Levhi 22
22
Kusawulekiswa ka miningelo
1Msana keto, Mkoma a to womba-womba ka Mosi, a txi khene: 2Gela Aroni ni vanana vakwe, ti to ve tsule kule ni simaha so sawuleka sa vanana va ka Israyeli, ava va ni sawulekisako, kasiku va si nyenyezisi ditina dangu do sawuleka: Ani ngani Mkoma! 3Va gele u txi khawe: Kukhukhela ka kuwa, m'thu wule i ku wa lihunzu lanu ni wa liveleko lanu, awu a tshuketako hafuhi ka simaha so sawuleka, asi va ka Israyeli va nga si lulamisa, va txi si tisa kwangu, na a sa basa eyo m'thu a na fuviswa hagari kwanu. Ani ngani Mkoma!
4Ni wammweyo wa lihunzu la Aroni, a nga tshapelwa ngu tshekela mwendo a nga mana txikanzameti, kha na kudya simaha so sawuleka na a sanzi ku ti basisa. Ngu toneto, kambe ti mahekako ka wule a gwesako txirumbi, mwendo awule mnoha wa liveleko wu nga huma, 5ka wule a gwesako txihari txo tsimbila ngu dibindi e maneka a di nyenyezisilwe, ka wule a gwesako m'thu wo mbi basa, e maneka a di totetwe nzambwa, hambi i di wuhi ni wuhi. 6Awule a nga gwesa simaha siya, a fanete e zumba a txi yila kala ni minova, asi dyi sile so katekiswa, kala kuza e samba mmidi ngu mati. 7Ngu msana ka kuswa ka ditambo ngu kona a no va ni fanelo ya kudya so sawuleka, nguko nzakudya sakwe. 8A nga thuke a txi dya nyama ya txihari txo ti fela txokha, hambi txo dawa ngu sihari sa txitinga, nguko a nga nyenyeziswa nene: Ani ngani Mkoma!
9Vaphaxeli va na vekisa sirumo sangu, va si maheteli sionho, ve maneka va txi nyenyezisa sakudya sangu, se va txi dawa ngu kuva va di ndakile milayo. Ani ngani Mkoma, awu a va sawulekisako.
10Awule i singako wa m'tini ka mphaxeli, a nga thuke a txidya so katekiswa; mwendo mpfhumba wakwe, hambi txithumi txakwe txi a txi holelako, va nga silo so katekiswa. 11Aniko ngako mphaxeli a di xavile m'thu ngu male yakwe; mwendo wu a nga velekwa mu nyumbani kwakwe ngu txithumi txakwe; va sikota kuva txi dya sakudya sakwe.
12Se ngako mwanana wa dihorana wa mphaxeli, a txi tekana ni wamwamna wa mamwani matiko, a ngadye si si nga mahelwa kuva i di sa mningelo wa mhamba. 13Aniko mwanana wa dihorana wa mphaxeli, awule i ku noni mwendo a nga ya tutumiswa wukati, asi nga ni mwanana, a txi wuyela nyumbani ka tate wakwe eya zumba kona, kufana ni mbimo ya wuphyani kwakwe, a na dya sakudya sa tate wakwe; aniko ni wammweyo wa matiko kha na mbi dya.
14Ngako m'thu wokari, a txi thuka a txi dya so katekiswa ngu kulunduma, a na si tshumetela ka mphaxeli, ngu mtengo wa sona, aniko a na si engetela ngu simwani sa wutxhanu. 15Vaphaxeli va nga thuke va txi leka vathu, va txi bihisa so katekiswa, asile vanana va ka Israyeli va si mahako mningelo wa mhamba ka Mkoma. 16Ngako vaphaxeli va txi tumetisa vamwani vathu va txidya sa mningelo wa mhamba, vona vathuvo va na rwala txionho txi txi ku ni fanelo yo dihelwa: Ani ngani Mkoma, ni sawulekisako.
Milayo madingano ni sihari si si ningelwako kumaha mphaxo
17 Mkoma a wombile ka Mosi, a txi khene: 18Gela Aroni ni vanana vakwe ni votshe vanana va ka Israyeli, ku khawe:
Wuhi ni wuhi m'thu wa ka Israyeli, mwendo ngu wule i ku mluveli, a nga aka ditikoni ka va Israyeli, awule a lavako kumaha mningelo wakwe wa mhamba, kasiku e tatisa txixambanyo txakwe, mwendo mningelo wa kumaha ngu kuranda kwakwe, ngako a txi maha mningelo wa mhamba yo hiswa ka Mkoma, 19kasiku mhamba yi txi amukelwa, a fanete kuningela txifuyo txa matune, txo mbi limala, txa mu ka mtxhambi wa tihomu, mwendo wa tinvuta, mwendo wa tiphongo. 20Mi nga thuke mi txi ningela txihari txi txi ku ni wulima, nguko Mkoma kha na mbi wu amukela mningelowo. 21Awule a lavako kumaha mningelo ka Mkoma, wa mhamba ya kuthutha, ngu txifuyo txa hombe mwendo txa txidotho, kasi kutatisa txithembiso txakwe, mwendo mhamba ya kuranda kwakwe, a fanete kuningela txifuyo txo hetiseka, txo mbi na wulima. 22Mi nga maheni mningelo ka Mkoma ngu txihari txi i ku dibhofu, txo limala, txo wilwa txihango, txa magwagwarimba, txa txigwere, mwendo txibawa, kambe mi nga maheni mningelo wo hiswa ka Mkoma, ha txiluveloni. 23Kambe homu mwendo txifuyo txatxidotho, txo lapha mwendo txo koma, wa sikota ku txi maha mningelo ngu kuranda kwako, aniko ngu kuxambanya kha wu na mbi tumeleka. 24Mi nga maheni mningelo ka Mkoma, ngu txihari txo thenwa ngu kuphwaraselwa, mwendo kusukwa, mwendo kuthaviswa, mwendo kuwilwa; ditikoni kwanu, mi nga maheni mhaka yo nga eyo. 25Kambe mi nga tumeleni kuningela so dyiwa sokari ngu manzani ka valuveli vanu, ka Mkoma, nguko sihono siyo so maha kubiha, se ene kha na ku mi tumelela, hi nga sa sinene.
