Valamuli 21
21
Vasikati vo lumba lihunzu la ka Bhenjamini
1Ti di nga eto, vavamna va ka Israyeli va ti ti xambanyile kona Misipa, va txi kha vona: “Ni wammweyo wa ka kwathu kha na mbi ningela mwanana wakwe wa dihorana, kasi ku a txi tekwa ngu va ka Bhenjamini.”
2Va to ta koko vathu kona Bheteli, va ti ta zumba masoni ka Txizimu, kala ni minova; se va to pekeletela tihuwa, va txi dila ngu txiviti txa hombe. 3Se va txi kha vona: “Awe Mkoma, Txizimu txa Israyeli, dita ngu hani dikhombo diya nyamsi da kupwateka limwelo ka tihunzu ta ka Israyeli kani?”
4Se ku to maheka taku mangwanani ka kona, vathu va to wuka ni mixo ve aka txiluvelo; kambe va to ningela miphaxo yo hiswa, ni miningelo ya kudikha. 5Se vanana va ka Israyeli va to kha vona: “I mani ka totshe tihunzu ta ka Israyeli a nga mbi maneka msengeletanoni, masoni ka Mkoma kani?” Nguko ku ti mahilwe txixambanyo txa hombe madingano ni vale va si tiko ka Mkoma kona Misipa, va txi kha vona: Va na fa kha ditshuri.
6Se vanana va ka Israyeli va to ti laya madingano ni vanawe va ka Bhenjamini, va txi kha vona: “Nyamsi la fuviswa lihunzu limwelo ka Israyeli. 7Hi na maha txani ngu va va nga sala, kasiku ve mana vasikati, eko hi nga xambanya ka Mkoma, hi txi khathu: Ni wammweyo ka vanana vathu vamahorana kha hi na mbi mningela a txi maha msikati wawe, kani?”
8Se va to kha vona: “Ina waho hagari ka tihunzu ta va ka Israyeli, awu a nga mbi kwela a txi ya ka Mkoma, kona Misipa kani?” Se wona taku ni wammweyo wa lihunzu la Jabhesi-Gileyadhi kha ta wugoveloni ka msengeletano. 9Ngu kumaha keto, vathu va to balwa, se wona taku ni wammweyo wa ka Jabhesi-Gileyadhi kha maneka hale. 10Sekoko msengeletano wu to rumela koneyo 12.000 wa vavamna vale va tindena ngutu, va txi va leleta va txi kha vona: Tsulani, mi txi ya dayela ngu matxhari vaaki va Jabhesi-Gileyadhi, vavasikati kumweko ni vafana. 11Sekoko, atiya ngu ti mi no maha: Ka votshe vavamna, ni ka votshe vavasikati vale va no maneka va di otete ni wamwamna, mi na va fuvisa do gwita.
12Se hagari ka vaaki va Jabhesi-Gileyadhi, va to mana 400 wa mahorana a timbiri, va nga ti sanzi kuziva wamwamna, va txi otela ni wamwamna, se va to va tisa wugoveloni kona Silo, ku manekako ditikoni ka Kanana.
13Sekoko wotshe msengeletano wu to rumela kuya womba ka vanana va ka Bhenjamini, avale va nga ti ti dirigwini ka Rimoni, va txi va gela taku kuho kudikha. 14Kambe ka yona mbimo eyo ya yimweyo, va to wuya ka va ka Bhenjamini, va txi ta va ninga vavasikati vale va nga wuya navo va txi hanya, i ku vavasikati va ka Jebhesi-Gileyadhi; aniko va ti si eneli kwawe votshe. 15Sekoko vathu va to ti laya ngu mhaka ya va ka Bhenjamini; nguko Mkoma a di mahile mibhando hagari ka tihunzu ta ka Israyeli. 16Se madhota a msengeletano ma to kha ona: “Hi na maha txani ngu vavamna vale va nga sala, eko vavasikati va ka Bhenjamini va nga dayelwa votshe, kani?” 17Va to engeta va txi kha vona: Thomba ya vale va nga sala nja va ka Bhenjamini, se ni lihunzu ni lalimwelo la ka Israyeli li nga fuviswe. 18Kambe athu kha hi sikoti kuvaninga vanana vathu vamahorana ve va vasikati vawe. Nguko vanana va ka Israyeli va xambanyile va txi kha vona: “A na ruketelwe awule a ningelako wamsikati ka va ka Bhenjamini!” 19Sekoko va to kha vona: “Wona taku dilembe ni dilembe ku ni m'buso wa Mkoma, kona Silo, wu mahwako Wuphemba ka Bheteli, ngu didhawa da wutxani, ka nzila ya mmangoni, yi kwelelako ngu Bheteli kala Sikemi, kala Wulambwe ka Lebhona.”
20Se va to leleta ka vanana va ka Bhenjamini va txi kha vona: Tsulani, mi txi ya barama amu ka mivhinya. 21Se ngako mi txi wona vanana vamahorana va Silo, va txi huma ngu mitxawa kuya sinya, nanu mi na huma ngu mu ka mivhinya, se mmwani ni mmwani kwanu, a na ti ñolela msikati, ka mahorana a Silo, mi txi wuya navo ditikoni ka va ka Bhenjamini. 22Se ngako vatate vawe mwendo tindiya tawe va txi ta mi henyela, athu hi na va gela ku khathu: “Nguko hi randa kwanu, va pfeleni wusiwana, nguko ka yimbi yiya, kha ha teka vavasikati vo dingana mmweyo ni mmweyo vawe, nguko anu kha ma va ninga, ka kuza anu mi mana mnandu.”
23Se vanana va ka Bhenjamini va to maha nga tona ti, se va to teka vasikati madingano ni mtengo wawe, ka vale va nga va ñola hagari ka mahorana ale ma nga ti sinya; se va to wuya tithombani kwawe, va txi ta aketa madhoropa, ve zumba ka ona. 24Ni vona vanana va ka Israyeli va to khukha kona eho, mmwani ni mmwani a txi tshumelela ka lihunzu lakwe ni ka liveleko lakwe; se va to khukha ngu hale, mmweyo ni mmweyo a txi ya ka thomba yakwe.
25 # Wona ni ka: Val. 17:6. Ka ona masiku ale, ku si nga ni mfumeli ka Israyeli, ngu kumaha keto, mmwani ni mmwani a ti ti mahela ati a nga txi ti wona i di to lulama kwakwe.
Currently Selected:
Valamuli 21: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.