Joxuwa 6
6
Kuxulwa ka didhoropa da Jeriko
1Ngu toneto, matimba a Jeriko ma ti ti sekilwe me khotwa, ngu mhaka ya kuthava vanana va ka Israyeli; ni wammweyo a ti si humi hambi kuwulela.
2Sekoko Mkoma a to khene ka Joxuwa:
“Wona! Ni ningete manzani kwako didhoropa da Jeriko, mfumeli wa dona, ni vavamna va dona, va tindena ta mtamo. 3Anu koko, motshenu vavamna va yimbi, mi na tenderukela didhoropa, mi txi randela didhoropa kumweko ngu ditshiku; mi na maha eto mndani ka mtxhanu wa masiku ni dimwedo. 4Se mtxhanu wa vaphaxeli ni vambidi va na teka mtxhanu wa titshodi ni timbidi, ta titxheho ta tihamba, va txi thangela masoni ka dibhokiso, se ka ditshiku da wutxhanu ni mambidi, mi na tenderuka didhoropa mtxhanu wa sikhati ni simbidi; se vaphaxeli va na veta titshodi. 5Se ku na maheka taku, ku txi vetwa ngu kulaphisa tshodi ya litxheho la hamba, na mi txi pfa diguwa da tshodi, votshe vathu va na kwangula ngutu; diguma da didhoropa di na wa hahatshi, se vathu va na wulela ka dona, mmwani ni mmwani ngu kona hale a nga rendekela kona.”
6Sekoko Joxuwa, mwana Nune, a to dhana vaphaxeli, a txi va gela tiya:
“Rwalani dibhokiso da txitumelelano; mtxhanu wa vaphaxeli ni vambidi, va na teke mtxhanu wa titshodi ni timbidi ta titxheho ta tihamba, va txi thangela masoni ka dibhokiso da Mkoma.”
7Se a to khene ka vathu:
“Tsulani mi txi ya tenderukela didhoropa; se awule a nga xoma a na thangele masoni ka dibhokiso da Mkoma.”
8Se ku to mahwa nga ti Joxuwa a nga wombisa tona ka vathu, taku mtxhanu wa vaphaxeli ni vambidi, va ngadi tekile mtxhanu wa titshodi ni timbidi ta titxheho ta tihamba, masoni ka Mkoma, va to pinda va txi veta titshodi; se dibhokiso da txitumelelano txa Mkoma di txi va londetela. 9Se avale va nga ti xomile, va ti ti masoni ka vaphaxeli vale va nga txi veta titshodi; se vale va nga txi londetela ngu msana ka dibhokiso, va txi tsimbila, na va txi veta titshodi. 10Aniko Joxuwa a ti ti ningile txileleto ka vathu, a txi khene: Mi nga kwanguleni, hambi kupfalisa mapswi anu, kambe ku nga hume dipswi ni da dimwedo ngu sisofuni kwanu, kala ka ditshiku di ani ni no khani: “Kwangulani! Sekoko mi na kwangula.” 11Se a to maha ti to dibhokiso da Mkoma di horoloka didhoropa, di txi di tenderuka txikhati tximwetxo; se va to wuya wugoveloni, va txi ta otela kona.
12Msana keto, Joxuwa a to wuka ni mabimbi-kutxa, se vaphaxeli va to rwala dibhokiso da Mkona. 13Se vaphaxeli vale va mtxhanu ni vambidi, va nga ti tekile mtxhanu wa titshodi ni timbidi ta titxheho ta tihamba, masoni ka dibhokiso da Mkoma, va txi tsimbila na va txi veta titshodi; se avale va nga ti xomile, va ti thangete masoni kwawe, se avale va nga txi londeta va txi tsimbila ngu msana ka dibhokiso da Mkoma; vaphaxeli va txi tsimbila na va txi veta titshodi. 14Ngu kumaha keto, va to tenderuka kambe didhoropa, ngu ditshiku da wumbidi, va txi tshumelela wugoveloni; va to maha toneto mtxhanu wa masiku ni dimwedo.
