Joxuwa 10
10
Kuxulwa ka Vaamori
1Se ku to maheka taku ngako, Adhonizedheki, mfumeli wa Jerusalema, a di engisile tito, Joxuwa a tekile didhoropa da Ayi, kambe a di khundumusete dotshe, ni ti to a mahile ka didhoropa da Ayi ni ka mfumeli wa kona, ati a nga maha ka didhoropa da Jeriko ni ka mfumeli wa kona, ni ku vaaki va Gibheyoni va mahile txitumelelano kumweko ni va ka Israyeli, kambe va zumbile hagari kwawe, 2a to telwa ngu dizowa ngutu, ene ni vathu vakwe, nguko Gibheyoni i ti ti Didhoropa da Hombe, kufana ni mamwani madhoropa a wukoma, i ti ti da hombe kupinda Ayi, ni vavamna va kona i ti ti tindena. 3Konako, Adhonizedheki, mfumeli wa Jerusalema, a to rumela m'biko ka Hohamu mfumeli wa Hebroni, ni ka Piramu, mfumeli wa Jarmuti, ni ka Jafiya mfumeli wa Lakisi, ni ka Dhebhiri mfumeli wa Egloni, a txi khene:
4“Ngonani kwangu mi ta ni vhuna; hi sengela kulovisa Gibheyoni, nguko ene a mahile txitumelelano ni Joxuwa ni vanana va ka Israyeli.”
5Ti di ngeto, vafumeli vale va mtxhanu va Vaamori, va to tshangana, ve tsula, vona kumweko ni otshe mabutho awe a yimbi, mfumeli wa Jerusalema, mfumeli wa Hebroni, mfumeli wa Jarmuti, mfumeli wa Lakisi ni mfumeli wa Egloni va to ya randela Gibheyoni, va txi lwa nayo.
6Ti di ngeto, vathu va Gibheyoni va to rumela m'biko ka Joxuwa, wugoveloni ka Giligali, va txi kha vona:
“U nga leke sithumi sako, kuluveta u txi ta kheno kwathu, kasi u ta hi hulukisa ni ku hi lwela, nguko votshe vafumeli va Vaamori, avale va nga aka mimangoni, va tshanganile kasi kutalwa ni nathu.”
7Joxuwa a to khukha Giligali, ene, ni otshe masotxhwa ni totshe tindena ta dibutho da yimbi. 8Se Mkoma a to khene ka Joxuwa:
“U nga va thave: Ani ni va ningete manzani kwako, ni wammweyo hagari kwawe kha na mbi emeka masoni kwako.”
9Se Joxuwa a to ya wa txitimwi kwawe ngu txidhukisa, msana ka kuva a di tsimbite wotshe wusiku, a txi khukhela Giligali. 10Se Mkoma a to va vhinganyisa masoni ka va ka Israyeli, se va ka Israyeli va to va peka va txi va khozisa, hafuhi ka Gibheyoni, va txi va girimusa ngu nzila ya kuya Bheti-Horoni, va txi va khozisa kala kuhoka Azeka ni Makedha. 11Se ku to maheka taku, mbimo yi va nga ti thava masoni ka va ka Israyeli, mkovani ka Bheti-Horoni, Mkoma a to wisa ngu nzumani marigwi a hombe txitimwi kwawe kala kuhoka Azeka, aha va nga mbambamela kona. Mbavangi ngutu avale va ngafa ngu marigwi a maralala kupinda avale va nga dawa ngu matxhari a vanana va ka Israyeli.
12Sekoko Joxuwa a wombile ka Mkoma, ka ditshiku dile Mkoma a nga ningela Vaamori manzani ka vanana va ka vanana va ka Israyeli, a txi khene:
“Ditambo, ema txitimwi ka Gibheyoni,
ni nawe mtxima, ema mkovani ka Ajaloni!”
