Valamuli 11
11
Jefta e lamulela va ka Israyeli
1Sekoko Jefta, Mugileyadhi, i ti ti ndena ya mtamo; kambe i ti ti mwanana wa digelegele; aniko tate wakwe i ti ti Gileyadhi. 2Nene msikati wa Gileyadhi, a m'velekete vanana, se mbimo yi vanana va wu wamsikati va nga kula, va to tutumisa Jefta, va txi m'gela ku kha vona:
“Khu na mbi va ni thomba nyumbani ka tate wathu, nguko u mwanana wa mmwani wamsikati.”
3Sekoko Jefta a to tutuma a txi thava vanakwe, se a txi ya zumba ditikoni ka Tobha; kambe vavamna vokari va sindaka-milayo va to patana ni Jefta, va txi xoma kumweko nayo.
4Se ku to maheka taku, msana ka masiku okari, vanana va ka Amoni va to xoma, va txi yalwa ni va ka Israyeli. 5Sekoko ku to maheka taku va ka Amoni va txi lwa ni va ka Israyeli, madhota a Gileyadhi ma to khukha ma txi ya lava Jefta, ditikoni ka Tobha. 6Se ma to kha ona ka Jefta:
“Ngono, u ta maha mthangeli wathu, kasi ku hi txi lwa ni vanana va ka Amoni.” 7Aniko Jefta a to khene ka madhota a Gileyadhi:
“Ina hi nga anu mi nga ni venga, mi txi ni tutumisa nyumbani ka tate wangu kani? Ngu kutxani koko mi txi ta kwangu, akuwa mi manekako, mi di kuxanisekani kani?”
8Se madhota a Gileyadhi ma to kha ona ka Jefta: Ngu tona eto hi tshumelela kwako, kasi ku u tsula ni nathu, u txi yalwa ni vanana va ka Amoni, ni ku u na maha mthangeli txitimwi ka votshe vazumbi va Gileyadhi.
9Sekoko Jefta a to khene ka madhota a Gileyadhi:
“Ngako mi di tete ku ta ni teka kasi ku hi txi yalwa ni vanana va ka Amoni, ni ku Mkoma a txi va ningela manzani kwangu, sekoko ani ni na maha mthangeli wanu kani?”
10“Se madhota a Gilelyadhi ma to kha ona ka Jefta:
Mkoma a na va fakazi hagari kwathu, nguko hi na maha madingano ni dipswi dako!”
11Ngu kumaha keto, Jefta a to tsula ni madhota a Gileyadhi. Se vathu va to m'veka kuva msungo ni mthangeli wawe; kambe Jefta a to womba otshe mapswi akwe masoni ka Mkoma, kona Misipa.
12Se Jefta a to rumela mitumi ka mfumeli wa vanana va ka Amoni, a txi khene:
“Njitxani txikuho hagari kwangu ni nawe, i mhaka muni u ku nayo awe ni nani, eko uzako u txi ta lwa ni nani ditikoni kwangu kani?”
13Se Mfumeli wa vanana va ka Amoni a to xamula ka mitumi ya Jefta, a txi khene:
Ngu ti to va ka Israyeli, mbimo yi va nga huma ngu Egipta, va tekile ditiko dangu, kukhukhela Arnoni kala Jabhoki ni Jordhani. Sekoko ni tshumetele ngu kuthutha matiko ale u nga teka.
14Jefta a to engeta a txi rumela yimwani mitumi ka mfumeli wa va ka Amoni, 15a txi khene kwakwe: Jefta a womba tiya:
Israyeli kha teka ditiko da Mowabhi, hambi da va ka Amoni. 16Txikhati txi va ka Israyeli va nga huma ngu Egipta, va to tsimbila ngu mu txiwulani kala va txi hoka Lineneni ko Bhilivila, va txi ya hoka ni Kadhesi. 17Se va ka Israyeli va rumete mitumi ka mfumeli wa Edhomi, kasiku veya m'gela ku kha vona: “Ha kombela ti to hi pinda ngu mu ditikoni kwako!” Aniko mfumeli wa va ka Edhomi, kha lava kuengisa txilo. Vona va to rumela mitumi kambe ka mfumeli wa Mowabhi, aniko nene a to lamba. Se va ka Israyeli va to simama ve zumba ditikoni ka Kadhesi.