26 Mkoma a wombile kambe ka Mosi, a txi khene:
27Ngako ku txi velekwa dirole, mwendo txinvutana, mwendo txihongwana, txi fanete kuzumba ni mame wa txona amu ka mtxhanu wa masiku ni mambidi. Kukhukhela ka ditshiku da wutxhanu ni mararu, ta koteka kumaha mningelo wa mhamba ngu sona ka Mkoma. 28Aniko mi nga sikoteni kudaya ka ditshiku dimwedo txifuyo, mwendo ni mwanana wa txona, hambi i di homu mwendo nvuta. 29Ngako mi txi lava kumaha mningelo wa mhamba yo bonga ka Mkoma, mahani ngu nzila yo lulama, kasiku yi txi amukeleka. 30Mi fanete kudya nyama ya kona, ka donedo ditshiku, mi si siyeti txilo, kala mangwanani ka kona: Ani ngani Mkoma!
31Vekisani sirumo sangu mi si xayisa: Ani ngani Mkoma! 32Mi nga nyenyeziseni ditina dangu do sawuleka; kasiku ani ni txi dhumiswa hagari ka vanana va ka Israyeli: Ani ngani Mkoma, ni mahako ti to anu mi va vathu vo sawuleka. 33Nguko ani ni mi humisile ditikoni ka Egipta, kasiku ni va ni di Txizimu txanu. Ani ngani Mkoma!
Currently Selected:
Levhi 22: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
Levhi 22
22
Kusawulekiswa ka miningelo
1Msana keto, Mkoma a to womba-womba ka Mosi, a txi khene: 2Gela Aroni ni vanana vakwe, ti to ve tsule kule ni simaha so sawuleka sa vanana va ka Israyeli, ava va ni sawulekisako, kasiku va si nyenyezisi ditina dangu do sawuleka: Ani ngani Mkoma! 3Va gele u txi khawe: Kukhukhela ka kuwa, m'thu wule i ku wa lihunzu lanu ni wa liveleko lanu, awu a tshuketako hafuhi ka simaha so sawuleka, asi va ka Israyeli va nga si lulamisa, va txi si tisa kwangu, na a sa basa eyo m'thu a na fuviswa hagari kwanu. Ani ngani Mkoma!
4Ni wammweyo wa lihunzu la Aroni, a nga tshapelwa ngu tshekela mwendo a nga mana txikanzameti, kha na kudya simaha so sawuleka na a sanzi ku ti basisa. Ngu toneto, kambe ti mahekako ka wule a gwesako txirumbi, mwendo awule mnoha wa liveleko wu nga huma, 5ka wule a gwesako txihari txo tsimbila ngu dibindi e maneka a di nyenyezisilwe, ka wule a gwesako m'thu wo mbi basa, e maneka a di totetwe nzambwa, hambi i di wuhi ni wuhi. 6Awule a nga gwesa simaha siya, a fanete e zumba a txi yila kala ni minova, asi dyi sile so katekiswa, kala kuza e samba mmidi ngu mati. 7Ngu msana ka kuswa ka ditambo ngu kona a no va ni fanelo ya kudya so sawuleka, nguko nzakudya sakwe. 8A nga thuke a txi dya nyama ya txihari txo ti fela txokha, hambi txo dawa ngu sihari sa txitinga, nguko a nga nyenyeziswa nene: Ani ngani Mkoma!
9Vaphaxeli va na vekisa sirumo sangu, va si maheteli sionho, ve maneka va txi nyenyezisa sakudya sangu, se va txi dawa ngu kuva va di ndakile milayo. Ani ngani Mkoma, awu a va sawulekisako.
10Awule i singako wa m'tini ka mphaxeli, a nga thuke a txidya so katekiswa; mwendo mpfhumba wakwe, hambi txithumi txakwe txi a txi holelako, va nga silo so katekiswa. 11Aniko ngako mphaxeli a di xavile m'thu ngu male yakwe; mwendo wu a nga velekwa mu nyumbani kwakwe ngu txithumi txakwe; va sikota kuva txi dya sakudya sakwe.
