Levhi 16
16
Ditshiku da kudivalelwa
1Se Mkoma a to womba-womba ka Mosi, msana ka kuva va di fite vanana vambidi va Aroni, mbimo yi va nga tshuketa masoni ka Mkoma, va txi fa. 2#Wona ni ka: Vaheb. 6:19. Mkoma koko a to khene ka Mosi: Gela Aroni mwananu asi wuleli ni ka txihi txikhati amu ka wukhalo wo sawuleka, asi pindi m'jiyo, awu wu hambanisako madhawa a mambidi a wukhalo wo sawuleka, masoni ka txikhalo txa wuxinji txi manekako txitimwi ka mtundu, kasi asi manwi ngu phango ya kufa, nguko ni na ti humelelisa ngu direfu txitimwi ka txikhalo txa wuxinji.
3 # Wona ni ka: Vaheb. 9:7. Aroni a fanete kuwulela ka wukhalo wo sawuleka, ngako a di ni dirole da mhamba yo kuwula txionho, ni hamba yo hiswa. 4Kukhata a na ambala dibhaji do sawuleka da linyu, ni txibhulukwana txa linyu, e ti sunga txiwununi ngu libhande la linyu, ni txigoko txa linyu: Asiya nziambalo so sawuleka; ngu toneto, a na samba mmidi wakwe ngu mati, a txi si ambala.
5Se ka msengeletano wa vanana va ka Israyeli, u na teka vamabhongwe vambidi, kasi kumaha mhamba yo kuwula txionho, ni hamba yimweyo ya mningelo wo hiswa. 6Msana keto, Aroni a na ningela dirole da matune, da mningelo wu wo divalela sionho sakwe; kambe a na maha ngu mhaka ya sionho sakwe, ni sa ngamu yakwe. 7Se a na teka vamabhongwe vambidi e va tisa ka Mkoma ha txikeni ka ditenda da msengeletano. 8Se Aroni a na xaxuva tixolo ngu vamabhongwe vambidi, kasi kuziva wu a lumbako Mkoma ni wu a lumbako Azazeli. 9Sekoko Aroni a na ningela ka Mkoma mabhongwe wu xolo yi nga komba ene, e maha mningelo wa mhamba yo divalela txionho. 10Aniko mabhongwe wule xolo yi nga komba taku mabhongwe wa Azazeli, a na mtisa masoni ka Mkoma a txi hanya, kasi ku e maha ngene mningelo wa mhamba yo divalela txionho, se e mrumela mabhongwe wule ka Azazeli, txiwulani.
11Se Aroni a na ningela dirole da mhamba yo divalela txionho, yo lumba ene apune, ni txa ngamu yakwe; e di daya dirole da mningelo wo hiswa. 12Kambe a na teka txo hisa ka txona dibaselo, txo tala ni makala a mndilo, o huma ka txiluvelo txi txi ku masoni ka Mkoma, ni manza akwe ma di tate ngu dibaselo do kuywa, do bhumula, e di wuleta amu ka m'jiyo. 13Se a na thela dibaselo txitimwi ka makala a mndilo, masoni ka Mkoma, wutshi wa dibaselo, wu na fanengeta txikhalo txa Wufakazi, kasiku Aroni asi fi.
14Se a na beta litiho amu ka mnoha wa dirole, e xwayela ngu wona txitimwi ka mtundu, ngu didhawa da wutxani, e xwayela kambe sikhati sa mtxhanu ni simbidi, ngu masoni ka txikhalo txa wuxinji.
15 # Wona ni ka: Vaheb. 9:13. Msana keto, a na daya mabhongwe wu a nga mahwa mningelo ngu vathu, kasi kumaha mhamba yo divalela txionho, e teka mnoha wa kona e wu tisa mndani ka nguwo a txi maha tonti a nga maha ngu mnoha wa dirole, e xwayela ngu wona masoni ka txifenengeto txa mtundu ni txitimwi ka wona.
16Ngu toneto, a na maha mhamba yo basisa wukhalo wo sawuleka, awu wu nga nyenyeziswa ngu wubihi, ni sihambunyeto, ni sionho sa vanana va ka Israyeli; a na maha kambe toneto ngu ditenda da msengeletano, adi di ku ngu hagari ka vathu vo mbi lulama.