18Ngu msana va to tsimbila ngu mu txiwulani, ve tenderuka ditiko da Edhomi ni da Mowabhi, va txi hoka Mowabhi na va txi ta ngu Wutxani. Vathu va to ya gova mtxhatuko ka Arnoni, kambe kha va wulela ditikoni ka Mowabhi, nguko Arnoni a maha muhingano ni Mowabhi. 19Sekoko va ka Israyeli va to rumela mitumi ka Seyoni, mfumeli wa Vaamori, mfumeli wa Hesibhoni, va txi ya kha vona: “Ha ku kombela u txi hi leka, hi pinda ngu mu ditikoni kwako, kala hi txi hoka amu hi yako kona.” 20Aniko Seyoni a to kaneta mapswi a txikombelo txa va ka Israyeli, kha tumela ti to ve pinda ngu ditikoni kwakwe, a to sengeleta dotshe dibutho dakwe da yimbi, a txi ya gova Jahaza, e yalwa ni va ka Israyeli. 21Se Mkoma, Txizimu txa ka Israyeli, a to ningela Seyoni ni vathu vakwe votshe, manzani ka va ka Israyeli, ve va khozisa; se Israyeli a to teka dotshe ditiko da Vaamori, ava va nga ti akile ka ditiko dile. 22Se va to teka dotshe ditiko da Vaamori, di maha thomba yawe, kukhukhela Arnoni kala Jabhoki, ni kukhukhela txiwulani kala mtxhatuko ka Jordhani. 23Sekoko nga ku Mkoma Txizimu txa ka Israyeli, a nga honyola ka va ka Amori ditiko dawe, a txi di ningela ka vathu vakwe va ka Israyeli, se awe ngawe u no hi tekela kani? 24Khu na mbi fumela matiko ale txizimu txako Kamosi txi nga kuninga, u txi ma khozisa kani? Ngu toneto, athu hi na xayisa sotshe si Mkoma, Txizimu txathu, a nga tekela vamwani a txi hi ninga. 25Ina awe u nga pala Bhalake, mwana Sapori, mfumeli wa Mowabhi kani? Ina ene a ta nga phikizana ni va ka Israyeli kani? A xomile matxhari a yimbi a txi va lwisa kani? 26Ku na ni 300 wa malembe, na va ka Israyeli va di akile kona Hesibhoni ni sidhoropanani ka kona, Aroweri ni sidhoropanani ka kona, ni ka otshe madhoropa awa ma ku mabambe ka mnambo wa Arinoni. Ngu kutxani u nga mbi mtekela otshe matiko awa mndani ka ona malembe awa kani? 27Ngu mhaka ya eto, ani kha na kuonhela, aniko awe ngawe u ni vhukako ngu ku ni xomela matxhari, u txi lava kulwa ni nani; Mkoma i ku mlamuli a na lamula nyamsi hagari ka vanana va ka Israyeli ni vanana va ka Amoni. 28Aniko mfumeli wa va ka Amoni kha engisa txilo ka mapswi awa Jefta a nga mrumela. 29Sekoko konako Moya wa Txizimu, wu to khandama ka Jefta, se Jefta a to tshawunyeta ditiko da Gileyadhi ni da Manasi, a txi pinda ngu Misipa wa Gileyadhi a txi ya ditikoni ka va ka Amoni. 30Se Jefta a to maha txixambanyo ka Mkoma, a txi khene: Ngako u txi ningela va ka Amoni manzani kwangu, 31a wule a no khata ene a txi huma ngu ha txikeni ka nyumba yangu, a txi ni hingeta, mbimo yi ni no wuya ni di xute vanana va ka Amoni, eyo ni na maha ngu ene minigelo wo hiswa ka Mkoma. 32Jefta a to pinda a txi ya ka va ka Amoni, kasi ku e yalwa navo, se Mkoma a to va ningela manzani kwakwe. 33Se a to va dayela kukhukhela Aroweri kala hafuhi ka Miniti, a txi hoka Abhele-Karimi, a txi va tekela madhoropa a magumi mambidi. Ngu toneto, va ka Amoni va to khoziswa ngu va ka Israyeli.
Mwanana wa dihorana wa Jefta
34Mbimo yi Jefta a nga ti wuya m'tini kwakwe ka Misipa, mwanana wakwe wa dihorana a to huma a txi ya mu hingeta na a txi sinya ni kuveta singomana. I ti ti mwanana wakwe wammweyo ekha wa dihorana, hahanze kwakwe a ti sina mmwani mwanana wa mfana hambi wa dihorana. 35A hale Jefta a nga mu wona, a to vharula syambalo sakwe na a txi dila, a txi khene: “Yowe! Mwanangu! U ni thete wusiwana kuhanyani kwangu ko pandiseka! Awe u hagari ka vale va ni xanisako. Nguko ni mahile txi thembiso ka Mkoma, kha ni sikotiko kutshumelela msana!” 36Konako mwanana wakwe a to mxamula a txi khene: “Tata, awe u mahile txixambanyo ka Mkoma. Maha kwangu, nga ti u nga thembisa, nguko Mkoma a tumete kuphotela ka valala vako, va ka Amoni.” 37Msana keto, a to womba ka tate wakwe a txi khene: Ni kombela txilo tximwetxo dwe: Ni leke, amu ka mitxima yimbidi, ni txi huma ni vangana vangu, kasiku ni txi ya saluka wuhorana, ngu kutsimbila-tsimbila amu mimangoni. 38Tate wakwe a to m'gela a txi khene: Tsula. Se a to mleka e tsimbila-tsimbila ni vangana vakwe a txi ti salukela wumbiri wakwe, amu mimangoni. 39Se ngako ku di pindile mitxima yimbidi, a to tshumela a txi wuya ka tate wakwe, ahawa tate wakwe a nga maha nga ti a nga xambanya tona. Kambe ene kha nga va a di zivile wamwamna. 40Kukhukhela konako ku to tumbuluka mkhuwo ka va ka Israyeli, wa ti to dilembe ni dilembe, timbiri ta ka Israyeli ti huma amu ka mune wa masiku, ti txi ya saluka mwanana wa Jefta wa dihorana, mugileyadhi.
Currently Selected:
Valamuli 11: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.