Joxuwa 13
13
Matiko ma sanziko kukhoziswa
1Ngako Joxuwa a di kumbile, na a di ni tanga ya malembe amangi, Mkoma a mgete a txi khene:
“Se awe u kumbile ngutu, u wa tanga ya malembe o tala na kuve ku ngadi sate ditiko da hombe, adi di fanelako kukhoziswa. 2Ditiko di di ku ngadi sate ngu diya: Yotshe mihingano ya Vafilista ni dotshe ditiko da Gexure, 3kukhukhela Xihori ku ku masoni ka Egipta, kala mihinganoni ka Ekroni ka wuphemba, ditiko di va ku kha vona nda Vakanana, mtxhanu wa vathangeli va Vafilista, i ku vava: Mthangeli wa Gaza, wa Asihodhe, wa Asikaloni, wa Gati ni wa Ekroni; ni Vahevhi; 4kukhukhela wulambwe, ni dotshe ditiko da Vakanana ni Meyara, i ku da Vasidhoni kala Afeka, m'hinganoni ka Vaamori; 5kumweko ni ditiko da Vagedhali, ni dotshe ditiko da Libhanoni, kala wutxani, kukhukhela Bhahali-Gadhi, hafuhi ka mmango wa Hermoni kala ha ditimbani ka Hamati. 6Votshe vaaki va mmangoni, kukhukhela Libhanoni kala Misirefoti-Mayimi, votshe Vasidhoni; ani nipune ni na va tutumisa, masoni ka vanana va ka Israyeli. Awe u na phakela ditiko diya, di maha thomba ya vanana va ka Israyeli, nga ti ni nga ku leletisa tona. 7Konkuwa koko, abanisela ditiko di txi maha thomba ya mtxhanu wa tihunzu ni mune, ni hafu ya lihunzu la ka Manasi.”
Matiko a tihunzu ta wutxani ka Jordhani
8Yimwani hafu ya lihunzu la ka Manasi, kumweko ni va ka Rubheni ni va ka Gadhi, evo va amukete thomba yawe, ayiya Mosi txithumi txa Mkoma, a nga va ninga, mtxhatuko ka Jordhani, ngu diphambo da wutxani, 9kukhukhela Aroweri, ku ku likasani ka txinambwana txa Aroweri, ni didhoropa dile di ku hagari ka mkova, ni lotshe libala la Madhebha kala Dhibhoni; 10ni madhoropa otshe a Seyoni, mfumeli wa Vaamori, awule a nga ti fumile Hesibhoni, kala muhinganoni ka vanana va ka Amoni: 11Ni Gileyadhi ni ditiko da Gesuri ni da Mahakate, ni wotshe mmango wa Hermoni, ni dotshe ditiko da Bhasani kala Salika; 12ditikoni ka Bhasani, wotshe mfumo wa Oge, a nga ti fuma matiko a Axitaroti ni Edreyi, nguko i ti msalela wo gwitisa, wa ka Refayime. Mosi a xute kambe a tutumisile vona vafumelivo vavambidi. 13Ti di ngeto, vanana va ka Israyeli, kha va tutumisa va ka Gesuri, hambi va ka Mahakate; ngu toneto va ka Gerusi ni va ka Mahakate, va ngadi ho kala nyamsi hagari ka va ka Israyeli. 14Lihunzu la ka Levhi ngu lona lokha li nga mbi ningwa thomba; nguko thomba ya lona ngu timhamba ti ti mahelwako Mkoma, Txizimu txa ka Israyeli, madingano ni ti txona txi nga womba.
Makhalo a lihunzu la ka Rubheni
15Ngu kumaha keto, Mosi a ningile ka lihunzu la vanana va ka Rubheni, txyavelo txawe, ngu mwaya ni mwaya. 16Se wu to maha muhingano wa kona, wu khukhela Aroweri, mabambe ka txinambwana txa Arnoni, ni didhoropa di di ku hagari ka mkova, ni lotshe libala, kala Medhabha, 17Hesibhoni ni otshe madhoropa a kona, ma manekako libalani: Dhibhoni, Bhamoti, Bhahali, Bheti-Bhahali-Meyoni, 18Jaza, Kedhimote, Mefahati, 19Kiriyatayimi, Sibhima ni Sereti-Xahari ka mmango wa mkovani; 20Bheti-Peyori, ni Asidhote-Pisiga, ni Bhati-Xerimoti, 21ni otshe madhoropa a libalani ni ditiko dotshe da Seyoni, mfumeli wa Vaamori, awule a nga fuma Hesibhoni, awu a nga khoziswa ngu Mosi, kumweko ni vathangeli va Midhiyani, Evhi, Rekemi, Zuri, Huri, ni Rebha, vathangeli va Seyoni, va nga ti akile kona ditikonimo. 22Nene Bhalamu, mwana Bheyori, awu i nga ti nyamsoro, vanana va ka Israyeli va mdate, ngu ditxhari, kumweko ni vale va nga dawa. 23Ngu toneto, muhingano wa ditiko da vanana va ka Rubheni, i ti mnambo wa Jordhani. Eyo ngu yona thomba ya vanana va ka Rubheni, ngu timwaya tawe, ni madhoropa a kona ni miti ya kona.
Makhalo a lihunzu la ka Gadhi
24Se Mosi a to ninga ka lihunzu la ka Gadhi, thomba yawe, madingano ni timwaya tawe. 25Ditiko da kona i Jazeri, ni madhoropa otshe a Gileyadhi, hafu ya ditiko da vanana va ka Amoni, kala Aroweri, masoni ka Rabha, 26ni kukhukhela Hesibhoni kala Ramati-Misipa ni Bhetomima; ni kukhukhela Mahanayime kala ditikoni ka mihinganoni ka Dhebhiri; 27ni mkova wa Bheti-Aramu, Bheti-Nimra, ni Sukote, ni Safoni, avale va nga sala ka mfumo wa Seyoni, mfumeli wa Hesibhoni, se Jordhani i ti muhingano wawe, kala magwito ka Linene la Kineroti, mtxhatuko ka Jordhani ngu wutxani. 28Eyo ngu yona thomba ya vanana va ka Gadhi, ngu mtengo wa timwaya tawe, ni madhoropa a kona ni miti ya kona.
Makhalo a lihunzu la va ka Manasi, a Wutxani
29Mosi a ningete kambe thomba ka hafu ya lihunzu la ka Manasi, yi nga salela hafu ya vanana va ka Manasi, lihunzu lawe, madingano ni timwaya tawe; 30mhingano wawe wu ti khukhela Mahanayime, kotshe Bhasani, ditiko dotshe da Oge, mfumeli wa Bhasani, otshe madhoropa a Jayiri ale ma ku Bhasani, i ti mtxhanu wa magumi ni dimwedo a madhoropa. 31Hafu ya Gileyadhi, ni Asterote, ni Edreyi, madhoropa a mfumo Oge wa Bhasani, ma ningetwe ka vanana va ka Makira, mwana Manasi, a ti ti wombwako ku ma ningetwe ka hafu ya vanana va ka Makira, madingano ni timwaya tawe.
32Atiya ngu tona tithomba ti Mosi a nga abanisela tibalani ka Mowabhi, mtxhatuko ka Jordhani, masoni ka Jeriko ngu diphambo da wutxani. 33Kambe lihunzu la ka Levhi, Mosi kha nga li ninga thomba; nguko Mkoma, Txizimu txa ka Israyeli ngene i kuthomba yawe, nga ti va nga va gelisa tona.
Currently Selected:
Joxuwa 13: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.