Luka 15

Txidinganiso txa nvuta yi yi nga mwalala

(Matewu 18:12-14)

1 # Wona ni ka: Luk. 5:29-30. Votshe vakhupisi ni vaonhi va ti tshuketela hafuhi ka Jesu, kasi ku ta mu engisa. 2Aniko Vafarisi ni Vabhali va ti ti ngungurukela va txi kha vona: “Mamowa wa amukela vawomhi, a txi dya navo.” 3Konaho ene a to va mahela txidinganiso txiya: 4“I mani hagari kwanu, awu a ku ni 100 da tinvuta, se a txi mwalalelwa ngu yimweyo, asi siyiko ti timwani ta mtxhanu wa magumi ni mune, ni mtxhanu wa tinvuta ni mune txiwulani, a txi londeta ayi yi nga mwalala, kala kuza a txi yi mana, kani? 5Se ngako a di yi mani, ngu litsako wa yi pakata, 6senikoko, mbimo yi a nga wuya m'tini wa ramba vangana vakwe ni vaakelani, a txi khene: ‘Tsakani kumweko ni nani nguko ni mani nvuta yangu, yi nga ti mwalate.’ 7Na mi gela ku khani, kufana ni toneto, nzumani ku nava ni litsako la hombe ngutu ngu mhaka ya muonhi mmweyo a nga hunduluka, kupinda litsako la kutsakela mtxhanu wa magumi ni mune ni mtxhanu ni mune wa vathu va kululama, va si faneliko kuhunduluka.”

Txidinganiso txa ditxheleni do mwalala

8“Mwendo ngu wuhi wamsikati aku, a di ni digumi da matxheleni a txi mwalalelwa ngu dimwedo, asi lumekiko dilambu, a txi hiyela nyumba, a txi rumarumela kala kuza e di mana kani? 9Se ngako a txi di mana, wa ramba vangana ni vaakelani va vasikati kulowe, a txi va gela ku khene: ‘Tsakani kumweko ni nani, nguko ni mani ditxheleni di di nga ti mwalate!’ 10Ani na mi gela ku khani, kufana ni toneto, ku na ni litsako la hombe masoni ka tingelozi ta Txizimu, ngu txionhi tximwetxo txi hundulukako.”

Txidinganiso txa mwanana wo mwalala e tshumela e manwa

11Jesu a va gete ku khene: “M'thu wokari a ti ni vanana vambidi va mazambi. 12Mnanda wa kona a tile ka tate wakwe a ta khene: ‘Tata, ni ninge txyavelo txa thomba, atxi txi ni lumbako.’ Se tate a va avete thomba votshe va vambidi. 13Msana ka masikuanyana madotho, awu wa mnanda a to pakela thundu yakwe, e khukha a txi tsula ka ditiko da kule, a txi ya hangalasela thomba yakwe, ngu kuhanyisa ku ambi ti pimela. 14Ngako a di hetile kudya sotshe, ku to humelela nzala ya hombe ditikoni mule, se ene a txi khata kupfa wusiwana. 15Ene a to tsula a txi ya kombela mthumo ka mmweyo wa vathu va ditiko dileya, awu a nga m'rumela tithembweni kwakwe, kasi kuya dyisa tikhumba. 16Ene a ti navela kukhura ngu makamba awa ma dyiwako ngu tikhumba, aniko a ti si nga ho ni mmweyo a nga txi mu ha.”

17“Se a di zumbile a txi ti alakanya, a to khene: ‘Nza singi sithumi sa tate wangu, si dyako, si txi sela, kuve ani na fa hawa ngu nzala. 18Ni na khukha ni tsula ka tata, ni txi ya mu gela ku khani: Tata, ni onhete nzuma ni masoni kwako. 19Kha ni swi ni di ni fanelo yo dhanwa ku ni mwanana wako. Ni amukele u txi ni pata kumweko ni sithumi sako.’ 20Se a to khukha, a txi tsula ka tate wakwe.” “Se ene a di ngadi kule, tate wakwe a to mu wona, a txi mu pfela wusiwana, a to tutuma a txi ya mu wukarela ngu mu ka thamo, a txi mu pswopswa. 21Mwanana a to khene: ‘Tata, ni onhete nzuma ni masoni kwako. Kha ni fanekelwi ngu kuwombwa ti to ni mwanana wako.’ 22Aniko tate a to gela sithumi sakwe a txi khene: ‘Kuluvetani mi neha syambalo so tshura ngutu, mi m'bombisa, mu ambekeni ringi litihoni kwakwe, mu ambekeni tikathula mikondoni kwakwe. 23Wuyisani dirole da kuena, di dayeni hi txi dya, hi maha msaho, 24nguko mwanana wu wangu, a nga ti fite, se a tshumete a txi hanya, a ti mwalate, se e tshumela e manwa.’ Se va to khata kubusa.”

25“Mwanana wakwe wa mkoma a ti ti thembweni. Se kuwuyani kwakwe, ngako a di hafuhi ni m'ti, a to pfa kuembelela ni sigingo sa kusinya. 26A di dhani mmweyo wa vale va sithumi, a to mu wotisa ku khene: ‘Atile nda txani!’ 27Ene a mgete ku khene: ‘I Mnanda wako a nga wuya, se tate wako a date dirole do nona, nguko a mu amukete a txi hanya kwati.’ ” 28Kambe ene a to henya ngutu, se asi lavi kuwulela. “Tate wakwe a to huma, a txi ya mkhongotela. 29Kambe ene a xamute ka tate wakwe, a txi khene: ‘Malembe amangi ni ku thumelako, kha ni zivi kundaka ni wumwewo ka milayo yako, kambe khu zivi ku nga ni ninga phongo ni txi busa ni vangana vangu. 30Aniko a wuyile mwanana wu wako, a nga xakela suma sako ni magelegele, se ene u m'dayete dirole do nona!’ 31Kambe tate a mu xamute ku khene: ‘Mwanangu, awe u zumba ni nani yotshe mbimo, sotshe si i ku sangu, nzako. 32Ti ni fanelo kubusa, hi txi tsaka nguko mnanda wu wako a ti fite, e tshumela a txi hanya; a ti mwalate, e tshumela a txi manwa!’ ”

Currently Selected:

Luka 15: BEC2016

Highlight

Copy