Levhi 25
25
Dilembe da wutxhanu ni mambidi
(Dhewuteronome 15:1-11)
1 Mkoma a to womba kambe ka Mosi, mmangoni ka Sinayi, a txi khene: 2Womba ka vanana va ka Israyeli u txi khawe:
Ngako mi txi wulela ka ditiko di ni mi ningako, mafu ma na xayisa Sabbata ya Mkoma. 3Amu ka mtxhanu wa malembe ni dimwedo, ngu kulondetelana ka ona, u na dima u phaya tithembweni kwako, u sanda mivhinya yako, se u elula mihando ya kona. 4Kambe ka dilembe da wutxhanu ni mambidi, ku nava ni Sabbata ya kuhumula ka mafu, Sabbata ya Mkoma; khu na mbi phaya thembweni kwako, hambi kusanda mivhinya yako. 5U nga elula asi si nga ti milela sipune si kula, hambi kusanda mivhinya yi yi nga ti milela yipune, yi kula ni kuveleka, nguko dilembe da kuhumuta mafu, kasi kudhumisa Mkoma. 6Edo dilembe, di na va do humuta mafu; aniko mihando yi yi no maneka yi di velekilwe amu tithembweni ka kona, mi na sikota ku yi dya: Awe ni dixonga dako, da wamwamna, ni da wamsikati, hambi ni txithumi; ni mluveli a nga aka kumweko ni nawe; 7sihari sako sa sifuyo ni sihari sa txitinga, asi si ku mu ditikoni kwako, si nga sikota kudya mihando ya mafu a tithembweni kwako, atile ti ku kuhumulani.
Dilembe da Kutxhatxheka
8U na bala mtxhanu wa mavhiki ni mambidi a malembe, i ku mtxhanu wa malembe ni mambidi a ku wuyeletwa mtxhanu ni kumbidi, se ku ma pata otshe ma dinganako mtengo wa mune wa magumi ni mtxhanu ni mune wa malembe. 9Sekoko ka ditshiku da digumi ka mtxhima wa wutxhanu ni yimbidi; i ku ditshiku da hombe da kudivalelwa ka sionho, u na ruma vahuweleli va txi veta mipundu ditikoni kotshe. 10Dilembe di di londetako, i ku da mtxhanu wa magumi, mi na di sawulekisa, mi txi huwelela kutxhatxheka ka vathu votshe va ditikoni; ndilembe da kutsaka kwanu, ndilembe da kutsaka ka hombe. Votshe va na va i di va nyamne va sile i ku sawe, ni kuva va txi tshumelela maxakani kwawe. 11Dilembe da mtxhanu wa magumi, di na va dilembe da kutsaka ka hombe, mi nga dimeni, mi nga phayeni, mi nga eluleni asi si nga ti milela sipune, hambi kuhapha mihando ya mindonga yile yi nga mbi sandelwa. 12Nguko dilembe diya, nda kutsaka ka hombe, ndo sawuleka; dyanani asi mafu ma nga si veleka.
13Nga ti ti nga wombwa, ka dilembe da kutska ka hombe, mmwani ni mmwani wa ka kwanu, a na tshumetelwa sile i ku sakwe. 14Ngako mi txi xavisa tximaha txokari ka mwakelani wanu, mwendo kuxava tximaha kwakwe, mi nga dyelelaneni. 15Mi fanete kuxava mwendo kuxavisa thembwe, madingano ni mtengo wa malembe a kuelula, ma nga sala. 16Ngako mtengo wa malembe awa ma nga sala i di wa hombe, u diha mtengo wa hombe; se ngako malembe awa ma nga sala i di amadotho, u na diha kudotho, nguko asi ene a ku xaviselako nza mtengo wa malembe a kuelula. 17Ngu toneto, kha mi na mbi dyelelana mmwani ni mmwani, mi na xonipha kunavela ka Txizimu; nguko ani ngani Mkoma, Txizimu txanu!