13 # Wona ni ka: 2 Sam. 1:18. Se ditambo di to ema,
mtxima ni wona wu to ema,
kala ku vathu va txi khozisa valala vawe.
Ina timhaka tiya kha ta bhalwa amu ka Dibhuku da Mlulami kani?
Ditambo di emile hagari ka nzuma, di txi swela kuswa, kala kuheta mbimo yo lava kudingana ni ditshiku dotshe. 14Kha kuzivi kumaneka ditshiku do fana ni donedo, hambi ngu msana hambi ngu masoni ka dona, adiya Mkoma a nga engisa dipswi da m'thu; nguko Mkoma a ti ti lwela va ka Israyeli.
15Sekoko Joxuwa a to tshumela a txi wuya wugoveloni ka Giligali, ni votshe va ka Israyeli.
16Vafumeli vale va mtxhanu va to thava veya sisala diphalani ka Makedha. 17M'thu wokari a to ya womba ka Joxuwa a txi khene: “Vafumeli vale va mtxhanu va ti ya manwa va di sisate diphalani, Makedha.”
18Joxuwa koko a to khene:
“Rindilitani marigwi a hombe, mi txi ya tsiva ngu ona ditshoko da diphala, mi txi veka hafuhi ka dona vavamna ve woneleta. 19Se anu mi nga emeni: Tutumisani valala vanu, va londeteni ngu msana, kambe mi nga va lekeni va txi wulela madhoropani kwanu, nguko Mkoma, Txizimu txanu, a va ningete manzani kwanu.”
20Mbimo yi Joxuwa ni vanana va ka Israyeli va nga khozisa Vaamori, aha koza ve va lovisa, na avale va miboti ya kuhanya va di tsute ka madhoropa o tsana, 21vathu votshe va to tshumela ve wuya ka Joxuwa wugoveloni ka niya Makedha ngu kudikha, ni wammweyo asi tsani kuwomba kubiha ngu txisofu txakwe ka vanana va ka Israyeli.
22Joxuwa a to khene:
“Tulani txike txa diphala mi txi humisa vafumeli va mtxhanu, mi va tisa hawa kwangu.”
23Se va to mtisela, nga toneto, ngu diphalani, vafumeli vale va mtxhanu: Mfumeli wa Jerusalema, ni mfumeli wa Hebroni, ni mfumeli wa Jarmuti, ni mfumeli wa Lakisi ni mfumeli wa Egloni. 24Ngako va di va humisile vafumeli vale, Joxuwa a to dhana votshe vavamna va ka Israyeli, aha a nga womba ka vathangeli va vathu va yimbi, avale a nga ti navo a txi khene:
“Tshuketani mi txi ta veka mikondo yanu ha tithamoni ka vafumeli vava.”
Se va to tshuketa ve veka mikondo yawe ha tithamoni ka vafumeli vale. 25Sekoko Joxuwa a to va gela a txi khene:
“Mi nga thaveni txilo kambe mi nga wikeni msana; khutalani mi txi zumba mi di tsani, nguko ngu tona tiya Mkoma a no maha ka votshe valala vanu, avale mi no lwa navo.”
26Se msana ka tiya, Joxuwa a to va peka a txi va daya, a txi va hayeka txitimwi ka mindonga ya mtxhanu, ahawa va nga zumba ka yona va di txikitilwe, kala ni minova. 27Se ku to maheka taku, na ditambo di di swite, Joxuwa a to rumela ti to ve thaviswa ha mindongani, veya rinzwa diphalani mule va nga ti sisate kona. Ma to vekwa marigwi a hombe ha txikeni ka diphala, aawa ma ku konaho kala ka ditshiku da nyamsi.
Kumwani kuxula ka Joxuwa
28Se ka dona ditshiku edo da dimwedo, Joxuwa a to khozisa didhoropa da Makedha, a txi daya mfumeli wa dona, ngu ditxhari, a txi lovisa votshe va nga txi hanya ka dona; kha nga siya ni m'boti ka dona, a to maha ka mfumeli wa kona ta kufana ni ti a nga maha ka mfumeli wa Jeriko.
