Johani 18

Jesu e ñolwa kona Getsemani

(Matewu 26:47-56; Marku 14:43-50; Luka 22:47-53)

1Jesu ngako a di gwitile kuwomba mapswi awa, a to khukha ni vagondiswa vakwe, veya mtxhatuko ka lidhonga la Kedroni, ahawa ku nga ti ni thembwe ya siluva, se Jesu a to wulela konemo ni vagondiswa vakwe. 2Judha awu a nga ti lava ku mningela, a ti wu ziva wukhalo wule, nguko Jesu a txi talisa kuya tshangana kona hale sikhati so tala ni vagondiswa vakwe. 3Sekoko, Judha a to teka mtxawa wa masotxhwa ni simwani sithumi sa vaphaxeli va hombe ni Vafarisi, e tsula navo koneyo, na va di xomile malambu, ni misanje ni matxhari.

4Jesu, ngu kuziva atiya ti nga ti lava ku mu humelela, a to va tshuketela hafuhi, a txi khene kwawe:

“Mi lava mani kani?”

5Vona va to xamula, va txi kha vona: “Hi lava Jesu wa Nazareta.”

Se Jesu a to va gela, a txi khene: “Ngani wuwa.”

Se Judha muwongi, a ti navo. 6Mbimo yi Jesu a nga va gela a txi khene: “Ngani wuwa,” va to xexa ve wa ngu nyatxisane. 7Se ene a to va wotisa kambe, a txi khene:

“Mi lava mani kani?”

Vona va to kha vona: “Hi lava Jesu wa Nazareta.”

8Se Jesu a to xamula, a txi khene:

“Ni mi gete kale ti to khani: ‘Ngani wuwa; ngako i di ditshuri ti to mi lava ani, lekani avava ve tsula.’ ”

9Ti mahekile tiya kasi kutatiseka dipswi di Jesu a ngadi womba, a txi khene: “Ka vale u nga ni ninga, awalo ni wammweyo ni nga mwalalelwa ngene.”

10Sekoko Simoni Pedro a nga ti ni ditxhari, a to di swomola e peka ngu dona mmweyo wa txithumi txa mphaxeli wa hombe, e txi bukuruta nzeve ya txinene. Txithumi txiya txi ti dhanwa ku i Malkusi. 11#Wona ni ka: Mat. 26:39; Mar. 14:36; Luk. 22:42. Aniko Jesu a to gela Pedro, a txi khene:

“Txhomeka ditxhari dako msavani ka dona. Kha ni na mbi sela digombe da sixaniso di ni nga ningwa ngu Tate kani?”

Jesu masoni ka Anasi

(Matewu 26:57-58; Marku 14:53-54; Luka 22:54)

12Sekoko mtxawa wa masotxhwa ni nduna ya ona ni maphoyisa a Vajudha, va to ñola Jesu, ve mu sunga, 13ve mu yisa, kuthanga, ka Anasi, tate wa msikati wa Kayifasi, i nga ti mphaxeli wa hombe wa dilembedo. 14#Wona ni ka: Joh. 11:49-50. Kayifasi wuwa, ngu wule a nga womba dipswi da wusungukati ka Vajudha, a txi khene: “Ti ni fanelo m'thu mmweyo a txi fela votshe vathu.”

Pedro a txi lamba Jesu

(Matewu 26:69-70; Marku 14:66-68; Luka 22:55-57)

15Simoni Pedro a ti londetela Jesu ngu msana, a di kumweko ni mmwani mgondiswa. Mgondiswa wuwa a ti ti ziwa ngu mphaxeli wa hombe. Se e wulela kumweko ni Jesu mtendelani ka mphaxeli wa hombe. 16Se Pedro a to ema ha txikeni ngu hahanze. Se awule mmwani mgondiswa, a nga ti ziwa ngu mphaxeli wa hombe, a to huma eya womba-womba ni wamsikati i nga ti muwoneleti wa ha txikeni: Ene a to wuleta Pedro. 17Sekoko awule wamsikati, i nga ti muwoneleti wa ha txikeni a to gela Pedro, a txi khene:

“Ina awe khu nga mmweyo wa vagondiswa va ene wule kani?”

Aniko ene a to xamula, a txi khene: “Kha ni nga ene ani!”

18Se si ti ti ho konaho sithumi ni maphoyisa, va nga ti dhivete mndilo wa makala ve wora, nguko ku ti ni pheho ngutu. Pedro nene a ti navo, a txi wora mndilo.

Jesu masoni ka Mphaxeli wa Hombe

(Matewu 26:59-66; Marku 14:55-64; Luka 22:66-71)

19Sekoko, mphaxeli wa hombe a to wotisa Jesu ngu mhaka ya vagondiswa ni kugondisa kwakwe. 20Jesu a to mu xamula a txi khene:

“Mahungu angu ni ma wombete ha kubasani, ditikoni muwa. Ni khala ni txi gondisa yotshe mbimo masinagogani ni Dithepeleni, ahawa va tshanganelako kona votshe Vajudha, txi walo ni txa tximwetxo ni nga womba ngu malengo. 21U ni wotisela txani kani? Wotisa vale va nga engisa ti ni nga va gondisa; wona taku vona va tiziva ati ni khalako ku va gela.”