17Ni wammweyo a nga maneka amu ka ditenda da msengeletano, mbimo yi Aroni a wulelako amu ka wukhalo wo sawuleka, kasiku e maha mhamba yo divalela txionho ene apune, ni txa ngamu yakwe, ni wotshe msengeletano wa va ka Israyeli. 18Ngako a di humile, a na ya ka txiluvelo txi txi ku masoni ka Mkoma, a di ni mnoha wa dirole ni wa mabhongwe, e xwayela ngu wona titshokata madhawani ka txiluvelo. 19A na xwayela ngu mnoha mtxhanu wa sikhati ni simbidi ha txiluveloni, e txi basisa ni ku txi sawulekisa ka wubihi wa va ka Israyeli.
20Msana ka kuva Aroni a di mahile mphaxo wa kubasisa wukhalo wo sawuleka, ni ditenda da msengeletano, ni txiluvelo, sekoko a na tisa mabhongwe wo hanya. 21Se Aroni a na sanzeka manza ha msungo ka mabhongwe wo hanya, se e ti tshanza ngu wotshe wubihi wa vanana va ka Israyeli, ni wotshe wuhambunyeti wawe, madingano ni sotshe sionho sawe; a na si veka txitimwi ka msungo wa mabhongwe, a txi m'heleketa txiwulani, ngu dianza da m'thu wu a nga emiselwa kumaha toneto. 22Ngu toneto, mabhongwe wule a na rwala kotshe kubiha kwawe, e tsula nako txiwulani.
23 # Wona ni ka: Eze. 44:19. Msana keto, Aroni a na wulela amu ka ditenda da msengeletano, e ambula syambalo sakwe sa linyo sa wuphaxeli, a nga ti ambate kuwulelani kwakwe ka wukhalo wo sawuleka, a txi si veka konamo. 24A na samba mmidi ngu mati a di ha wukhaloni ko sawuleka, e ambala syambalo sakwe a txi huma. Se e maha mningelo wa mhamba yo hiswa ngu wutumbu wakwe apune ni wa vathu, a txi maha mhamba yo divalela txionho, ene ni vathu votshe. 25Ngu kugwita a na hisa ha txiluveloni, mafura a sihari si si nga mahwa mningelo wa mhamba yo basisa txionho.
26Se awule a nga heleketa mabhongwe (i ku mabhongwe wo tsiveta), a na kuwula syambalo sakwe, e samba mmidi wakwe matini, se ngu kona a no wulela wugoveloni.
27 # Wona ni ka: Vaheb. 13:11. Aniko dirole ni mabhongwe, sa mningelo wa kuthavisa sionho, asile mnoha wa sona wu nga tiswa kasi kubasisa wukhalo wo sawuleka, si fanete kuyiswa hahanze ka wugovelo; si txi ya hiswa kona, i ku didhowo, nyama, ni masembe a kona. 28Awule a nga ya si hisa, a na kuwula syambalo sakwe, e samba mmidi ngu mati, se ngu kona a no wulela wugoveloni.
Txialakanyiso txa ditshiku da kudivalelwa
(Valevhi 23:26-32)
29Awuwa mlayo ngu wu anu mi no wu vekisa ka yotshe mbimo. Ka ditshiku da wugumi, ka mtxima wa wutxhanu ni yimbidi, mi fanete mi txi va ni masaluko o ti dilela sionho sanu, anu ni valuveli vanu, avale va hanyako kumweko ni nanu, kambe mi nga nõleni mthumo ni wawumwewo. 30Nguko, ka donedo ditshiku, ku na mahwa mhamba yo divalela sionho sanu, kasi mi txi basiswa, ka sotshe sionho sanu, masoni ka Mkoma.
31I Sabbata ya kuhumula kwanu, kambe mi na xanisa mihefemulo yanu; atxiya njileleto txa kwa mbi gwita. 32Se mphaxeli wu a no totwa, ni kusawulwa kasi kumaha mphaxo wukhaloni ka tate wakwe, a na maha mphaxo wa kuthavisa sionho, na a ti ambate syambalo sa linyu, i ku syambalo so sawuleka, 33ngu kumaha keto, a na thavisa sionho ka wukhalo wo sawuleka; kambe a na thavisa sionho ka ditenda da msengeletano, ni ha txiluveloni; ngu kufana nito, a na thavisa sionho sa vaphaxeli, ni votshe vathu va msengeletano.
34 # Wona ni ka: Levh. 23:26-32; Mith. 29:7-11. Se atxiya i nava txileleto txo mbi gwita, kasi kuthavisa sionho sa vanana va ka Israyeli, ka sotshe sionho sawe, kumweko ngu dilembe. Se Aroni a to mahisa tona ti Mkoma a nga rumisa tona ka Mosi.
Currently Selected:
Levhi 16: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.