29Sekoko Joxuwa ni votshe va ka Israyeli, va to khukha Makedha va txi ya didhoropani ka Libhina va txi yalwa nado. 30Se Mkoma a to di ningela ni dona ni mfumeli wa dona, manzani ka va ka Israyeli, ava va ngadi khozisa ngu ditxhari, ni votshe avale va nga ti ti hanya ka dona; kha va nga leka ni wammweyo wo sala. Va to maha ka mfumeli wa kona ta kufana ni ti va nga maha ka mfumeli wa Jeriko.
31Sekoko, Joxuwa ni votshe va ka Israyeli, va to khukha Libhina veya Lakisi, ahawa va nga ya di randela ni vathu va dona, va txi lwa navo. 32Se Mkoma a to ningela didhoropa da Lakisi manzani ka va ka Israyeli, avale va ngadi khozisa ngu ditshiku da wumbidi, ve di lovisa ngu ditxhari, ni sotshe so hanya, asile si nga ti ti ho ka dona, kufana ni ti va nga mahela Libhina. 33Sekoko Horamu, mfumeli wa Gezeri, a to ta kasi ku ta vhuneta Lakisi, aniko Joxuwa a to m'daya, kumweko ni vathu vakwe, asi siyi ni wammweyo.
34Se Joxuwa ni votshe va ka Israyeli, va to khukha Lakisi va txi ya Egloni, ahawa va nga ya gova masoni ka vathu va dona ve lwa navo, 35se ka dona ditshiku edo da dimwedo, va to di khozisa ve di lovisa ngu ditxhari; ka dona ditshiku edo kambe, va to dayela vathu va dona, ni sotshe so hanya, kufana ni ti a nga maha Lakisi.
36Msana keto, Joxuwa a to khukha Egloni e tsula Hebroni, ni votshe va ka Israyeli, ve yalwa ni vathu va kona, 37se va to ya khozisa didhoropa, ve fuvisa ngu ditxhari, mfumeli wa kona, ni otshe madhoropa ale ma nga ti fumwa ngu dona, ni sotshe sile si nga ya maneka ka dona si txi hanya.
38Sekoko, Joxuwa ni votshe va ka Israyeli, va to tshumela ve wuya Dhebhiri, ahawa va nga ta lwa ni vathu va kona. 39Va to di khozisa didhoropa kumweko ni mfumeli wa kona, ni otshe madhoropa ale ma nga txi fumwa ngu dona; va to ma fuvisa ngu ditxhari, ve lovisa sotshe sile si nga ya maneka ka dona si txi hanya, kha va leka ni wumwewo e sala; nga ti a nga maha ka Hebroni, ni ka Libhina, ni ka vafumeli va kona, ngu toneto Joxuwa a nga ti maha ka Dhebhiri ni ka mfumeli wa kona.
40Ngu toneto, Joxuwa a khozisile dotshe ditiko, mimango ni Negebhe, ni libala ni mikova yotshe, ni vafumeli va kona votshe; kha nga leka ni wammweyo wo sala, a to si lovisa sotshe si si nga ya maneka si txi hanya, nga ti Mkoma, Txizimu txa ka Israyeli, a nga va leletisa tona. 41Se Joxuwa a to va khozisa kukhukhela Kadhesi-Bharneya kala Gaza, ni dotshe ditiko da Goxeni kala Gibheyoni. 42Se votshe vafumeli vava ni matiko awe, Joxuwa a va khozisile ngu mbimo yimweyo, nguko Mkoma, Txizimu txa ka Israyeli, a ti ti lwela Israyeli. 43Sekoko Joxuwa ni votshe va ka Israyeli, va to tshumela ve wuya wugoveloni ka Giligali.
Currently Selected:
Joxuwa 10: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.