidimi
1Vanathu, mi nga laveni ku bhi motshenu ngu ku ti maha vagondisi, nguko ma tiziva ti to hi fanete kuya kuthethiswani ko karata. 2Nguko, hotshethu ha onha sikhati so tala. Awule asi onhiko amu ka kuwombawomba, ngu ditshuri i m'thu wo hetiseka, awu a sikotako kuvekela matomu wotshe mmidi wakwe. 3Ngako hi txi veka matomu mkanani ka mahantxhi, kasiku ma txi hi engisa, ha sikota kutsimbitisa wotshe mmidi wa ona. 4Wonani sitimela sa mati ni sona, hambiko i ku sa hombe, na si txi susumetwa ngu moya wa mtamo, aniko si kombwa nzila ngu lemu ya yidotho, si txi yiswa amuwa mtsimbitisi wa sona a lavako ku si txi ya kona. 5Kufana ni toneto, lidimi ni lona, hambiko i ku txihango txa txidotho txa mmidi, la ti dhumisa ngu mithumo ya lona ya hombe. Wonani mndilo wa wudotho, wu hisa txitinga txa hombe ngutu. 6Se lidimi ni lona i mndilo, nditiko do tala ngu wubihi; lidimi li vekilwe hagari ka sihango sathu, se li nyeta wotshe mmidi, li dhivela mndilo wu wu hisako wutomi wotshe wa vathu, mndilo wu bhatiswako ngu mndilo wa gehena. 7Nguko, totshe tixaka ta sihari sa txitinga, ta sinyana, ta minyoka, ni ta sihari sa linene sa fuywa, si txi fuywa ngu m'thu. 8Aniko lidimi, awalo a sikotako ku li fuma. Lona njilala txo mbi zumbiseka, kambe li tate ngu txhefu yo daya. 9#Wona ni ka: Gen. 1:26. Hi dhumisa ngu lona Txizimu, Tate, kambe hi ruketela ngu lona vathu, va va nga vangwa ka txifananiso txa Txizimu. 10Ngu toneto, txisofuni kumweko kuhuma kukatekisa ni kuruka. Vanathu, atiya kha ti faneli kumaheka. 11Ina txisima txi nga sikota kuhumisa mati o tshamba ni o bava ngu wukhalo wumwewo, kani? 12Vanathu, ina mkuwu wu nga sikota kuveleka mihamdo ya muolivha, mwendo mndonga wa m'vhinya wu nga sikota kuveleka makuwu, kani? Kufana ni toneto, txisima txa mati a m'nyu kha txi na kuhumisa mati o tshamba.
Wuzivi wu wu tako ngu txitimwi
13I mani hagari kwanu a zivako, kambe na a di txharihile, kani? A na kombise ngu mahanyelo akwe a kutiveka hahatshi ni a wuzivi. 14Aniko, ngako mi di ni wukhuxu wo bava ni moya wo ti randa mipune timbiluni kwanu, mi nga ti kuliseni, kambe mi nga wombeni makuhu o kaneta ditshuri, 15nguko, wuzivi wo ngeto, kha wu ti ngu txitimwi, aniko mbuzivi wa ha mafuni; wa wuhari ni wa wusathane. 16Nguko, ahawa ku ku ni wukhuxu ni mibhando, ku na tumbuluka mazunga ni totshe tixaka ta sionho. 17Kasi wuzivi wu wu tako ngu txitimwi, kukhata wu basile, kambe wu ni lidikho, ni wunene, ni kuengisa, kuhonisela, ni mihando ya yinene, ku ambi kana-kana, ni ku ambi kanganyisa. 18Mihando ya kululama yi phaywa kudikhani ngu va va hanyako ngu kudikha.
Currently Selected:
Jakobe 3: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.