Mhaka ya Dilembe da Wutxhanu ni Mambidi
18Londetani sileleto sangu, mi vekisa silayelo sangu, mi txi si xayisa ngu kuthemba, kasiku mi na hanya mi di tsani amu ditikoni. 19Ditiko di na humisa mihando ya dona, nanu mi na va ni sakudya sasingi, mi txi hanya ka dona ditikodo, ngu kudikha. 20Ngako mi txi wotisa mi txi khanu: Hi na dya txani amu ka dilembe da wutxhanu ni mambidi, ngako hi si phayi, hi si eluli asile si no va si di velekilwe amu tithembweni kani? 21Zivani ti to ani ni na mi katekisa ka dilembe da wutxhanu ni dimwedo, ni mi ninga kupfuna ka si si no velekwa amu tithembeni kwanu, asi si enelako malembe mararu. 22Ka dilembe da wutxhanu ni mararu, mi na dima mi phaya, na mi txi dya asile mi nga elula kale; mi na ya masoni ngu kudya sa mawongwe, kala kuza mi txi elula amu ka dilembe da wutxhanu ni mune.
Milayo madingano ni tithomba
23Mi nga xaviseni thembwe da magwito, nguko mafu ma lumba ani, anu mi valuveli, mi vapfhumba ka ditiko di mi nga aka ka dona, i ku dangu. 24Ngu toneto, ka ditiko danu dotshe, ku fanete kuva ni nzila ya kutekisa thembwe.
25Ngako mmweyo wa va ka kwanu e thuka a txi wela wusiwanani, aha koza e xavisa thembwe yakwe, mmwani wa dixaka dakwe, awu i ku mxayisi wakwe, a fanete kuya tekisa thembweyo. 26Ngako asi nga ni wo mtekisela thembwe yoneyo, aniko e za a txi mana wutxhukwana ngu mtamo wakwe, 27a fanete kubala mtengo wa malembe ale ma nga pinda, msana ka kuva a di xavisile thembwe, se a na hakela aale ma nga sala, ka wule a nga xava thembwe, se ene wa sikota kuteka thembwe yakwe, e tshumelela ka yona. 28Ngako asi sikoti kumana mitamo ya wutxhukwana, thembwe yile a nga xavisa, yi na simana yi di mtamoni ka wule a nga xava kala ka Dilembe da kutsaka ka hombe. Se ngako Dilembe da kutsaka ka hombe di di hokile, nyamne wa thembwe a na teka thembwe, aha a no tshumelela ka yona.
29Ngako m'thu wokari a txi xavisa nyumba yi a zumbako ka yona, ayi yi ku didhoropani ko bhiywa, wa sikota ku yi tekisa mndani ka dona dilembedo a nga yi xavisa ngu dona; ngu mtamo wakwe, kasiku e yi tekisa, mbwa dilembe dimwedo dwe. 30Ngako nyumba yi yi nga xawa, yi di didhoropani ko bhiywa yi si tekiswi mndani ka mpimo wa dilembe, eyo nyumba yi na lumba wule a nga yi xava, ni situkulwana sakwe sotshe, hambi di txi hoka dilembe da kutsaka ka hombe. 31Aniko tinyumba ti ti ku amu mitini ko mbi bhiywa, ti fana ni tithembwe, ta koteka kutekiswa ka dilembe da kutsaka ka hombe.
32Ngu didhawa da Valevhi, ngako va txi xavisa tinyumba tawe na ti di didhoropani ko bhiywa, va na ni fanelo yo tekisa tinyumbeto ni ka txihi txikhati. 33Se ngako mmweyo wa va ka Levhi a di xavile nyumba, yile yi nga xaviswa amu didhoropani kwawe, nyumba yoneyo yi na va yi txi tekiswa amu ka dilembe da kutsaka ka hombe, nguko tinyumba ti ti ku madhoropani ka va Levhi, i thomba yawe kala kupinduka, hagari ka vanana va ka Israyeli. 34Ni tithembwe tile ti ku madhawani ka madhoropa awe, ti nga xaviswe, nguko ngu yona thomba ya va ka Levhi, kala kupinduka.