22Kambe, neti Jesu a nga gwita kuwomba tiya, mmweyo wa diphoyisa, a nga ti emile konaho a to mu yamasa ngu mpama, a txi khene:

“Ngu toneto, u angulisako tona mphaxeli wa hombe kani?”

23Jesu a to mxamula, a txi khene:

“Se ngako ni di sindilwe kuwomba, ni kombe womba wufakazi wa wubihi wangu; aniko ngako ni sa sindwa, u ni pekela txani kani?”

24Msana keto, Anasi a to rumela Jesu, a di sungilwe, ka mphaxeli wa hombe Kayifasi.

Pedro e lamba Jesu kambe

(Matewu 26:71-75; Marku 14:69-72; Luka 22:58-62)

25Se Simoni Pedro a ti ti ho kona hale, a txi ora mndilo. Va to kha vona kwakwe:

“Ina kasi awe khu nga mmweyo wa vagondiswa vakwe kani?”

Kambe ene a kanetile, a txi khene: “Kha ni nga mmweyo wawe ani!”

26Se mmweyo i nga ti txithumi txa mphaxeli wa hombe, dixaka da wule a nga wilwa nzeve, a to khene:

“Ina txima kha na kuwona awe thembweni niya ka siluva kumweko nayo kani?” 27Pedro a to kaneta kambe. Se kunukunuko mkuku wu nje kuemba.

Jesu masoni ka Pilato

(Matewu 27:1-2,11-14; Marku 15:1-5; Luka 23:1-5)

28Msana keto, va to teka Jesu ve khukha nayo m'tini ka Kayifasi kuya thethiswa, ve mu heleketa nyumbani ka wukoma. I ti mixo. Vona kha va wulela nyumbani mule ka wukoma ngu kuthava kutinyenyezisa, kasi va txi na mana kudya Pasika. 29Sekoko Pilato a to huma hahanze, a txi va tshuketela hafuhi, a txi khene kwawe:

“Mi mangalela m'thu wuwa ngu mhaka muni kani?”

30Vona va to mu xamula, va txi kha vona:

“Idiku ova asi nga ni mnandu, nga hi sa mtisa hawa kwako.”

31Pilato a to va gela, a txi khene:

“Mtekeni anu mi txi mthethisa nga ti mlayo wanu wu wombisako tona.”

Vajudha va to angula, va txi kha vona:

“Kha hi tumelelwi kudaya m'thu.”

32 # Wona ni ka: Joh. 3:14; 12:32. Atiya ti mahekile kufela kutatiseka dipswi di Jesu a ngadi womba ngu ti a no fisa tona.

33Pilato a to tshumela e wulela nyumbani ka wukoma, e dhana Jesu, a txi khene kwakwe:

“Ina awe u mfumeli wa Vajudha, kani?”

34Jesu a to mu xamula, a txi khene:

“U womba eto ti txi khukhela ha msungo kwako, mwendo i mmwani m'thu a nga ku bhulela mhaka yangu kani?”

35Pilato a to xamula, a txi khene: “No va ni di Mujudha ani kani? Ditiko dako ni vaphaxeli va hombe ngu vona va nga kuningela manzani kwangu. Nji txani u nga maha kani?”

36Jesu a to xamula, a txi khene:

“Mfumo wangu hi nga wa ditikoni muwa. Idiku Mfumo wangu mbwa ditikoni muwa, nga mahalamu angu ma txi ni lwela, kasiku ani ni si ningelwi manzani ka Vajudha. Se ngu toneto, wukoma wangu hi nga wa muwa.”

37Pilato a to mu xamula, a txi khene: “Se awe u mfumeli kani?”

Jesu a to xamula, a txi khene: “Ngawe u wombako ti to ani ni mfumeli! Ni velekilwe kambe ni tile ditikoni muwa, kasiku ni ta maha fakazi ya ditshuri; wuhi ni wuhi i ku wa ditshuri wa engisa dipswi dangu.”

38Se Pilato a to khene: “Njitxani ditshuri kani?”

Jesu a txi abaniselwa lifo

(Matewu 27:15-31; Marku 15:6-20; Luka 23:13-25)

Se a di wombile tiya, a to huma kambe e tsula ka Vajudha, a txi ya khene kwawe:

“Ani kha ni mani mnandu ni wawumwewo ka m'thu wuwa. 39Ngu mbimo ya Pasika, mi ni tolovelo ya kukombela ni thukunyula mmweyo ka va va sibotxhwa. Se ma ti lava ni thukunyula mfumeli wa Vajudha kani?”

40Sekoko vona va to kwangula, va txi kha vona:

“U nga thuse eyo, thusa Bharabhasi!”

Kasi Bharabhasi wuwa i ti ti dikhamba.

Currently Selected:

Johani 18: BEC2016

Highlight

Copy