15Se ku to maheka taku, ka ditshiku da wutxhanu ni mambidi, ve phindula ngu kugwimba ka wuronga, se ngu kufana ni toneto, va to tenderuka didhoropa mtxhanu wa sikhati ni simbidi; ka dona ditshiku edo dwe, va to tenderuka didhoropa mtxhanu wa sikhati ni simbidi. 16Se ku to maheka taku, mbimo yile vaphaxeli va nga txi veta titshodi, ka txikhati txa wutxhanu ni simbidi, Joxuwa a to khene ka vathu:
“Kwangulani! Nguko Mkoma a mi ningile didhoropa!” 17“Didhoropa di na ruketelwa masoni ka Mkoma, dona ni sotshe si si ku ka dona; Rahabhi, awu wa digelegele, ngene ekha a no hanya, ene kumweko ni votshe vale va no maneka va diho nyumbani, nguko a sisile tixoli tile hi nga ti ruma. 18Aniko anu ti woneleni ka so yila, kasi ku mi si ti nyenyezisi ngu ku si teka, se mi txi tisa dikhombo wugoveloni ka Israyeli, ku txi ta fuviswa. 19Aniko yotshe silivhela, ni nzalama, ni siya sa txikete ni sa simbi, si lumba Mkoma; si na maha thomba ya Mkoma.”
20Vathu koko va to kwangula, na vaphaxeli va txi veta titshodi; se ku to maheka taku, mbimo yile vathu va nga pfa kutuma ka titshodi, va to kwangula ngu kukwangula ka hombe; se diguma di to wa hahatshi, vathu ve wulela didhoropani, mmwani ni mmwani ngu ha a nga ti rendekete kona, va to teka didhoropa. 21Se va to lovisa ngu ditxhari sotshe si si nga ti ti ho didhoropani, kukhukhela ka wamwamna, wamsikati, mfana, txikosana, tihomu, sifuyo sa sidotho, ni timbongola.
22Aniko Joxuwa a to womba ka vavamna vale vavambidi va nga ya xola ditiko, a txi khene: “Wulelani nyumbani ka wamsikati wule wa digelegele, mi txi ya humisa wule wamsikati, ni sotshe si a ku naso, nga ha mi nga xambanya kwakwe.”
23Sekoko majaha ale a sinyengwani,#6:23 Mwendo tixoli. ma to wulela ma txi ya humisa Rahabhi, ni tate wakwe, ni mame wakwe, ni vanawe, ni sotshe si a nga ti ti naso; va to humisa ni otshe maxaka akwe, va txi ya ma veka hahanze ka wugovelo wa ka Israyeli. 24Se va to hisa didhoropa ngu mndilo, ni sotshe si si nga ti ti ho ka dona, hahanze ka silivhela dwe, ni nzalama, ni siya sa txikete, ni sa simbi, va to si ningela si maha thomba Nyumbani ka Mkoma. 25Ngu kumaha keto, Joxuwa a to hulukisa Rahabhi, wule wa digelegele, ni va nyumba ya tate wakwe, ni sotshe sile a nga ti ti naso; se Rahabhi a to aka hagari ka va ka Israyeli, kala ka ditshiku da nyamsi, nguko a nga sisa sinyengwani#6:25 Mwendo tixoli. sile Joxuwa a nga ti si rumile kuya xola Jeriko.
26 # Wona ni ka: 1 Vafu. 16:34. Se ka yona yile mbimo, Joxuwa a to xambanya, a txi khene:
“A na ruketelwe masoni ka Mkoma,
m'thu wu a no aketa didhoropa diya da Jeriko!
A txi aka makhato a didhoropa,
a na felwa ngu matiwula akwe,
Mbimo yi ku no vekelwa matimba,
a na felwa ngu mwanana wakwe wa tshole.”
27 Mkoma a ti ti kumweko ni Joxuwa; se nduma yakwe yi ti ti hangalaka ka dotshe ditiko.
Currently Selected:
Joxuwa 6: BEC2016
Highlight
Copy
Compare
Share
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.