35Ngako m'thu wa ka kwanu i di txisiwana, asi sikoti kuthuma, mu amukele e hanya kumweko ni nawe. Maha toneto hambi ni ka wule i ku mluveli, mwendo mtsimbili amu ditikoni. 36U nga lave dibhindu, kambe u nga m'dyelele, aniko thava Txizimu txako, u na zumba nayo mwananu. 37U nga mlombe male yako kasiku u txi bhindula, kambe u nga mninge sakudya ngu ku mxavisela.
38Ani ngani Mkoma, Txizimu txanu, ni nga mi humisa ditikoni ka Egipta, kasi ku mi ninga ditiko da Kanana, ni va ni di Txizimu txanu.
Milayo madingano ni tikhumbi
39Ngako m'thu wa ka kwanu a txi wa amu ka wukulungu, a txi ta kwako, e ta ti xavisa, u nga mthumise mthumo wa wukhumbi. 40Mxayise kufana ni txithumi txo holelwa, mwendo mpfhumba wako; a na zumba a txi thuma ha m'tini kwako, kala ka Dilembe da Kutsaka ka hombe. 41Sekoko, ene ni vanana vakwe, va na khukha, ve tshumelela m'tini kwawe, va txi ya zumba tithembweni kwawe, tile i ngadi ta vatate vawe. 42Ngu toneto, vona nzithumi sangu, ani ni va thavisile ditikoni ka Egipta; va nga xaviswe, kufana ni kuxavisa ka tikhumbi. 43U nga va mahele tshofu, aniko xonipha Txizimu txako.
44Khumbi ya wamwamna mwendo ya wamsikati, ayile mi yi lavako kasi kuzumba nayo m'tini kwanu, mi fanete kuya yi xava ka matiko a vaakelani vanu. 45Ma sikota kuxava sithumi sa tikhumbi, hagari ka valuveli vanu, avale va nga aka kumweko ni nanu; evo va sikota kuva i di thomba yanu. 46Ma sikota ku va teka ve maha thomba ya vanana vanu; mi na sikota ku va thumisa nga tikhumbi; se Muisrayeli, i ku wa ka kwanu, mi nga sikoteni ku mthumisa ngu kunemela.
47Ngako mluveli wule a nga aka ditikoni kwanu, e maneka a txi humelela, se m'thu wa ka kwanu e maneka a di wusiwanani, ahale koza eya ti xavisa ka mluveli, mwendo ka mmwani wa dixaka dakwe, eva khumbi, 48msana ka kuva a di ti xavisile, wa sikota kutirulwa; mmweyo wa maxaka akwe, wa sikota ku mtirula; 49tatanyani wakwe mwendo mwanana wa tatanyani wakwe, hambi mmwani wa dixaka dakwe, wa sikota ku mtirula; aniko a txiza e mana mitamo, a nga ti tirula ene apune. 50Ene ni mxavi wakwe va na langana ve pimisa mtengo wa malembe ale ma nga pinda, kukhukhela ka mbimo yile a nga xawa ka yona, kala ka dilembe da kutsaka ka hombe, va txi pimisa mtengo wa male ya hakhelo, nga txithumi. 51Ngako ku di ngadi sate malembe amangi a na humisa male yi yi dinganako ona malembeyo, na ku txi balwa mtengo wa male a kudingana, ka yile a nga xawa ngu yona. 52Ngako ku di sate malembe amadotho, kuza ku txi hoka dilembe da kutsaka ka hombe, a na bala kumweko nayo, se a txi humisa male yo ti tirula ngu yona, ngu kudinganisa mtengo wa malembe. 53Mndani ka malembe ale a no va a di m'tini kwakwe, a fanete a txi xayisiswa ku nga txithumi txo holelwa; kha kulaveki e xaniswa kufana ni khumbi. 54Ngako asi tirulwi ngu nzila yiya, a na va a txi tekiswa ngu ka dilembe da kutsaka ka hombe, kumweko ni vanana vakwe.
55Nguko va ka Israyeli va lumba ani dwe, ndikhumbi tangu; nzithumi sangu, avale ni nga va humisa ditikoni ka Egipta. Ani ngani Mkoma, Txizimu txanu.
Currently Selected:
Levhi 25: BEC2016
Highlight
Share
Compare
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.