12Se ngako mwanana wa dihorana wa mphaxeli, a txi tekana ni wamwamna wa mamwani matiko, a ngadye si si nga mahelwa kuva i di sa mningelo wa mhamba. 13Aniko mwanana wa dihorana wa mphaxeli, awule i ku noni mwendo a nga ya tutumiswa wukati, asi nga ni mwanana, a txi wuyela nyumbani ka tate wakwe eya zumba kona, kufana ni mbimo ya wuphyani kwakwe, a na dya sakudya sa tate wakwe; aniko ni wammweyo wa matiko kha na mbi dya.
14Ngako m'thu wokari, a txi thuka a txi dya so katekiswa ngu kulunduma, a na si tshumetela ka mphaxeli, ngu mtengo wa sona, aniko a na si engetela ngu simwani sa wutxhanu. 15Vaphaxeli va nga thuke va txi leka vathu, va txi bihisa so katekiswa, asile vanana va ka Israyeli va si mahako mningelo wa mhamba ka Mkoma. 16Ngako vaphaxeli va txi tumetisa vamwani vathu va txidya sa mningelo wa mhamba, vona vathuvo va na rwala txionho txi txi ku ni fanelo yo dihelwa: Ani ngani Mkoma, ni sawulekisako.
Milayo madingano ni sihari si si ningelwako kumaha mphaxo
17 Mkoma a wombile ka Mosi, a txi khene: 18Gela Aroni ni vanana vakwe ni votshe vanana va ka Israyeli, ku khawe:
Wuhi ni wuhi m'thu wa ka Israyeli, mwendo ngu wule i ku mluveli, a nga aka ditikoni ka va Israyeli, awule a lavako kumaha mningelo wakwe wa mhamba, kasiku e tatisa txixambanyo txakwe, mwendo mningelo wa kumaha ngu kuranda kwakwe, ngako a txi maha mningelo wa mhamba yo hiswa ka Mkoma, 19kasiku mhamba yi txi amukelwa, a fanete kuningela txifuyo txa matune, txo mbi limala, txa mu ka mtxhambi wa tihomu, mwendo wa tinvuta, mwendo wa tiphongo. 20Mi nga thuke mi txi ningela txihari txi txi ku ni wulima, nguko Mkoma kha na mbi wu amukela mningelowo. 21Awule a lavako kumaha mningelo ka Mkoma, wa mhamba ya kuthutha, ngu txifuyo txa hombe mwendo txa txidotho, kasi kutatisa txithembiso txakwe, mwendo mhamba ya kuranda kwakwe, a fanete kuningela txifuyo txo hetiseka, txo mbi na wulima. 22Mi nga maheni mningelo ka Mkoma ngu txihari txi i ku dibhofu, txo limala, txo wilwa txihango, txa magwagwarimba, txa txigwere, mwendo txibawa, kambe mi nga maheni mningelo wo hiswa ka Mkoma, ha txiluveloni. 23Kambe homu mwendo txifuyo txatxidotho, txo lapha mwendo txo koma, wa sikota ku txi maha mningelo ngu kuranda kwako, aniko ngu kuxambanya kha wu na mbi tumeleka. 24Mi nga maheni mningelo ka Mkoma, ngu txihari txo thenwa ngu kuphwaraselwa, mwendo kusukwa, mwendo kuthaviswa, mwendo kuwilwa; ditikoni kwanu, mi nga maheni mhaka yo nga eyo. 25Kambe mi nga tumeleni kuningela so dyiwa sokari ngu manzani ka valuveli vanu, ka Mkoma, nguko sihono siyo so maha kubiha, se ene kha na ku mi tumelela, hi nga sa sinene.
26 Mkoma a wombile kambe ka Mosi, a txi khene:
27Ngako ku txi velekwa dirole, mwendo txinvutana, mwendo txihongwana, txi fanete kuzumba ni mame wa txona amu ka mtxhanu wa masiku ni mambidi. Kukhukhela ka ditshiku da wutxhanu ni mararu, ta koteka kumaha mningelo wa mhamba ngu sona ka Mkoma. 28Aniko mi nga sikoteni kudaya ka ditshiku dimwedo txifuyo, mwendo ni mwanana wa txona, hambi i di homu mwendo nvuta. 29Ngako mi txi lava kumaha mningelo wa mhamba yo bonga ka Mkoma, mahani ngu nzila yo lulama, kasiku yi txi amukeleka. 30Mi fanete kudya nyama ya kona, ka donedo ditshiku, mi si siyeti txilo, kala mangwanani ka kona: Ani ngani Mkoma!
31Vekisani sirumo sangu mi si xayisa: Ani ngani Mkoma! 32Mi nga nyenyeziseni ditina dangu do sawuleka; kasiku ani ni txi dhumiswa hagari ka vanana va ka Israyeli: Ani ngani Mkoma, ni mahako ti to anu mi va vathu vo sawuleka. 33Nguko ani ni mi humisile ditikoni ka Egipta, kasiku ni va ni di Txizimu txanu. Ani ngani Mkoma!
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.